Omwa mwaka oyo, ekithunga mukyakolha esyombinduka ndebe esyawathikaya okw’ikulha-kulhania obughuma omw’iramya ly’Abigha be Biblia. E Watch Tower muyatsuka eribya yikahulhukya emyatsi eyikasoborera erisako eriryakanibawako omwa mihindano yabo y’obuli wiki eyirimo Erisaba, Eripipa, n’eriha Obwakayiso. Eryongera okw’ekyo, Abigha be Biblia mubahulhukya ekalenda eyiriko erisako ly’obuli wiki kuthya n’olhwimbo olhwangabere lhukimbwa obuli mundu akayeghesya n’omw’iramya ly’eka.

Okwa mihindano yabo, Abigha be Biblia ibakaha “obwakayiso” obuli mw’ebyalholirweko ebihambire okwa mubiiri w’erithulira, ibaha Yehova y’ewasingya, ib’imba, kutse nibya n’erisaba. Eva Barney, oyuwabatizibawa 1923 inianawithe myaka 15, ak’ibuka bino: “Iwamanza eriha obwakayiso, iwukahangana n’eritsuka eribugha ebinywe nga bino, ‘Nganza erisima Omukama busana n’ebibuya byosi ebyo akangolera.’” Abandi balikyethu ibanzire eriha obwakayiso. Mwali Wethu Barney mwongerako athi: “Mughalha wethu mwanzwa oyukulire omo myaka ya Godwin iniakabya inianawithe bingyi by’erisimirako Omukama. Aliwe mukali wiwe iniakabya akalhangira mughalha wethu oyukasondolha akayibulha-bulha, iniakakura ekoti ya mwira wiwe y’enyuma neryo mwira wiwe in’ikalha ahisi.”

Murundi mughuma omwa kwezi, obuli kithunga ikikabya n’omuhindano w’embaghane owalimo Erisaba, Eripipa, n’eriha Obwakayiso. E Watch Tower ey’Okwakani 1, 1923, yikakania okwa muhindano oyu muyabugha yithi: “Embindi y’omuhindano yitholere iyahira omuwatho okwa bwakayiso obuhambire okwa mubiiri w’erithulira n’okw’ihira omwa bakoli mw’omuhwa. . . . Thwikirirye thuthi emihindano eyikahimba eyi yikendi leka balikyethu ibongera eribya bughuma.”

Charles Martin, omuthuliri w’emyaka 19 erilhua e Vancouver, Canada, mwaghasirwa kutsibu omwa mihindano eyo. Enyuma waho, mwibuka bino: “Omo mwanatsukira eriminya ebyo nangabugha omw’ithulira ly’enyumba okwa nyumba. Mughulhu mungyi, ihakabya ihane oyukendiha ekyalholirweko ekihambire okw’ithulira erya nyumba okwa nyumba. Eki mukyaleka inaminya ebya nanga bugha kandi ngoku nangasubirya erihakanisya muthina-muthina.”

“Ebiro by’erithuliramo” nabyo ibikaleka omwa kithunga imwabya obughuma. E Watch Tower ey’Okwakani 1, 1923, muyaranga yithi: “Ithwe bosi erithoka eribya bughuma omwa mubiiri mughuma . . . , Kyakabiri, Okwakathano 1, 1923, mukyasombwerwe ng’ekiro  ekya ithwe bosi thwanga sangira omw’ithulira. Kwabinemwendibya bikabya bithya obuli Kyakabiri ekikatsuka obuli kwezi . . . Obuli muthuliri omwa buli kithunga atholere iniasangira omwa mubiiri.”

Nibya n’Abigha be Biblia abalere mubasangira omwa mubiiri oyo. Hazel Burford, oyuwabya awithe myaka 16 misa okwa buthuku obo, mwibuka bino: “E Bulletin mwabya emyatsi eyikabya nga yisosene n’ebya thwanga bugha eya thwanga hambira omwa muthwe. a Ingane haghuma na sukulhu waghe, n’omuhwa munene munasangira omwa mibiiri yosi eyi.” Aliwe Mwali Wethu Burford mwabana erihakanisya eryalhua aho athabya akalengekania athi iryasira. Mwabugha athi: “Mughalha wethu mughuma mwanzwa oyukulire omo myaka mwaghanira ighuma athi ingye isinathulira abandu. Okwa buthuku obo, abandi mubathayitheghererya ngoku Abigha be Biblia abosi, imwamune ‘abalhwana n’abaana-batho’ batholere ibasangira omw’ipipa Omuhangiki wethu Mukulhu.” (Esy. 148:12, 13) Aliwe Mwali Wethu Burford mwathabikyako. Enyuma waho mwali wethu mwayasoma okwa klasi yakabiri ey’esukuru ye Gilead kandi amakolha ng’omumisyonare e Panama. Endambi muyahika, balikyethu abo bamahindulha amalengekania agho babya bawithe oko balere erisangira omw’ithulira.

N’emihindano eminene-minene muyaghumya obughuma bw’abalikyethu. Emingyi y’okwa mihindano eminene-minene eyi yabyamo ebiro by’erithuliramo, ng’olhwabya omwa Winnipeg, e Canada. Biro 31 Okwakasathu, olhuhindano olhu mulhwabyako ekitsweka “Erithulira Linene ery’Embaghane e Winnipeg,” eryo abosi ababya okwa lhuhindano bakokibawa erisangira omw’ithulira eryo. Ebiro by’erithulira ng’ebi mubyaleka abandu bangyi ibahikwako kandi mwamalhwiririra ebibuya. Biro 5 Okwomunani, abandu nga 7,000 mubahindana okwa lhundi lhuhindano olhwabya e Winnipeg. Okwa buthuku obo, oyu w’owabya mughanzo munene owababirithahindana okwa lhuhindano e Canada.

Olhuhindano lhukulhu kutsibu olhw’abandu ba Yehova olhwabya 1923 lhw’olhwabya biro 18-26 Okwomunani e Los Angeles, California. Omwa syowiki esyakolhaya okwa lhuhindano, esyompapura sy’amakuru mumwabya eritherera busana n’omukonga oyu kandi Abigha be Biblia mubaghaba esyokada  esilhabire omu 500,000. Ehyapa ehikathererera muhyahirwa okwa syomatoka esy’etraspoti n’esy’abandu ahabwabo.

Kyamukagha biro 25 Okwomunani, Mughalha Wethu Rutherford mwalhabya omukania owawithe omuthwe “Esyombuli n’Esyombene-hene,” omo aminyikalhaya ndeke-ndeke “esyombuli” eribya isikimanira abawithe amalengekania w’erisyabya okwa kihugho paradiso. Kandi mwalhabya omukania n’erisoma erithwamu lino, “Erikunga.” Erithwamu eri mulyatsweba Ekikristendomu kandi mulyahira omwa b’emithima myolho mw’omuhwa w’eriyighabulha oku “Babeli Mukulhu.” (Erib. 18:2, 4) Enyuma waho Abigha be Biblia ab’omuhwa erithimba omwa kihugho kyosi banga kolere haghuma erighaba esyomiliyoni sy’esyokopi esy’erithwamu eryo.

Okwa kiro ky’erighunzerera olhuhindano olho, abandu abalhabire omu 30,000 mubowa Mughalha Wethu Rutherford akalhabya omukania w’abandu bosi owawithe omuthwe “Ebihanda Byosi Binemulholha Eyiri e Harmagedoni, Aliwe Esyomiliyoni sy’Abandu Abaliho Lino Sibendi Syaholha.” Babere banalindirire abandu banene erisyahindana, Abigha be Biblia mubapangisya ekisathiro kinene ekihyaka ekye Los Angeles. Erilhangira bathi obuli mundu akowa ndeke, balikyethu mubakolesya emizindalo ey’omwa kisathiro ekyo eyiwithe omulenge munene, eyabya tekinologia mbyaka okwa buthuku obo. Abandi bangyi mubahulikirira endegheka eyi okwa redio.

Omwa 1923, muhabya eriyongera erithendi syibiriranwa omwa mubiiri w’erithulira omwa Afrika, Yuropu, India, ne South America. Omwa India, ya A. J. Joseph abya inianemuwathikya okw’ihulhukya ebitabu omwa Lhuhindi, Olhutamil, Olhutelugu, n’Olhuurdu, kandi inianemutsomana mukali wiwe n’abaana biwe mukagha.

Omwa Sierra Leone, Abigha be Biblia ya Alfred Joseph na Leonard Blackman mubahandikira ekyaghanda kikulhu ekye Brooklyn, New York, erisaba obuwathikya. Biro 14 Okwakani, 1923, erisaba lyabo mulyasubwamo. Alfred mwabugha athi, “Kyamukagha kighuma omwa kiro, munathererwa esimu eyo ndabya ngayitsulirye.” Mwowa omulenge munene akabugha athi, “Niwe wahandikira e Watch Tower Society wukasaba erithumirwa abathuliri?” Alfred mwasubirya athi “Ee. Aliwe nalhaghirawa.” Abya mulenge wa William R. Brown. Abya iniabirihikayo ekiro ekyo erilhua e Caribbea iniane na mukali wiwe, Antonia, n’abali biwe balere, Louise na Lucy. Balikyethu mubalhuaho ibayahika oko bagheni abo.

Alfred mwongerako athi: “Engyakya eyakwamako, ingye na Leonard thwabya ithune omwa muhindano  wethu w’erigha lye Biblia ery’obuli wiki thukalhangira omulhume muuli y’omwa lhukyo. Abya ini Mughalha Wethu Brown. Abya awithire ekwenene y’omuhwa munene indi mwanza erilhabya omukania w’abandu bosi ekiro ekyakwamako.” Muhathalhaba n’okwezi, Mughalha Wethu Brown athali aghaba ebitabu byosi ebyo abya iniabiriletha. Buthuku buke enyuma waho, mwahebwa ebindi bitabu ebilhabire omu 5,000, kandi hathe halhaba buthuku bunene mwayithagha ebindi. Aliwe Mughalha Wethu Brown mwathaminywa ng’oyukaghulhaya ebitabu. Omwa mubiiri wiwe w’obuthuku buuli ng’omughombe wa Yehova ow’omuhwa, mughulhu mungyi iniakakanaya okwa Amasako omwa mikania yiwe, ekyaleka iniahebwa erina Bible Brown.

Ebyo bine aho, ekyaghanda ky’omuthahulha ekyabya Barmen, Germany, kyabya kyoswiremo abandu banene, kandi amahe we France abya inianemwanza erisyabambira omuyi oyo. Abigha be Biblia mubabana enyumba nene e Magdeburg eyalhangirika iyikendi kolerwamo ndeke eby’eriprintinga. Biro 19 Okwomukagha, balikyethu mubaghunza eriboha ebyuma ebikaprintinga n’ebindi bindu neryo bamahumira omwa Beteli mbyaka e Magdeburg. Okwa kiro ekyonyine-nyine ekyo ekyaghanda kikulhu kyabwirawa ngoku babirighunza erihuma, ekirango mukyabya omwa syompapura sy’amakuru kithi e France yabirihamba omuyi we Barmen. Balikyethu mubalhangira erihuma ini bwema obukakanganaya eritsumulha n’obutheya bwa Yehova.

Omwa Brazil, George Young, oyuwabya iniabirighenda omwa bihugho bingyi erithulhughania engulhu yuwene, mwawathikya okw’itsukisya ekyaghanda kihyaka n’eritsuka erihulhukya e Watch Tower omwa Lhupotigwizi. Omwa mezi make buyira, mwaghaba ebitabu ebilhabire omu 7,000. Kandi iyo eryasa omwa Brazil mulyaleka Sarah Ferguson iniabana akaghisa akakatsemesaya. Sarah abya iniabiritsuka eribya akasoma e Watch Tower eritsuka 1899, aliwe isyali athathoka erikangania eriyihayo liwe omw’ibatizibwa. Mezi make enyuma waho, Mwali Wethu Ferguson n’abaana biwe bbani erighunzerera mubathoka erithwa ekiika kikulhu eki.

Omwaka abere akahwa, ebyalhwiririra omw’iramya bughuma ery’Abigha be Biblia mubyakanibwako omwa Watch Tower ey’Okwerikuminibiri 15, 1923: “Ni kyolho erilhangira ngoku ebithunga . . . bine omwa mibere eyuwene bunyakirimu . . . Leka thusighale ithunambere ekyambalho kyethu ky’amalhwa n’eryongera omuhwa n’erithwamu erilholha embere omwa mwaka owakasa, eritsema thunemukolera Yehova.”

Omwaka owakwamako nagho angabere mwaka owakatsemesaya oko Bigha be Biblia. Balikyethu okwa Beteli babya ibabirighunza amezi ibanemukolera okwa kithaka ky’okwa kizinga ekye Staten, lhughendo lhuke erilhua okwa kyaghanda kyabo kikulhu e Brooklyn. Amanyumba awahimbawa okwa kithaka ekyo ahwa erihimbwa okw’itsuka lya 1924, kandi mwaleka balikyethu omwa kihugho kyosi ibabya bughuma kandi ibathulhughania engulhu yuwene omwa syonzira esyabya isisyanga thokekene kera.