1. Munabwire abangyi bakasubiraya bathi bakabwirwa okwa menge? (Emisyo 1:20, 21)

 OMWA bihugho bingyi, ni kya buli kiro erilhangira abathuliri b’Obwami abatsemire ibane oko syonzira esikalhabamo abandu banene ibanemughaba ebitabu. Wunewathasangira omwa mulingo w’erithulira oyu? Kyamabya ikwakiri kithya, ahathe erithika-thika wabirilengekania okwa binywe by’omusyo ebiri omwa kitabu ky’Emisyo​—eby’eribugha indi amenge akathulha endulo omwa bandu bangyi nuku bowe erihabulha lyagho. (Soma Emisyo 1:20, 21.) E Biblia n’ebitabu byethu muli “amenge” w’okwenene​—amenge wa Yehova. Oyu w’omwatsi agho abandu bakayithagha nuku bangathwa ekiika ky’erimbere ekikakolhaya okwa nzira y’engebe. Thukatsema omundu akaligha ebitabu byethu. Aliwe si b’abosi. Abandi sibalyanza eriminya ebya Biblia yikabugha. Abandi bakathusekerera. Bakalengekanaya bathi e Biblia yabirihwa okwa buthuku. N’abandi bakatsambulikanaya esyongangirirya sye Biblia esihambire okwa by’esyongeso, ibabugha bathi abakasikwama bakalire kandi bakatsweba-tsweba abandi. Nomwabine, omwa lhwanzo Yehova anemulholha embere erilhangira athi abosi bakabana amenge w’okwenene. Omo nziraki?

2. Ni hayi aho thwanga bana amenge w’okwenene munabwire, aliwe abanene bakathwamu erikolhaki?

² Enzira nguma eyo Yehova akakolesaya erilhangira athi amenge w’okwenene akowika ly’erilhabira omwa Kinywe kiwe, e Biblia. Hakuhi obuli mundu anawithe ekitabu ekyo. Kandi ibbwa ebitabu byethu ebiseghemere okwa Biblia? Thukasima eritsumulha lya Yehova kundi bine omwa mibughe eyilhabire omu 1,000. Abakahulikirira, ni bugha ambu, abakabisoma  n’erighendera okwa byabakigha, bakaghasirawa. Aliwe abanene bakathwamu erigheghena omulenge w’amenge w’okwenene. Bamabya b’erithwamu, bakanza baghendere okwa menge wabu kutse erihulikirira abandi ng’ibo. Nibya bangana thughaya busana n’erithwamu erikwama ebya Biblia yikabugha. Omwatsi ono akendi kangania ekikaleka abandu ibasubirya bathya. Aliwe, thuthatsuka eriminya ngoku thwanga bana amenge erilhua oku Yehova.

3. Amenge w’okwenene mwamuliki?

³ Amenge anganamanyisya amaaka w’erikolesya ebya thwasi erithoka erithwamu ndeke. Nomwabine, amenge w’okwenene syali subulira okw’ekyo. E Biblia yikabugha yithi: “Eryubaha Omwami Mukulhu ni nzuko y’amenge; n’eriminya ly’Oyubuyirire ni bwowika.” (Emi. 9:10) Neryo thwamabya ithuwithe erithwamu likulhu, thutholere ithwalhangira thuthi erithwamu lyethu likaseghemera okwa malengekania wa Yehova​—“eriminya ly’Oyubuyirire.” Thwangana kolha ekyo omw’isekulya omwa Biblia n’ebitabu ebiseghemere okwa Biblia. Thukabya thukakolha ekyo, thukabana amenge w’okwenene.​—Emi. 2:5-7.

4. Busana naki Yehova musa yuwanga thuha amenge w’okwenene?

⁴ Yehova musa yuwanga thuha amenge w’okwenene. (Abar. 16:27) Busana naki iyo ya Nzuko y’amenge? Eky’erimbere, iyo ng’Omuhangiki, yuwasi obuli kindu ekihambire okwa bihangikwa biwe. (Esy. 104:24) Ekyakabiri, ebyosi ebya Yehova akakolha bikakanganaya amenge. (Abar. 11:33) Ekyakasathu, erihabulha lya Yehova ery’amenge mughulhu wosi likaghasira abakalighenderako. (Emi. 2:10-12) Thwamabya b’eribana amenge w’okwenene, thutholere ithwaligha ebindu bisathu ebi n’erilighirabyo erisondolha ebya thukathwamu n’ebya thukakolha.

5. Ni byahi ebikalhwiririramo abandu bakaghana eriligha ngoku Yehova ya Nzuko y’amenge w’okwenene?

⁵ Abangyi omwa kihugho bakaligha ngoku ebyo bakalhangira omwa buhangikwa bikolirwe ndeke; aliwe kandi bakaghana bathi sihali Omuhangiki neryo ibasighika eky’ebindu eriyibuthukira. Abandi bakabugha bathi bikirirye omu Nyamuhanga, aliwe bakalhangira ebihano bye Biblia ng’ebyabirihwa okwa buthuku neryo ibathwamu erikolha ebyo banzire. Mwabirilhwiririraki? Mbwino ekihugho kyanabiryuwana busana n’abandu eriyikethera amenge wabu omwakanya k’eriyikethera awa Nyamuhanga? Mbwino banabiribana etseme y’okwenene kutse amaha awaghumire aw’obuthuku obukasa? Ebya thukalhangira bikaleka ithwaligha ekwenene eno: “Sihali menge kutse eriminya, kutse ekihano ebikalhwa n’Omwami Mukulhu.” (Emi. 21:30) Ekyo ka kikathuhira mw’omuhwa w’erisondekania oku Yehova kw’amenge w’okwenene! Eky’obulighe, abandu banene sibali kolha ekyo. Busana naki?

6. Ngoku kiri omwa Emisyo 1:22-25, ni bahi abakayiha ebithwe okwa menge w’okwenene?

⁶ Abangyi bakayiha ebithwe omughulhu amenge w’okwenene “akathulha endulo omo nzira.” Erikwamana ne Biblia, hali esyogurupu isathu sy’abandu abakaghana amenge: ‘abathasiki,’ ‘abakasekereraya,’ na “bakiru.” (Soma Emisyo 1:22-25.) * Thulebaye ndeke emibere eyikaleka abandu ng’aba ibaghana amenge wa Nyamuhanga, kandi thulebaye ngoku thwanga yihighulha okw’ibya n’emibere eyo.

7. Busana naki abandi bakathwamu eribya “abathasiki”?

 ⁷ ‘Abathasiki’ babakikiriraya obuli mwatsi kandi bakathebibawa lhuba. (Emi. 14:15) Mughulhu mungyi thukabana abali ng’abo omw’ithulira. Ng’eky’erileberyako, thalengekania okwa syomiliyoni sy’abandu abanemuthebibwa n’abasondoli b’amadini n’ab’ekipolitiki. Abandi kyabiribakukubalya bakaminya ngoku abasondoli ng’abo babiribatheba. Aliwe abakanibweko omwa Emisyo 1:22 bakathwamu eribya omwa buthaminya obo kundi ku banzire bathya. (Yer. 5:31) Bakatsemera erikolha ebyo banzire kandi sibalyanza erigha ebya Biblia yikabugha kutse erighondera ebihano byayu. Abangyi bakayowa ng’omukali oyuhambirire edini owe Quebec, e Canada, oyuwabwira Omwema oyuwamubungira athi, “Omukara wethu amabya iniabirithutheba, ekibi ini kiwe, isi kyethu!” Ahathe erithika-thika sithwanzire erigherererya abakakighenderera eribya abathasiki!​—Emi. 1:32; 27:12.

8. Ni kyahi ekikendi thuwathikya eribana amenge w’okwenene?

⁸ Busana n’enzumwa mbuya, e Biblia yikathuhira mw’omuhwa w’erithendibya abathasiki aliwe eribya “bakulhu abahikene omo malengekania [wethu].” (1 Kor. 14:20) Thukabana amenge aw’okwenene omw’ighendera okwa misingyi ye Biblia omo ngebe yethu. Lyolho-lyolho, thukayilhangirira ngoku emisingyi eyo yikathuwathikaya eriyihighulha okwa bitsibu kandi ithwathwamu ndeke. Thukakolha ndeke thukalebya nga thunemukulha-kulhana thuthi omw’eki. Thwamabya ithunemw’igha e Biblia kandi ithwamabirighunza buthuku ithunemuhindana, ithwangana yibulya nga ni kyahi ekikaleka ithuthahika okwa kiika eky’eriyihayo oku Yehova n’eribatizibwa. Thwamabya ithwabiribatizibwa, mbwino thunemukulha-kulhana ithwe ng’abathuliri kandi bakangirirya b’engulhu yuwene? Mbwino ebya thukathwamu binemukangania ngoku emisingyi ye Biblia y’eyikathusondolha? Mbwino thunemukangania emibere y’Ekikristayo thukakolongana n’abandi? Thwamalhangira ah’eryuwania, ambi ithwahulikirira ndeke ebihano bya Yehova ‘ebikaha amenge oko yukabulhagho.’​—Esy. 19:7.

9. “Abakasekereraya” bakakanganaya bathi ku bakaghana amenge?

⁹ Egurupu eyakabiri ey’abandu abakagheghena amenge wa Nyamuhanga ‘b’abakasekereraya.’ Hakanayira ithwabana abandu ng’abo omw’ithulira. Kikabatsemesaya erisekererya abandi. (Esy. 123:4) E Biblia muyabugha yithi omwa biro by’enyuma-nyuma, hasyabya abasininguli kutse abakasekereraya. (2 Pet. 3:3, 4) Ng’abakwe b’omuthunganene Loti, abandi munabwire si balihulikirira erikunga lya Nyamuhanga. (Enz. 19:14) Abangyi bakasekerera abakaghendera okwa misingyi ye Biblia. Abakasekereraya “bakakwama esyongumbu syabo nyibi.” (Yuda 7, 17, 18) Ebya Biblia yikabugha okwa bakasekereraya bihambene ndeke n’emibere y’abakayisamambulha okw’ikirirya n’abandi ababirighana Yehova!

10. Ngoku kiri omwa Esyonyimbo 1:1, thwanga yihighulha thuthi okwa bakasekereraya?

¹⁰ Thwanga yitheya thuthi okw’ikwama enzira y’abakasekereraya? Enzira nguma ly’eriyihighulha okw’inywana abawithe omuthima w’eritsambulikania abandi. (Soma Esyonyimbo 1:1.) Obo kwesi sithutholere thukahulikirira kutse erisoma ekyosi-kyosi eky’abakayisamambulha okw’ikirirya. Thukaminya ngoku thwamathendi yitheya, ikyangana thwolhobera eribya mw’omuthima w’eritsweba n’eritsuka erithika-thikira Yehova n’obusondoli obwa thukabana omwa kithunga kiwe. Eriyihighulha okw’ekyo, ithwangana yibulya: ‘Mbwino nganabera eriyineghenia thukabana obusondoli buhyaka kutse enzoborera ndebe? Nganawithe  omubere w’erisondekania omw’abakasondolha mw’ebisobyo?’ Thwamahengulha emibere ng’eyo omwa byalhuba, Yehova akathutsemera.​—Emi. 3:34, 35.

11. “Abakiru” bakalhangira bathi ebihano bya Yehova eby’esyongeso?

¹¹ Egurupu yakasathu ey’abandu abakaghana amenge ‘b’abakiru.’ Ni bakiru kundi bakaghana erighendera okwa bihano bya Nyamuhanga eby’esyongeso. Bakakolha ebya bakalhangira bathi by’ebihikire omo meso wabu. (Emi. 12:15) Abandu ng’abo bakaghana Yehova, Enzuko y’amenge. (Esy. 53:1) Thukabya thukababana omw’ithulira, mughulhu mungyi bakathutsamba busana n’erisikya ebihano bya Biblia. Aliwe sihali ekibuya ekyo bangaha. E Biblia yikabugha yithi: “Amenge alhabire olhulengo lhw’omukiru; syali kumbulha obuno bwiwe bw’okwa lhukyo.” (Emi. 24:7) Abakiru sibawithe kyosi-kyosi eky’amenge ekyo bangaha. Kwesi ky’ekikaleka Yehova iniathukunga athi ‘thulhue embere sy’omundu mukiru’!​—Emi. 14:7.

12. Ni byahi ebikendi thuwathikya erighana enzira y’abakiru?

¹² Erithendibya ng’abandu abakapona erihabulha lya Nyamuhanga, ithwe thukanza emibere akakoleramo emyatsi, imwamuli n’ebihano biwe ebyosi. Thwangana ghumya olhwanzo olho omw’ilinganisya ebikalhwiririra omw’ibya bowa n’omw’ithendibya bowa. Lebaya ebitsibu ebyo abandu bakayilethera busana n’erighana ebihano bya Yehova eby’amenge omwa bukiru. Neryo lebaya ngoku engebe yawu yuwene busana n’eriowa Nyamuhanga.​—Esy. 32:8, 10.

13. Mbwino Yehova akanathukaka erighendera okw’ihabulha liwe ly’amenge?

¹³ Yehova akalhangira athi abosi bakahebawa amenge, aliwe syalikaka owosi-wosi erilighagho. Aliwe akabugha ebikahika okwa bathe hulikirira amenge. (Emi. 1:29-32) Abakathwamu erithendiowa Yehova “basyalya okwa bighuma by’enzira yabu.” Endambi yikendi syahika, emibere bakathwaliramo engebe yabu iyabalethera obulighe, ebitsibu, n’erighunzerera ibathoghothibwa. Okwa lhundi lhuhandi, abakahulikirira erihabulha lya Yehova ery’amenge n’erighendera kulyo bakalhaghanisibawa bino: “Oyukanyowa asyikalha ndeke, kandi asyabya buholho butsira eryubaha ly’ebibi.”​—Emi. 1:33.

14-15. Thuk’ighaki omwa Emisyo 4:23?

¹⁴ Thukabya thukaghendera okwa menge wa Nyamuhanga, mughulhu wosi thukaghasirawa. Ngoku thwabirilhangira, Yehova akalhangira athi erihabulha ly’amenge likabanika ahathe erithuha. Ng’eky’erileberyako, omwa kitabu ky’Emisyo, akathuha erihabulha erithehwa okwa buthuku eryanguwania engebe yethu thwamalighenderako. Thulebaye eby’erileberyako bbini eby’erihabulha ly’amenge ng’eryo.

¹⁵ Theghaya omuthima wawu w’omusyo. E Biblia yikabugha yithi: “Theghaya omuthima  wawu n’omuhwa wosi; kusangwa mugho mukalhua esyongununuko sy’engebe.” (Emi. 4:23) Thalengekania okwa bya thutholere ithwakolha eritheya omuthima wethu owonyine-nyine. Thutholere ithwalya ebyalya eby’ekirisya, ithwakolha ebisasayizi ebikaghunza, n’eriyihighulha okwa mitse mibi. Ebiri ng’ebyo byathukanakolha eritheya omuthima wethu w’omusyo. Obuli kiro thukayirisaya Ekinywe kya Nyamuhanga. Thukathegheka emihindano y’Ekikristayo n’erihindana kuyo kandi thukasangira muyo. Thukalhangira thuthi thukabya ithunemusangira mughulhu wosi omwa mubiiri w’erithulira. Kandi thukayihighulha okw’ibya n’emitse mibi omw’iyihighulira ighuma okwa kyosi-kyosi ekyanga tsandya amalengekania wethu, ng’eriyitsemesya eririmo eby’obutswatswa n’abanywani babi.

16. Busana naki ebiri omwa Emisyo 23:4, 5 ni by’omughaso munabwire?

¹⁶ Tsemera ebya wuwithe. E Biblia yikaha erihabulha lino: “Siwuyilhuhaye eribya ow’ebindu; . . . Wukahaghurira ameso oko bitheho kwehi? Kusangwa kwenene ebindu bikayikolera ebipupa, ng’erisamba likaghulhuka erilholya omo kyanya.” (Emi. 23:4, 5) Ebindu byangana hwaho endambi ni ndambi. Nomwabine, munabwire abagaga n’abanakwa abosi bakayihweraya omw’isondekania esyosente. Eriyisurusuthya eri mughulhu mungyi likaleka ibabya n’emibere eyikendi batsandya kw’erina, obughuma bwabu, nibya n’amaghalha wabu. (Emi. 28:20; 1 Tim. 6:9, 10) Okwa lhundi lhuhandi, amenge akaleka ithwabya n’amalengekania awatholere okwa syosente. Amalengekania ng’ayo akathutheghaya okwa mururu kandi inialeka ithwatsemera ebya thuwithe kandi ithwabana etseme.​—Omu. 7:12.

17. Thwanga bana thuthi “olhulimi lhw’ab’amenge,” ngoku kiri omwa Emisyo 12:18?

¹⁷ Lengekanaya wuthe wabugha. Thwamathendi yitheya, ebya thukabugha ibyangana letha ebitsibu bingyi. E Biblia yikabugha yithi: “Hali oyukabugha buthalengekania ng’eritsimitha ly’omuyali; nikwa olhulimi lhw’ab’amenge ni lhamya.” (Emi. 12:18) Thukaleka ihabya ihane obughuma thukayihighulha okw’ithonga abandi busana n’ebisobyo byabu. (Emi. 20:19) Emibughire yethu erithoka erilhamya omwakanya  k’erihuthalya, thutholere ithusulya omuthima wethu mw’eriminya erikalhua omwa Kinywe kya Nyamuhanga. (Lk. 6:45) Thwamaghanirya okwa bya Biblia yikabugha, ebinywe byethu ibyanganabya ‘ng’engununuko y’amenge’ eyikahumulikanaya abandi.​—Emi. 18:4.

18. Erighendera okwa Emisyo 24:6 kyanga thuthokesya kithi omubiiri w’erithulira?

¹⁸ Ghendera okwa busondoli. E Biblia yikaha erihabulha erikathuthokesaya, lino: “Kusangwa busana n’erihana ly’amenge wasyayalhwa; n’omo ndeko y’abahani hali obuholho.” (Emi. 24:6) Thalengekania ngoku erighendera okwa musingyi oyu kikaleka ithwathoka omubiiri wethu w’erithulira n’erikangirirya. Omwakanya k’erikolesya esyethu nzira sy’erithulira, thukalengaho erighendera okwa menge agho thukahebawa. Thukabana obusondoli bw’amenge okwa mihindano yethu y’Ekikristayo, eyo abahabuli abasi bingyi bakalhabaya emikania eyiseghemere okwa Biblia n’ebitsweka erithuthendeka. Eryongera okw’ekyo, ekithunga kya Yehova kikathuha eby’erikolesya eby’omughaso​—ebitabu n’esyovidiyo—​ebyangana wathikya abandu eriyitheghererya e Biblia. Wunemw’igha erikolesya ndeke ebindu ebi?

19. Wukayowa wuthi okwa menge agho Yehova akaha? (Emisyo 3:13-18)

¹⁹ Soma Emisyo 3:13-18. Ka thukasima kutsibu busana n’amenge awuwene awali omwa Kinywe kya Nyamuhanga! Thwangabere hayi kuthuthabya nagho? Omo mwatsi ono, thwamabirikania okwa by’erileberyako by’amenge aw’akakolha awali omwa kitabu ky’Emisyo. Ni kwenene, omwa Masako wosi muli ebinywe by’amenge ebyo Yehova abirithuha. Kwesi mughulhu wosi thuthwemu erighendera okwa menge agho Yehova akathuha. Okw’ithwe, emibere ekihugho kikathwaliramo amenge ng’ayo si kikulhu; thukaligha ngoku ‘obutseme buli oko buli mundu oyukamakiriragho.’