1. Ni kyahi ekyangasa omwa bulengekania thukalengekania okwa mundu w’obughanyiri?

 THUKABYA thukalengekania okwa mundu w’obughanyiri, ithwangana thera akasasani k’omundu w’olhukeri, oyuhehere, oyukakwira abandi b’obulighe, kandi omwenge. Omusyo ogho Yesu abugha owahambire okwa Musamaria mubuya inianganasa omo bulengekania. Omulhume w’ehandi oyo mwakangania Omuyuda oyo abibi babya ibabiriswirya n’erinyegha y’obughanyiri. Omusamaria ‘mwaghanyira’ Omuyuda oyo wabya iniabirihuthangalibwa kandi omo lhwanzo mwalhangira athi akatsomanawa. (Lk. 10:29-37) Eky’erileberyako eki kikakanganaya omubere mubuyanga wa Nyamuhanga wethu—obughanyiri. Omubere oyo ni katsweka k’okwa mubere wa Nyamuhanga ow’olhwanzo, kandi akakanganayagho buli kiro akakolongana nethu.

2. Ni yindi nzira yahi ey’erikanganiryamo obughanyiri?

² Hane eyindi nzira ey’erikanganiryamo obughanyiri. Ow’obughanyiri angana thwamu erithendi suyira omundu kandi inianatholere erisuyirwa. Omo nzira eyo, Yehova abiribya inianemuthukangania obughanyiri. Omuhandiki w’esyonyimbo mwabugha athi: “Syali thusuyira ngoku litholere.” (Esy. 103:10) Nomwabine, okwa bundi buthuku, Yehova angana thwamu erihighitha omukolha-nabi.

3. Ni bibulyo byahi ebya thukendi kaniako?

³ Omo mwatsi ono, thukendi kania okwa bibulyo bisathu: Busana naki Yehova akakanganaya obughanyiri? Erihighitha lihambene lithi n’obughanyiri? Ni byahi ebyanga thuwathikya erikangania obughanyiri? Thulebaye ngoku Ekinywe kya Nyamuhanga kikasubiraya ebibulyo ebi.

4. Busana naki Yehova akakanganaya obughanyiri?

⁴ Yehova akakanganaya obughanyiri busana n’olhwanzo. Omukwenda  Paulo mwasondolibwa erihandika athi Nyamuhanga ni ‘w’erighanyira linene.’ Hano, Paulo aby’akakania okwa bughanyiri bwa Nyamuhanga obw’eriha abaghombe biwe abahakabibwa abathahikene b’amaha w’engebe y’elhubulha. (Efe. 2:4-7) Aliwe obughanyiri bwa Yehova ni bunene kutsibu kwilhaba n’aho. Omuhandiki w’esyonyimbo ya Dawudi mwahandika athi: “Yehova akakanganaya obubuya okwa bosi, kandi obughanyiri bwiwe bukalhangirika omwa byosi eby’akakolha.” (Esy. 145:9, NWT) Kundi Yehova anzire abandu, akakanganaya obughanyiri omughulhu akalhangira ikikayithaghisibawa.

5. Yesu mw’igha athi okwa bughanyiri bwa Yehova?

⁵ Erihako Yesu musa, sihali owundi oyuwasi Yehova ng’anzire erikangania bungahi obughanyiri. Thatha oyu na Mughalha babya haghuma elhubulha ahabw’emyaka mingyi Yesu athali asa okwa kihugho. (Emi. 8:30, 31) Mirundi mingyi, Yesu mwalhangira ngoku Thatha wiwe akakanganaya abakolha-nabi b’obughanyiri. (Esy. 78:37-42) Omw’ikangirirya liwe, Yesu iniakakanaya kutsibu okwa mubere mubuyanga wa Thatha wiwe oyu.

6. Ni ky’erileberyako kyahi ekya Yesu aha ekikakanganaya obughanyiri bwa Thatha wiwe?

⁶ Ngoku kiri omo mwatsi owahwere, Yesu mwakolesya omusyo w’omwana oyuwatsaha erithuwathikya eriminya Yehova ng’anzire erikangania bungahi obughanyiri. Omwana oyo abya iniabirilhua eka kandi “mwapanza-panza ebindu biwe omwa mighendere mithya-mithya.” (Lk. 15:13) Enyuma waho, mwayisubamo amaleka engebe yiwe y’obutswatswa, amayikehya, n’erisuba eka. Thatha wiwe mwakolhaki? Omulhwana oyo mwalhuaho iniayira ekyo akakolha. Yesu mwabugha athi: “Neryo mwahongoka mwaya eyiri thatha wiwe; nikwa omughulhu abya akine ekyaswa, ise wiwe mwamulhangira, neryo omuthima wiwe mwamughanyira, neryo mwathibitha eyo ali, mwamubaghalira, mwamulyatsirira.” Thatha mwathahemulikania mughalha wiwe. Omwakanya k’ekyo, omo bughanyiri mwabuyira mughalha wiwe n’erimuthangirira eka. Omwana oyuwatsaha oyo abya iniabirihalya kutsibu, aliwe busana n’eriyisubamo liwe, thatha wiwe mwamughanyira. Thatha w’obughanyiri oyuli omo musyo oyu ak’imanira Yehova. Omo nzira eyikahumulikanaya eyi, Yesu mwakangania ngoku Thatha wiwe akabya inianayitheghekire erighanyira abakolha-nabi abakayisubamo erilhua okwa muthima.​—Lk. 15:17-24.

7. Amenge wa Yehova ahambene athi n’obughanyiri obw’akakanganaya?

⁷ Yehova akakanganaya obughanyiri busana  n’amenge wiwe manene. Amenge wa Yehova si mubere w’erithabya n’amenge w’omwa muthwe buyira. Omwakanya k’ekyo, e Biblia yikabugha yithi ‘amenge awakalhua endatha oswire mw’erighanyira [obughanyiri], n’emibiiri mibuya.’ (Yak. 3:17) Ng’omubuthi w’olhwanzo, Yehova anasi ngoku obughanyiri bwiwe bukaghasira abaana biwe. (Esy. 103:13; Isa. 49:15) Obughanyiri bwa Nyamuhanga bukabaha amaha nomubakana sobaya. Neryo amenge wa Yehova awathawithe busubuliro akaleka iniakangania obughanyiri omughulhu akalhangira ihane ekyanga leka. Aliwe kandi, Yehova anasi omughulhu athatholere erikangania obughanyiri. Omo menge, syali lhabaya aho bughanyiri bwiwe bukasubulira kyamabya ikikendi leka iniasighika ekibi.

8. Okwa bundi buthuku, ni kyahi ekyanga yithaghisibwa, kandi busana naki?

⁸ Thubughe thuthi omughombe wa Nyamuhanga omw’ikighenderera iniathwamu eribya omo ngebe y’obutswatswa. Thutholere ithwakolhaki? Paulo mwasondolibwa erihandika athi: “Simuthambe n’omundu” oyo. (1 Kor. 5:11) Abakolha-nabi abatheyisubamo bakahighithawa omo kithunga. Ekyo kikayithaghisibawa busana n’eritheya balikyethu abathaleghulha n’erisighika esyonzira sya Yehova esibuyirire. Nomwabine, abandi kyangana bakalira erilhangira endegheka y’erihighitha ng’ekindu ekikakanganaya obughanyiri bwa Nyamuhanga. Ekyo nina kwenene? Thulebaye.

9-10. Ngoku kiri omwa Abaebrania 12:5, 6, busana naki thwangana bugha thuthi endegheka y’erihighitha ni y’obughanyiri? Iha eky’erileberyako.

⁹ Thukabya thukowa ekirango okwa mihindano omundu oyo thunasi kandi oyo thwanzire ngoku “syakiri mughuma w’okwa Bema ba Yehova,” thukakwa obulighe bunene. Thwangana bulha nga kinalhue kitholere erihighitha omundu oyo. Mbwino kwenene erihighitha nina kindu ekikakanganaya obughanyiri? Ee. Erithendi suyira omundu oyunatholere erisuyirwa, si kangania amenge, obughanyiri, kutse olhwanzo. (Emi. 13:24) Mbwino erihighitha lyangana wathikya omukolha-nabi oyutheyisubamo erihindulha emibere yiwe? Ee. Abangyi ababiriwa omw’ilholho erikalire babirilhangira ngoku erithwamu lya basyakulhu ery’eribahighitha lyabirileka ibabuka kw’obulengekania, ibahindulha emitse yabu, n’erisuba oku Yehova.​—Soma Abaebrania 12:5, 6.

¹⁰ Thalengekania okwa ky’erileberyako kino. Omulisya iniaminya ngoku enguma y’okwa syombuli siwe yabirilhwalha. Anasi ngoku erithambira obulhwere obo kikamuyithaghisaya erihighulha embuli eyo okwa sindi esiri omo kihangulho. Aliwe, esyombuli ni bihangikwa ebikabya haghuma. Bikanza ibyabya omo kihangulho kighuma, neryo ibyangana pona byamaghabulhwa. Aliwe ibbwa mbwino eki kikamanyisaya kithi omulisya amabya mutsurumi kutse oyuthekwa bulighe akasombolha emithambirire eyi? Eyihi nahake. Anasi ngoku amaleka eyilhwere y’omwa kihangulho, obulhwere ibukendi lhandaghana. Omw’ihighulha eyilhwere, akatheghaya ekihangulho ekyosi.​—Thasyalebaya na Abalawi 13:3, 4.

11. (a) Ni mwa nzira nga syahi oyuhighithirwe angalinganisibwa n’embuli eyilhwere? (b) Ni bindu byahi n’obuwathikya ebyo abahighithirwe batholere ibahebwa?

¹¹ Omukristayo amahighithwa, ithwangana mulhangira ng’embuli eyilhwere eyo. Alhwere bunyakirimu. (Yak. 5:14) Obulhwere bw’obunyakirimu, ng’awandi malhwere w’ekinyamubiri, bwangana sighalira. Neryo okwa bundi buthuku kikayithaghisibawa erihighulha omundu oyulhwere bunyakirimu okwa kithunga. Erihighitha eri ni kindu ekikakanganaya ngoku Yehova anzire abathaleghulha abali omo kihangulho Kiwe, kandi lyangana hamba okwa muthima w’omukolha-nabi ikyaleka iniayisubamo. Inianahighithirwe, angana hindana okwa mihindano, eyo akendi lisibwa n’erihimbwa bunyakirimu.  Kandi awithe obughabe bw’erihebwa ebitabu by’erikolesya n’erilebya e JW Broadcasting^®. Abasyakulhu bakabya banemulhangira kw’anemukolha esyombinduka, ihanganayira ibamuha erihabulha n’obusondoli ebyanga muwathikya erithasyasuba-subania obunyakirimu bwiwe nuku angathasyabya mughuma w’okwa Bema ba Yehova. *

12. Ni kindu kyahi ky’olhwanzo kandi eky’obughanyiri ekya basyakulhu banga kolera omukolha-nabi oyutheyisubamo?

¹² Ni kikulhu eryibuka ngoku abakolha-nabi abatheyisubamo basa babakahighithawa. Abasyakulhu banasi ngoku oyu ni mwatsi akalire, owabathe banga lhangira mwa lhutseghe-tseghe. Banasi ngoku Yehova akakunga “omo libanza lithunganene.” (Yer. 30:11) Banzire balikyabu, kandi sibanganza erikolha ekyosi-kyosi ekyanga hamba nabi okwa bunyakirimu bwabu. Aliwe okwa bundi buthuku, ekindu ky’olhwanzo kandi eky’obughanyiri ekyanga kolhwa ly’erilhusya omukolha-nabi y’omwa kithunga.

13. Busana naki Omukristayo mulebe e Korinto mwayithagha erihighithwa?

¹³ Thalengekania okwa kya mukwenda Paulo akolera omukolha-nabi oyuthayisubamo omo kighana ky’erimbere. Omukristayo e Korinto abya akasingira na mukali wa thatha wiwe. Ekyo ka mukyathikya! Okw’eki, Yehova abya iniabiribwira Abaisraeli athi: “Omundu oyukaghotsera n’omukali w’ise wiwe abiriambulha endumbu ya thatha wiwe; ababiri bosi basyithwa kwenene.” (Law. 20:11) Nomwabine, Paulo syanga bughire athi omulhume oyo ithibawe. Aliwe mwabwira ekithunga kye Korinto athi kimuhighithe. Obutswatswa b’omulhume oyo bwabya ibunemuhamba nabi okwa bandi omo kithunga, nibya n’abandi b’okw’ibo mubathalhangira eki ng’erilholho erikalire!​—1 Kor. 5:1, 2, 13.

14. Paulo mwakangania athi omulhume oyuwahighithawa e Korinto y’obughanyiri, kandi busana naki? (2 Abanya Korinto 2:5-8, 11)

¹⁴ Buthuku bulebe enyuma waho, Paulo mwaminya ngoku omulhume oyo abirikolha esyombinduka. Omukolha-nabi oyo abya iniabiriyisubamo omo kwenene! Nomwakine indi omulhume oyo abya iniabirihemulha ekithunga, Paulo mwathanza erimukalhako kutsibu omw’isuyira. Mwahamulha abasyakulhu athi: ‘Mumubuyire n’erimukirania.’ Lhangira ekyaleka Paulo iniabugha athya: “Akasyakindwa n’obulighe.” Paulo mwakwira omulhume oyuwayisubamo oyo y’obulighe. Omukwenda Paulo mwathanza erilhangira omulhume oyo obulighe ibwabirimubundamirya, eribbunika muthima busana  n’eby’akolha kikaleka akabikyako erisondya ekighanyiro.​—Soma 2 Abanya Korinto 2:5-8, 11.

15. Abasyakulhu bakasuyira n’erikangania obughanyiri mughulhu wahi?

¹⁵ Omw’igherererya Yehova, abasyakulhu banzire erikangania obughanyiri. Bakasuyira omundu omughulhu kyamayithaghisibwa aliwe ibakangania obughanyiri omughulhu kitholere. Bamathendi kolha ekyo, obughanyiri ibukendibya isibuthakanganibwa, ibamasighika ekibi. Aliwe ibbwa, mbwino abasyakulhu basa babatholere ibakangania obughanyiri?

16. Ngoku kiri omwa Emisyo 21:13, Yehova akakolhaki busana n’abakalemawa erikangania obughanyiri?

¹⁶ Abakristayo abosi bakalengaho erigherererya obughanyiri bwa Yehova. Busana naki? Enzumwa nguma yiri yithi Yehova syali hulikirira abakalemawa erikangania abandi b’obughanyiri. E Biblia yithi: “Oyukakuningira okuthwe kwiwe nuku syowe ekiriro eky’omundu w’ahisi nayu asyabirikira iniath’ithabwa.” (Emisyo 21:13, NWT) Sihali n’omughuma w’okw’ithwe oyuwanzire Yehova iniaghana erihulikirira emisabe yiwe, neryo thukalengaho eriyihighulha okw’ibya n’omuthima owakalire. Omwakanya k’erithendi hulikirira Omukristayo mulikyethu oyuli omo bulhumi, mughulhu wosi thutholere ithwabya ithunayitheghekire erihulikirira “ekiriro ky’omundu w’ahisi.” Kuthya, thukalengaho erighendera okw’ihabulha erya sondolibawa lino. Nyamuhanga syendi syakangya obughanyiri oko omundu oyuthekangaya obughanyiri. (Yak. 2:13) Omw’iyikehya thwamibuka nga thukayithagha bungahi obughanyiri, ithukendyongera erikangania obughanyiri. Kwilhabirirya thwanzire erikangania omukolha-nabi oyukayisubamu y’obughanyiri akasuba omo kithunga.

17. Omwami Dawudi mwakangania athi obughanyiri obukalhua okwa muthima?

¹⁷ Eby’erileberyako bye Biblia byangana thuwathikya erikangania obughanyiri n’eriyihighulha okw’ibya n’omuthima owakalire. Ng’eky’erileberyako, lengekanaya oko Mwami Dawudi. Mughulhu mungyi iniakakanganaya obughanyiri obukalhua okwa muthima. Nomwakine indi Saulo mwanza erimwitha, Dawudi mwakangania omwami omuhakabibwa wa Nyamuhanga y’obughanyiri, mwathanza erithuhulya kutse erimukolha nabi.​—1 Sam. 24:9-12, 18, 19.

18-19. Ni mwa mibere yahi ibiri eyo Dawudi athakanganirayamo obughanyiri?

¹⁸ Aliwe, Dawudi isyali kanganaya obughanyiri mughulhu wosi. Ng’eky’erileberyako, omughulhu Nabali, omulhume oyutsurumire, abugha omw’ithendi sikya n’erighana eriha Dawudi n’abalhume biwe b’ebyalya, Dawudi mwahithana n’erithwamu eriyitha omulhume oyo n’abalhume bosi ab’enyumba yiwe. Thukasima ekya muka Nabali, omukali oyukaghumisirizaya, ya Abigaili, akolha omo byalhuba, kyamaleka Dawudi iniathabya kw’olhubanza lhw’omusasi.​—1 Sam. 25:9-22, 32-35.

¹⁹ Okwa bundi buthuku, omuminyereri Natana mwabwira Dawudi okwa mulhume omugaga oyuwiba embuli y’omuliranwa wiwe omwera. Omwa kinigha, Dawudi mwabugha athi: “Ngoku Omwami Mukulhu aliho, omundu wakolha eki atholere eriholha!” (2 Sam. 12:1-6) Dawudi abya inianasi Emighambo ya Musa. Oyuk’iba embuli iniatholere  inialihayo mwa mbuli ini. (Eri. 22:1) Kandi ibbwa eritswera omwibi y’olhw’erikwa? Eryo lyabya itswera ly’obutsurumi. Aho Natana abya iniali kw’ikolesya omwatsi oyo erikangania Dawudi ebibi ebikalire ebyo iyuwene-wene abirikolha! Aliwe Yehova mwakangania Dawudi y’obughanyiri bunene kwilhaba obwa Dawudi angakanganirye omwibi oyuwabya omwa ky’erileberyako kya Natana!​—2 Sam. 12:7-13.

20. Eky’erileberyako kya Dawudi kyanga thweghesyaki?

²⁰ Lhangira ngoku busana n’ekinigha Dawudi mwatswera Nabali n’abalhume bosi ab’enyumba yiwe b’olhw’erikwa. N’enyuma waho, Dawudi abya inianayitheghekire eritswera omulhume w’omwa ky’erileberyako kya Natana y’olhw’erikwa. Omwa kyakabiri eki, ithwangana bulha ekyaleka omulhume mwolho oyu iniatswera athya omwa butsurumi. Lengekanaya okwa kyabya ikyabiribya oku Dawudi. Okwa buthuku obo, obunyamuthima-thima bwa Dawudi bwabya ibunemumuhandikirira. Omuthima w’eritswera omwa butsurumi ni kaminyikalho k’erilhwalha bunyakirimu. Yesu mwakunga abigha biwe athi: “Simutswere abandi, mukasyatswerwa na Nyamuhanga. Kusangwa omusindo mukatswera, ghona Nyamuhanga asyabatsweramo.” (Mt. 7:1, 2) Neryo thuyitheghaye okwa butsurumi kandi thulengeho eribya nga Nyamuhanga wethu ‘ow’erighanyira linene.’

21-22. Ni nzira nga syahi esya thwanga kanganiryamo obughanyiri?

²¹ Obughanyiri si yowa buyira. Kundi nibya obughanyiri bwabirikanibwako ‘ng’erikwira abandi b’obulighe omw’iyira eky’erikolha.’ Neryo ithwe bosi thwangana lebya ndeke ebiyithawa by’eka yethu, ekithunga kyethu, n’abaliranwa bethu. Omo kwenene hali highisa hingyi ehy’erikanganiryamo obughanyiri! Hane oyukayithagha erihumulikanibwa? Mbwino thwangana muwathikya, obundi erimuha ebyalya kutse erimuwathikya omwa yindi nzira? Mbwino oyuwabirisubulibwa omwa kithunga akayithagha abanywani abakendi muhumulikania n’erimuhimba? Thwangana bwira abandi oko mwatsi ow’akahumulikanaya ow’engulhu yuwene? Eyi ni nguma y’okwa syonzira esyuwene kutsibu esy’erikanganiryamo obuli mundu obughanyiri.​—Yobu 29:12, 13; Abar. 10:14, 15; Yak. 1:27.

²² Thwamabiriminya ebiyithawa ng’ebyo, ithukendi lhangira ngoku hali highisa hingyi ehy’erikanganiryamo obughanyiri. Thukabya thukakangania obughanyiri, thukatsemesaya Thatha wethu w’elhubulha, Nyamuhanga ‘ow’erighanyira linene’!