Obuseku bwabya kitsweka ky’okwa bwingiriro bw’Ahabuyirire ah’ehekalhu. Erikwamana n’esyombindulha sye New World Translation of the Holy Scriptures esyahulhukibawa omwaka wa 2023 athali ahika, “obuseku obwabya embere wayo bwabya n’obuuli obulingene n’obughali mita 9.25, n’obuuli bw’erilholya endatha bwabya bw’esyomita 55.53.” (2 Emy. 3:4, NWT.) N’esindi mbindulha nasyo sikakanganaya ngoku obuseku bwabya n’obuuli obw’esyomita “55.53,” ekyangana manyisya kithi bwabya bw’esyofuti 175!

Nomwabine, Embindulha Nyihya-Nyihya eya 2023 yikabugha okwa buseku bw’ehekalhu ya Solomona yithi: “Obuuli bwayo bwabya esyomita nga 9 (futi 30). a Thalengekania okwa syonzumwa ndebe esikaleka ihabya embinduka eyi.

Obuuli bw’obuseku sibukanibweko omwa 1 Abami 6:3. Omwa mulhondo oyo, omuhandiki Yeremia mwakania okwa buuli bw’obuseku n’omuthobero wabo, butsira obuuli bw’erilholya endatha bw’obuseku. Neryo omwa sura eyikakwamako, akakanaya okwa bindi ebyabya okwa hekalhu imwamune, engetse eyiyithimbireko eyinunirye, esyondina ikumi, esyonduyi ibiri sy’emiringa esyabya eyihya w’obuseku. (1 Bam. 7:15-37) Kyamabya indi obuseku bwabya bw’esyomita esilhabire omu 50 kandi ini buuli kwilhaba ebindi bitsweka by’ehekalhu, busana naki Yeremia mwathakania okwa buuli bw’erilholya endatha bw’obuseku? Nibya bighana bingyi enyuma waho, abahandiki Abayuda mubabugha ngoku obuseku sibwabya buuli okwa bindi bitsweka by’ehekalhu ya Solomona.

Abasomire bakathika-thikira eky’eribugha indi obuseku bw’obuuli bw’esyomita 55.53 bwabya endatha sy’esyombimbo sy’ehekalhu. Esyonyumba nyiri-nyiri esihimbire omwa mabwe n’omwa matafali esy’omwa buthuku bwakera, ng’esyongyo esyabya okwa sya hekalhu sy’Emisiri syabya siwithe obughali bunene ekabunu neryo isyaghenda sikakeha eyighulhu. Aliwe ehekalhu ya Solomona yabya yambaghane. Abasomire bakabugha bathi esyombimbo syayo syangabya isisyabya silhabire okwa bunene bw’esyomita 2.7. Theodor Busink oyusomire ebya kera eby’erithera esyopulani sy’esyonyumba akabugha athi: “Erikwamana n’obunene bw’olhuhimbo lhw’obwingira bw’ehekalhu, obuseku bwangabya isibwabya bw’esyomita 55.53.”

Ebinywe ebiri omwa 2 Emyatsi y’Emigulu 3:4 byangabya imubyakopwa nabi. Nomwakine indi ebitabu birebe ebya kera bikabugha bithi “55.53” omwa mulhondo oyo, awandi masako awayiketherwe nge Codex Alexandrinus eyahulhukibawa omwa kighana kyakathano na Codex Ambrosianus eyahulhukibawa omwa kighana eky’omukagha bikabugha bithi esyomita 9.25.” Ni kyahi ekyangabya imukyaleka omuhandiki omw’ithendi kighenderera iniahandika “55.53”? Ekinywa “kikumi” na “mita” bisosene omwa Kihebrania. Neryo omuhandiki angabya imwahandika ekinywe “kikumi” omwakanya ka “mita.”

Ni kwenene, thunemulengaho eriyitheghererya emyatsi ng’eyi n’erithera ndeke akasasani k’ehekalhu ya Solomona, thukahira omuwathu okwa ekya hekalhu yabya yik’imanira—ehekalhu ngulhu y’obunyakirimu. Ka thukasima kutsibu Yehova eribya iniabirithukokya ithwe bosi abaghombe biwe erimuramirya okwa hekalhu eyo!—Ebr. 9:11-14; Erib. 3:12; 7:9-17.