1. Eribya “n’obwagha bwa Nyamuhanga” niki, kandi buhambene buthi n’etseme?

 ETSEME ey’okwenene sikwama kyabunyahirwa buyira erikasa kandi iryahwaho. Iyo yanganabyaho kera na kera omwa ngebe y’omundu. Yithi? Yesu mwasoborera omw’ikangirirya liwe ly’okwa kithwe athi: “Obutseme buli oko basi ko bali n’obwagha bwa Nyamuhanga!” (Mt. 5:3) Yesu abya inianasi ngoku abandu bahangikirwe ibanawithe eriyisunza linene ly’eriminya n’eriramya Omuhangiki wabu, Yehova Nyamuhanga. Eryo ly’eribya ‘n’obwagha bwa Nyamuhanga.’ Kandi kundi Yehova ni “Nyamuhanga oyutsemire,” n’abakamuramaya nabo bangana tsema.​—1 Tim. 1:11, NWT.

2-3. (a) Erikwamana n’ebya Yesu abugha, ni bandi bahi abanga tsema? (b) Thukendi kania okuki omo mwatsi ono, kandi busana naki kikayithayisibawa?

² Mbwino thutholere ithwabya omwa ngebe eyithe mw’ebitsibu imuthwatsema? Eyihi. Omw’ikangirirya liwe, Yesu mwabugha ekindu ekikaswekaya. “Abali n’obulighe”​—mbulha kundi babbunikire muthima busana n’ebibi byabu kutse banemulhaba omwa bitsibu ebikalire​—bangana tsema. Yesu mwabugha ikyan’ekyo okwa ‘bakendereribawa busana n’erithunganene’ kutse ‘abakatsumawa’ busana n’erikwama Kristo. (Mt. 5:4, 10, 11) Aliwe etseme ey’okwenene yanga thokekana yithi omwa mibere eyiri ng’eyi?

³ Yesu abya iniakathukangiriraya athi etseme ey’okwenene yikalhwiririra omw’ighuthya obwagha bwethu obw’obunyakirimu n’eriyithunda hakuhi na Nyamuhanga butsira omw’ibya ithune omwa ngebe eyuwene. (Yak. 4:8) Thwanga kolha ekyo kya thuthi? Omo mwatsi ono, thukendi kania okwa biika bikulhu bisathu ebyanga thukolya okwa tseme ey’okwenene.

4. Ni kiika kyahi eky’erimbere ekikakolhaya okwa tseme ey’okwenene? (Esyonyimbo 1:1-3)

⁴ EKIIKA 1: Erithoka eribana etseme y’okwenene, thutholere ithwayirisya ebyalya by’obunyakirimu. Abandu n’ebisoro bakayithagha ebyalya by’ekinyamubiri erithoka eribyaho. Aliwe abandu basa babangalya ebyalya by’obunyakirimu. Kandi thukabiyithagha. Ky’ekyaleka Yesu iniabugha athi: “Omundu syendi syabyaho busana n’obundu ibobwene, nikwa busana n’obuli kinywe ekikalhua omo buno bwa Nyamuhanga.” (Mt. 4:4) Busana n’ekyo sithutholere thukalhabya ekiro n’ekighuma isithuthayirisya ebyalya by’obunyakirimu erilhua omwa Kinywe kya Nyamuhanga eky’obughuli, e Biblia. Omuhandiki w’esyonyimbo mwabugha athi: ‘Obutseme buli n’omundu oyo emighambo ya Yehova ni butseme bwiwe, kandi ak’ighayo omo musibo n’omo kiro.’​—Esyonyimbo 1:1-3.

5-6. (a) Ni byahi ebyo thwang’igha omwa Biblia? (b) Erisoma e Biblia lyanga thuwathikya omwa nzira syahi?

⁵ Kundi Yehova athwanzire, abirithukangania omwa Biblia mw’ebya thwanga kolha erithoka eribana etseme. Thukaminya ng’athuwithire kighendererwaki. Thukaminya ngoku thwanga yithunda hakuhi nayu kandi ithwaminya nga thwanga kolhaki iyo erithughanyira. Kandi thuk’igha okwa maha mabuyanga agho abirithulhaghanisya busana n’obuthuku obukasa. (Yer. 29:11) Ekwenene eya thukabana eyi omw’igha lye Biblia yikaleka ithwatsema kutsibu!

⁶ Ngoku thunasi, e Biblia kandi yoswire mw’erihabulha eryo thwanga ghenderako omo ngebe ya buli kiro. Thwamaghendera okw’ihabulha eryo, ithwangana bana etseme.  Omughulhu wukayowa iwabirihwa amani busana n’ebitsibu, ghunza buthuku iwunemusoma Ekinywe kya Yehova kandi kighanirayeko. Yesu mwabugha athi: “Obutseme buli oko bakowa ekinywe kya Nyamuhanga n’erikolhakyo.”​—Lk. 11:28.

7. Wanga ghasirwa wuthi omwa ndambi eyo wukaghunza wukasoma Ekinywe kya Nyamuhanga?

⁷ Wukasoma Ekinywe kya Nyamuhanga, yithondolhaye nuku wutsemere ndeke ebyo wuk’igha. Ng’eky’erileberyako, kino kine kyathakubyako? Omundu iniakutsumbira ebyalya ebyo wanzire kutsibu. Aliwe kundi wuli okw’iharabana kutse wuwithe bingyi ebyo wukalengekanayako, iwangana bithomengera buthasihirwa. Wukaghunza erirya iwaminya ngoku muwukalya lhuba-lhuba neryo iwayikubyabwomo wuthi ambi wulyalya lyolho-lyolho, wanasihirwa. Kuthya, wune wathasoma e Biblia omw’iharabana iwalemwa eritsemera ndeke omwatsi wayo? Yithondolhaye nuku wutsemere erisoma Ekinywe kya Nyamuhanga; ibya nga wunalhangire ebyabya, nga wunowire emirenge, kandi lengekanaya okwa bya wamasoma. Erikolha ekyo kikendi leka iwongera eritsema.

8. “Omughombe oyutheleghulha n’owamenge” anemuberererya athi olhukwamirwa lhwiwe? (Lebaya n’omwatsi ahikwa.)

⁸ Yesu mwasombolha “omughombe oyutheleghulha n’ow’amenge” erithuha akalyo k’obunyakirimu okwa mughulhu atholere, kandi thukalisibawa ndeke bunyakirimu. * (Mt. 24:45) Amasako awasondolibawa n’omulimu kya kindu kikulhu omwa byosi ebyo omughombe oyuthaleghulha akahulhukaya. (1 Tes. 2:13) Busana n’ekyo, ebyalya by’obunyakirimu ebyo bikathuwathikaya eriminya amalengekania wa Yehova ngoku kikanganibwe omwa Biblia. Ky’ekikaleka ithwasoma esyogazeti sy’Akaleberyo na Awake! n’emyatsi okwa jw.org. Thukathegheka emihindano y’ahakathi-kathi k’ewiki n’ey’okwa wikendi. Kandi thukalebaya endegheka ye JW Broadcasting^® obuli kwezi yamabya iyineho. Eriyirisya ebyalya eby’obunyakirimu ebikaghunza kikendi thuwathikya erihika okwa kiika kyakabiri ekikakolhaya okwa tseme ey’okwenene.

9. Ni kiika kyahi ekyakabiri ekikakolhaya okwa tseme ey’okwenene?

⁹ EKIIKA 2: Erithoka eribana etseme ey’okwenene, thutholere ithwaghendera okwa bihano bya Yehova. Omuhandiki w’esyonyimbo mwahandika athi: “Obutseme buli n’abo abakubaha Omwami Mukulhu, abakakwama ebihano biwe!” (Esy. 128:1) Eryubaha Yehova kikamanyisaya kithi thumusikirye kutsibu erihika okw’iyihighulha okw’ikolha ekindu kyosi-kyosi ekyanga muponesya. (Emi. 16:6) Busana n’ekyo, thukalholha embere erighendera okwa bihano bya Nyamuhanga ebihambire okwa kihikire n’ekithahikire ngoku bisoborerwe omwa Biblia. (2 Kor. 7:1) Ithukendi tsema thwamakolha ebya Yehova anzire n’erighana ebya ponire.​—Esy. 37:27; 97:10; Abar. 12:9.

10. Eryongera okw’iminya ekya Nyamuhanga anzire, thutholere ithwakolhaki? (Abanya Roma 12:2)

¹⁰ Soma Abanya Roma 12:2. Omundu anganaminya ngoku Yehova yuwithe obuthoki bw’erithwamu athi ekihikire n’ekiwire ky’eki, aliwe kandi atholere inialigha erighendera okwa bihano bya Nyamuhanga. Ng’eky’erileberyako, omundu anganaminya ngoku egavumente yiwithe obuthoki bw’erihiraho ebilhaghiro bikahika okwa sipidi y’erifughirako okwa nguda. Aliwe anganabya isyanzire eriligha erighendera okwa bilhaghiro ebyo. Busana n’ekyo, anganafugha okwa sipidi nene  kwilhaba eyitholere. Thukakanganaya omwa mibere yethu ku thwikirirye kwenene ngoku erighendera okwa bihano bya Yehova ky’ekindu ekitholere omo ngebe. (Emi. 12:28) Dawudi kw’ayowa athya, kundi mwakania oku Yehova athi: “Wasyanyikangya enzira y’engebe, embere sy’obusu bwawu hali obutseme obwoswire, kandi hakuhi nawu hali ebitsange bya kera na kera.”​—Esy. 16:11.

11-12. (a) Omughulhu thuwithe ebikathulyambaya kutse thuhwere amani, thutholere ithwayitheya okuki? (b) Ebinywe ebiri omwa Abanya Filipi 4:8 byanga thuwathikya bithi thukasombolha eby’eriyitsemesya?

¹¹ Omughulhu thuwithe ebikathulyambaya kutse thuhwere amani, ithwangana yowa nga thukayithagha eyindi nzira ey’eriyibaliryamo okwa bitsibu byethu. Ekyo kikayitheghereribawa, aliwe thutholere ithwayitheya okw’iyisanga ithwabirikolha ekindu ekyo Yehova aponire.​—Efe. 5:10-12, 15-17.

¹² Omwa baruha yiwe okwa Banya Filipi, omukwenda Paulo mwabwira Abakristayo athi balhole embere erilengekania okwa myatsi ‘eyithunganene, eyibuyirire, eyanganzwa, n’ey’erisimwa.’ (Soma Abanya Filipi 4:8.) Nomwakine indi kutsibu-tsibu ebya Paulo abugha sibyabya bihambire oko mwatsi w’eriyitsemesya, ebyo ahandika bitholere ibyahamba okwa by’eriyitsemesya ebya thukasombolha. Thalengesya kino: Ahali ekinywe “emyatsi” omwa mulhondo oyu, subaya omo mwanya wakyo mw’ekinywe “esyonyimbo,” “esyofilimu,” “ebitabu,” kutse “emisathu y’evidiyo.” Erikolha eki kyangana kuwathikya eriminya nga ni byahi ebya Nyamuhanga angabya iniakaligha n’ebya angabya isyali ligha. Thwanzire engebe yethu iyahambana n’ebihano bya Yehova ebirengire. (Esy. 119:1-3) Neryo ithunawithe obunyamuthima-thima obuhenirye, thwangana kwama ekindi kiika ekikakolhaya okwa tseme ey’okwenene.​—Emib. 23:1.

13. Ni kiika kyahi ekyakasathu ekikakolhaya okwa tseme ey’okwenene? (Yoane 4:23, 24)

¹³ EKIIKA 3: Lhangira wuthi eriramya lya Yehova likabya embere omo ngebe yawu. Ng’Omuhangiki wethu, Yehova ya thutholere ithwaramya. (Erib. 4:11; 14:6, 7) Busana n’ekyo, ekya thutholere ithwahira embere ly’erimuramya omo nzira ey’akaligha, omwa “kirimu n’omwa kwenene.” (Soma Yoane 4:23, 24.) Thwanzire omulimu abuyirire wa Nyamuhanga iniasondolha eriramya lyethu nuku lihambane n’ekwenene eyiri omwa Kinywe kiwe. Eriramya lyethu litholere iryabya embere nomuthwangabya ithuli omwa kihugho ey’omubiiri wethu aliko olhukako kutse imanibirwe. Nga lino, balikyethu abalhabire omu 100 bane omwa ngomo habw’erithabya ini Bema ba Yehova. * Nomwabine bithya, ibanatsemire bakakolha ngoku banga thoka erisaba, eriyeghesya, n’eribwira abandi oku Nyamuhanga wethu n’Obwami bwiwe. Thwamatsumwa kutse eriendereribwa, thwangana tsema busana n’eriminya ngoku Yehova ane haghuma nethu kandi kw’akendi syathuhemba.​—Yak. 1:12; 1 Pet. 4:14.

14. Ni kyahi ekyahika oku mughalha wethu omulere e Tajikistan, kandi busana naki?

¹⁴ Ebyalholirweko bikaghumaya ngoku ebiika bisathu ebya thwamabirikaniako bikakolhaya okwa tseme ey’okwenene, nomuthwangabya ithuli omo mibere eyiri yithi. Thalengekania okwa kyabya oku Jovidon Bobojonov ow’emyaka 19, owe Tajikistan, oyuwaghana eringira omo mahe. Omo Kwerikumi 4, 2019, mubasyamuheka ewabu, amahirwa  omwa ngomo habw’amezi, kandi mwathwalhwa ng’engoli y’ebibi. Obuthe bulingirirania obu mubwahirwa omwa makuru w’ebihugho bingyi. Mukyakanganibwa ngoku mwaswiribwa bakanza erimukaka bathi alhahiraye athi akendi sighika amahe n’eriambalha ekyambalho ky’amahe. Enyuma waho, mwahiribwako olhubanza kandi amathumwa omwa kampu y’abanya-ngomo erihika aho prezidenti w’ekihugho ekyo abughira athi amaghanyirwa n’erihamulha athi alhwikawe. Omwa byosi ebyalhabamo ebi, Jovidon mwasighalha iniane muthaleghulha kandi inianatsemire. Athi? Omw’ibya inianatsomene ekiyithawa kiwe ky’obunyakirimu mughulhu wosi.

15. Jovidon iniakayirisaya athi ebyalya by’obunyakirimu iniane omwa ngomo?

¹⁵ Jovidon iniane omwa ngomo iniakabya inianemuyirisya ebyalya by’obunyakirimu, nibya n’omughulhu abya isyawithe e Biblia kutse ekyosi-kyosi eky’okwa bitabu byethu. Ekyo mukyathokekana kithi? Balikyethu omwa kithunga kyabu ibakabya bakamulethera ebyalya ibakabya ibabirihandika erisako ly’ekiro okwa hisaho ehirimo ebyalya. Busana n’ekyo, iniakathoka erisoma e Biblia n’erighanirya kuyo buli kiro. Abere abirilhua omwa ngomo, mwaha erihabulha lino busana n’abathe bathabana ebitsibu ebikalire: “Ni kibuya erikolesya ndeke obwiranda bwawu eryongera  eriminya Yehova omw’isoma Ekinywe kiwe n’ebitabu byethu.”

16. Jovidon mwahira amalengekania wiwe w’okuki?

¹⁶ Mughalha wethu oyu mwaghendera okwa bihano bya Yehova. Omwakanya k’erihira amalengekania okwa syongumbu nyibi n’eriyingirya omwa mitse mibi, mwahiragho oku Yehova n’ebya Yehova akalhangira mwa by’omughaso. Jovidon iniakatsemera obubuya bw’ebihangikwa bya Nyamuhanga. Obuli ngyakya iniakabuka iniahulikirira esyonyonyi sikimba. Omwa kiro iniakasamalira okwezi n’esyongununu. Mwabugha athi: “Ebihembo ebikalhua oku Yehova ebyo mubyaleka ingatsema kandi ibikanyihiramo amani.” Thwamasima ebya Yehova akathuha bunyakirimu na kinyamubiri, ithukendi tsema, kandi etseme eyo iyangana ghumya amaaka wethu w’eriyiyinia.

17. Omughulhu thukabana ebitsibu ebiri ng’ebya Jovidon, imukendi lhwiririraki thwamalholha embere eriyiyinia? (1 Petero 1:6, 7)

¹⁷ Jovidon kandi mwahira eriramya lya Yehova ly’embere. Mwaminya omughaso w’erisighalha muthaleghulha oku Nyamuhanga w’okwenene. Yesu mwabugha athi: “Wasyaramya Omukama Nyamuhanga wawu iwamukolera iyuwene.” (Lk. 4:8) Abakamanda b’amahe n’abasirikali babya banzire Jovidon iniayighana edini yiwe. Omwakanya k’ekyo, iniakasaba omwa musibo n’omwa kiro, erisaba Yehova athi amuwathikaye erithendi bikyako n’erithendi leghulha. Nomwanabana obuthe bulingirirania obo, Jovidon mwathayighana erikirirya liwe. Busana n’ekyo, lino atsemire kutsibu habw’eribana ekindu ekyo athabya awithe athali ahekwa, eriswiribwa, n’erihirwa omwa ngomo​—erikirirya erighumire.​—Soma 1 Petero 1:6, 7.

18. Thwanga sighalha thuthi ithunatsemire?

¹⁸ Yehova anasi ebya thukayithagha erithoka eribana etseme ey’okwenene. Wamakwama ebiika bisathu ebikakolhaya oko tseme ey’okwenene, iwangana sighalha iwunatsemire nomuhangabya ebitsibu ebikalire. Neryo nawu iwukendi thoka eribugha wuthi: “Obutseme buli oko kihanda ekiwithe Omwami Mukulhu mo Nyamuhanga wabo!”​—Esy. 144:15.