1. Omumalaika akabugha athiki, kandi ebyo bikakuhambako bithi?

 OMUMALAIKA alyabya w’erikania nawu, iwunemwendi hulikirira eby’akabugha? Ni kwenene, munabwire omumalaika anemukania n’obuli “kithunga ky’abandu, n’obuli kihanda, n’obuli mubughe, n’oko bandu.” Anemubugha athiki? “Mubahe Nyamuhanga, kandi mumupipe . . . Muramaye Nyamuhanga oyuwahangika olhubulha, n’ekihugho.” (Erib. 14:6, 7) Yehova musa ya Nyamuhanga w’okwenene oyo obuli mundu atholere iniaramya. Thukasima kutsibu eribya iniabirithuha akaghisa k’obughuli ak’erimuramirya omo hekalu yiwe nene ey’obunyakirimu!

2. Ehekalu ya Yehova ey’obunyakirimu y’eyahi? (Lebaya akasanduko “ Ekya Yithemanyisaya.”)

² Ehekalu eyonyine-nyine ey’obunyakirimu y’eyahi, kandi ni hayi aho thwangabana emyatsi eyikakanaya kuyo kwa buuli? Ehekalu eyi si nyumba yonyine-nyine. Y’emitheghekere ya Yehova ey’erimuramya omo nzira eyo akaligha eyiseghemere oko kihongo ky’endongolya ya Yesu. Omukwenda Paulo mwasoborera emitheghekere eyi omo baruha eyo ahandikira Abakristayo Abaebrania ab’omwa kighana ky’erimbere ababya bikere e Yudea. b

3-4. Ni byahi ebyabya bikalyambya Paulo ebihambire okwa Bakristayo Abaebrania abe Yudea, kandi mwabawathikya athi?

³ Ni kyahi ekyaleka Paulo iniahandikira Abakristayo Abaebrania ababya bikere e Yudea? Obundi ahabw’esyonzumwa ngulhu-ngulhu  ibiri. Ey’erimbere, eribahumulikania. Abangyi omw’ibo bakulira omwa dini y’Ekiyuda. Abakulhu b’edini yabo yakera bangabya imubabasiningulira busana n’eribya Bakristayo. Busana naki? Kundi Abakristayo sibabya bawithe ehekalu eyuwene kutsibu ey’eriyaramiryamo, isibawithe ekiherero eky’erihererako Nyamuhanga obuhere, kandi isibawithe abahereri. Eki kyangabya imukyaghunza abigha ba Kristo b’amani n’erileka erikirirya lyabo iryatseka. (Ebr. 2:1; 3:12, 14) Nibya n’abaghuma b’okw’ibo bangabya imubanalengwako bamanza erisuba omwa Kiyuda.

⁴ Ekyakabiri, Paulo mwabwira Abakristayo Abaebrania abo athi babya isibalihiraho akaghalha eriyitheghererya esyongangirirya mbyaka esy’obunyakirimu kutse esy’omwakathi, ebyalya ebikalha-kalire ebiri omwa Kinywe kya Nyamuhanga. (Ebr. 5:11-14) Ahathe erithika-thika, abaghuma b’okw’ibo babya ibakinahambirire Emighambo ya Musa. Aliwe Paulo mwasoborera ngoku amahere agho Emighambo yabya yikabugha yithi abandu ibahayo syanga ghunzireho ighuma ebibi. Busana n’enzumwa eyo, Emighambo yabya ‘iyabirilhusibwaho.’ Neryo Paulo mwalholha embere eribakangirirya ekwenene ndebe ey’omwakathi. Mw’ibukya Abakristayo balikyabo “amaha awalengire” awaseghemere okwa kihongo kya Yesu awanga bawathikirye ndeke eriyithunda “hakuhi na Nyamuhanga.”—Ebr. 7:18, 19.

5. Ni byahi ebya thutholere ithwayitheghererya ebiri omwa kitabu kye Biblia ekya Abaebrania, kandi busana naki?

⁵ Paulo mwasoborera balikyabo Abaebrania ekyaleka eriramya ly’Ekikristayo iryabya irirengire kutsibu eriramya eryo babya bakakolha kera. Ebyabya bikakolhwa omwa dini y’Ekiyuda kyabya ‘kyutsutsu buyira ky’ebyo ebikendi syasa. Nikwa eby’ekwenene ni Kristo.’ (Kol. 2:17) Ekyutsutsu ky’ekindu kikabya isiky’ekindu ekyo ekyonyine-nyine aliwe ni kisosekanio kyakyo. Neryo kuthya n’ebyabya bikakolhwa kera omw’iramya ly’Ekiyuda kyabya kyutsutsu buyira ky’eby’ekwenene ebyabya ibikayasa. Thutholere ithwayitheghererya emitheghekere eyo Yehova abirihiraho busana n’ebibi byethu erighanyirwa nuku thumuramaye omwa nzira ey’akaligha. Leka thulinganisaye “ekyutsutsu” (emiramirye y’Ekiyuda eya kera) na “eby’ekwenene” (emiramirye y’Ekikristayo), ngoku bisoborerwe omwa Abaebrania. Omw’ikolha ekyo, thwangana yitheghererya ndeke ehekalu y’obunyakirimu kandi nga yikathuhambako yithi.

6. Ehema y’erihindanamo yabya yikakolesibwa yithi?

⁶ Emiramirye eya kera. Paulo mwaseghemerya omukania wiwe okwa hema y’erihindanamo eyo Musa ahimba 1512 E.K.K. (Lebaya echati “Emiramirye eya Kera—Emiramirye y’Ekikristayo.”) Ehema eyo yabya hema eyo Abaisraeli babya bakabera eriheka bakahuma. Mubakolesyayo hakuhi myaka 500 erihikira aho ehekalu eyanga ghunzire buthuku buuli yahimbawa e Yerusalemu. (Eri. 25:8, 9; Emig. 9:22) “Ehema y’erihindanamo” eyi abya mwanya mukulhu ogho Abaisraeli babya bakahikiramo oku Nyamuhanga n’erihayo obuhere n’erimuramya. (Eri. 29:43-46) Aliwe kandi ehema y’erihindanamo yabya yikimanira ekindu kikulhu kutsibu ekyo Abakristayo babya ibakayabana.

7. Ehekalu y’obunyakirimu yatsuka eribyaho mughulhu wahi?

⁷ Emiramirye y’Ekikristayo. Ehema y’erihindanamo eyakera kyabya “kyutsutsu ky’emyatsi y’elhubulha,” kandi iyikimanira ehekalu nene ya Yehova ey’obunyakirimu. Paulo mwabugha athi “omwatsi oyu [ehema y’erihindanamo] ali ng’ekisosekanio ky’omughulhu ono.” (Ebr. 8:5; 9:9) Neryo omughulhu ahandikira Abaebrania, ehekalu y’obunyakirimu yabya iyabiribyaho omwa miramirye y’Ekikristayo. Ehekalu eyi yabyaho omwa 29 E.K. Omwaka oyo, Yesu mwabatizibwa, mwahakabibwa n’omulimu abuyirire, kandi mwatsuka erikolera Yehova ‘ng’omuhereri mukulhu oko bahereri bosi’ omwa hekalu y’obunyakirimu. c—Ebr. 4:14; Emib. 10:37, 38.

8-9. Ngoku kiri omwa Abaebrania 7:23-27, ni mbaghane yahi nene eyiri ahakathi-kathi k’abahereri bakulhu abe Israeli n’Omuhereri Mukulhu oyulengireyo, Yesu Kristo?

⁸ Emiramirye ya kera. Omuhereri mukulhu mwahebwa obuthoki bw’erimanira abandu embere sya Nyamuhanga. Omuhereri mukulhu ow’erimbere owe Israeli ya Haruni, Yehova amusombolha ehema y’erihindanamo yikahebwayo. Aliwe ngoku Paulo asoborera, “abahereri bakera babya bangyi kusangwa babya bakaholha isibethoka erikolha omubiiri w’ebiro byosi.” d (Soma Abaebrania 7:23-27.) Kandi ibo ng’abalhume abathahikene, abahereri bakulhu abo babya b’erihayo obuhere busana n’ebibi byabo. Eki kikaleka ihabya embaghane nene ahakathi-kathi k’abahereri bakulhu abe Israeli n’Omuhereri Mukulhu, Yesu Kristo.

⁹ Emiramirye y’Ekikristayo. Ng’Omuhereri wethu Mukulhu, Yesu Kristo “akakolha omubiiri . . . omo hema y’ekwenene, ey’Omukama [Yehova] ahanda, butsira bandu.” (Ebr. 8:1, 2) Paulo mwasoborera athi kundi ‘Yesu akakotha syalyumbaya erikolha omubiiri wiwe w’obuhereri.’ Paulo mwongerako athi Yesu ‘syaliko kibi, abirihighulhwa oko bakolha-nabi’ kandi athi erithendibya ng’abahereri bakulhu abe Israeli, Yesu ‘syalihera amahere ebiro byosi’ busana n’ebibi biwe. Neryo thulebaye embaghane eyiri ahakathi-kathi k’ebiherero n’amahere eby’omwa miramirye eya kera n’ey’Ekikristayo.

10. Amahere w’okwa kiherero eky’omulinga aby’akakanganiaki?

¹⁰ Emiramirye eya kera. Eyihya okwa bwingiriro bw’ehema y’erihindanamo ikukabya ekiherero ky’omulinga ekyo babya bakahererako Yehova amahere w’ebisoro. (Eri. 27:1, 2; 40:29) Aliwe, amahere ayo isyali leka abandu bakaghanyirwa ighuma ebibi byabo. (Ebr. 10:1-4) Amahere w’ebisoro awabya akabera erihererwa okwa hema y’erihindanamo aby’akakangania  obuhere bughuma obwanga ghunzireho ighuma ebibi by’abandu.

11. Ni kiherero kyahi ekya Yesu ayiherako ng’obuhere? (Abaebrania 10:5-7, 10)

¹¹ Emiramirye y’Ekikristayo. Yesu abya inianasi ngoku Yehova amuthuma okwa kihugho erihayo engebe yiwe ng’ekihongo ky’endongolya busana n’abandu. (Mt. 20:28) Neryo okw’ibatizibwa liwe, Yesu mwayihayo erikolha ebya Yehova aby’anzire. (Yn. 6:38; Gal. 1:4) Yesu mwayihayo okwa kiherero ky’omusyo ekik’imanira “erisonda” lya Nyamuhanga busana na Mughalha wiwe erihayo engebe yiwe eyihikene. Engebe ya Yesu muyahebwayo “ngendo nguma” erighanyira kutse eriswikira ighuma ebibi by’obuli mundu oyukikiriraya Kristo. (Soma Abaebrania 10:5-7, 10.) N’ekindi, thulebaye ebyabya bikabya omwakathi k’ehema y’erihindanamo nga byabya bikamanyisyaki.

12. Oyuwabya ak’ingira omwa buli kitsweka ky’ehema y’erihindanamo nindi?

¹² Emiramirye ya kera. Ehema y’erihindanamo n’esyohekalu esyahimbawa enyuma waho e Yerusalemu byabya bisosene omwakathi. Omwakathi imukabya bitsweka bibiri—“Ahabuyirire” ‘n’Ahabuyirire Kutsibu’—ebyabya bikaghabulhwa omwa lhukimba olhukasukuliraya olhudesire. (Ebr. 9:2-5; Eri. 26:31-33) Ahabuyirire ihakabya omuthaghalha w’etara ow’ehoro, ekiherero eky’erihisiryako obukwa, n’emeza eyiriko omuggati w’erikangania. “Abahereri abahakabibawa amaghutha” basa ibabakalighirawa eringira Ahabuyirire erikolha emibiiri yabo eyibuyirire. (Emig. 3:3, 7, 10) Ahabuyirire Kutsibu ihakabya erisanduko ly’endaghano ery’ehoro eryabya likimanira eribyaho lya Yehova. (Eri. 25:21, 22) Omuhereri mukulhu  musa iyukalighirawa erilhaba okwa lhukimba olhukasukuliraya eringira Ahabuyirire Kutsibu murundi mughuma omwa mwaka okwa Kiro ky’Erihanulha. (Law. 16:2, 17) Obuli mwaka, iniak’ingirayo iniane n’omusasi w’ebisoro eriyahanulha busana n’ebibi biwe n’eby’ekihanda kyosi kye Israeli. Erighunzerera, erilhabira omwa mulimu wiwe abuyirire, Yehova mwakangania ndeke-ndeke ekyonyine-nyine ekyo ebyabya bikabya omwa hema y’erihindanamo ebi bikamanyisayaki.—Ebr. 9:6-8. e

13. Ahabuyirire n’Ahabuyirire Kutsibu ah’ehema y’erihindanamo hak’imaniraki omwa miramirye y’Ekikristayo? 

¹³ Emiramirye y’Ekikristayo. Omughanzo muke w’abigha ba Kristo babirihakabibwa n’omulimu abuyirire, kandi bawithe obughuma bw’embaghane na Yehova. Abandu 144,000 aba ni b’erisyakolha ng’abahereri elhubulha haghuma na Yesu. (Erib. 1:6; 14:1) Ahabuyirire ah’ehema y’erihindanamo hak’imanira ibo eribya ibabiriyirwamo baana ba Nyamuhanga ab’obunyakirimu ibane okwa kihugho. (Abar. 8:15-17) Ahabuyirire Kutsibu ah’ehema y’erihindanamo hak’imanira elhubulha, eyo Yehova ikere. “Olhukimba olhukasukuliraya” olhwabya lhukaghabulha Ahabuyirire okwa Habuyirire Kutsibu lhuk’imanira omubiri wa Yesu ow’omunyoku owabya akamulemesya eringira elhubulha ng’Omuhereri Mukulhu oyulengireyo ow’ehekalu y’obunyakirimu. Omw’ihayo omubiri wiwe ng’obuhere busana n’abandu, Yesu mwakyungulira Abakristayo abahakabibwa abosi b’enzira y’engebe y’elhubulha. Nabo batholere ibasighania emibiri yabo nuku babane olhuhembo lhwabo lhw’elhubulha. (Ebr. 10:19, 20; 1 Kor. 15:50) Yesu abere abirilhubukibwa, mwingira Ahabuyirire Kutsibu ah’ehekalu y’obunyakirimu, eyo erighunzerera abahakabibwa abosi bakamuyiyungako.

14. Ngoku kiri omwa Abaebrania 9:12, 24-26, ni kyahi ekikaleka emitheghekere ya Yehova ey’ehekalu y’obunyakirimu iyabya iy’eyilengireyo?

¹⁴ Hano thwangana lhangira ndeke-ndeke ngoku emitheghekere ya Yehova busana n’eriramya ly’okwenene eyiseghemere oko kihongo ky’endongolya n’obuhereri bwa Yesu Kristo ku y’eyilengireyo kutsibu. Omuhereri mukulhu owe Israeli iniak’ingira Ahabuyirire Kutsibu ahahimbawa n’abandu iniane n’omusasi w’ebisoro, aliwe Yesu mw’ingira “elhubulha,” ahabuyirire kutsibu kwilhaba emyanya yosi, eribanika embere sya Yehova. Eyo mwahayo obughuli bw’engebe yiwe eyihikene habwethu “eriyiha busana n’erilhusya ebibi.” (Soma Abaebrania 9:12, 24-26.) Ekihongo kya Yesu ky’ekihongo kisa ekikaghunziraho ighuma ebibi. Ngoku thukayalhangira, mbulha thuwithe amaha w’erisyaghenda elhubulha kutse aw’erisyabya oko kihugho, ithwe bosi thwangana ramya Yehova omo hekalu yiwe y’obunyakirimu.

15. Ni bahi ababya bakakolera omwa kibugha ky’ehema y’erihindanamo?

¹⁵ Emiramirye ya kera. Ehema y’erihindanamo yabya yiwithe ekibugha kighuma—ekiriko olhughuthu aho abahereri babya bakakolera emibiiri yabo. Ekiherero kinene eky’omulinga eky’eryokeryako obuhere kyabya omwa kibugha ekyo, kuthya n’ekinabiro ky’amaghetse eky’omulinga ekyo abahereri babya bakakolesya eriyiyonza bathe bakolha emibiiri yabo eyibuyirire. (Eri. 30:17-20; 40:6-8) Aliwe esyohekalu esyahimbawa enyuma waho, nasyo syabya siwithe ekibugha ky’eyihya aho abathabya bahereri babya bak’imana eriramya Nyamuhanga.

16. Ni bahi abakakolera omwa buli kibugha ky’ehekalu y’obunyakirimu?

¹⁶ Emiramirye y’Ekikristayo. Bathe baghenda  elhubulha eriyakolha ng’abahereri haghuma na Yesu, emisighalira y’okwa baghalha babu abahakabibwa abathaleghulha bakakolera omwa kibugha ky’omwakathi eky’ehekalu y’obunyakirimu okwa kihugho. Ekinabiro kinene ky’amaghetse ekyabyaho ni kibukyo kikulhu okw’ibo, kuthya n’okwa Bakristayo abosi, erisighalha ibanahenirye omwa by’esyongeso na bunyakirimu. Neryo ibbwa “endeko nene,” abakasighika buthaleghulha baghalha bobu Kristo abahakabibwa, bakaramiraya hayi? Omukwenda Yoane mwabalhangira ibimene “embere w’ekithumbi ky’obwami . . . bakakolera [Nyamuhanga] omo musibo n’omo kiro omo Hekalu yiwe.” Bakakolha eki hano okwa kihugho omwa kibugha ky’eyihya eky’ehekalu y’obunyakirimu. (Erib. 7:9, 13-15) Ka thukalhangira eribya n’omwanya omwa mitheghekere ya Yehova ey’eriramya ly’okwenene mwa kindu ky’obughuli!

17. Thuwithe olhusunzo lhw’erihayo amahere wahi oku Yehova?

¹⁷ Munabwire Abakristayo abosi bawithe olhusunzo lhw’erihayo obuhere oku Yehova omw’ikolesya endambi yabo, akaghalha kabo, n’ebya bawitheko erilholya emyatsi y’Obwami y’embere. Ngoku omukwenda anabwira Abakristayo Abaebrania, thwanganaha “eripipa lyethu ng’obuhere oku Nyamuhanga. Kandi emirenge yethu yipipe erina liwe.” (Ebr. 13:15) Thwangana kangania ku thukalhangira olhusunzo lhwethu lhw’eriramya Yehova mwa lhw’obughuli omw’imuha obuhere obuwene kutsibu.

18. Ngoku kiri omwa Abaebrania 10:22-25, ni byahi ebya thuthatholere thukaghalhaghandya kandi ni byahi ebya thuthatholere thuk’ibirirwa?

¹⁸ Soma Abaebrania 10:22-25. Akayaghunzerera ebaruha yiwe oko Baebrania, Paulo mwahulha ebindu muthina-muthina eby’omw’iramya lyethu ebya thuthatholere thukaghalhaghandya. Ebi mwamuli erisaba Yehova, eribwira abandi oko maha wethu, erihindana haghuma ng’ekithunga, n’erihimbangana “omughulhu thukalhangira ekiro kya [Yehova] kikahika hakuhi.” Emyatsi eyiri omw’Ibisulirwa yikayahwayo, omumalaika wa Yehova akahira omuwatho w’okwa binywe bino omw’ibibugha mirundi ibiri: “Wuramaye Nyamuhanga!” (Erib. 19:10; 22:9) Ambi isithw’ibirirawa ekwenene ey’omwakathi ey’obunyakirimu eyihambire oko hekalu nene ya Yehova ey’obunyakirimu n’erilhangira olhusunzo olho thuwithe olhw’eriramya Nyamuhanga wethu mukulhu mo lhw’obughuli!