OBULI mwaka, esyombuli nyingyi sy’obughuli sikasubulha isyasubibwa omo kithunga ky’Ekikristayo. Thalengekania okwa ‘butseme bunene obukabya elhubulha’ obuli mbuli yikasubulha! (Lk. 15:7, 10) Wamabya iwabirisuba omo kithunga, wutholere iwaminya ngoku Yesu, abamalaika, na Yehova bakatsema bakalhangira wukathasyakwama ekwenene. Nomwabine, wukendibya wunemusuba-subania obughuma bwawu na Yehova, wangana bana ebitsibu. Ebighuma by’okw’ibyo by’ebyahi, kandi ni kyahi ekyanga kuwathikya?

Abangyi bakabya ibakinayowa nabi nibya ibabirisuba omwa kithunga. Obundi wukayitheghereraya eriyowa ly’Omwami Dawudi. Nibya n’enyuma w’erighanyirwa amalholho wiwe, mwabugha athi: “Ebibi byaghe byabirinyihikako.” (Esy. 40:12; 65:3) Omundu anganaghunza myaka mingyi inianemuyowa nabi kutse eriyowa ng’ahemukire nibya iniabirinasuba oku Yehova. Isabelle, mwaghunza emyaka eyilhabire oku 20 inianahighithirwe. * Mwabugha athi, “Mukyanyikalira kutsibu eriligha ngoku Yehova angananyighanyira.” Wamahwa amani, iwangana tseka bunyakirimu kandi. (Emi. 24:10) Isiwalighira ekyo erikubyako.

Abandi bakasagha bathi sibanga thoka erikolha ebyosi ebikayithaghisibawa erisuba-subania obunywani bwabu na Yehova. Antoine abere abirisuba oku Yehova, mwabugha athi: “Nabya inabiribirirwa obuli kindu ekihambire okwa ngebe yaghe ya kera ng’Omukristayo.” Busana n’eriyowa ng’eryo, abandi bangana sagha erisangira ndeke omwa mibiiri y’obunyakirimu.

Ng’eky’erileberyako, omundu amabya iniawithe enyumba yiwe ey’anzire kutsibu, neryo iyatsandibwa omo kiyagha kinene, inianganahwa amani akalengekania okwa buthuku n’akaghalha ebikayithaghisibawa  erithasyahimbayo. Kuthya, obughuma bwawu na Yehova bwamabya imubwatsanda busana n’erikolha erilholho erikalire, iwangana yowa wuthi erisuba-subania obunyakirimu bwawu kikendi yithagha akaghalha kanene kutsibu. Aliwe hane obuwathikya.

Yehova akathukokaya athi: “Mwase lino, thukanaye haghuma.” (Isa. 1:18) Wabirithahiraho akaghalha kanene eryuwania emyatsi. Yehova akw’anzire busana n’erihiraho akaghalha ako. Thakilengekaniako: Wabiriha Yehova ekyanga leka iniasubirya amabehi wa Sitani!​—Emi. 27:11.

Omw’ikolha eki, wabiriyithunda oku Yehova, nayu akalhaghanisaya eriyithunda hakuhi nawu. (Yak. 4:8) Aliwe, abandi erithaminya ngoku omundu abirisuba omo kithunga sikirighunza. Wutholere iwalholha embere erighumya olhwanzo olho wuwithire Yehova Thatha wawu kandi Munywani. Eki wanga kikolha wuthi?

Lengaho eriyihiriraho ebilhubirirwa ebya wanga thoka. Obundi wukin’ibukire ekwenene y’omusingyi eyo w’igha eyihambire oku Yehova n’emilhaghe yiwe ey’obuthuku obukasa. Aliwe wukayithagha erithasyasuba-subania engebe yawu ng’Omukristayo, nayu mwamuli erithulha engulhu yuwene n’eribya mughulhu wosi n’abalikyethu. Lengekanaya okwa bilhubirirwa bino.

Kanaya na Yehova mughulhu wosi. Thatha wawu anasi ngoku eribera eriyowa nabi lyanganaleka ikyakukalira erimusaba. (Abar. 8:26) Neryo, ‘yitsingirire omw’isaba,’ eribwira Yehova nga wanzire bungahi obunywani bwawu nayu. (Abar. 12:12) Andrej akibuka bino: “Iningayowa nabi kutsibu kandi ingayowa ingahemukire. Aliwe enyuma w’obuli saba, eriyowa eryo irikakeha. Munongera erithekana omo bulengekania.” Wamabya isiwasi ebyo wanga hira omo musabe, lebaya emisabe y’Omwami Dawudi oyuwayisubamo eyiri omwa Esyonyimbo 51 na 65.

Igha e Biblia mughulhu wosi. Eki kikendi kuwathikya bunyakirimu n’eryongera olhwanzo olhwa wuwithire Yehova. (Esy. 19:7-11) Felipe akabugha athi: “Erithendibya n’endegheka y’obunyakirimu ky’ekyaleka ingatseka n’erilhabirya Yehova ya hisi. Mundanza erikolha ekisobyo ekyo engendo yakabiri, neryo munathwamu erilhangira indi eriyeghesya bukabya butheya bwaghe.” Nawu wangana kolha ekiri ng’ekyo. Wamabya iwukayithagha obuwathikya bw’eriminya ebya wangayeghesyako ebitholere, busana naki iwuthasaba omunywani oyukulire bunyakirimu y’obuwathikya?

Suba-subanaya obunywani bwawu na balikyethu. Abandi abakasuba omo kithunga bakasagha bathi abandi bakendi bathunga kw’amalengekania awathatholere. Larissa akabugha athi: “Munahemuka kutsibu. Munayowa inabirighoberya ekithunga. Munaghunza buthuku ingane muyowa indya.” Wuminye ngoku abasyakulhu n’abandi abakulire bunyakirimu banzire kutsibu erikuwathikya wukasuba-subania obunyakirimu bwawu. (Lebaya akasanduko “ Abasyakulhu Banga Kolhaki?”) Batsemire eribya iwabirisubulha, kandi banzire iwatsema!​—Emi. 17:17.

Ni byahi ebyanga kuthunda hakuhi n’ekithunga? Sangira ndeke omwa bya balikyethu banemukolha—erihindana okwa mihindano n’erithulira mughulhu wosi. Eki kikendi wathikya kithi? Felix mwabugha athi: “Ekithunga kyabya ikinanyilindirire. Munayowa inganzibirwe. Abosi mubanyiwathikya erithasyabya omw’ihiika ly’obunyakirimu, eriyowa inabirighanyirwa, n’erilholha embere.”—Lebaya akasanduku “ Wanga Kolhaki?”

Sitani akendi lholha embere erikulethera ‘ebiyagha’ erianza erikutsekya wunemusuba-subania obunywani bwawu na Yehova. (Lk. 4:13) Ibya iwunayitheghekire erighumya enyumba yawu y’obunyakirimu lino.

Bikahika okwa syombuli siwe, Yehova akalhaghanisaya athi: “Nasyasondya-sondya esithere, n’erisubulya esyapanza-panzawa, n’erisenga esyabbunika, n’erisikya esyabya silhwere.” (Eze. 34:16) Yehova abiriwathikya abandi bangyi erisuba-subania obunyakirimu bwabu. Wubye iwunasi ngoku anzire erikuwathikya erilholha embere erihimba obunywani bwawu nayu obughumire kutsibu.