1. Ni butseme bwahi n’ekitsumbi ebyo thuwithe?

 THUTSEMIRE kutsibu kandi thukalhangira ini kitsumbi eribya Bema ba Yehova! Thukahulhawa omwa lina lya Nyamuhanga kandi thukatheghaya ekitsumbi ky’erina eryo omw’isangira omwa mubiiri w’erithulira n’eriyira abigha. Thukatsema thukawathikya omundu oyuwithe ‘amalengekania awakaleka iniatholera eribana engebe y’erikotha’ eribya mwikirirya. (Emib. 13:48, NWT) Thukayowa nga Yesu ‘oyuwatsema kutsibu omo mulimu abuyirire’ omughulhu abigha biwe balhua omw’ithulira ibabiribana mw’ebibuya.​—Lk. 10:1, 17, 21.

2. Thwanga kangania thuthi ku thukalhangira omubiiri wethu w’erithulira mwa mukulhu?

² Thukalhangira omubiiri wethu w’erithulira mwa mukulhu. Omukwenda Paulo mwabwira Timoteo athi: “Wuyitheghaye kandi wutheghaye erikangirirya lyawu.” Paulo mw’ongerako athi: “Wamakolha wuthya wasyayilhamya haghuma n’abakakuhulikirira.” (1 Tim. 4:16) Neryo esyongebe siri omwa kabi. Thukayitheghaya kundi thuli ndulhani sy’omwa Bwami bwa Nyamuhanga. Mughulhu wosi thukanza ithwabya n’emibere eyikaleka Yehova iniapipwa kandi eyihambangene n’engulhu yuwene eyo thukathulha. (Fil. 1:27) Thukakanganaya ku ‘thukatheghaya erikangirirya lyethu’ omw’iyitheghekera ndeke erithulira n’erisaba Yehova y’emighisa thuthethwathulira abandi.

3. Mbwino obuli mundu akendi hulikirira omwatsi w’Obwami? Iha eky’erileberyako.

³ Nibya n’omughulhu thukahiraho akaghalha kanene, abangyi omwa bulhambu bwethu bangana ghana erihulikirira omwatsi w’Obwami. Thalengekania okwa kyalholirweko kya Mughalha Wethu Georg Lindal, oyuwathulira iyuwene omwa Iceland eritsuka 1929 erihika 1947. Mwaghaba esyongumi sy’ebitabu; aliwe muhathabya n’omughuma oyukaligha ekwenene. Mwahandika athi: “Abandi ibakabya nga bakahakanisaya ekwenene, aliwe abangyi isibalyanza n’erihulikirira.” Nibya n’enyuma w’abamisyonare abakalhua okwa Gilead eryasayo n’erikanyirirya omubiiri,  muhalhaba eyindi myaka mwenda abanya Iceland balebe erisalha bayihayo oku Yehova n’eribatizibwa. *

4. Thwangana yowa thuthi abandu bakaghana erihulikirira engulhu yuwene?

⁴ Thukayiponera abandu bakaghana erihulikirira. Ithwangana yowa ngoku Paulo ayowa, oyuwakwa “obulighe bunene n’eriaghalhwa” busana n’Abayuda bosi erithendi ligha ngoku Yesu ya Masiya oyuwalhaghanisibawa. (Abar. 9:1-3) Kandi ibbwa kyamabya indi iwabya iwabirihiraho akaghalha kanene n’erisaba busana n’omwigha, aliwe inialemwa erikulha-kulhana kandi n’erigha eryo iryabya iritholere iryahwa? Kutse ibbwa wamabya isiwuli wathawathikya omundu mulebe erihika okw’ibatizibwa? Wunatholere iwayowa nga wuli kw’olhubanza, obundi erilengekania wuthi Yehova syathatsumulha erithulira lyawu? Omo mwatsi ono, thukendi subirya ebibulyo bibiri bino: (1) Ni byahi ebikakanganaya ngoku erithulira lyethu linemulhwiririra mw’ebibuya? (2) Ni byahi ebya thutholere ithwabya ithunalindirire thukathulira?

5. Busana naki omubiiri owathukakolera Yehova mughulhu wosi syali lhwiririra mw’ebya thulhue thukalengekania?

⁵ E Biblia yikakanaya okwa mundu oyukakolha erisonda lya Nyamuhanga yithi: “Ebyosi omundu oyo akakolha bikatsumulhawa.” (Esy. 1:3) Aliwe, ekyo sikirimanyisaya kithi obuli kindu ekyathukakolera Yehova kikendibya ngoku thwanzire. Engebe y’abandu ‘yoswire n’obulighe’ busana n’obuthahikana—obwethu n’obw’abandi. (Yobu 14:1) N’ekindi, abakathuhakanisaya bangana thoka erimania omubiiri wethu w’erithulira habw’akathuku kake. (1 Kor. 16:9; 1 Tes. 2:18) Neryo kwesi, Yehova akaminya athi omubiiri wethu w’erithulira ng’anemulhwiririra mw’ebibuya? Thulebaye emisingyi mirebe ye Biblia eyikathuwathikaya erisubirya ekibulyo eki.

6. Yehova akaminya athi omubiiri wethu owathukamukolera ng’anemulhwiririra mw’ebibuya?

⁶ Yehova akasamalira akaghalha n’eriyiyinia lyethu. Embere sya Yehova, omubiiri wethu akalhwiririra mw’ebibuya thwamakolhagho n’omuhwa n’omwa lhwanzo, mbulha abandu bahulikirire kutse eyihi. Paulo mwahandika athi: ‘Nyamuhanga sialikolha ekithathunganene. Syang’ibirirwa omubiiri wenyu, n’olhwanzo olho mwakangaya busana nayu, imwabirikolera, kandi mukinakolera abandu ba Nyamuhanga.’ (Ebr. 6:10) Yehova ak’ibuka akaghalha n’olhwanzo lhwethu, akaghalha ako nomukangabya isikathalhwiririra mw’ebibuya. Neryo, wangana ghendera okwa bya Paulo abwira Abanya Korinto bino: ‘Ebyo mukakolera Omukama si bya busa,’ nomubyangabya isibithalhwiririra mw’ebya mulhue mukalengekania.—1 Kor. 15:58.

7. Ebya mukwenda Paulo abugha okwa mubiiri wiwe w’erithulira byanga thweghesyaki?

⁷ Omukwenda Paulo abya mumisyonare  oyuli ky’erileberyako kibuya, mwatsukisya ebithunga bihyaka omwa miyi mingyi. Aliwe, abere akayowa iniatholere erilhwira okwa bikaleka iniatholera eribya mughombe wa Kristo, mwathahira omuwatho okwa mughanzo w’abandu abo abiriwathikya eribya bikirirya. Omwakanya k’ekyo, erikangania ebikabughawa n’abakayihamaya ku biwire, Paulo mwahandika athi: “Nabirikolha kwilhababo kutsibu.” (2 Kor. 11:23) Nga Paulo, thutholere ithw’ibuka ngoku akaghalha ako thukahiraho n’eriyiyinia lyethu bya Yehova akalhangira mwa bikulhu kutsibu.

8. Ni kyahi ekya thutholere ithw’ibuka okwa mubiiri wethu?

⁸ Omubiiri wethu w’erithulira akatsemesaya Yehova. Yesu mwathuma abigha 70 eriyathulha omwatsi w’Obwami, kandi babere baghunza erithulhughania eryo, “mubasubulha n’obutseme.” Busana naki mubatsema? Mubabugha bathi: “Esyombinga musyathwowire omughulhu thwahanasyo omo lina lyawu!” Aliwe, Yesu mwahengulha amalengekania wabu akababwira athi: “Simutseme kusangwa ebirimu bibi byabiribowa, nikwa mutseme kusangwa amena wenyu abirisakwa elhubulha.” (Lk. 10:17-20) Yesu mwaminya ngoku sibendibera eribana ebyalholirweko ebyuwene ng’ebyo omw’ithulira lyabu. Omo kwenene, sithwasi nga ni bangahi ababya babere Bakristayo okw’abatsuka erihulikirira abigha. Ekikulhu kutsibu, abigha babya batholere ibatsema busana n’eriminya ngoku Yehova abiritsemera akaghalha kabu kanene butsira busana n’abandu eribahulikirira lisa.

9. Ngoku kiri omwa Abanya Galatia 6:7-9, thwamayiyinia omwa mubiiri wethu ithukendi banaki?

⁹ Thwamayiyinia omwa mubiiri wethu w’erithulira, ithukendi syabana engebe y’erikotha. Thukabya thukalima n’erihera embutho y’ekwenene y’Obwami n’omuthima wethu wosi, thukabya kandi ‘ithukabiba omw’isonda ly’omulimu’ omw’ilighira omulimu abuyirire wa Nyamuhanga erithukoleramo. ‘Thwamathendi lhuha’ kutse ‘erileghulha,’ Yehova akathulhaghanisaya athi ithukendi hulhulha engebe y’erikotha, mbulha thwawathikirye omwigha eriyihayo oku Nyamuhanga kutse eyihi.​—Soma Abanya Galatia 6:7-9.

10. Omw’ithulira lyethu, abandu erihulikirira kutse erithendi hulikirira kikaseghemera okuki?

¹⁰ Kutsibu-tsibu abandu erihulikirira kutse eyihi kikasighikira okwa biri omwa mithima yabu. Yesu mwasoborera ekwenene eyi omwa musyo wiwe ow’omubibi oyuwabiba embutho okwa muthaka muthina-muthina, aliwe ey’okwa muthaka mughuma musa yeyahethaya. (Lk. 8:5-8) Yesu mwabugha athi omuthaka muthina-muthina ak’imanira abandu abo emithima yabu yikahulikirira “ekinywe kya Nyamuhanga” omwa nzira esithasosene. (Lk. 8:11-15) Ng’omubibi, sithwanga bugha thuthi omubiiri wethu ahethaye, kundi ekyo kikasighikira okwa muthima w’abahulikiriri bethu. Olhukwamirwa lhwethu ly’erilholha embere eribiba embutho eyuwene ey’omwatsi w’Obwami. Ngoku omukwenda Paulo anabugha, ‘obuli mundu asyahembwa na Nyamuhanga ngoku omubiiri wiwe ali,’ butsira erikwamana n’ebikalhwiririra omwa mubiiri wiwe.—1 Kor. 3:8.

11. Ni kyahi ekyaleka Noa iniabya muthuliri mubuya w’erithunganene? (Lebaya ekisasani ky’okwa kidipa.)

¹¹ Eritsuka kera abandu isibali hulikirira Abema ba Yehova. Ng’eky’erileberyako, Noa abya “muthuli w’erithunganene,” obundi ahabw’emyaka mingyi. (2 Pet. 2:5) Ahathe erithika-thika, abya inianawithe amaha athi abandi bakendi hulikirira akabathulira, aliwe Yehova mwathakangania athi ekyo ky’ekikendibya. Omwakanya k’ekyo, Nyamuhanga abere akaha Noa y’obusondoli bw’erihimba obwathu, mwabugha athi: “Nawu wasy’ingira omo bwathu, iwe, n’abaghalha bawu, n’omukali  wawu, n’abakali b’abaghalha bawu.” (Enz. 6:18) Kandi omw’ilengekania okwa bipimo n’obunene bw’obwathu obwa Nyamuhanga abugha athi ahimbe, Noa angabya imwaminya ngoku ni bake abangahulikirire. (Enz. 6:15) Ngoku thunasi, sihali n’omundu n’omughuma erilhua omwa kihugho kibi ekyo oyuwahulikirira Noa. (Enz. 7:7) Mbwino Yehova mwanalhangira Noa ng’oyuwabirilemwa? Eyihi na hake! Embere sya Nyamuhanga, Noa mwakolha ndeke omubiiri w’erithulira kundi omwa buthaleghulha mwakolha ebya Yehova abugha athi akole.—Enz. 6:22.

12. Omuminyereri Yeremia mwabana athi etseme omwa mubiiri wiwe nomwakine indi mubathamuhulikirira kandi mubamuhakanisya?

¹² Omuminyereri Yeremia nayu mwathulira ahabw’emyaka mingyi nomwakine indi abandu mubathamuhulikirira kandi mubamuhakanisya. Mwahwa amani abahakani ‘bakamutsuma n’erimuseka,’ kyamaleka inialengekania okw’ileka omubiiri wiwe. (Yer. 20:8, 9) Aliwe Yeremia mwathalekagho! Ni kyahi ekyamuthokesaya erirwanisya amalengekania wiwe awathatholere n’eribana etseme omw’ithulira liwe? Mwahira amalengekania wiwe okwa bindu bikulhu-bikulhu bibiri. Eky’erimbere, omwatsi wa Nyamuhanga ogho Yeremia abwira abandu angabahere ‘amaha oko biro ebikasa.’ (Yer. 29:11) Ekyakabiri, Yehova abya iniabirisombolha Yeremia eryimanira erina liwe. (Yer. 15:16) Nethu thukathulha omwatsi w’amaha omwa kihugho kibi kino, kandi thukahulhawa omwa lina lya Yehova ng’Abema biwe. Thwamahwerya amalengekania okwa bindu bikulhu-bikulhu bibiri ebi, ithukendi bana etseme mbulha abandu bahulikirire kutse eyihi.

13. Thuk’ighaki okwa musyo wa Yesu owali omu Mariko 4:26-29?

¹³ Erikulha-kulhana bunyakirimu likaghenda lyolho-lyolho. Yesu mwakangania ekwenene eyi omwa musyo wiwe w’omubibi oyukaghotsera. (Soma Mariko 4:26-29.) Embutho y’omubibi muyalhasa lyolho-lyolho kandi abya isyawithe ekyo angakolha nuku yikule lhuba-lhuba. Nawu wangana ghana erilhangira ebikalhwiririra omwa mubiiri wawu w’eriyira abigha habw’obuthuku bulebe kundi erikulha-kulhana likaghenda lyolho-lyolho kandi omwa biika. Ngoku omulimi athe angakaka ebirimwa biwe erikulha lhuba-lhuba ngoku alhue anzire, nethu sithwanga kaka abigha be Biblia erikulha-kulhana lhuba-lhuba bunyakirimu ku thwanzire. Neryo isiwahwa amani kutse eribikyako bamathwalha buthuku erikulha-kulhana ngoku wuthalhue wulengekenie. Ng’obulime, omubiiri w’eriyira abigha akayithagha erighumisirizya.​—Yak. 5:7, 8.

14. Ni ky’erileberyako kyahi ekikakanganaya ngoku ebikalhwiririra omwa mubiiri wethu byanganasa lyolho-lyolho?

¹⁴ Omwa wandi malhambu, ebikalhwiririra omwa mubiiri wethu w’erithulira byangana thwalha myaka erisalha byalhangirika. Thalengekania okwa ky’erileberyako kya mwali wethu Gladys na Ruby Allen, bali bethu abasubeneko abathumawa ng’abatemburi b’omughulhu wosi omwa tawuni ye Quebec e Canada omwa 1959. * Busana n’akahathikano k’abandu n’abakulhu b’edini y’Ekikatuliki, abandu babya isibanga hulikirira omwatsi w’Obwami. Gladys ak’ibuka bino: “Muthwaghunza emyaka ibiri ithunemuthulira nyumba okwa nyumba habw’esyosaha munani obuli kiro isihali n’oyukathuhulikirira! Abandu ibakakwama kyasa okwa lhukyo n’eriyighendera babirilhangira ku n’ithwe. Aliwe muthuthalhuhirira.” Obuthuku bwabere bunemulhaba, abandu mubahindulha amalengekania wabu, bamatsukiraho erihulikirira. Lino omwa tawuni eyo muli ebithunga bisathu.—Isa. 60:22.

15. Ebiri omwa 1 Abanya Korinto 3:6, 7 bikathweghesyaki okwa mubiiri w’eriyira abigha?

 ¹⁵ Eriyira abigha kikayithagha akaghalha k’abandu bangyi. Kyabiribuwa indi ekithunga kyosi kikawathikaya omundu erihika okw’ibatizibwa. (Soma 1 Abanya Korinto 3:6, 7.) Ng’eky’erileberyako, omuthuliri iniaha oyuwabirianzisibwa y’etrakit kutse egazeti. Mughalha wethu iniaminya ngoku endegheka yiwe siyendimulighira erisuba okw’oyulyanzisibawa, neryo iniabwira owundi muthuliri athi amusubeko. Omuthuliri oyo iniathoka eritsuka erigha nayu e Biblia. Nayu iniabya akakokya abandi balikyethu oko mwigha oyo, kandi obuli mughuma iniahira omwa mwigha mw’omuhwa omwa nzira muthina-muthina. Obuli mulikyethu oyukendi hika okwa mwigha oyo akendi wathikya ok’uthangirira embutho y’ekwenene. Omwa nzira eyo, ngoku Yesu anabugha, omubibi n’omughesi ibangana tsema haghuma omw’ighesa ly’obunyakirimu.​—Yn. 4:35-38.

16. Busana naki wangana bana etseme omwa mubiiri w’erithulira nomuwangabya iwutsotsobere omwa maghalha?

¹⁶ Kandi ibbwa wamabya isiwanga thasyasangira ndeke omwa mubiiri w’erithulira n’erikangirirya engulhu yuwene busana n’eritsotsobera omo maghalha? Nawu iwangana bana etseme omw’ighesa. Thalengekania okwa ky’erileberyako ky’Omwami Dawudi n’abalhume biwe abalhamaya esyofamile n’ebindu byabu okwa babbandi Abameleki. Abalhume bikumi bibiri babya ibabirilhuha kutsibu isibangathasyathoka erilhwa, neryo mubasighalha enyuma eritheya emisiko. Babere babirisinga amalhwa, Dawudi mwahamulha athi abosi baghabane omo bulingirirania ebiryanyeghawa. (1 Sam. 30:21-25) Kwabine bithya n’okwa mubiiri wethu w’eriyira abigha. Obuli mundu oyukakolha ekyosi-kyosi ekyo anga thoka erisangira mugho angana bana okwa tseme y’erilhamya n’eriwathikya omundu muhyaka eritsuka enzira eyikakolhaya okwa ngebe.

17. Ni kyahi ekya thutholere ithwasimirako Yehova?

¹⁷ Thukasima Yehova busana n’enzira y’olhwanzo ey’akalhangiriramo omubiiri owathukamukolera. Anasi ngoku sithuwithe ekya thwanga kolha okwa byanga lhwiririra omwa kaghalha kethu. Nomwabine bithya, akalhangira omuhwa n’ebilhubirirwa byethu ebyuwene, kandi akathuhemba. Kandi akathukangiriraya ngoku thwangabana etseme omwa byathukakolha omwa mubiiri munene w’erighesa. (Yn. 14:12) Thwangana kakasya ngoku Nyamuhanga akendi thuligha thwamathendi lhuhirira!