1. Busana naki kyangana thukalira eribya bowa?

 KINE kyathakukalira eribya mwowa? Ekyo mukyabya oku Mwami Dawudi, neryo mwasaba Nyamuhanga athi: “Wunyihanganaye omo kirimu ky’eriowa.” (Esy. 51:12) Dawudi aby’anzire Yehova. Nomwabine, ihakanayira ikyakalira Dawudi eribya mwowa, nethu kuthya. Busana naki? Eky’erimbere, thwabirisighalya omubere ow’obuthowa. Ekyakabiri, mughulhu wosi Sitani akalengaho erithuhiramo omuthima w’eriyisamambulha, ngoku anakolha. (2 Kor. 11:3) Ekyakasathu, thuthimbirweko n’abandu abali mw’omuthima w’eriyisamambulha, “ekirimu ekikasondolha abandu abathiowa Nyamuhanga.” (Efe. 2:2) Sithutholere thukasubulira okw’irwanisya omubere wethu w’erianza erikolha ekibi aliwe kandi thutholere ithwaghana akahathikano ako Diabolo n’ekihugho kino bakathuhirako erianza thubye bathowa. Thutholere ithwahiraho akaghalha eriowa Yehova n’abo abiriha obuthoki.

2. Kikamanyisayaki ‘eriowa lhuba’? (Yakobo 3:17)

² Soma Yakobo 3:17. Omuhandiki Yakobo oyuwasondolibawa mwabugha athi ab’amenge ‘bakowa lhuba.’ Thalengekania ekyo nga kikamanyisayaki. Thutholere ithwabya ithunanzire kandi ithunayitheghekire erighondera abo Yehova abiriha obuthoki okwa lhulengo lhulebe. Ni kwenene, Yehova syangabugha athi thwowe omundu oyukabugha athi thuthwe ebihano Biwe.—Emib. 4:18-20.

3. Busana naki eriowa abawithe obuthoki ni kikulhu embere sya Yehova?

³ Ikyangana thwolhobera eriowa Yehova kwilhaba eriowa omundu. Kundi nibya, mughulhu wosi Yehova akaha obusondoli obuwene kutsibu. (Esy. 19:7) Ekindu ekyo abandu abawithe obuthoki bathe bangathoka erikolha. Nomwabine, Thatha wethu w’elhubulha abiriha ababuthi, abathabali b’egavumente, n’abasyakulhu b’ekithunga b’obuthoki okwa lhulengo lhulebe.  (Emi. 6:20; 1 Tes. 5:12; 1 Pet. 2:13, 14) Thukabya thukabowa, thukabya ithwamowa Yehova. Leka thulebaye nga thwanga ghondera thuthi abandu abo Yehova abiriha obuthoki, nomwakine indi okwa bundi buthuku kyangana thukalira eriligha n’erighendera okwa busondoli bwabu.

4. Busana naki abalere bangyi sibaliowa ababuthi babu?

⁴ Abalere bathimbirweko n’ab’olhulengo lhwabo “abathiowa ababuthi babo.” (2 Tim. 3:1, 2) Busana naki abangyi omw’ibo ibabya bathowa? Abandi bakayowa bathi ababuthi babu ni bathebya. Ababuthi bakalengekanaya bathi abaana babu ibakolha ebyo ibobene-bene bakalemawa erikolha. Abandi bakalhangira erihabulha ly’ababuthi babu ng’eryabirihwa okwa buthuku, erithatholere, kutse ng’erikabahirako olhukako lhunene. Wamabya iwuli mulere, nawu wunewathayowa wuthya? Abangyi kikabakalira erighendera okwa kihano kya Yehova kino: “Mwowe abathatha n’abakoyo wenyu busana n’Omukama, kusangwa ko litholere lithya.” (Efe. 6:1) Ni kyahi ekyanga kuwathikya erikolha ekyo?

5. Busana naki Yesu ni ky’erileberyako ekyuwene eky’omulere oyuwowa ababuthi biwe, ngoku kiri omu Luka 2:46-52?

⁵ Wangan’igha eribya mwowa erilhua okwa ky’erileberyako kibuyanga ekya Yesu. (1 Pet. 2:21-24) Abya mundu oyuhikene oyuwithe ababuthi abathahikene. Aliwe Yesu iniakasikaya ababuthi biwe nibya n’omughulhu babya bakakolha ebisobyo kandi bakalemwa erimuyitheghererya okwa bundi buthuku. (Eri. 20:12) Thalengekania okwa kyabya Yesu iniane w’emyaka 12. (Soma Luka 2:46-52.) Ababuthi biwe mubamusigha e Yerusalemu. Ahathe erithika-thika lhwabya lhukwamirwa lhwa Yozefu na Maria erilhangira bathi abaana babu abosi bane omwa gurupu eyikasuba eka omukonga akahwamo. Erighunzerera, Yozefu na Maria babere babana Yesu, Maria mwatsweba Yesu busana n’erileka ibahangya-hangya! Yesu anganababwire athi n’ibo basobirye. Omwakanya k’ekyo, mwasubirya ababuthi biwe omwa nzira nyolho kandi ey’erisikya. Aliwe Yozefu na Maria “mubathaminya ebyo abugha nabo.” Nomwabine, Yesu “mwabya akowa ebyo bamubwira.”

6-7. Ni kyahi ekyanga wathikya abalere eriowa ababuthi babu?

⁶ Abalere, kine kyathabakalira eriowa ababuthi benyu omughulhu bakasobaya kutse bakalemwa eribayitheghererya? Ni kyahi ekyanga wathikya? Eky’erimbere, lengekanaya Yehova ng’akayowa athi. E Biblia yikabugha yithi mukabya mukowa ababuthi benyu, “kikatsemesaya Omukama.” (Kol. 3:20) Yehova akaminya omughulhu ababuthi bawu bakalemawa erikuyitheghererya ndeke kutse omughulhu bakahiraho ebilhaghiro ebikalire. Aliwe mwamakwama kyathwamu eribowa, mukamutsemesaya.

⁷ Ekyakabiri, lengekanaya ababuthi bawu nga bakayowa bathi. Wukabya wukowa ababuthi bawu, wukabatsemesaya n’erileka ibakuyikethera. (Emi. 23:22-25) Iwangan’ongera eriyithunda hakuhi nabo. Mughalha wethu Alexandre owe Belgium akabugha athi: “Nabere ingatsuka eriowa ababuthi baghe, obughuma bwethu mubwahinduka. Muthwongera eriyithunda haghuma n’eritsema.” b Ekyakasathu, lengekanaya ngoku eribya mwowa lino kikendi syakuwathikya omwa buthuku obukasa. Paulo, oyuwikere e Brazil, akabugha athi, “Erigha eriowa ababuthi baghe kyabirinyiwathikya eriowa Yehova n’abandi ab’obuthoki.” Ekinywe kya Nyamuhanga kikaha enzumwa mbuya  eyangaleka iwowa ababuthi bawu. Kikabugha kithi: “Emyatsi yawu yithoke eryuwana, na kandi iwathoka eribugha biro binene muna-kihugho.”—Efe. 6:2, 3.

8. Ni kyahi ekikaleka eminyethu mingyi ibathwamu eriowa ababuthi babu?

⁸ Abalere bangyi babiriyilhangirira ngoku emyatsi yik’uwana bamabya bowa. Luiza, nayu owe Brazil, mukyamukalira eriyitheghererya ekikaleka ibathamulighira eribya n’esimu ahabw’obuthuku bulebe. Kundi nibya mwalengekania athi abangyi ab’emyaka yiwe banenasyo. Aliwe neryo mwaminya ngoku omo kwenene ababuthi biwe babya ibali okw’imutheya. Lino akabugha athi, abiriminya ngoku omughulhu akowa ababuthi biwe, syatholere akayowa ngali kw’olhukako, kundi erihabulha lyabu ly’eryonyine-nyine eryo akayithagha. Mwali wethu omulere ya Elizabeti erilhua e United States, okwa bundi buthuku kikinamukalira eriowa ababuthi biwe. Akasoborera athi, “Namathendi yitheghererya ndeke ekyamaleka ababuthi baghe ibahiraho ekilhaghiro kirebe, ngalengekanaya okwa mughulhu ebilhaghiro byabo byanyitheghaya.” Monica, oyuwikere e Armenia, akabugha athi mughulhu mungyi emyatsi yikamughendera ndeke omughulhu akowa ababuthi biwe kwilhaba omughulhu akaghana eribowa.

9. Abangyi bakayowa bathi okw’ighondera ekilhaghiro?

⁹ Abandu bangyi bakaligha ngoku thukayithagha esyogavumente sy’abandu kandi ngoku thutholere ithwanowa ebilhaghiro birebe ebyo “abathabali b’ekihugho” bakahiraho. (Abar. 13:1) Aliwe abandu iban’abo bangana ghana erighendera okwa kilhaghiro ekikabya nga siky’obulingirirania kutse ekikabya nga kikabayithaghako bingyi. Ng’eky’erileberyako, thalengekania okwa ky’eriliha emisolho. Omwa kihugho kighuma e Yuropu, abandu bangyi bikirirye bathi “kihikire erithendiliha emisolho wamayowa wuthi siyitholere.” Ky’ekikaleka omwa kihugho ekyo, abandu sibaliliha emisolho eyosi eyo egavumente yikabayithaghako.

10. Busana naki thukaghondera nibya n’ebilhaghiro ebya thuthanzire?

¹⁰ E Biblia yikakanganaya ngoku esyogavumente sy’abandu sikaletha eriaghalhwa, siri omwa busondoli bwa Sitani, kandi sikisiya isyathoghothibwa. (Esy. 110:5, 6; Omu. 8:9; Lk. 4:5, 6) Kandi yikathubwira yithi “oyukalhwa n’abinye ehamuli akalhwa n’ekilhaghiro kya Nyamuhanga.” Ithwe erighondera abathabali b’ekihugho oko lhulengo lhulebe ni kitsweka ky’okwa mitheghekere ya Yehova eyiriho habw’akathuku kake ey’erihiraho obuyithondeke. Kwesi, thutholere ‘ithwaliha abosi b’eminda yabo,’ imwamuli emisolho, erisikya, n’obwowa. (Abar. 13:1-7) Thwangana lhangira ekilhaghiro nga kyamathusurusuthya, nga si ky’obulingirirania, kutse nga kikalire erighondera. Aliwe thukowa Yehova, kandi akathubwira  athi thwowe abathabali aba bamabya isibathabugha bathi thuthwe ebihano biwe.—Emib. 5:29.

11-12. Ngoku kiri omu Luka 2:1-6, ni kyahi ekya Yozefu na Maria bakolha erighondera ekilhaghiro ekyabya kikalire, kandi mumwalhwiririraki? (Lebaya n’ekisasani.)

¹¹ Thwangan’ighira okwa ky’erileberyako kya Yozefu na Maria, ababya ibanayitheghekire eriowa abathabali b’ekihugho nibya n’omughulhu kyabya kikalire. (Soma Luka 2:1-6.) Maria iniakisiya iniahikya mezi mwenda inina mukule, obwowa bwiwe kuthya n’obwa Yozefu mubwalengwako. Augusto, oyuwabya akathabalha e Roma mwabugha athi obuli mundu aye okwa tsapa. Yozefu na Maria babya b’erighenda e Betelehemu, olhughendo lhw’esyokilomita 150 erilhaba omwa kihugho ky’ehithwe. Olhughendo olho silhwabya lhwolho, kutsibu-tsibu oku Maria. Abathahenie aba bangabya imubayilhalikirira busana n’amaghalha wa Maria n’aw’omwana wabu oyuthe wabuthwa. Kandi ibbwa obukule kubwahira omwa nzira? Abya w’eributha oyukendi syabya Masiya. Mbwino ekyo kyangabere kiyihambulyo ky’erithendiowa ab’egavumente?

¹² Yozefu na Maria mubathalighira ekyosi-kyosi okw’ebyo kikaleka bakabulha nga banaghondere ekilhaghiro. Yehova mwabatsumulha busana n’obwowa bwabo. Maria mwahika e Betelehemu ya buholho, amabutha omwana oyuwithe amaghalha awuwene, kandi nibya amawathikya okw’iberererya amaminyereri we Biblia!—Mika 5:2.

13. Obwowa bwethu bwanga hamba buthi oku balikyethu?

¹³ Thukabya thukowa abathabali b’ekihugho, thukayighasira kuthya n’abandi. Thuthi? Thukayihighulha okw’isuyirwa eryo abakaghana erighondera ekilhaghiro bakabana. (Abar. 13:4) Obwowa bwethu bwangana hamba okwa mibere abathabali bakathwaliramo Abema ba Yehova. Ng’eky’erileberyako, myaka mingyi kera omwa Nigeria, abasirikali mub’ingira omwa Kisenge ky’Obwami omwa buthuku bw’emihindano, bakasondya abakayisamambulha okw’ithuha emisolho. Aliwe omukulhu  w’abasirikali mwabwirabo athi basubeyo, mwabugha athi: “Mughulhu wosi Abema ba Yehova bakathuha emisolho.” Obuli erighondera ekilhaghiro, wangan’uwania erina ly’abandu ba Yehova—erina eryo kiro kighuma lyangana syatheya abikirirya balikyenyu.—Mt. 5:16.

14. Ni kyahi ekyawathikaya mwali wethu mughuma eribya inianayitheghekire erighondera abathabali?

¹⁴ Nomwabine, hanganayira ithwaghana erighondera abathabali b’ekihugho. Mwali wethu Joanna ow’omwa United States akabugha athi; “Mukyanyikalira kutsibu eribya mwowa, kundi abaghuma b’okwa bahughu baghe mubabana obuthebulingirirania erilhua okwa bathabali.” Aliwe Joanna mwahiraho akaghalha kanene erihindulha amalengekania wiwe. Eky’erimbere, mwalekeraho erisoma emyatsi eyikahirawa okwa mithahulha y’enganirania eyikaleka iniathunga okwa bathabali kw’amalengekania mabi. (Emi. 20:3) Ekyakabiri, mwasaba Yehova y’obuwathikya bw’erimuyikethera omwakanya k’eriyikethera embinduka omwa syogavumente sy’abandu. (Esy. 9:9, 10) Ekyakasathu, mwasoma emyatsi eyihambire okw’ithendibya na lhuhandi eyiri omwa bitabu byethu. (Yn. 17:16) Joanna lino akabugha athi erisikya n’erighondera ab’obuthoki kyabirileka iniabya inianathekene n’erisikira emibere eyiriho.

15. Busana naki kyangana thukalira erighondera obusondoli obukalhua omwa kithunga kya Yehova?

¹⁵ Yehova akathusaba athi ‘thwowe abakathusondolha’ omwa kithunga. (Ebr. 13:17) Nomwakine indi Omusondoli wethu, Yesu, ahikene, abo akakolesaya erithusondolha hano h’okwa kihugho sibahikene. Kyangana thukalira eribaghondera, kutsibu-tsibu bamathubwira bathi thukole ekya thuthanzire. Omukwenda Petero mukyanamukalira eribya mwowa. Omumalaika abere amulhaghira athi alye ebisoro ebithunda-thundire erikwamana n’Emighambo ya Musa, Petero mwaghana—butsira murundi mughuma, aliwe mirundi isathu! (Emib. 10:9-16) Busana naki? Okw’iyo obusondoli buhyaka obo mubwabya nga sibutholere. Aby’abeghere eyindi nzira y’erikoleramo emyatsi. Kyamabya imukyakalira Petero erighondera obusondoli erilhua okwa mumalaika oyuhikene, ibbwa kyanga thukalira bungahi erighondera obusondoli obw’abalhume abathahikene!

16. Nomwakine indi omukwenda Paulo angana lhangire obusondoli obw’ahebawa nga sibutholere, mwakolhaki? (Emibiri 21:23, 24, 26)

¹⁶ Omukwenda Paulo abya inianayitheghekire ‘eriowa’ nibya n’omughulhu ahebawa obusondoli obo anganalhangire nga sibutholere. Abakristayo Abayuda babya ibabiriowa amabehi oku Paulo—amabehi awabya akakangania athi Paulo iniakathulira athi “baleke Emighambo ya Musa” kandi athi sibasikaye Emighambo ya Musa. (Emib. 21:21) Abalhume bakulhu Abakristayo abe Yerusalemu mubabwira Paulo bathi aghende n’abalhume bbani omwa hekalu kandi ayeraye erikangania kw’abya akaghendera okwa Mighambo. Aliwe Paulo abya inianasi ngoku Abakristayo sibakiri ahisi sy’Emighambo. Kandi abya isyathakolha kibi kyosi-kyosi. Nomubyanabya bithya, Paulo mwalhuaho iniowa. “Mwimya abandu abo, n’engyakya mwakolha emitsye y’eriera haghuma nabo.” (Soma Emibiri 21:23, 24, 26.) Obwowa bwa Paulo mubwaleka ihabya obughuma.—Abar. 14:19, 21.

17. Ekyalholirweko kya Stephanie kikakweghesayaki?

¹⁷ Mwali wethu Stephanie mukyamukalira eriligha erithwamu eryo abaghalha bethu b’esyongwamirwa ab’omwa kihugho kyabu bakolha. Iyo na mwira wiwe mubatsemera erikolera omwa gurupu y’owundi mubughe. Neryo ekyaghanda ky’omuthahulha muk’imania egurupu  eyo, n’abathahenie abo mubasubibwa omwa kithunga ky’omubughe wabo. Stephanie akabugha athi; “Munathatsema nahake. Munathaligha ngoku hali obuyithawa bunene omwa kithunga ky’omubughe wethu.” Nomubyanabya bithya, mwathwamu erisighika obusondoli buhyaka obo. Akabugha athi: “Endambi muyahika, namayilhangirira ngoku erithwamu eri lyabya ly’amenge. Omwa kithunga kyethu thwabiribya babuthi b’obunyakirimu okwa bangyi abathawithe ab’okw’ibo omwa kwenene. Nganemweghesya dada oyuwabya iniabirisebebera oyuwabirisuba omwa kithunga. Kandi lino ngawithe obuthuku obukaghunza obw’eriyeghesya.” Akongera athi, “Ngawithe obunyamuthima-thima obuhenirye, eriminya ngoku nabirikolha ekyo nangathoka eribya mwowa.”

18. Thukaghasirawa thuthi omw’ibya bowa?

¹⁸ Thwangan’igha eribya bowa. Yesu “mwigha eriowa” butsira omwa mibere eyuwene, aliwe “omo myatsi aghalhawamo.” (Ebr. 5:8) Nga Yesu, mughulhu mungyi thuk’igha eribya bowa omwa mibere eyikalire. Ng’eky’erileberyako, okw’itsuka ly’ekihunzo ky’ekorona (COVID-19) omughulhu thwabwirawa indi thuleke erihindanira okwa bisenge byethu by’obwami n’omubiiri wethu w’erithulira nyumba okwa nyumba ak’imanibwa, mukyanakukalira eribya mwowa? Nomwabine, obwowa bwawu mubwakutheya, muwabya bughuma n’abikirirya balikyenyu, kandi muwatsemesya Yehova. Lino ithwe bosi thunayitheghekire erisyaghondera obusondoli bwosi-bwosi obwa thukendi syahebwa omwa buthuku bw’obulighe bunene. Engebe yethu yangana syaseghemera okw’ekyo!—Yobu 36:11.

19. Busana naki wanzire iwabya mwowa?

¹⁹ Thwamabir’igha ngoku obwowa bukaletha emighisa mingyi. Aliwe ekikulhu kutsibu, thukathwamu eriowa Yehova kundi thumwanzire kandi thwanzire erimutsemesya. (1 Yn. 5:3) Sithuwithe ekya thwanga thuha Yehova busana n’ebyosi ebyo abirithukolera. (Esy. 116:12) Aliwe thwangana mughondera kuthya n’abo abiriha obuthoki. Thwamabya bowa, thukakanganaya ku thuwithe amenge. Kandi abawithe amenge bakatsemesaya omuthima wa Yehova.—Emi. 27:11.