1. Ni maha wahi agho Yehova abirithuha?

 YEHOVA abirithuha amaha mabuyanga aw’engebe y’erikotha. Abandi bawithe amaha w’erisyabya elhubulha kera na kera ng’ebihangikwa eby’ekirimu ebitheholha. (1 Kor. 15:50, 53) Aliwe, abangyi bawithe amaha aw’erisyabya okwa kihugho kera na kera ibanawithe amaghalha awahikene n’etseme. (Erib. 21:3, 4) Mbulha thulindirire engebe y’erikotha omwa lhubulha kutse okwa kihugho, thukalhangira amaha wethu mwa w’obughuli.

2. Amaha wethu aseghemere okuki, kandi busana naki ithwabugha thuthya?

² Ekinywe “amaha,” ngoku kikolesibirwe omwa Biblia, kyangana manyisya “erilindirira ebindu ebyuwene ebikayabya.” Amaha wethu busana n’obuthuku obukasa ni w’okwenene kundi akalhua oku Yehova. (Abar. 15:13) Thunasi ebyo abiriyilhagha, kandi thunasi ngoku mughulhu wosi akaberereraya ebyo akabugha. (Emig. 23:19) Thuyikethere ngoku Yehova anzire kandi awithe amaaka w’eriberererya obuli kindu ekyo abiribugha athi akendi syakolha. Busana n’ekyo, amaha wethu syaseghemere okwa binyambwirwa kutse okwa malengekania buyira; aseghemere oko bwema obulhangirikire kandi ni w’okwenene.

3. Thukendi kania okuki omo mwatsi ono? (Esyonyimbo 71:5)

³ Thatha wethu w’elhubulha athwanzire, kandi anzire ithwamuyikethera. (Soma Esyonyimbo 71:5.) Amaha wethu omu Yehova amabya inianaghumire, ithukendi thoka erighumira ebitsibu n’erilindirira obuthuku obukasa ithune bathubaha kandi ithunatsemire. Thulebaye ngoku amaha wethu akathutheghaya. Okw’ekyo, thutsuke erilebya ngoku amaha ali ng’enaanga kandi ng’esapeho y’ekyuma. Neryo thwanalebya ngoku thwanga ghumya amaha wethu.

4. Amaha ali athi ng’enaanga? (Abaebrania 6:19)

⁴ Omwa baruha yiwe okwa Baebrania, omukwenda Paulo mwalinganisya amaha wethu n’enaanga. (Soma Abaebrania 6:19.) * Mughulhu mungyi Paulo iniakalhaba omwa syongetse, neryo abya inianasi ngoku esyonaanga sikaleka ekiyagha ikithaheka obwathu. Buthuku bughuma, abya iniane omwa bwathu ekiyagha kinene kikahitha. Omwa kiyagha ekyo, mwalhangira abakaghendaya obwathu bakaghusa esyonaanga sy’omwa maghetse nuku ekiyagha sikiheke obwathu neryo bukayayihinda okwa syonguka. (Emib. 27:29, 39-41) Ngoku enaanga yikanaleka obwathu ibwasika, amaha wethu akaleka ithwasika nuku sithuyisununule oku Yehova thukabana ebitsibu ebikalire. Amaha wethu akathuwathikaya erilhaba omwa bitsibu ebiri ng’ekiyagha kundi thuyikethere ngoku obuthuku obuthekene buli hakuhi-kuhi. Wibuke, Yesu mwabugha athi thukendi syendereribwa. (Yn. 15:20) Neryo erighanirya okwa bya Yehova abirithulhagha kikaleka ithwalholha embere erimukolera.

5. Amaha mwaghumya athi Yesu omughulhu abya w’eriholha?

⁵ Thalhangira amaha nga mwaleka athi Yesu iniabya inianasikire nomwanabya w’eriholha olhuholho olhukanubaya. Okwa Pentekote 33 E.K., omukwenda Petero mwasuba omo buminyereri obuli omwa kitabu ky’Esyonyimbo obukakanganaya ndeke ngoku Yesu abya inianathekene: “Omubiri waghe asyabana amaha, kusangwa siwendi sigha ekirimu kyaghe omo Kulimu, kutse siwendi syaleka omubuyirire wawu erilholha okw’ihonda. . . . Embere syawu wasyanyusulya n’obutseme.” (Emib. 2:25-28; Esy. 16:8-11) Nomwakine indi Yesu abya inianasi ngoku angaholire, abya inianawithe amaha awaghumire ngoku Nyamuhanga angamulhubukirye kandi kw’angabwene etseme y’erithasyabya haghuma na Thatha wiwe elhubulha.​—Ebr. 12:2, 3.

6. Mughalha wethu mughuma mwabugha athiki okwa maha?

⁶ Amaha wethu w’Ekikristayo abirileka abangyi b’okwa balikyethu ibayiyinia. Thalengekania okwa ky’erileberyako kya Leonard Chinn, mughalha wethu omuthaleghulha oyuwabya ikere e England. Omwa Olhuhi lhw’Erimbere olhw’Ekihugho kyosi, mwahirwa omwa ngomo habw’erighana eringira omwa mahe. Mwaghunza amezi abiri iniane omwa kisenge ky’engomo mw’eyuwene, n’enyuma waho amakolesibwa emibiiri eyikalha-kalire. Enyuma waho mwahandika athi, “Ebya nalhabamo mubyaleka ingalhangira ngoku amaha akathuwathikaya eriyiyinia. Thuwithe eky’erileberyako kya Yesu, abakwenda, n’abaminyereri, kandi thuwithe n’emilhaghe mibuyanga eyiri omwa Biblia. Ebyosi ebi bikathuha amaha awaghumire kutsibu aw’obuthuku obukasa kandi ibyaleka ithwayiyinia.” Oku Leonard, amaha mwabya ng’enaanga, n’okw’ithwe anganabya ng’enaanga.

7. Ebitsibu bikaghumaya bithi amaha wethu? (Abanya Roma 5:3-5; Yakobo 1:12)

⁷ Thukabya thwabiriyiyinirya ebitsibu n’eriyilhangirira obuwathikya bwa Yehova kandi kw’akathusima, amaha wethu akongera erighuma. (Soma Abanya Roma 5:3-5; Yakobo 1:12.) Neryo thukabya n’amaha awaghumire kwilhaba agho thwabya nagho thukatsuka eriligha engulhu yuwene. Sitani anzire ebitsibu byethu ibyathubundamirya, aliwe busana n’obuwathikya bwa Yehova thwangana yiyinirya ndeke obuli kitsibu.

8. Amaha ali athi ng’esapeho y’ekyuma? (1 Abanya Tesalonika 5:8)

⁸ E Biblia kandi yikalinganisaya amaha wethu n’akakira [asapeho y’ekyuma]. (Soma 1  Abanya Tesalonika 5:8.) Omusirikali iniakambalha esapeho eyi eritheya omuthwe wiwe okwa misoha eyo esyonzighu siwe syabya sikalengaho erimughusako. Omwa malhwa wethu w’obunyakirimu, thutholere ithwatheya obulengekania bwethu okwa bithegho bya Sitani. Akathulethera ebitsibu n’amalengekania muthina-muthina erianza eritsandya obulengekania bwethu. Ngoku esapeho y’ekyuma yikanatheghaya omuthwe w’omusirikali, amaha wethu akatheghaya amalengekania wethu nuku thusighale bathaleghulha oku Yehova.

9. Ni byahi ebikalhwiririramo abandu bamathendibya n’amaha?

⁹ Amaha wethu aw’engebe y’erikotha akendi thuwathikya erikolha omwa menge n’omwa buyitheghererya. Okwa lhundi lhuhandi, amaha wethu amatseka kandi thukalighira amalengekania w’ekinyamubiri eribya omwa bulengekania bwethu, ithwanga n’ibirirwa ekilhubirirwa kyethu eky’engebe y’erikotha. Thalengekania okwa bandi Bakristayo ababya omwa Korinto kera. Amaha wabu omwa mulhaghe mukulhu wa Nyamuhanga mwahwa​—amaha w’erilhubuka. (1 Kor. 15:12) Paulo mwabugha athi abathawithe amaha aw’obuthuku obukasa bakabyaho busana na munabwire musa. (1 Kor. 15:32) Munabwire abanene abathawithe amaha omwa milhaghe ya Nyamuhanga bakabya omo ngebe eya nzangwa-nalya. Aliwe ithwe, thukayikethera obuthuku obukasa obwa Yehova abirithulhagha. Amaha wethu akakolha ng’esapeho y’ekyuma eritheya amalengekania wethu n’erithutheya okwanza engebe y’eriyitsomana ithwibene eyanga tsandya obughuma bwethu na Yehova.​—1 Kor. 15:33, 34.

10. Amaha angathutheya athi okwa malengekania awawire?

¹⁰ Esapeho yethu y’amaha kandi yangana thutheya okw’ilengekania thuthi sihali ekyangaleka thukalengaho eritsemesya Yehova. Ng’eky’erileberyako, omundu anganabugha athi: ‘Ingye sinendisyabya okwa bakendi syabyaho kera na kera. Singatholere nahake. Sinanga thoka erighendera okwa bihano bya Nyamuhanga.’ Wibuke ngoku omuhumulikania w’amabehi wa Yobu ya Elifasi mwakolesya ebinywe ng’ebyo akaghanirya na Yobu. Elifasi mwabugha athi: “Omundu niki, athi abye mubuya kwehi?” Mwongera eribugha oku Nyamuhanga athi: “Lebaya, syali yikethera ababuyirire biwe; egha, n’ekyanya si kibuya omo meso wiwe.” (Yobu 15:14, 15) Aya ka ni mabehi awakalire! Wibuke ngoku amalengekania ng’ayo akalhua oku Sitani. Anasi ngoku wamalighira amalengekania ng’ayo erikubyamo, amaha wawu iniakendi ghenda akahwa. Omwakanya k’ekyo, ghana amabehi ng’ayo neryo hweraya amalengekania okwa milhaghe ya Yehova. Isiwathika-thikira eky’eribugha indi anzire iwabyaho kera na kera n’eky’eribugha athi akendi kuwathikya erihika okwa kilhubirirwa ekyo.​—1 Tim. 2:3, 4.

11. Busana naki thutholere ithwaghumisirizya thunemulindirira amaha wethu eriberereribwa?

¹¹ Si kyolho mughulhu wosi erilholha embere erighumya amaha wethu. Ithwangana lemwa erighumisirizya thukalinda Yehova. Aliwe, Yehova ni wa kera na kera, kandi amalengekania agho awithe oko ndambi ali mbaghane okwa wethu. (2 Pet. 3:8, 9) Akendi syaberererya ekighendererwa kiwe omwa nzira eyuwenenga, aliwe angana ghan’ikiberererya okwa ndambi eya thulengekenie. Ni kyahi ekyanga thuwathikya eribya ithunemughumya amaha wethu omw’ighumisirizya thunalindirire Yehova eriberererya emilhaghe yiwe?​—Yak. 5:7, 8.

12. Ngoku kiri omwa Abaebrania 11:1, 6, amaha ahambene athi n’erikirirya?

¹² Amaha wethu akendyongera erighuma thwamasighalha ithune hakuhi na Yehova, oyukendi syaberereryagho. Omo kwenene, e Biblia yikakanganaya ngoku ithwe eribya n’amaha thutholere ithw’ikirirya ngoku Yehova aneho kandi  “kw’akahemba abakamusonda-sonda.” (Soma Abaebrania 11:1, 6.) Thwamabirikirirya ngoku kwenene Yehova aneho, thukongera eriyikethera kw’akendi syaberererya ebyosi ebyo abiriyilhagha. Thulebaye esyonzira esya thwanga kamathiryamo obughuma bwethu na Yehova nuku thulhole embere erighumya amaha wethu.

13. Thwanga yithunda thuthi hakuhi na Nyamuhanga?

¹³ Saba Yehova, kandi soma Ekinywe kiwe. Nomwakine indi sithwanga lhangira Yehova, thwangana yithunda hakuhi nayu. Thwangana kania nayu omw’isaba, ithunayikethere kw’akendi thuhulikirira. (Yer. 29:11, 12) Thwangana hulikirira Nyamuhanga omw’isoma e Biblia n’erighanirya kuyo. Thukabya thukasoma okwa mibere Yehova atsomaniramo ababya bathaleghulha kera, amaha wethu kwa kan’ongera athya erighuma. Ebyosi ebiri omwa Kinywe kya Nyamuhanga “byasakawa busana n’erithukangirirya. Neryo Amasako akathuha eriyitsingirira n’erihanda omuthima, ithwathoka eribya n’amaha.”​—Abar. 15:4.

14. Busana naki iwalengekania okwa bya Yehova abirikolera abandi?

¹⁴ Ghaniraya okwa mibere Yehova abiriberereryamo emilhaghe yiwe. Thalengekania okwa ebya Nyamuhanga akolera Abrahamu na Sara. Mubakulha omo myaka bamabya isibangabutha. Nomubyanabya bithya, Nyamuhanga mwabalhaghanisya athi bangabuthire omwana. (Enz. 18:10) Abrahamu mwakolhaki? E Biblia yikabugha yithi: “Abrahamu mwikirirya . . . Busana n’eki mwabya thatha w’ebihanda bingyi.” (Abar. 4:18) Nomwakine indi okwa malengekania w’abandu muhabya nga sihakiri maha, Abrahamu abya inianayikethere ngoku Yehova angaberererye omulhaghe Wiwe. Yehova mwathalhabirya omulhume muthaleghulha oyo y’ahisi. (Abar. 4:19-21) Emyatsi ng’eyo yikathukangiriraya ngoku mughulhu wosi thwangana yikethera ngoku Yehova akendi berererya emilhaghe yiwe, nomukyangalhangirika nga sikyanga thokekena.

15. Busana naki thutholere ithwalengekania okwa bya Nyamuhanga abirithukolera?

 ¹⁵ Lengekanaya okwa bya Yehova abirikukolera. Thalengekania nga wabirighasirwa wuthi omw’ibererera ly’emilhaghe eyiri omo Biblia. Ng’eky’erileberyako, Yesu abirilhaghanisya athi Thatha wiwe akendi syakuha ebya wukayithagha. (Mt. 6:32, 33) Yesu kandi abirikukakasya ngoku Yehova akendi kuha omulimu abuyirire wukasabagho. (Lk. 11:13) Yehova abiriberererya emilhaghe eyo. Obundi wangana lengekania okwa yindi milhaghe eyo abiriberererya busana nawu. Ng’eky’erileberyako, akayilhagha erikughanyira, erikuhumulikania, n’erikulisya bunyakirimu. (Mt. 6:14; 24:45; 2 Kor. 1:3) Wamaghanirya okwa bya Nyamuhanga abirithakukolera, iwukendi ghumya amaha wawu omwa bya kendi syakukolera omwa buthuku obukasa.

16. Busana naki amaha ni kihembo ky’obughuli?

¹⁶ Amaha wethu w’engebe y’erikotha ni kihembo ky’obughuli erilhua oku Nyamuhanga. Thulindirire kutsibu obuthuku obukasa obuwenenga​—obwa thutholere ithwaligha ahathe erithika-thika ku bukendi syabya. Amaha akakolha ng’enaanga yethu, erithusikya nuku thuyiyiniraye ebitsibu, thwimanire eriendereribwa, nibya nomulyangabya in’ikwa. Akakolha ng’esapeho y’ekyuma, eritheya amalengekania wethu nuku thughane ebiwire n’eryamakirira ebihikire. Amaha wethu awaseghemere okwa Biblia akathuthunda hakuhi na Yehova n’eribisulha obunene bw’olhwanzo olhw’athuwithire. Thukaghasirawa kutsibu thukongera erighumya maha wethu.

17. Busana naki amaha wethu akakolhaya okwa tseme?

¹⁷ Omwa baruha yiwe okwa Banya Roma, omukwenda Paulo mwathuhira mw’omuhwa ‘w’eritsema omo maha.’ (Abar. 12:12) Paulo angatsemire kundi aby’akakasirye ngoku amasighalha muthaleghulha, angabwene engebe y’erikotha omwa lhubulha. Nethu thwangana tsema omo maha wethu kundi thukakasirye ngoku Yehova akendi syaberererya emilhaghe yiwe. Ngoku omuhandiki w’esyonyimbo anahandika, “obutseme buli n’omundu . . . oyukayikethera Omwami Mukulhu Nyamuhanga wiwe, . . . Oyukaberereraya esyondaghane siwe ebiro byosi.”​—Esy. 146:5, 6.