Baghalha bethu okwa Beteli babya bane mukolha kutsibu ahabw’omwaka mughuma n’amezi nga malebe erihimba eredio eya WBBR okwa kizinga kye Staten, e New York City. Babere babirihalha ekibanza, mubahimba enyumba nene y’abakoli n’eyindi nyumba eyabyamo ebyuma eby’erikolesya. Omubiri oyu abere abirihwa, baghalha bethu mubatsuka erithondekania ebyuma nuku eredio yitsukireho “erikolha.” Aliwe mubabya b’erirwanisya ebitsibu muthina-muthina.

Mukyakalira baghalha bethu erisingika omulongoti mukulhu owe redio. Omulongoti w’obuuli bw’esyomita 91 abya akayithagha erisingikwa ahakathi-kathi sy’ebikondo bibiri eby’emithi, obuli kighuma ini ky’obuuli bw’esyomita 61. Erilengesya ly’erimbere mulyathakolha. Omw’iyikethera obuwathikya bwa Yehova, erighunzerera baghalha bethu mubasingura. Calvin Prosser, oyuwakolha okwa mubiiri oyu mwabugha athi, “Ku thwathoka omurundi w’erimbere, thwangabere ithukayipipa n’eribugha thuthi, ‘Lhangira ekyo thwamabirikolha!’” Baghalha bethu mubaligha ngoku Yehova yulyabathokesaya, aliwe lhwabya isilhuhwere.

Eby’erikolesya esyoredio byabya imubyanamatsuka, n’ebyuma ebyanga kolesibwa byabya isibiribanika lhuba-lhuba. Neryo baghalha bethu mubabana ekyuma eky’omuyikolere, ekyabya ikyabirikolesibwa kera eky’amani aw’esya watt 500. Omwakanya k’erighulha akazindalo, mubakolesya ak’okwa simu eya buli kiro. Erigholho lighuma omwa Kwakabiri, baghalha bethu mubathwamu erilengesya ebyuma ebyosi ebi. Baghalha bethu mubayithagha eprogramu ey’erihira okwa redio, neryo mubathwamu eryimba esyonyimbo sy’Obwami. Ernest Lowe ak’ibuka ekindu ekikasekaya ekyabya omughulhu baghalha bethu babya bak’imba, Mughalha wethu Rutherford, oyuwowa bakimbira  okwa redio iniane e Brooklyn esyokilomita nga 25 erilhua aho babya, mwabatherera esimu.

Mughalha wethu Rutherford mwabugha athi: “Muleke ebyuwungu byenyu ebyo. Emirenge yenyu yamowika ng’esyopusu esikalira.” Ibabiribya ng’abamahemuka, mubalimya ekyuma ekyo, aliwe mubaminya ngoku bakendi thoka eribuya eredio omurundi w’erimbere.

Omwa Kwakabiri 24, 1924, omurundi w’erimbere eredio eribugha buthongole, Mughalha wethu Rutherford mwahayo eredio “busana n’eriberererya emibiiri y’obwami bwa Masiya.” Mwabugha athi ekighendererwa ky’eredio eyi “ly’eriwathikya abandu abosi eriyitheghererya e Biblia n’omughulhu owathulimo.”

Omurundi w’erimbere erikolesya eredio eya WBBR mubyaghenda ndeke. Ahabw’emyaka 33 eyakwamako, abandu ba Yehova mubakolesya e WBBR erilhabiryako esyondegheka syabu.

Omo Kwomusanju 1924, Abigha be Biblia mubahindana haghuma okwa lhuhindano e Columbus, Ohio. Abahindana mubalhua omwa bihugho bingyi erithimba omwa kihugho kyosi, kandi mubahulikirira emikania yikalhabibwa omwa Lhuharabu, Olhusungu, e French, Olhujamane, Olhugiriki, Olhuhangarian, Olhuitaliani, Olhulithuania, Olhupolishi, Olhurasia, emibughe ye Scandinavia, n’Olhuyukrenia. Ebitsweka birebe eby’eprogramu mubyahiribwa okwa redio, n’emitheghekere muyahirwaho busana n’olhupapura olhwa Ohio State Journal erihandika emyatsi eyihambire okwa lhuhindano olho.

Kyakani, Okwomusanju 24, balikyethu abalhabire oku 5,000 abahindana okwa lhuhindano mubasangira omw’ithulira. Mubaghaba ebitabu ebilhabire omwa 30,000 n’eritsukisya esyongumi sy’abigha be Biblia. E Watch Tower muyabugha okwa kiro ekyo yithi “kyabya kitsweka ekyatsemesaya kutsibu eky’Olhuhindano olho.”

Kyakathano, Okwomusanju 25, Mughalha wethu Rutherford inianemulhabya omughuma w’okwa mikania yiwe, buthubaha mwasoma ekihandiko ekyabya kikatsweba abakulhu b’amadini. Omwa kihandiko kiwe, mwatsweba abakulhu b’eby’ekipolitiki, ab’amadini n’ab’eby’obusubure busana “n’erileka abandu ibathaminya esyondegheka sya Nyamuhanga esy’eritsumulha abandu omw’ibaha engebe y’erikotha.” Eryongera okw’ekyo, ekihandiko ekyo mukyakangania kithi abalhume aba “babirihamya okwa kithongole ky’Amahanga Awayitherene n’eribugha bathi ‘ni bwami bwa Nyamuhanga bw’okwa kihugho erilhabira omwa myatsi ey’epolitiki.’” Abigha be Biblia mubayithagha obuthubaha n’erighumisirizya erithoka eribwira abandu b’omwatsi oyu.

E Watch Tower muyakania omwa bikuhi ngoku olhuhindano lhwahamba okwa bandu yithi:  “Amahe make w’Omukama aya awahindana okwa lhuhindano lhwe Columbus mwasubayo erikirirya lyabu iryabirihimbwa . . . , isibanga hambwako n’amaaka wosi-wosi kutse ekindu kyosi-kyosi ekyo esyonzighu syabu syangakolesya eribalemesya.” Leo Claus, oyuwahindana okwa lhuhindano, akibuka bino: “Muthwalhua okwa lhuhindano ithwabiribya n’omuhwa munene w’eribwira abandi bw’omwatsi oyu.”

Omwa Kwerikumi, Abigha be Biblia mubatsuka erighaba esyomiliyoni sy’esyokopi esy’etrakit eya Ecclesiastics Indicted, e trakit eyiprintingire eyabyamo ebya Mughalha wethu Rutherford asoma ebihambire okwa bakulhu b’amadini. Omwa tawuni nyike eya Cleveland, Oklahoma, Frank Johnson mwaghunza erighaba esyotrakit omwa bulhambu obo bamuha ihakine dakika 20 abandi erimuhikako bakasyamwenda. Abya isyanga balindira aho banga mulhangirira kundi abalhume b’omwa tawuni eyo babya ibane mumusondya ibabirimuhithanako busana n’omubiri wiwe ow’erithulira. Mughalha wethu Johnson mwathwamu eriyibisa omwa kanisa eyabya hakuhi. Kundi mweya isimuli mundu, mwathwamu erihira esyokopi sy’etrakit eya Ecclesiastics Indicted omwa Biblia ey’omuhalimu w’ekanisa n’okwa buli kithumbi. Mwalhuaho inialhua omwa kanisa omwa byalhuba. Kundi abya iniakinawithe obuthuku, mwakolha ikyan’ekyo omwa sindi kanisa ibiri.

Frank mwanguha amasuba omwa mwanya ogho abya iniakendi bananganiramu n’abalikyabu. Mwabisama ekanyuma sy’aho esyamatoka sikanywira amaghutha, inianayikengemerere abalhume ababya bakamusondya. Abalhume abo mubalhaba aho ali ibane omwa matoka, aliwe mubathamulhangira. Babere babirighenda, abathuliri balikyabo Frank, ababya ibanemuthulira omwa bulhambu obo, mubasyamwenda neryo abosi mubaghenda omwa matoka.

Omughuma w’okwa baghalha bethu abo akabugha athi: “Thwabere thukalhua omwa tawuni muthwalhaba okwa syakanisa isathu esyo. Embere sy’obuli kanisa yabya iyin’imene abandu nga 50. Abaghuma b’okwa bandu abo, babya ibane musoma e trakit eyo, n’abandi ibanemusumbayo nuku omuhalimu w’ekanisa alhangireyo. Ekibuya, muthwalhuaho lhuba hathe habanika butsibu! Aliwe muthwasima Yehova Nyamuhanga wethu busana n’obutheya bwiwe n’amenge awathuwathikaya nuku esyonzighu sy’Obwami sisithuhambe.”

Omwa bindi bihugho, Abigha be Biblia mubakangania obulhume-lhume obuli ng’obo bakathulira. Omwa France y’endatha, Józef Krett mwathulira abandu ababya bakakolera aho bakathakulha eby’obughuli eby’omwa kithaka abahuma erilhua e Poland. Abya w’erilhabya omukania owakabugha athi “Erilhubuka ly’Abaholi Liri Hakuhi.” Esyokada sy’erikokya syabere sikaghabirwa abandu b’omwa tawuni, omufaza w’omwa tawuni eyo mwabwira abali omwa parishi yiwe athi isibaghendayo. Ebyo abugha mubithaghenderwako. Abandu abalhabire omu 5,000 mubahindana okwa mukania oyo, imwamune n’omufaza oyo! Mughalha wethu Krett mwabwira omufaza athi ase athakangania okwenene kw’esyonyikirirya siwe, aliwe mwaghana. Mughalha wethu Krett mwaghaba ebitabu ebyosi ebyo abya nabyo, kundi mwalhangira ngoku abandu abo athulira babya n’enyotha y’Ekinywe kya Nyamuhanga.—Amo. 8:11.

Omwa Afrika, Claude Brown mwaletha engulhu yuwene e Gold Coast, lino eyasibwe mwa Ghana. Emikania yiwe n’ebitabu ebyo abya akaghaba mubyawathikya okw’ilhalhania ekwenene omwa byalhuba omwa kihugho ekyo. John Blankson, oyuwabya akasomera eby’emibatsi, mwahulikirira okwa mughuma w’okwa mikania ya mughalha wethu Brown. Mwalhwaho iniaminya ngoku abiribana ekwenene. John akabugha athi: “Ekwenene muyaleka inatsema, kandi iningakanaya kuyo ahathe eribisirira okwa sukuru eyo nabya ngasomerako eby’emibatsi.”

 Kiro kighuma, John mwaghenda okwa kanisa y’Abapira eriyabulya omukangirirya wabu ebihambire okwa busathu bubuyirire, engangirirya eya John abya iniabiriminya ngoku siyiri omwa masako. Omukangirirya mwamuthibithako, n’eritsuruma omwa mulenge muli athi: “Siwuli Mukristayo; wuli wa Sitani. Ulhua hano!”

Abere akahika eka, John mwahandikira omukangirirya oyo y’ebaruha, eyikamukokaya erisyakania okwa busathu omwa mwanya owali mw’abandu bangyi. Omukangirirya w’ekanisa mwabwira John athi amubane omwa ofisi y’omuhalimu mukulhu ow’esukuru eyo abya akasomerako eby’emibatsi. Eyo, omuhalimu mukulhu w’esukuru oyo mwamubulya nga nina kwenene indi mwahandikira omukangirirya w’ekanisa.

John mwasubirya athi:“Ee mukulhu, munakikolha.”

Omuhalimu mwabugha athi John atholere iniahandikira omukangirirya w’ekanisa ebaruha y’erisaba ekighanyiro. Neryo John mwahandika athi:

“Mukulhu, Omuhalimu waghe mwakabugha athi ngakuhandikire erikusaba ekighanyiro kandi nganayitheghekire erikolha ekyo w’amaligha ngoku wukakangiriraya esyongangirirya sy’amabehi.”

Inianaswekire, omuhalimu w’esukuru mwabulya athi, “Blankson, ebi byawukanza erihandika?”

“Ee, Mukulhu. Ebyo byananga handika.”

“Wukayabingawa. Wanga thoka wuthi erikania nabi okwa mukangirirya w’ekanisa y’egavumente neryo iwalengekania wuthi wukendi sighalha okwa sukuru y’egavumente?”

“Aliwe ibbwa, Mukulhu, . . . wukabya wukathusomesya neryo hakabya esyonzumwa esyo thuthethakenga, mbwino sithuli kubulhaya ebibulyo?”

“Ni kwenene, mukabulhaya.”

“Mukulhu, okwenene kuli kuthi, ekyo ky’ekyabere. Omulhume oyu abya inianemuthweghesya e Biblia neryo n’amamubulya ekibulyo. Amabya isyathathoka erisubirya ekibulyo, busana naki iwabugha wuthi ngahandike ebaruha y’erimusaba ekighanyiro?”

Blankson mwathabingwa. Kandi mwathahandika ebaruha y’erisaba ekighanyiro.

E Watch Tower muyakania omwa bikuhi okwa byabya omwa mwaka oyo yithi: “Omo kwenene, thwangana bugha nga Dawudi thuthi: ‘Wukamba amaaka w’erilhwa, wabirikinda esyonzighu syaghe.’ (Esyonyimbo 18:39) Oyu ni mughuma w’okwa myaka eyathuhimba kutsibu, kundi thwabiriyilhangirira okuboko kw’Omukama . . . abandu biwe ababiriyihayo . . . babirilholha embere eriha obwema ibanatsemire.”

Omwaka akayahwa, baghalha bethu mubahiraho emitheghekere y’eryongera erithulira okwa redio. Omubiiri mwatsuka okwa yindi redio e Chicago. Eredio mbyaka eyi muyathunga erina eritholere erya WORD. Omw’ikolesya ekyuma eky’amani w’esya watt 5,000, eredio WORD iyikathuma omwatsi w’Obwami erihika haali, nibya n’omwa Canada y’endatha.

Omwa mwaka owa 1925, ekyakakalha kyethu ky’obunyakirimu kyabya ikikay’ongera omwa nzira eyikatsemesaya, okwa Bigha be Biblia omw’ithasyathunga eriyitheghererya lihya-lihya erya Eribisulirwa sura 12. Eki kyanga lekire abandi ibathwikalha. Nomwabine, abangyi bangatsemere eriyitheghererya lihya-lihya eri erihambire okwa bindu ebikendi syabya omwa lhubulha kandi eriyitheghererya eri nga lyangahambire lithi okwa bandu ba Nyamuhanga okwa kihugho.