OMWATSI W’ERIGHA 40
OLHWIMBO 30 Thatha Waghe, Nyamuhanga, Kandi Munywani
Yehova “Akalhamaya Ababbunikire omo Muthima”
“Akalhamaya ababbunikire omo muthima, akasenga-senga ebironda byabo.”—ESY. 147:3.
EKIGHENDERERWA
Yehova akatsomana kutsibu ababbunikire omo muthima. Omwatsi ono akendi thuwathikya erilhangira ngoku Yehova akathuhumulikanaya omughulhu thuli omwa bulighe kandi ngoku akathuwathikaya erihumulikania abandi.
1. Yehova akayowa athi okwa baghombe biwe?
NI KYAHI ekya Yehova akalhangira akasamalira abaghombe biwe okwa kihugho? Akalhangira omughulhu thuli omwa tseme n’omughulhu thuli omwa bulighe. (Esy. 37:18) Ka kikamutsemesaya kutsibu akalhangira ithunemumukolera ngoku thwanga thoka nomwakine indi thunemubana amalighe! Kwilhaba n’aho, anzire erithusighika n’erithuhumulikania.
2. Ni kyahi ekya Yehova akakolera ababbunikire omuthima, kandi thwanga ghasirwa thuthi omw’itsomana liwe?
2 Esyonyimbo 147:3 hakabugha hathi Yehova ‘akasenga-senga ebironda’ eby’ababbunikire omuthima. Omwa lisako lino Yehova akakanibawako ng’oyukatsomana ndeke ababbunikire omuthima. Thwanga kolhaki erithoka erighasirwa omw’itsomana lya Yehova? Thulebaye eky’erileberyako. Omudokita oyuwasi bingyi anganakolha bingyi eriwathikya omundu oyuwabirihuthalha erithoka erilhama. Aliwe, erithoka erighasirwa, oyuhuthere atholere iniaghendera ndeke okwa busondoli bwa dokita. Omwa mwatsi ono, thukendi lhangira ebya Yehova akabwira ababbunikire omuthima erilhua omwa Kinywe kiwe kandi thukendi lebya ngoku thwanga ghendera okw’ihabulha liwe ly’olhwanzo.
YEHOVA AKATHUKAKASAYA NGOKU THULI B’OBUGHULI
3. Busana naki abandi bakayowa nga sibawithe mughaso?
3 Thuli omwa kihugho ekithemo lhwanzo, kandi eky’obulighe, abandu bangyi babirileka abandi ibayowa nga sibawithe mughaso. Mwali wethu oyukahulhawamo Helen a akabugha athi: “Munakulira omwa famile eyithemo lhwanzo. Thatha waghe iniatsurumire kandi obuli kiro iniakathubwira athi sithuwithe mughaso.” Obundi, nga Helen, wabirikolhwa nabi, eribera eritswebwa-tswebwa, kutse abandi ibaleka iwayowa nga siwanzibirwe. Kyamabya ikwakiri kithya, kyangana kukalira eriligha ngoku hane oyukutsomene erilhua okwa muthima.
4. Ngoku kiri omwa Esyonyimbo 34:18, ni kakasya lyahi erya Yehova akathuha?
4 Nomwakine indi abandi babirikukolha nabi, wangana yikethera ngoku Yehova akwanzire kandi ngoku akakulhangira mwa w’obughuli. Iyo “ali hakuhi n’ab’emithima ibbunangikire.” (Soma Esyonyimbo 34:18.) Wamayowa ‘isiwuwithe maha,’ wibuke ngoku Yehova mwalhangira ebibuya omwa muthima wawu neryo amakuletha okw’iyo. (Yn. 6:44) Anayitheghekire erikuwathikya kundi wuli w’obughuli embere siwe.
5. Thwang’ighaki okwa mibere Yesu athwaliramu abakalhangirawa mwa b’ahisi?
5 Thwangana minya Yehova ng’akayowa athi omw’ilengekania okwa ky’erileberyako kya Yesu. Iniane okwa kihugho, Yesu mwalhangira ababya bakalhangirwa mwa b’ahisi, neryo mwabakangania olhukeri. (Mt. 9:9-12) Omughulhu omukali oyuwabya awithe amaha w’erilhamibwa kw’obulhwere obukalire ahamba oko lhukimba lhwa Yesu, mwamuhumulikania kandi amamusima busana n’erikirirya liwe. (Mk. 5:25-34) Yesu akagherereraya ndeke-ndeke emibere ya Thatha wiwe. (Yn. 14:9) Neryo kwesi wangana yikethera ngoku Yehova akakulhangira mwa w’obughuli kandi ngoku akalhangira emibere yawu mibuya, imwamune erikirirya lyawu n’olhwanzo olhwa wumuwithire.
6. Omundu angakolhaki erithoka erighumira eriyowa nga syawithe mughaso?
6 Wangakolhaki wamabya iwukabera eriyowa nga siwuwithe mughaso? Soma emilhondo ye Biblia eyikakukakasaya ngoku wuli w’obughuli embere sya Yehova kandi ghaniraya kuyo. b (Esy. 94:19) Wamabya iwabirilemwa erihika okwa kilhubirirwa kyawu kutse iwabirihwa amani kundi siwanga kolha bingyi ng’abandi, isiwayitsweba kutsibu. Yehova syali kuyithaghako ebya wuthe wangathoka. (Esy. 103:13, 14) Wamabya imuwanakolhwa nabi, isiwayitsweba busana n’ekya oyuwakukolha nabi akolha. Siwabya wutholere wukakolhwa wuthya! Wibuke ngoku Yehova akatsweba abakakolha abandi ba nabi, butsira abakakolhawa nabi. (1 Pet. 3:12) Sandra, oyuwanubibawa iniakine mwana, akabugha athi, “ngabera erisaba Yehova erinyiwathikya ngayilhangire ngoku akanyilhangira.”
7. Thwanga kolesya thuthi ndeke ebyo thwalhabiremo omwa ngebe omwa mubiiri wa Yehova?
7 Isiwathika-thika ngoku Yehova anganakukolesya eriwathikya abandi. Abirikuha olhusunzo lhw’erikolha haghuma nayu omwa mubiiri w’erithulira. (1 Kor. 3:9) Ebya wabirilhabamu omwa ngebe byabirileka iwabya iwanganakwira abandi b’obulighe kandi iwaminya nga bakayowa bathi. Wangana yira bingyi by’erikolha eribawathikya. Helen, oyulyakanibawako ahanyuma, mwabana obuwathikya kandi nayu lino abirithoka eriwathikya abandi. Akabugha athi: “Yehova abirileka ingye nabya ngayowa nga ‘singwithe mughaso,’ inayowa inganzibirwe kandi ingali w’omughaso.” Helen atsemire erikolha ng’omutemburi w’omughulhu wosi.
YEHOVA ANZIRE ITHWALIGHA OBUGHANYIRI BWIWE
8. Ni kakasya lyahi eryo thukabana omu Isaya 1:18?
8 Abandi b’okwa baghombe ba Yehova bakayowa nabi busana n’ebibi ebyo bakolha kera, obundi bathe babatizibwa kutse enyuma w’eribatizibwa. Aliwe kyuwene eryibuka ngoku Yehova mwahayo endongolya busana n’olhwanzo lhunene olho athuwithire. Ahathe erithika-thika, anzire ithwaligha ekihembo kiwe. Yehova akathukakasaya athi ‘thwamabirikania’ c nayu, akathughanyira ebibi byethu. (Soma Isaya 1:18.) Ka ni ky’olhwanzo Yehova eribya iniak’ibirirawa ebibi ebyo thwakolha kera! Kandi, syalibirirawa ebibuya ebya thwabirikolha.—Esy. 103:9, 12; Ebr. 6:10.
9. Busana naki thutholere ithwahwerya amalengekania okwa ebya thukakolha lino n’eby’obuthuku obukasa butsira okwa bya thwakolha kera?
9 Wamabya iwukinayowa nabi busana n’ebibi ebyo wakolha kera, lengaho erihira amalengekania okwa bya wukakolha lino n’eby’obuthuku obukasa butsira okwa bya kera. Thalengekania okwa ky’erileberyako ky’omukwenda Paulo. Mwayikubyabwomo busana n’eryendererya kutsibu Abakristayo, aliwe mwaminya ngoku Yehova abirimughanyira. (1 Tim. 1:12-15) Mbwino mwanalholha embere erilengekania okwa bibi ebyo akolha kera? Ahathe erithika-thika mwaghana erikolha ekyo, ngoku anabya iniabirighana erilengekania okwa by’akolha iniakine omwa dini y’Ekiyuda. (Fil. 3:4-8, 13-15) Omwakanya k’ekyo, Paulo mwathulira n’omuhwa kandi amahwerya amalengekania okwa by’embere. Nga Paulo, siwanga hindulha ebya kera. Aliwe wanganaha Yehova y’olhukengerwa omwa mibere wulimo lino n’erilengekania okwa buthuku obuwenenga obukasa obo abirikulhaghanisya.
10. Thwanga kolhaki ebyo thwakolha kera byamabya imubyaghalya abandi?
10 Wanganabya iwukayowa nabi busana n’ebyo wakolha ebyabiriaghalya abandi. Ni kyahi ekyanga wathikya? Kolha ekyosi-kyosi ekyo wangathoka eryuwania emyatsi, imwamune n’erisaba ekighanyiro ekikalhua okwa muthima. (2 Kor. 7:11) Saba Yehova awathikaye abahambawako busana n’ebyo wakolha. Anganakuwathikya haghuma n’abo waghalhaya erithoka eriyiyinia n’erithasyathekana.
11. Thwang’ighaki okwa ky’erileberyako ky’omuminyereri Yona? (Lebaya n’ekisasani ky’okwa .)
11 Ighira okwa bisobyo byawu bya kera, kandi ibya iwunayitheghekire erilighira Yehova erikukolesya omwa nzira yosi-yosi eyo akanza. Thalengekania okwa ky’erileberyako ky’omuminyereri Yona. Omwakanya k’erighenda e Ninawe ngoku Nyamuhanga amulhaghira, Yona mwathibitha ehandi. Yehova mwasuyira Yona, kandi Yona mw’ighira okwa kisobyo kiwe. (Yona 1:1-4, 15-17; 2:7-10) Yehova mwathalhuhirira oku Yona. Nyamuhanga mwamuha akandi kaghisa k’erisuba e Ninawe, lero Yona mwalhuaho iniowa. Mwathalighira eriyowa nabi busana n’ebisobyo biwe ebya kera likamulemesya eriligha olhukwamirwa olhu olhwalhua oku Yehova.—Yona 3:1-3.
Omuminyereri Yona abere abirilhua omonda y’esamaki nene, Yehova mwathasyamubwira athi aghende e Ninawe eriyathulha omwatsi wiwe (Lebaya enungu 11)
YEHOVA AKATHUHUMULIKANAYA ERILHABIRA OMWA MULIMU ABUYIRIRE
12. Yehova akathuha athi obuholho omughulhu thukabana ebitsibu ebikalire? (Abanya Filipi 4:6, 7)
12 Yehova akathuhumulikanaya erilhabira omwa mulimu wiwe abuyirire omughulhu thukabana ebitsibu ebikalire. Lengekanaya okwa ky’erileberyako kya Ron na Carol. Eky’obulighe, omwana wabu w’obulhume mway’itha. Bakabugha bathi: “Thwabya ithwabirilhaba omwa bitsibu ebikalire, aliwe eki mukyathukalira kutsibu. Ithukabya thukabulha othulho omwa kiro ithukasaba mirundi minene, kandi omwa kwenene muthwabana obuholho obukanibweko omwa Abanya Filipi 4:6, 7.” (Soma.) Wamabya iwune mulhaba omwa kitsibu ekikabbuna omuthima, wangana bwira Yehova y’ebyosi ebiri okwa muthima wawu omw’isaba mughulhu wosi kandi okwa ndambi yosi-yosi. (Esy. 86:3; 88:1) Mughulhu wosi saba Yehova y’omulimu wiwe abuyirire. Syanga gheghena ebyo wukamusaba.—Lk. 11:9-13.
13. Omulimu abuyirire angathuwathikya athi eryongera eriramya Yehova buthaleghulha? (Abanya Efeso 3:16)
13 Mbwino wuhwere amani busana n’ekitsibu ekikalire? Omulimu abuyirire angana kuha amaaka aw’erilholha embere eriramya Yehova buthaleghulha. (Soma Abanya Efeso 3:16.) Lebaya ekyalholirweko kya mwali wethu Flora. Iyo na mwira wiwe babya ibanemukolha ng’abamisyonare omughulhu mwira wiwe asingira, neryo mubakomolhana. Flora akabugha athi: “Obulhumi obo nabya nabu busana n’erinyighoberya mubwanyibundamirya. Munasaba Yehova erinyiha omulimu wiwe abuyirire nuku ngathoke eriyiyinia. Yehova mwanyihumulikania kandi amanyiwathikya erighumira ekitsibu ekya natsuka erilengekania indi sinanga thoka erighumira.” Flora akayowa Nyamuhanga iniabirimuwathikya eryongera erimuyikethera kandi anakakasirye ngoku akendi lholha embere erimuwathikya omwa bitsibu biwe byosi. Akongerako athi: “Ebinywe ebiri omu Esyonyimbo 119:32 mubyanyiberererako. Bikabugha bithi: ‘Ngendikenga amahano wawu n’omuhwa, kusangwa wasyamba kandi eriminya.’”
14. Thwanga lighira thuthi omulimu wa Nyamuhanga erithuwathikya?
14 Ni byahi ebyo wangakolha wabirisaba Yehova y’omulimu abuyirire? Sangira omwa bikendi kuwathikya ery’ongera eribana omulimu abuyirire. Ebi mwamuli erihindana okwa mihindano n’erithulira abandi. Usulhaya omwa malengekania wawu mw’amalengekania wa Yehova omw’isoma Ekinywe kiwe obuli kiro. (Fil. 4:8, 9) Wunemusoma, ighira okwa bakanibweko omwa Biblia abalhaba omwa bitsibu kandi ghaniraya okwa mibere Yehova abawathikirayamo eriyiyinia. Sandra, oyothulyakanayako, mwabana ebitsibu ebikalire kutsibu ebikwamangene. Akabugha athi: “Omwatsi wa Yozefu akanyihimba. Mwathalighira ebitsibu n’obuthe bulingirirania ebyo abana bikatsekya obughuma bwiwe na Yehova.”—Enz. 39:21-23.
YEHOVA AKATHUHUMULIKANAYA ERILHABIRA OMWA BIKIRIRYA BALIKYETHU
15. Ni bahi abanga thuhumulikania, kandi bangathuwathikya bathi? (Lebaya n’ekisasani.)
15 Thukabya thukaghalhwa, abikirirya balikyethu bangana ‘thuwathikya kutsibu.’ (Kol. 4:11) Omo kwenene balikyethu bakaleka ithwalhangira olhwanzo olho Yehova athuwithire. Abikirirya balikyethu bangana thuhumulikania omw’ithuhulikirira ndeke, kutse bangana thusighika omw’ibya haghuma nethu. Bangana thuhimba omw’ithukanirya okwa mulhondo owe Biblia owakahumulikanaya kutse erisaba haghuma nethu. d (Abar. 15:4) Okwa bundi buthuku, mughalha wethu kutse mwali wethu angana thw’ibukya amalengekania wa Yehova kandi eki ikyathuwathikya erilholha embere eriyiyinia. Kandi Abakristayo balikyethu bangana thusighika omwa nzira esilhangirikire, ng’erithuha ebyalya omughulhu thuli omwa bitsibu.
Abanywani abayiketherwa kandi abanzire Yehova, bangana kuhumulikania n’erikusighika (Lebaya enungu 15)
16. Thukayithagha erikolhaki erithoka eribana obuwathikya bw’abandi?
16 Thwamanza abandi bathuwathikaye, thutholere ithwabasaba obuwathikya. Balikyethu bathwanzire kandi banzire ibathuwathikya. (Emi. 17:17) Aliwe banganabya isibasi ekya thukayithagha kutse nga thukayowa thuthi. (Emi. 14:10) Wamabya iwubbunikire muthima, ibya iwunayitheghekire eribwira abanywani abuwene b’eriyowa lyawu. Leka baminye obuwathikya obwa wanga yithagha. Wangana thwamu eribwira omusyakulhu kutse abasyakulhu babiri abo wukayowa buholho erikania nabu. Abandi bali bethu babirilhangira ngoku eribwira mwali wethu oyukulire omwa myaka kikahumulikanaya.
17. Ni byahi ebyanga thulemesya eribana erihumulikanibwa, kandi thwanga birwanisya thuthi?
17 Yihighule okwanza eriyisolholha. Busana n’eriyowa nabi, wangana yowa isiwanzire eribya haghuma n’abandi. Okwa bundi buthuku, balikyethu bangana lemwa erikuyitheghererya kutse ibalemwa eribugha ebinywe ebitholere. (Yak. 3:2) Isiwalighira ebiri ng’ebyo erikulemesya eribana erihumulikania erya wukayithagha. Omusyakulhu w’ekithunga ya Gavin, oyulhwere obulhwere bw’eriyinuwa, akabugha athi: “Sindyanza eribya haghuma n’abandi.” Nomwabine, Gavin akalengaho eribya haghuma n’abandi kandi abirighasirwa. Mwali wethu ya Amy akabugha athi: “Busana n’ebya nalhabiremo, sikirinyolhobera eriyikethera abandu. Aliwe ngane mwigha erianza n’eriyikethera balikyethu ngoku Yehova akakolha. Nganasi ngoku eki kikatsemesaya Yehova, kandi naghe kikanyitsemesaya.”
EMILHAGHE YA YEHOVA EY’OBUTHUKU OBUKASA YANGANA THUHUMULIKANIA
18. Ni byahi ebyo thwanga lindirira omwa buthuku obukasa, kandi thwanga kolhaki lino?
18 Eriminya ngoku Yehova akisigha iniaghunziraho ighuma obulhumi obwa thuwithe kinyamubiri kutse omw’iyowa, kyangana leka ithwalindirira obuthuku obukasa ithunasikire. (Erib. 21:3, 4) Okwa buthuku obo, ebindu ebikathulethera obulhumi ebya thwabirilhabamu sibyendi ‘syahika oko muthima.’ (Isa. 65:17) Ngoku thwabirilhangira, na lino Yehova ‘akasenga-senga ebironda byethu.’ Lhangira wuthi wukakolesaya ebyosi ebyo Yehova abirihiraho nuku wubane erihumulikana n’erilhuhuka. Isiwathika-thikira nahake eky’eribya iniakutsomene.—1 Pet. 5:7.
OLHWIMBO 7 Yehova Ni Kaghalha Kethu
a Awandi mena abirihindulhwa.
b Lebaya akasanduko “ Yehova Akakulhangira mwa w’Obughuli.”
c Erithoka ‘erikania’ na Yehova, thutholere ithwakangania ngoku thwabiriyisubamu omw’imusaba thuthi athughanyire ebibi byethu n’omw’ihindulha emibere yethu. Kandi thwamakolha ekibi ekikalire, thutholere ithwasondekania obuwathikya bw’abasyakulhu b’ekithunga.—Yak. 5:14, 15.
d Ng’eky’erileberyako, thalengekania okwa masako awakanganibwe ahisi sy’omuthwe “Amaghaniryo” na Erihumulikanibwa” omwa kitabu Scriptures for Christian Living.
