1, 2. (a) Yesu mwasubirya athiki Petero akabugha athi sikimuhikeko? (Lebaya ekisasani ekiri okw’itsuka.) (b) Ni kyahi ekyaleka Yesu iniasubirya athya?

ABIGHA ba Yesu mubasweka! Ibawithe amaha bathi Yesu akendi subya obwami bw’Abaisraeli, aliwe Yesu amabugha athi ali hakuhi n’eriaghalibwa n’erithibwa. Omukwenda Petero mwabya w’erimbere erisubirya athi: “Mukama, Nyamuhanga aghanaye ekyo! Eki sikikuhikeko na kera.” Yesu mwamusubirya athi: “Iwe Sitani, wubye enyuma kw’ingye! Wuli ndwikale yaghe kusangwa amalengekania wawu si wa Nyamuhanga nikwa ni w’abandu.”​—Matayo 16:21-23; Emibiri 1:6.

² Omw’ibugha ekyo, Yesu mwakangania ndeke-ndeke ngoku amalengekania wa Yehova ali mbaghane okwa malengekania w’ekihugho kino ekiri omwa buthoki bwa Sitani. (1 Yoane 5:19) Petero mwanza Yesu abye n’amalengekania aw’eriyitsomana agho abangyi omwa kihugho bawithe. Aliwe Yesu abya inianasi ngoku Yehova anzire ayitheghekere eriaghalhwa n’olhuholho ebyabya ibikayamubyako. Erisubirya lya Yesu mulyakangania  ndeke-ndeke kw’akaligha amalengekania wa Yehova n’erighanira ighuma aw’ekihugho.

3. Busana naki si kyolho eriligha amalengekania wa Yehova n’erighana aw’ekihugho?

³ Kandi ibbwa nethu? Mbwino thukalengekanaya nga Yehova kutse ng’abandu b’omwa kihugho? Ithwe ng’Abakristayo thukalengaho kutsibu erilhangira thuthi ebyathukakolha bikatsemesaya Nyamuhanga. Kandi ibbwa emibere eya thukalengekanirayamu? Thunemuhiraho akaghalha erilengekania nga Yehova, ni bugha ambu, erilhangira emyatsi ngoku akalhangirayo? Erikolha ekyo kikayithagha akaghalha kanene. Aliwe, kyolhobire erilengekania ng’abandu abali omwa kihugho. Ekyo kiri kithya kundi ekirimu ky’ekihugho kithuthimbireko eyi n’eyi. (Abanya Efeso 2:2) Kandi abandu omwa kihugho mughulhu mungyi bakayilengekanayako ibobene, nethu thwangananza erilengekania ng’ibo. Omo kwenene, kikalire erilengekania nga Yehova aliwe ikyolhoba erilengekania ng’abandu abali omwa kihugho.

4. (a) Ibikendibya bithi thwamalighira ekihugho erisondolha amalengekania wethu? (b) Thukend’ighaki omwa mwatsi ono?

⁴ Thwamalighira ekihugho erisondolha amalengekania wethu, ithwanganasamo eriyitsomana n’erianza eriyithwiramo ekya thukayowa nga kihikire kutse nga kiwire. (Mariko 7:21, 22) Neryo ni kikulhu erigha eribya ‘n’amalengekania wa Nyamuhanga,’ butsira ‘aw’abandu.’ Omwatsi ono akendi thuwathikya erikolha ekyo. Thukendi lebya esyonzumwa esikaleka erilhangira emyatsi ngoku Yehova akalhangirayo ikyabya isihiribwa kw’olhukako olhukalire, aliwe ku kikathughasira. Kandi thukendi lhangira ngoku thwanga yitheya okw’ighendera okwa malengekania w’ekihugho kino. Omo mwatsi owakakwamako, thukendi syalhangira ngoku thwanga thunga amalengekania wa Yehova okwa myatsi mirebe n’eriyiragho mwa wethu.

5. Busana naki abandi bandu sibalyanza omundu owosi-wosi akabya ng’amabasondolha?

⁵ Abandi bandu sibalyanza owosi-wosi akasondolha emibere bakalengekanirayamu. Bakabugha bathi, “Ngayilengekaniraya.” Bakabya obundi ibakamanyisaya bathi banzire eriyithwiramu kandi bathi bawithe obughabe bw’erikolha ekyo. Sibalyanza abandi bakabya ng’abamabasondolha kutse eribakaka eribya ng’abandi abosi. * (Lebaya omwatsi ahikwa.)

6. (a) Ni bwiranda bwahi obwa Yehova akathuha? (b) Mbwino obwiranda obu sibuwithe lhubibi?

⁶ Ni kibuya eriminya ngoku thwamaligha amalengekania wa Yehova, ithukendibya ithukinawithe obwiranda bw’eribya n’amalengekania wethu. Omu 2 Abanya Korinto 3:17 hathi: “Aho omulimu w’Omukama ali, ho hali obwiranda.” Yehova akathuha obwiranda bw’eribya abandu abo thwanzire eribya. Thwangana yisombolera ebya thwanzire n’erisombolha nga ni bindu byahi eby’eritsemera. Yehova mwathuhangika athya. Aliwe eki sikirimanyisaya indi obwiranda bwethu sibuwithe lhubibi. (Soma 1 Petero 2:16.) Thukabya thukanza eriminya ekihikire kutse ekiwire, Yehova akanza ithwakolesya Ekinywe kiwe erithusondolha. Mbwino eki ni kakiribwa kutsibu, kutse kikathughasira?

7, 8. Mbwino ni kakiribwa kutsibu erilhangira emyatsi ngoku Yehova akanza ithwalhangirayo? Iha eky’erileberyako.

 ⁷ Thwanganaha eky’erileberyako kino. Ababuthi bakalengaho erikangirirya abaana babu esyongeso mbuya. Bangana bakangirirya eribya b’okwenene, eribya bakoli, n’eritsomana abandi. Eki ka si kakiribwa kutsibu. Aliwe, ababuthi bakabya ibakathegheka abaana babu erisyabya ndeke omwa ngebe. Abaana ibakendibya babirikulha n’erilhua eka, ibakendibya n’obwiranda bw’eriyisombolera ekya banzire. Bamasombolha erighendera okwa ngeso mbuya esya babuthi babu babakangiriraya, bakabya ibanganathwamu ndeke n’eriyitheya okwa bitsibu bingyi, amaghaniryo, n’eriyikubya bwomo.

⁸ Ng’omubuthi mubuya, Yehova anzire abaana biwe ibatsema omwa ngebe. (Isaya 48:17, 18) Neryo akathukangiriraya emisingyi eyihambire okwa by’esyongeso kandi ngoku thwanga thwalha abandi. Akathukokaya erigha erilhangira emyatsi ngoku akalhangirayo n’erighendera okwa ngeso esyo anzire. Eki si kakiribwa kutsibu. Omwakanya k’ekyo, kikaleka ithwabya n’amenge n’erithuwathikya erithwamu ndeke. (Esyonyimbo 92:5; Emisyo 2:1-5; Isaya 55:9) Thukendibya ithwanganasombolha ebyo thwanzire, aliwe erisombolha eryo iryathulethera etseme. (Esyonyimbo 1:2, 3) Thwamabya n’amalengekania wa Yehova thukaghasirawa omwa nzira nyingyi!

9, 10. Ni byahi ebikakanganaya ngoku amalengekania wa Yehova alengire aw’ekihugho?

⁹ Eyindi nzumwa eyikaleka ithwanza amalengekania wethu abye nga wa Yehova ni kusangwa amalengekania wiwe alengire kutsibu aw’ekihugho. Ekihugho kikaha amahano okwa mibere ey’esyongeso, ngoku amaka angatsema, kandi ngoku wangaghasirwa omwa mubiiri n’eyindi mibere y’engebe. Aliwe amangyi omwa mahano aya syalilighirana n’amalengekania wa Yehova. Ng’eky’erileberyako, mughulhu mungyi ekihugho kikahira omwa bandu mw’omuhwa w’erikwamirira ebyabu bisa n’erilhangira eby’obusingiri nga si kibi. Kandi hakanayira ikyahana abathahenie kithi ibakenditsema bamaghabulhana kutse erikomolhana habw’ehindu hike-hike. Erihabulha eri lihukene okwa kya Biblia yikakangiriraya. Aliwe ibbwa, mbwino munabwire erihana ly’ekihugho lya likakolha ndeke kwilhaba erye Biblia?

¹⁰ Yesu mwabugha athi: “Amenge . . . akaminyikalha omwa mibiiri yagho.” (Matayo 11:19) Nomwakine indi ekihugho kyabirikulha-kulhana kutsibu omwa by’etekinologia, kyabirilemwa erighunzaho ebitsibu ebinene-binene ebikaleka ithuthatsema, ng’esyonyuhi, akasolholho, n’obubi. Eryongera okw’ekyo, ekihugho kikalighira eby’obusingiri. Aliwe abandu bangyi bakaligha ngoku eki kikatsandaya amaka, ikyaletha ebitsibu omwa maghalha, n’erilhwiririramu ebindi bitsibu. Kandi ibbwa erihana lya Yehova? Abakristayo ababiryangirira amalengekania wa Yehova bawithe amaka awatsemire ndeke, amaghalha awuwene, kandi bawithe  obughuma obuwene n’abalikyabu erithimba omwa kihugho kyosi. (Isaya 2:4; Emibiri 10:34, 35; 1 Abanya Korinto 6:9-11) Eki kikakanganaya ndeke-ndeke ngoku amalengekania wa Yehova alengire kutsibu aw’ekihugho.

11. Oyuwasondolha amalengekania wa Musa nindi, kandi mumwalhwiririraki?

¹¹ Abaghombe ba Yehova abathaleghulha abakera babya ibanasi ngoku amalengekania wa Yehova alengire. Ng’eky’erileberyako, nomwakine indi Musa mwakangiriribwa “omwa menge wosi w’Abanya Misiri,” abya inianasi ngoku amenge w’okwenene akalhua oku Yehova. (Emibiri 7:22; Esyonyimbo 90:12, NW) Neryo mwasaba Yehova athi: “Wunyikangaye esyonzira syawu.” (Eriluayo 33:13) Kundi Musa mwalighira Yehova erisondolha amalengekania wiwe, Yehova mwamukolesya omwa mibere y’eriswekya eriberererya ekighendererwa kiwe n’erimusikya omw’imwahulhamo mundu w’erikirirya linene.​—Abaebrania 11:24-27.

12. Erithwamu lya Paulo lyabya liseghemere okuki?

¹² Omukwenda Paulo abya awithe menge, iniasomire ndeke, kandi inianasi Ekihebrania n’Ekigiriki. (Emibiri 5:34; 21:37, 39; 22:2, 3) Aliwe mwaghana amenge w’ekihugho, amathwamu erikwamana n’ebiri omwa Kinywe kya Nyamuhanga. (Soma Emibiri 17:2; 1 Abanya Korinto 2:6, 7, 13.) Ekyalhwiririramu, mwabana ebibuya omw’ithulira n’eribya n’amaha w’olhuhembo olhwa kera na kera.​—2 Timoteo 4:8.

13. Nindi oyuwithe olhukwamirwa lhw’erihengulha amalengekania wethu nuku thulhangire emyatsi ngoku Yehova akalhangirayo?

¹³ Ahathe erithika-thika, amalengekania wa Nyamuhanga alengire kutsibu aw’ekihugho. Thwamakwama emisingyi ya Nyamuhanga, ithukendi tsema n’erighasirwa ndeke. Aliwe Yehova syendi thukaka erilengekania ng’iyo. “Omughombe oyuthereghulha n’ow’amenge” syali thukaka eribya n’amalengekania malebe, n’abasyakulhu kuthya. (Matayo 24:45; 2 Abanya Korinto 1:24) Obuli mughuma okw’ithwe awithe olhukwamirwa lhw’erihengulha amalengekania wiwe nuku alhangire emyatsi nga Yehova. Thwanga thoka thuthi ekyo?

14, 15. (a) Thutholere ithwaghanirya okuki nuku thulengekanaye nga Yehova? (b) Busana naki sithutholere thukalighira amalengekania w’ekihugho eringira omwa bulengekania bwethu? Iha eky’erileberyako.

¹⁴ Abanya Roma 12:2 hathi: “Simusosekanibawe n’emyatsi y’ekihugho kino, nikwa muleke Nyamuhanga eribahindulha n’eribaha obulengekania buhya-buhya. Muthya mwasyathoka eriminya erisonda lya Nyamuhanga. Erisonda eri ni ribuya kandi likatsemesaya kandi, lihikene.” Erisako eri likathweghesaya ngoku mbulha amalengekania wethu asondolhawa naki thuthe thwigha ekwenene, thwangana hindulha amalengekania wethu n’erihambaniagho n’awa Nyamuhanga. Nomwakine indi emibere eya thukasighalhaya okwa babuthi n’ebya thukalhabamu byanabirihamba okwa mibere thukalengekanirayamu, amalengekania wethu anganalholha embere erihinduka. Kandi iniakendi hinduka erikwamana n’ebya thukathwamu erilengekaniako. Thwamaghanirya okwa malengekania wa Yehova, ithukendi yilhangirira ngoku mughulhu wosi amalengekania wiwe ahikire. Neryo, ithukendianza erilhangira emyatsi ngoku akalhangirayo.

¹⁵ Aliwe erihindulha amalengekania nuku thulengekanaye nga Yehova, thutholere  ithwaleka ‘erisosekanibwa n’emyatsi y’ekihugho kino.’ Eki kikamanyisaya kithi thutholere ithwaleka erilebya, erisoma, kutse erihulikirira ekyosi-kyosi ekihukene okwa malengekania wa Nyamuhanga. Erikuwathikya eriyitheghererya omughaso w’eki, lengekanaya okwa ky’erileberyako ky’ebyalya. Oyuwanzire eribya n’amaghalha awuwene anganathwamu eribya akalya ebyalya ebikahimba amaghalha. Aliwe akaghalha kiwe ikakendikwa busa amabya inianemulya ebyalya ebibbolire! Kuthya, akaghalha kethu k’eribya n’amalengekania wa Yehova ikakendikwa bbule thwamalighira amalengekania w’ekihugho eringira omwa bulengekania bwethu.

16. Thutholere ithwayitheya okuki?

¹⁶ Mbwino thwangana yihighulira ighuma okwa malengekania w’ekihugho? Eyihi, thukendibya ithunemubana amaghuma w’okwa malengekania w’ekihugho kusangwa thuli mwa kihugho. (1 Abanya Korinto 5:9, 10) Nibya omw’ithulira, ithukendibya ithune mwowa abandu bakabugha amalengekania awathahikire n’esyonyikirirya sy’amabehi. Aliwe nomwakine indi sithwanga yihighulira ighuma okwa malengekania awathahikire, sithutholere eribera erighanirya kugho kutse erilighagho. Nga Yesu, thutholere ithwaghana lhuba amalengekania agho Sitani anganza ithwabya nagho. Kandi thwangana yitheya okw’ikwama kyahulikirira amalengekania w’ekihugho.​—Soma Emisyo 4:23.

17. Thwanga yihighulha thuthi okw’ikwama kyahulikirira amalengekania w’ekihugho?

¹⁷ Ng’eky’erileberyako, thutholere ithwasombolha ndeke abanywani. E Biblia yikabugha yithi abandu abatheramaya Yehova bamabya banywani bethu b’ahakuhi, ithukendi tsuka erilengekania ng’ibo. (Emisyo 13:20; 1 Abanya Korinto 15:12, 32, 33) Kandi thutholere ithwasombolha ndeke eby’eriyitsemesya. Thukabya thukaghana eby’eriyitsemesya ebikakulha-kulhanaya engangirirya y’ebindu eriyibuthukira, obwithi, kutse obusingiri, thukatheghaya amalengekania wethu okw’itsandibwa n’amalengekania awakarwanisaya “eriminya lya Nyamuhanga.”​—2 Abanya Korinto 10:5.

18, 19. (a) Busana naki thutholere ithwayitheya okwa malengekania w’ekihugho awakasa omwa mibere eyithe lhangirikire? (b) Ni bibulyo byahi ebya thutholere ithwayibulya, kandi busana naki?

 ¹⁸ Kandi thutholere ithwaminyerera n’erighana amalengekania w’ekihugho awakasira omwa mibere eyithe lhangirikire ndeke. Ng’eky’erileberyako, esindi syongulhu (amakuru) sikalhabibawa omwa mibere eyikasighika amalengekania malebe w’ekipolitiki. N’eyindi myatsi y’amakuru yirimo ebilhubirirwa n’ebyo bandu bamabirikolha ebya kihugho kyanzire. Esindi filimu n’ebitabu sikakulha-kulhanaya omuthima owa “ingye mukulhu ingye ndabe” na “eka yaghe yitsuke” kandi ibuwaniriryagho. Aliwe, amalengekania aya syaseghemere okwa Biblia. Yikabugha yithi ithwe n’eka yethu ithukendi tsema kundu thwamanza Yehova kwilhaba ekindu kyosi-kyosi. (Matayo 22:36-39) Kandi, n’eyindi myatsi ey’abaana nomwakine indi yanganalhangirwa nga si mibi, yanganaleka abaana ibaligha emibere y’obutswatswa.

¹⁹ Eki sikirimanyisaya indi ni kibi erisangira omw’iyitsemesya eryuwene. Aliwe thutholere ithwayibulya: ‘Nganalhangira amalengekania w’ekihugho nibya nomwangasa omwa mibere eyithe lhangirikire ndeke? Nganemuyitheya n’abaana baghe okwa ndegheka ndebe sy’etivi n’eby’erisoma? Nganawathikaya abaana baghe eribya n’amalengekania wa Yehova okwa myatsi nuku sibahekawe n’amalengekania w’ekihugho agho bak’owa n’erilhangira?’ Thwamaminya embaghane eyiri ahakathi-kathi k’amalengekania wa Nyamuhanga n’aw’ekihugho, ithwanganayihighulha ‘okw’isosekanibwa n’emyatsi y’ekihugho kino.’

20. Ni kyahi ekikendi kangania ekya wukaghenderako?

²⁰ Thutholere ithwibuka ngoku emyatsi yikalhua habiri hasa. Oku Yehova, n’oku Sitani n’ekihugho kiwe. Wukaghendera okundi? Erisubirya liri lithi, okwa w’oyowuk’iha kw’emyatsi. Thwamaligha amalengekania w’ekihugho, ikikendi thukangirirya amalengekania wakyo neryo ithukendi tsuka erilengekania n’erikolha omw’iyitsomana. Neryo ni kikulhu erisombolha ndeke ebya thukalebaya, erisoma, erihulikirira, n’erilengekaniako.

21. Thukendi syakania okuki omo mwatsi owakakwamako?

²¹ Omo mwatsi ono thwamabirigha ngoku eribya n’amalengekania wa Yehova, thutholere ithwayitheya okwa w’ekihugho. Kandi thutholere ithwaghanirya okwa malengekania wa Nyamuhanga nuku thulengekanaye ng’iyo. Omo mwatsi owakakwamako, thukendi syalhangira ngoku thwangakolha ekyo.