1-2. (a) Ni byahi ebyo esindi gavumente syabirikolha okwa bandu ba Yehova, aliwe abandu biwe babirikolhaki? (b) Eriendereribwa lyanga letha lithi etseme? (Kanaya n’okwa kisasani ky’okwa kidipa.)

 NGA lino, omubiiri wethu aneko olhukako kutse erimanibwa omwa bihugho ebilhabire omu 30 omo kihugho kyosi. Omwa bighuma by’okwa bihugho ebyo, ab’ehamuli babirihira balikyethu b’omwa ngomo. Ni kibi kyahi ekyo bakolire? Embere sya Yehova, sihali. Ekyo bakolire ly’erisoma e Biblia n’erighayo, eribwira abandi b’okwa bya bikirirye, n’erihindana haghuma n’abikirirya balikyabo. Kandi babirighana eky’eribya na lhuhandi omwa by’ekipolitiki. Nomuhane erihakanisya erikalire, abaghombe ba Nyamuhanga abathaleghulha aba babirisighalha bathaleghulha *​—erikangania ku babiriyiherayo ighuma oku Yehova. Kandi batsemire erikolha ekyo!

² Obundi wabirilhangira ebisasani by’abaghuma b’okwa Bema aba abathubaha n’eribalhangira ibanemusenyenyia. Batsemire kundi banasi ngoku Yehova akabatsemera busana n’erisighalha bathaleghulha okw’iyo. (1 Emy. 29:17a) Yesu mwabugha athi: “Obutseme buli oko babiriendereribwa busana n’erithunganene . . . Mutseme, mutsange kutsibu, kusangwa olhuhembo lhwenyu ni lhungyi.”​—Mt. 5:10-12.

3. Ngoku kiri omwa Emibiri 4:19, 20, abakwenda mubakolhaki bak’endereribwa, kandi busana naki?

³ Balikyethu banemulhaba omwa ebyo abakwenda baghumira  omwa kighana ky’erimbere bak’endereribwa busana n’erithulira abandi oku Yesu. Abatsweri b’omwa koti ngulhu y’Abayuda ibakabera erihanabo “bathi si babughe kandi omo lina lya Yesu.” (Emib. 4:18; 5:27, 28, 40) Abakwenda mubakolhaki? (Soma Emibiri 4:19, 20.) Mubaminya ngoku ow’obuthoki bw’endatha kutsibu abya ‘iniabiribahana athi bakangiriraye engulhu yuwene oko bandu,’ n’eriha obwema obuhambire oku Kristo. (Emib. 10:42) Neryo esyombuyi syabu, ya Petero na Yoane, buthubaha mubabugha bathi bakendi kenga Nyamuhanga kwilhaba abatsweri abo kandi mubabugha bathi sibanga leka erikania oku Yesu. Erithwalira haghuma, mubabya nga bamabulya ab’obuthoki abo bathi, ‘Mukanza eribugha muthi ebihano byenyu birengire ebya Nyamuhanga?’

4. Ngoku kiri omwa Emibiri 5:27-29, ni ky’erileberyako kyahi ekyo abakwenda bahiriraho Abakristayo abosi ab’okwenene, kandi thwanga bagherererya thuthi?

⁴ Abakwenda mubahiraho eky’erileberyako ekyuwene ekyo Abakristayo abosi b’okwenene babirikwama, ni bugha ambu, ‘erikenga Nyamuhanga kwilhaba abandu.’ (Soma Emibiri 5:27-29.) Babere babiriswiribwa busana n’erisighalha bathaleghulha, abakwenda mubalhua omwa koti ngulhu y’Abayuda “ibanemutsema bathi Nyamuhanga akaghanzabo ng’abatholere erihemulhwa busana n’erina lya Yesu,” kandi mubalholha embere erithulira!​—Emib. 5:40-42.

5. Ni bibulyo byahi ebya thutholere ithwasubirya?

⁵ Eky’erileberyako ekya bakwenda bahiraho kikaleka ihabya ebibulyo birebe. Ng’eky’erileberyako, erithwamu lyabu ly’erikenga Nyamuhanga kwilhaba abandu mulyahambana lithi n’ekihano kye Biblia ekikabugha kithi obuli omundu “akenge abathabali b’ekihugho”? (Abar. 13:1) Thwanga ‘yolhobeka thuthi oko bathabali, n’ab’ehamuli,’ ngoku omukwenda Paulo abugha, kandi ithwabya ithune bathaleghulha oku Nyamuhanga ng’Omuthabali wethu mukulhu kutsibu?​—Tito 3:1.

6. (a) Ngoku kiri omwa Abanya Roma 13:1, thuwithe lhukwamirwaki embere sy’abathabali b’ekihugho? (b) Ni kyahi ekihikire bikahika okwa bathabali bosi b’ekihugho?

⁶ Soma Abanya Roma 13:1. “Ab’ehamuli”  bawithe obuthoki kandi bakathabalha oko bandi. Abakristayo ni b’erighondera abathabali b’ekihugho aba. Abathabali abo bakaleka ihabya obuyithondeke, ibalhangira bathi ebilhaghiro bikaghenderawako, n’okwa bundi buthuku bakalhwira okwa bandu ba Yehova. (Erib. 12:16) Ky’ekikaleka, ithwabwirwa indi thubahe emisolho, engemu, erikenga, n’erisikya ebyo bakasaba. (Abar. 13:7) Aliwe, esyogavumente sy’ekihugho esyo siwithe obuthoki kutse ehamuli kundi Yehova akalighirasyo eribya n’ehamuli eyo. Yesu mwakangania ndeke-ndeke omusingyi oyu Omuthabali Omuroma ya Pontio Pilato akamuthondesya. Pilato abere akakania okwa hamuli eyo aby’awithe ey’eribalya engebe ya Yesu kutse ey’erimwitha, Yesu mwamubwira athi: “Siwangabya n’ehamuli okw’ingye wuthalyahabawayo na Nyamuhanga.” (Yn. 19:11) Ngoku kyanabya oku Pilato, munabwire ehamuli y’abathabali n’abanya politiki abosi ab’ekihugho yinawithe olhubibi.

7. Ni mwa mibere yahi sithutholere thukaghondera abathabali b’ekihugho, kandi ni kyahi ekya batholere ibaminya?

⁷ Abakristayo bakaghondera ebilhaghiro by’esyogavumente byamabya isibir’ithwa ebihano bya Nyamuhanga. Aliwe sithwang’owa abandu bamabugha bathi thukole ebyo Nyamuhanga akathanga kutse bakathuthanga erikolha ebyo Nyamuhanga akayithagha. Ng’eky’erileberyako, ibangananza abalhwana bahambe esyombundu erilhwira okwa lihanga lyabu. * Kutse bangana thanga e Biblia yethu n’ebitabu byethu ebiseghemere okwa Biblia kandi ibathuthanga erithulira n’eriramya haghuma. Abathabali bakabya bakakolesya nabi ehamuli yabu, ng’eriendererya abigha ba Kristo, bakabya ibaliko olhubanza embere sya Nyamuhanga. Yehova analhangire!​—Omu. 5:8.

8. Hali mbaghaneki ahakathi-kathi ka Yehova n’ab’ehamuli?

⁸ Esyogavumente siwithe obuthoki bw’endatha aliwe sisiwithe obuthoki bw’endatha kutsibu. Yehova yuwithe obuthoki obw’endatha kutsibu. Mirundi mingyi omwa Biblia akahulhawamo “ow’Obuthoki bw’Endatha Kutsibu.”

9. Omuminyereri Danieli mwalhangiraki omwa syonzoli?

⁹ Omuminyereri Danieli mwalhangira esyonzoli esyakanganaya ndeke-ndeke ngoku Yehova y’ow’obuthoki bw’endatha kutsibu okwa wandi mathabali wosi. Danieli mwatsuka erilhangira ebisoro binene-binene bbini ebikimanira amathabali w’amaaka awakera n’awa munabwire​—Babeli, Abamedi n’Abapersia, Gurisi, ne Roma n’obuthabali bw’amaaka obw’ekihugho kyosi, e Anglo-America. (Dan. 7:1-3, 17) Neryo Danieli mwalhangira Yehova Nyamuhanga inian’ikere okwa kithumbi ky’obwami ky’eritswera eky’elhubulha. (Dan. 7:9, 10) Ebyakwamako ebya muminyereri muthaleghulha oyo alhangira bikaghusa okwa bathabali abamunabwire kw’akasali.

10. Ngoku kiri omu Danieli 7:13, 14, 27, ni bahi abo Yehova akaha obuthoki bw’erithabalha ekihugho, kandi eki kikakanganayaki okw’Iyo?

¹⁰ Soma Danieli 7:13, 14, 27. Nyamuhanga mwalhusya okwa syogavumente sy’abandu kw’obuthoki n’ehamuli n’eribihererya abandi abatholere ndeke kandi abawithe amaaka manene. Ba bahi? Oko “oyusosire omughalha w’omundu,” Yesu Kristo, n’okwa ‘babuyirire b’ow’Obuthoki bw’Endatha Kutsibu,’ abandu 144,000 abakendi syathabalha “kera na kera.” (Dan. 7:18) Omo kwenene, Yehova ‘y’ow’Obuthoki bw’Endatha Kutsibu,’ kundi iyo musa yuwithe ehamuli y’erikolha ekiri ng’ekyo.

11. Ni kindi kyahi ekya Danieli ahandika ekikakanganaya ngoku Yehova y’ow’obuthoki bw’endatha kutsibu oko bihanda byosi?

 ¹¹ Ebya Danieli alhangira omwa syonzoli bihambene n’ebyo abya iniabirisangwa abugha. Danieli mwabugha athi: “Nyamuhanga w’elhubulha, akasingula [akalhusayaho] abami, kandi iniasingya abami.” Kandi mwahandika athi ‘ow’Obuthoki bw’Endatha Kutsibu akathabalha oko bwami bw’abandu, akahabo oko oyo anzire.’ (Dan. 2:19-21; 4:17) Mbwino hanabere obuthuku Yehova inialhusyaho kutse erihiraho abathabali? Ahathe erithika-thika!

12. Kera Yehova mwanalhusyaho athi abami b’okwa bithumbi byabu by’obwami? (Lebaya ekisasani.)

¹² Yehova abirikangania ndeke-ndeke ngoku yuwithe obuthoki bw’endatha kutsibu kwilhaba “abathabali b’ekihugho.” Thalengekania okwa by’erileberyako bisathu. Farao owe Misiri mwahira abandu ba Yehova b’omwa bukobe kandi mirundi mingyi mwaghana eribalhwika. Aliwe Nyamuhanga mwabalhusya omwa bukobe kandi amaleka Farao aholere omwa Ngetse y’Engulha. (Eri. 14:26-28; Esy. 136:15) Omwami Belsasari owe Babeli mwakolha omukonga kandi ‘amayihaghatha erilhwa n’Omukama w’elhubulha’ kandi ‘amapipa esyonyamuhanga sy’ekitsipa n’esyamaghetse,’ omwakanya k’eripipa Yehova. (Dan. 5:22, 23) Aliwe Nyamuhanga mwakehya omulhume w’emiyiheko oyo. Oko “kiro ekyo,” Belsasari mw’ithibwa n’obwami bwiwe mubwahebwa Abamedi n’Abapersia. (Dan. 5:28, 30, 31) Omwami Herode Agripa I owe Palestine mw’ithisya omukwenda Yakobo n’erihira omukwenda Petero y’omwa ngomo, inianawithe ekighendererwa ky’erimwitha. Aliwe Yehova mwakakirya Herode okw’iberererya ekighendererwa kiwe ekyo. “Omumalaika w’Omukama mwaswirya Herode,” amaholha.​—Emib. 12:1-5, 21-23.

13. Kera Yehova mwanakindira ighuma athi abathabali abayiyungire haghuma?

¹³ Kandi Yehova abirikangania obuthoki bwiwe bw’endatha kutsibu okwa bathabali abosi abayiyungire haghuma. Mwalhwira Abaisraeli, amabathokesya erithoghothya abami 31 abayiyungire haghuma abe Kanana n’erithoka erihamba amalhambu manene aw’Ekihugho Ekyalhaghanisibawa. (Yos. 11:4-6, 20; 12:1, 7, 24) Yehova kandi mwabawathikya erikindira ighuma Omwami Beni-hadadi n’abandi bathabali 32 abe Suria abalhwa n’Abaisraeli.​—1 Bam. 20:1, 26-29.

14-15. (a) Ni byahi ebya Omwami Nebukadneza n’Omwami Dario babugha okwa hamuli ya Yehova y’erithabalha? (b) Omuhandiki w’esyonyimbo mwabugha athiki oku Yehova n’ekihanda Kiwe?

 ¹⁴ Ngendo na ngendo, Yehova abirikangania ku ni w’obuthoki bw’Endatha Kutsibu! Omwami Nebukadneza owe Babeli abere ayihalhamba busana ‘n’amaaka w’obuthoki bwiwe na busana n’olhukengerwa lhw’erikangabasania liwe’ omwakanya k’erikangania ngoku Yehova Yutholere eripipwa, Nyamuhanga mwaleka atsande kw’omuthwe. Nebukadneza abere abirilhama, ‘mwapipa ow’Endatha Kutsibu’ kandi amaminya ngoku “erithabalha [lya Yehova] n’ithabalha lya kera na kera.” Mwongerako athi: “Sihali oyuwanga kakirya ebyalha biwe.” (Dan. 4:30, 33-35) Obuthaleghulha bwa Danieli oku Nyamuhanga bwabere bwabirilengwako, na Yehova abere abirimulhamya omwa kyuna ky’esyondale, Omwami Dario mwabugha athi: “Abandu bathithimane n’eryubaha embere sya Nyamuhanga wa Danieli; kusangwa iyo ni Nyamuhanga oyuliho, oyukothire kera na kera, n’obwami bwiwe ni bwami obuthendi syaheribwa; n’erithabalha liwe lyasyakotha erihika ko nduli.”​—Dan. 6:7-10, 19-22, 26, 27.

¹⁵ Omuhandiki w’esyonyimbo mwabugha athi: ‘Yehova akayira esyombiitha sy’ebihanda mo buyira, akalimaya eriyisunza ly’abandu.’ Mwongerako athi: “Obutseme buli oko kihanda ekiwithe Nyamuhanga mo Mwami Mukulhu; obutseme buli oko bandu abiriyisogha mo bandu biwe.” (Esy. 33:10, 12) Kwesi ka thuwithe enzumwa mbuya y’erisighalha bathaleghulha oku Yehova!

16. Ni yikethera lyahi erya thuwithe bikahika okwa “bulighe bunene,” kandi busana naki? (Lebaya ekisasani.)

¹⁶ Thwamabirisoma okwa bya Yehova akolha kera. Neryo ibbwa ni byahi ebya thulindirire hakuhi-kuhi aha? Thwangana yikethera ngoku Yehova akendi syalhamya abaghombe biwe abathaleghulha omwa “bulighe bunene” obukayasa. (Mt. 24:21; Dan. 12:1) Akendi syakolha eki omughulhu ebihanda ebiyiyungire  haghuma, ebyasibwe mwa Gogi owe Magogi, bikabambira abaghombe ba Yehova abathaleghulha omwa kihugho kyosi ahathe erikwa bulighe. Ebihanda ebiyiyungire haghuma ebyo nomubyangabyamo ebihugho byosi 193 ebikakolha ekithongole eky’Obughuma bw’Ebihanda (UN), sibyanga yirenga okwa w’Obuthoki bw’Endatha Kutsibu n’amahe wiwe w’elhubulha! Yehova akalhaghanisaya athi: “Nasyayihamya, n’eriyihighulha, n’eriyiminyisya omo meso w’ebihanda bingyi. Nabu basyaminya ko indi Mwami Mukulhu [Yehova].”​—Eze. 38:14-16, 23; Esy. 46:10.

17. Ni kyahi ekya Biblia yikabugha yithi kikendi syahika okwa bami b’ekihugho n’okwa bakasighalha bathaleghulha oku Yehova?

¹⁷ Eribambira lya Gogi likendi syakolya okwa lhuhi lhwa Yehova olhw’erighunzerera olhwe Harmagedoni akathoghothya “abami b’ekihugho kyosi.” (Erib. 16:14, 16; 19:19-21) Mbaghane n’ekyo, “abathunganene basyikalha omo kihugho. N’abahikene basyasighalha mukyo.”​—Emi. 2:21.

18. Abakristayo bangyi ab’okwenene babirithwamu erikolhaki, kandi busana naki? (Danieli 3:28)

¹⁸ Eritsuka kera, Abakristayo bangyi ab’okwenene babiritsama obwiranda bwabu nibya n’esyongebe syabu busana n’olhwanzo olhwa bawithire Yehova ng’oyuwithe Ehamuli y’Erithabalha. Babirisighalha bathaleghulha, abawithe erithwamu eriri ng’erya Abaebrania basathu abalhamibawa omw’irunga ly’omuliro busana n’erisighalha bathaleghulha oko w’Obuthoki bw’Endatha Kutsibu.​—Soma Danieli 3:28.

19. Yehova akendi syatswera abandu biwe erisighikira okuki, kandi thutholere ithwakolhaki lino?

¹⁹ Omuhandiki w’esyonyimbo ya Dawudi mwahandika okwa mughaso w’erisighalha muthaleghulha oku Nyamuhanga, athi: “Omwami Mukulhu ni mutsweri w’abandu bosi. Iwe Mwami Mukulhu wunyitswere ndeke, kusangwa sindi ko musango, kandi nyithunganene [muthaleghulha].” (Esy. 7:8) Kandi, Dawudi mwahandika athi: “Obuthaleghulha n’erithunganene ka binyitheghaye, kundi nga kuhirireko amaha.” (Esy. 25:21, NWT) Engebe ey’eribyamo eyuwene kutsibu ly’erisighalha bathaleghulha oku Yehova, erithendi lhwika erithunganene lyethu okw’iyo, nomuhangabyaki! Neryo ithukendi yowa ng’omuhandiki w’esyonyimbo oyuwahandika athi: “Obutseme buli n’abo abakalendera butsira malholho [abakasighalha ibane bathaleghulha], abakakwama emighambo y’Omwami Mukulhu.”​—Esy. 119:1.