OMWATSI W’ERIGHA 42
OLHWIMBO 103 Abalisya Ni Balhume b’Olhusunzo
Kanganaya ku Wukasima Abalhume b’Olhusunzo
“Omughulhu ahethukira endatha . . . mwaha abandu [abalhume] b’olhusunzo.”—EFE. 4:8.
EKIGHENDERERWA
Ngoku abaghombe abawathikya, abasyakulhu b’ekithunga, n’abalebererya b’omuthimbo bakathuwathikaya kandi nga thwanga kangania thuthi ku thukasima ebyo abalhume abathaleghulha aba bakakolha.
1. Ebighuma by’okwa bihembo ebyo Yesu abirithuha by’ebyahi?
SIHALI mundu oyuwabirithakolha bingyi eriwathikya abandi nga Yesu. Iniane okwa kihugho, ahathe eriyikukumirira mwakolesya amaaka wiwe erikolha ebithiko-thiko eriwathikya abandi. (Lk. 9:12-17) Mwahayo ekihembo ekilengire ebyosi omw’ihayo engebe yiwe busana nethu. (Yn. 15:13) Erilhua ah’akathalhubukira, Yesu abirilholha embere eribya oyukawathikaya abandi. Ngoku analhaghanisaya, abirisaba Yehova athi athuthulireko omulimu wiwe abuyirire busana n’erithukangirirya n’erithuhumulikania. (Yn. 16:13) Kandi erilhabira omwa mihindano yethu y’ekithunga, Yesu akolholha embere erithuthendeka ngoku thwanga yira abigha omwa kihugho kyosi.—Mt. 28:18-20.
2. Abalhume b’olhusunzo abakanibweko omwa Abanya Efeso 4:7, 8 ni bahi?
2 Thalengekania okwa kindi kihembo ekya Yesu abirithuha. Omukwenda Paulo mwahandika athi, Yesu abere abirighenda elhubulha, mwathuhererya abalhume b’olhusunzo. (Soma Abanya Efeso 4:7, 8.) Paulo mwasoborera ngoku Yesu mwathuha abalhume b’olhusunzo aba erithoka erisighika ekithunga omwa nzira muthina-muthina. (Efe. 1:22, 23; 4:11-13) Munabwire, abalhume b’olhusunzo aba, mwamuli abaghombe abawathikya, abasyakulhu b’ekithunga, n’abalebererya b’omuthimbo. a Omo kwenene, abalhume aba sibahikene, neryo bakanasobaya. (Yak. 3:2) Aliwe Omukama wethu Yesu Kristo akabakolesaya erithuwathikya; ibo ni bihembo ebyo abirithuha.
3. Soborera ithwe bosi nga thwanga sighika thuthi omubiiri w’abalhume b’olhusunzo.’
3 Yesu mwahererya abalhume b’olhusunzo aba b’omubiiri w’erighumya ekithunga. (Efe. 4:12) Aliwe ithwe bosi thwangana bawathikya eriberererya olhukwamirwa lhukulhu olhu. Ng’eky’erileberyako: Abandi omw’ithwe thukasangira omw’ihimba Ebisenge by’Obwami. Abandi bakasighika omubiiri omw’ihayo ebyalya, etrasipoti n’ebindi ebikayithayisibawa. Kuthya, ithwe bosi thwangana sighika akaghalha ako abaghombe abawathikya, abasyakulhu b’ekithunga, n’abalebererya b’omuthimbo bakahiraho omwa byathukabugha n’erikolha. Thulebaye nga thwanga ghasirwa thuthi omw’ikolha lyabu kutsibu kandi ngoku thwanga kangania ku thukasima ibo haghuma na Yesu, oyuwathuha abalhume b’olhusunzo aba.
ABAGHOMBE ABAWATHIKYA “ABAKAWATHIKAYA ABANDI”
4. Omwa kighana ky’erimbere, ni byahi ebyo abaghombe abawathikya babya bakakolha ‘eriwathikya abandi’?
4 Omwa kighana ky’erimbere, abandi baghalha bethu mubasombolhwa eribya baghombe abawathikya. (1 Tim. 3:8) Bakabya nga n’ibo babya bakakolha omubiiri ‘ow’eriwathikya abandi’ owa Paulo akanayako. (1 Kor. 12:28) Kilhangirikire ngoku abaghombe abawathikya ibakakolha emibiiri eyikayithayisibawa nuku abasyakulhu b’ekithunga bahweraye amalengekania okw’ikangirirya n’erilisya esyombuli. Ng’eky’erileberyako, abaghombe abawathikya bangabya ibabya bakawathikya okw’ihandika esyokopi sy’Amasako kutse okw’ighulha ebindu ebikayithaghisibawa erihandika esyokopi esyo.
5. Ni mibiiri nga yahi ey’eriwathikya eyo abaghombe abawathikya bakakolha munabwire?
5 Thalengekania okwa nzira ndebe esyo abaghombe abawathikya bakawathikirayamo omwa kithunga kyenyu. (1 Pet. 4:10) Bangana hebwa olhukwamirwa lhw’erikolha okwa by’embaririra kutse amalhambu, erisabira ekithunga ky’ebitabu, erikolera okwa redio, eribya bathangiriri, kutse eriwathikya okw’isugha Ekisenge ky’Obwami. Emibiiri yosi eyi yikayithaghisibawa ekithunga erithoka eribya omwa buyithondeke. (1 Kor. 14:40) Eryongera okw’ekyo, abandi baghombe abawathikya bakalhabaya ebitsweka okwa muhindano ow’Engebe n’Omubiiri n’erilhabya emikania y’abandu bosi. Kandi omughombe omuwathikya anganasombolhwa eriwathikya omulebererya w’egurupu. Okwa bundi buthuku, abaghombe abawathikya abatholere bakanaghenda haghuma n’abasyakulhu okwa syombungo sy’erilisya.
6. Ni nzumwa syahi esikaleka ithwasima abaghombe bethu abawathikya abakakolha kutsibu?
6 Emibiiri eyo abaghombe abawathikya bakakolha yikaghasira yithi ekithunga? Mwali wethu Beberly, b owe Bolivia akabugha athi, “Ngasima abaghombe bethu abawathikya, kundi ngaghasirawa ndeke omwa mihindano. Busana n’omubiiri wabo, ng’imba, inasubirya, inahulikirira emikania, n’er’ighira okwa syovidiyo n’ebisasani. Bakatsomana eby’obuyirinde n’eritsomana abakahindana erilhabira okwa nganirania y’evidiyo. Emihindano yikabya yikahwamu, bakawathikaya okwa buyonzo, eby’embaririra, n’erilhangira bathi thukabana ebitabu ebyo thukayithagha. Ngabasima!” Leslie, oyuwikere e Colombia kandi oyo mwira wiwe akakolha ng’omusyakulhu w’ekithunga, akabugha athi: “Mwira waghe akayikethera abaghombe abawathikya erikolha emibiiri muthina-muthina. Ku bathabyaho, angabere bbize na kwilhaba, neryo ngasima omuhwa wabu n’eribya ibanayitheghekire eriwathikya.” Ahathe erithika-thika ithwe abosi thukasima emibiiri eyo abaghombe abawathikya bakakolha.—1 Tim. 3:13.
7. Thwanga kangania thuthi ku thukasima abaghombe abawathikya? (Lebaya n’ekisasani.)
7 Nomwakine indi thwangana yowa ithunemusima abaghombe abawathikya, e Biblia yikathubwira yithi: “Mubye bandu b’ewasingya.” Eki kikamanyisaya kithi thutholere ithwakangania ku thukasima. (Kol. 3:15) Kristofer, omusyakulhu w’ekithunga owe Finland, akakanganaya erisima liwe omwa nzira eno, “Ngathuma ekadi kutse emeseji n’erihira mw’erisako kutse eryahulha enzira ndebe eyo omughombe omuwathikya akanyihimbiramo kutse ekikaleka inasima omubiiri wiwe.” Pascal na Jael ab’ikere e New Caledonia, bakahira abaghombe abawathikya b’omwa misabe yabu. Pascal akabugha athi: “Lino-lino, thwabiribya ithunemusaba n’erisima busana na baghalha bethu aba abawithe olhukwamirwa omwa kithunga.” Yehova ak’owa emisabe ng’eyo, kandi ekithunga kyosi kikaghasirawa.—2 Kor. 1:11.
ABASYAKULHU B’EKITHUNGA “ABAKAKOLHA KUTSIBU OMO KATHI-KATHI KENYU”
8. Busana naki Paulo mwahandika athi abasyakulhu b’omwa kighana ky’erimbere ‘bakakolha kutsibu’? (1 Abanya Tesalonika 5:12, 13)
8 Omwa kighana ky’erimbere, abasyakulhu ibakakolha kutsibu omwa kithunga. (Soma 1 Abanya Tesalonika 5:12, 13; 1 Tim. 5:17) ‘Ibakasondolha’ ekithunga—erisondolha emihindano n’erikolha erithwamu ng’akathunga k’abasyakulhu. ‘Ibakahana’ balikyabo—eriha erihabulha lirebe ery’olhwanzo nuku batheghaye ekithunga. (1 Tes. 2:11, 12; 2 Tim. 4:2) Kandi, abalhume aba ibakakolha kutsibu eriha esyofamile syabo sy’ebiyithawa byasyo, n’erilhangira bathi bakasighalha ibanaghumire bunyakirimu.—1 Tim. 3:2, 4; Tito 1:6-9.
9. Ni ngwamirwa syahi esyo abasyakulhu bakaberereraya?
9 Munabwire, abasyakulhu b’ekithunga ni balhume abali bbize. Ni bathuliri b’engulhu yuwene. (2 Tim. 4:5) Bakasondolha n’omuhwa omubiiri w’erithulira, ibatheghekania omubiiri w’erithulira omwa bulhambu bwethu, kandi ibathuthendeka erithulira n’erikangirirya ndeke. Kandi bakakolha ng’abatsweri b’olhukeri, abathawithe kasolholho. Omukristayo amakolha ekibi ekikalire, abasyakulhu bakalengaho erimuwathikya eryuwania obughuma bwiwe na Yehova. Banemukolha ekyo, bakalhangira bathi ekithunga kikabya ikinahenirye. (1 Kor. 5:12, 13; Gal. 6:1) Ekikulhu kutsibu, abasyakulhu basibwe ng’abalisya. (1 Pet. 5:1-3) Bakalhabaya emikania eyiseghemere okwa Masako eyitheghekirwe ndeke, bakalengaho eriminya obuli mughuma omwa kithunga, kandi bakaghenda okwa syombungo sy’erilisya. Eryongera okwa sindi ngwamirwa, abandi basyakulhu bakawathikaya okw’isugha n’erihimba Ebisenge by’Obwami, eritheghekania emihindano eminene-minene, n’erikolha okwa Hithunga hy’Abakakolongana n’Amathambiriro, n’Ehithunga Ehikabungira Abalhwere. Abasyakulhu bakakolha kutsibu busana nethu!
10. Ni nzumwa nga syahi esyangaleka ithwasima abasyakulhu bethu ab’ekithunga abakakolha kutsibu?
10 Yehova mwalhaghanisya ngoku abalisya basyathutsomana ndeke kandi ‘sithwendi syubaha kandi, kutse erikwa engitsi.’ (Yer. 23:4) Johanna, mwali wethu owe Finland, mwayilhangirira ngoku ebinywe ebi ni by’ekwenene mama wiwe akalhwalha obulhwere obukalire. Akabugha athi: “Nomukikananyikalira eribwira abandi b’eriyowa lyaghe, omusyakulhu oyo nabya isingasi mwanyighumisirizya, amasaba naghe, kandi amanyikakasya ngoku Yehova anyanzire. Sind’ibuka ebinywe ebyonyine-nyine ebyo abugha, aliwe ng’ibuka ngoku munayowa ingali omwa butheya. Ngaligha ngoku Yehova yuwamuthuma erinyiwathikya okwa buthuku obutholere.” Abasyakulhu ab’omwa kithunga kyenyu babirikuwathikya bathi?
11. Thwanga kangania thuthi ku thukasima abasyakulhu? (Lebaya n’ekisasani.)
11 Yehova anzire ithwakangania ngoku thukasima abasyakulhu “busana n’omubiiri wabo.” (1 Tes. 5:12, 13) Henrietta, nayu oyuwikere e Finland, akabugha bino: “Abasyakulhu bakawathikaya abandi ahathe erikakwa, aliwe ekyo sikirimanyisaya kithi bawithe obuthuku n’akaghalha kanene kwilhaba abandi kutse sibawithe ebitsibu omwa ngebe syabo. Okwa bundi buthuku, ng’akwama kyababwira indi, Ibbwa wunakyasi! Wuli musyakulhu oyuwene. nganzire iwaminya ekyo.’” Mwali wethu owe Türkiye c oyukahulhawamo Sera akabugha athi: “Abasyakulhu bakayithagha erihirwa mw’omuhwa erithoka erilholha embere. Neryo ithwangana bahandikira akabaruha, ithwabakokya okw’irya, kutse erighenda nabo omw’ithulira.” Hane omusyakulhu oyo wukasima busana n’akaghalha ako akahiraho? Sondaya esyonzira esy’erikanganiryamo erisima eryo.—1 Kor. 16:18.
Wangana hira omwa basyakulhu “mw’omuhwa” ogho bakayithagha erilholha embere (Lebaya enungu 7, 11, 15)
ABALEBERERYA B’OMUTHIMBO ABAKATHUHIMBA
12. Ni mitheghekere yahi eyahirawaho erighumya ebithunga omwa kighana ky’erimbere? (1 Abanya Tesalonika 2:7, 8)
12 Kristo Yesu mwaha Ekithunga abalhume b’olhusunzo abakakolha omwa yindi nzira. Omwa busondoli bwiwe, abasyakulhu omwa Yerusalemu mubathuma Paulo, Barnaba, n’abandi ng’abalebererya abakabalhama. (Emib. 11:22) Busana naki? Ahabw’enzumwa ngumerera eyikaleka abaghombe abawathikya n’abasyakulhu ibasombolhwa: erighumya ebithunga. (Emib. 15:40, 41) Abalhume aba babya bakayithalya okwa bindi nibya n’erihira esyongebe syabo sy’omwa kabi erithoka erikangirirya n’erihimba abandi.—Soma 1 Abanya Tesalonika 2:7, 8.
13. Ni syongwamirwa nga syahi esyo abalebererya b’omuthimbo bakaberereraya?
13 Mughulhu wosi abalebererya b’omuthimbo bakabya ibanemughenda-ghenda. Abandi bakaghenda esyongumi sy’esyokilomita bakabungira ebithunga. Obuli wiki, omulebererya w’omuthimbo akalhabaya emikania nga y’eyo, iniaghenda okwa syombungo sy’erilisya, iniasondolha omuhindano w’abatemburi, kuthya n’ow’abasyakulhu, n’erisondolha emihindano y’eriyathulira. Akathegheka emikania n’eritheghekania emihindano eminene-minene. Akasomesaya esukuru y’abatemburi, iniahira h’emitheghekere ey’eribya n’omuhindano w’embaghane haghuma n’abatemburi b’omwa muthimbo—n’erikolha okwa yindi myatsi, okwa bundi buthuku imwamune eyikayithaghisibawa lhuba-lhuba eyo ekyaghanda ky’omuthahulha kikabugha kithi akole.
14. Ni nzumwa nga syahi esikaleka ithwasima abalebererya bethu b’omuthimbo abakakolha kutsibu?
14 Ebithunga bikaghasirawa bithi omwa kihembo ky’abalebererya b’omuthimbo? Akakania okwa syombungo sy’abalebererya b’omuthimbo, mughalha wethu owe Türkiye akabugha athi: “Obuli lhubungo lhwabo lhukanyihira mw’omuhwa w’eryongera endambi y’eriwathikya balikyethu. Nabiribanangana n’abalebererya b’omuthimbo bangyi; aliwe, sihali n’omughuma w’okw’ibo oyuwabiribya nga syanga hikirwa kutse nga syanga nyibanira buthuku.” Johanna, oyulyakanibawako, mwathulira haghuma n’omulebererya w’omuthimbo, mubathasanga okwa miyi kw’omundu wosi-wosi. Akabugha athi, “Nomwabine, sinendisy’ibirirwa ekiro ekyo. Bali bethu babiri abanzubireko babya imubanamahuma, neryo nabya inabiribakwa lhukando lhunene. Omulebererya w’omuthimbo mwanyihimba ndeke kandi amanyiwathikya erilhangira ngoku omwa mubiiri wa Yehova, eribya haali okwa bahughu n’abanywani ni ky’akathuku kake aliwe omwa kihugho kihya-kihya thukendisyabya n’ehighisa hy’erisyabya haghuma kera na kera.” Abalebererya b’omuthimbo bangyi ku bakanayihira oku balikyethu.—Emib. 20:37–21:1.
15. (a) Ngoku kiri omu 3 Yohana 5-8, thwanga kangania thuthi ku thukasima abalebererya b’omuthimbo? (Lebaya n’ekisasani.) (b) Busana naki thutholere ithwakangania ku thutsomene abakali b’abalhume b’olhukwamirwa, kandi thwanga kolha eki kya thuthi? (Lebaya akasanduko “ Mwibuke Bakali Babu.”)
15 Omukwenda Yohana mwahira omu Gayo mw’omuhwa w’eribya oyukakokaya balikyethu abakabalhamira ebithunga ‘n’erikwamanisyabo omwa nzira yabo, ngoku litholere embere sya Nyamuhanga.’ (Soma 3 Yohana 5-8.) Enzira nguma eyo thwanga koleramo ekyo ly’erikokya omulebererya w’omuthimbo okw’irya. Eyindi nzira ly’erisighika esyondegheka sy’omubiiri w’erithulira omwa buthuku bw’olhubungo lhwiwe. Leslie, oyulyakanibawako, akakanganaya erisima omwa sindi nzira. Akabugha athi: “Ngasaba Yehova indi abahe ebiyithawa byabu. Kandi ingye na mwira waghe thwabiribya ithunemubahandikira esyobaruha eribabwira ngoku esyombungo syabu sikathuwathikaya.” Wibuke, abalebererya b’omuthimbo si bandu abawithe amaaka w’embaghane. Okwa bundi buthuku, bakalhwalha, ibabya omwa maghaniryo, kandi nibya n’erihwa amaani. Obundi ebinywe byawu by’olhukeri n’ekihembo ekitholere byangabya in’isubirya ly’omusabe w’omulebererya wenyu w’omuthimbo!—Emi. 12:25.
THUKAYITHAGHA ABALHUME B’OLHUSUNZO”
16. Ngoku kiri omwa Emisyo 3:27, ni bibulyo byahi ebyo baghalha bethu bangayibulya?
16 Erithimba omwa kihugho kyosi, thukayithagha baghalha bethu bangyi abangakolha ng’abalhume b’olhusunzo. Wamabya iwuli mughalha wethu oyubatizibirwe, mbwino wunawithe “amaaka omwa byalha byawu erikolhakyo”? (Soma Emisyo 3:27.) Wunanzire eritholera erikolha ng’omughombe omuwathikya? Wunanzire eritholera eritsomana ebiyithawa bya balikyenyu omw’ikolha ng’omusyakulhu? d Mbwino wangana thoka erikolha esyombinduka ndebe omwa ngebe yawu nuku w’usuliriraye efomu y’erighenda okwa Sukuru y’Abathuliri b’Obwami? Esukuru eyi yikendi kuthendeka n’erileka Yesu iniakukolesya omwa buswire. Wamayowa nga siwutholere, saba Yehova. Musabe obuwathikya bw’omulimu wiwe abuyirire erithoka eriberererya ndeke olhukwamirwa lhwosi-lhwosi olho wukahebawa.—Lk. 11:13; Emib. 20:28.
17. Abalhume b’olhusunzo bakaleka ithwakakasya kyahi oko Mwami wethu, Yesu Kristo?
17 Erikolha kutsibu lya baghalha bethu abo Yesu abirisombolha ng’abalhume b’olhusunzo likaleka ithwakakasya ngoku anemuthusondolha omwa biro bino eby’enyuma-nyuma. (Mt. 28:20) Mbwino siwuli sima eribya ithuwithe Omwami w’olhwanzo, oyukahithaya, oyutsomene kandi oyukathuha baghalha bethu abatholere erithutsomana? Neryo sondaya ehighisa ehy’erikanganiryamo ku wukasima baghalha bethu abakakolha kutsibu aba. Kandi isiwibirirawa erisima Yehova, oyuli Nzuko ‘y’obuli lhusunzo lhubuya n’obuli lhusunzo lhuwene.’—Yak. 1:17.
OLHWIMBO 99 Esyongumi sy’Abalikyethu
a Abasyakulhu abali okwa Kathunga Akasondolha, abawathikya ab’Akathunga Akakasondolha, abali okwa Syokomiti sy’Ebyaghanda by’Omuthahulha, n’abawithe esindi ngwamirwa omwa mubiiri wa Yehova, nabu ni balhume b’olhusunzo.
b Awandi mena abirihindulhwa.
c Kera eyabya yikahulhwamo Turkey.
d Eribana bingyi nga wanga simbirira wuthi erikolha ng’omughombe omuwathikya kutse omusyakulhu, lebaya omwatsi “Baghalha bethu—Mbwino Munemusimbirira Eribya Abaghombe Abawathikya?” na “Baghalha bethu—Mbwino Munemusimbirira Erikolha ng’Abasyakulhu?” omwa Kaleberyo ak’Okwerikuminakughuma 2024.
