1, 2. Thuk’ighaki thukalholha embere erikulha-kulhana? Iha eky’erileberyako.

THALENGEKANIA omundu iniaha omwana mulere y’ekihembo. Ababuthi b’omwana ibamubwira bathi, “Bugha wuthi wasingya.” Iniabugha kundi bamamubwira ambu abughe. Aliwe omwana anemukulha, iniaghenda akalhangira ekikaleka ababuthi biwe ibalhangira ini kikulhu erisingya abandi bamathukolera ebibuya. Erighunzerera, nayu iniabya akasingya abandi kundi abir’igha erisima.

² Ekiri ng’ekyo mukyathubyako. Thwabere thukatsuka erigha kwenene, muthwaminya ku ni kikulhu erisikya ebihano bya Yehova. Aliwe thukabya thukalholha embere erikulha-kulhana, thuk’ongera erigha bingyi ebihambire okwa malengekania wiwe, ni bugha ambu, ebyo anzire, ebyo aponire, kandi ngoku akalhangira emyatsi. Thukabya thukalighira amalengekania wa Yehova erithusondolha omwa bya thukasombolha n’erikolha, thukakolha amalengekania wiwe mwa wethu.

3. Busana naki kyangana kalha erilengekania nga Yehova kw’akalengekanaya?

³ Nomwakine indi thukatsemera erigha erilengekania nga  Yehova, kikanakalha erilengekania ng’iyo kundi sithuhikene. Ng’eky’erileberyako, thunasi amalengekania wa Yehova okwa by’esyongeso, erianza ebindu by’ekinyamubiri, erithulira, erikolesya nabi omusasi, n’eyindi myatsi. Aliwe kyangana thukalira eriyitheghererya ekikaleka iniabilhangira athya. Neryo thwang’igha thuthi eryongera erilengekania nga Yehova? Kandi eki ikikendi thuwathikya kithi erikolha ekihikire lino n’omwa buthuku bw’embere?

4. Kikamanyisayaki eribindulha obulengekania eribya buhya-buhya?

⁴ Soma Abanya Roma 12:2. Omwa mulhondo oyu, omukwenda Paulo mwabugha ekya thutholere erikolha erithoka erigha erilengekania nga Yehova kw’akalengekanaya. Mwabugha athi ‘sithusosekanibawe n’emyatsi y’ekihugho kino.’ Ngoku thwanalhangira omo mwatsi owahwere, eki kikamanyisaya erighana amalengekania n’emibere y’ekihugho. Aliwe kandi Paulo mwabugha athi thutholere ithwabinduka n’erithunga obulengekania buhya-buhya. Eki kikamanyisaya kithi thutholere ithw’igha Ekinywe kya Nyamuhanga, ithwayitheghererya amalengekania wiwe, ithwaghanirya kugho, n’erilengaho kutsibu eribya n’amalengekania wa Nyamuhanga.

5. Soborera embaghane eyiri ahakathi-kathi k’erisoma n’erigha.

⁵ Erigha si soma lhuba-lhuba omwatsi kutse eriramba eby’erisubirya okwa bibulyo. Thukabya thuk’igha, thukaghaniraya okwa mwatsi ng’akathweghesaya Yehova nga nindi, eby’akakolha, kandi ngoku akalengekanaya. Thukalengaho eriyitheghererya ekikaleka Yehova iniathubwira athi thukole eki thuleke kirya. Kandi thukalebaya ekya thutholere erihindulha omwa ngebe n’omwa malengekania wethu. Ni kwenene sikyanga thokekana erighanirya okwa nzumwa syosi esi obuli yeghesya. Aliwe ni kibuya erighunza akathuku, obundi embindi y’obuthuku bw’eriyegheseryamu, erighanirya okwa bya thulyigha.​—Esyonyimbo 119:97; 1 Timoteo 4:15.

6. Ni kyahi ekikabya thukaghanirya okwa Kinywe kya Nyamuhanga?

⁶ Hane ekindu kibuyanga ekikabya omughulhu thukaghanirya mughulhu wosi okwa Kinywe kya Nyamuhanga. ‘Thukathoka eriminya’ kutse eriyikakasya ithwibene-bene, ngoku amalengekania wa Yehova ahikene. Thukatsuka eriyitheghererya ngoku akalhangira emyatsi, n’erighunzerera ithwalighirana nayu. Neryo thukabindulha obulengekania bwethu neryo ithwatsuka erilengekania omwa mibere mihyaka. Lyolho-lyolho, ithwathunga amalengekania wa Yehova.

7, 8. (a) Yehova akalhangira athi ebindu by’ekinyamubiri? (Lebaya ebisasani ebiri okw’itsuka.) (b) Thwamalhangira ebindu by’ekinyamubiri ngoku Yehova akabilhangira, ini kyahi ekya thukendi lhangira mwa kikulhu?

⁷ Amalengekania wethu akahamba okwa bya thukolha. (Mariko 7:21-23; Yakobo 2:17) Thulebaye eby’erileberyako bike ebikakanganaya eki kya ndeke-ndeke. Eky’erileberyako kighuma, ekiri omo mwatsi owahambire okw’ibuthwa lya Yesu, kikakanganaya ndeke-ndeke amalengekania wa Yehova okwa bindu by’ekinyamubiri. Nyamuhanga mwayisombolera Yozefu na Maria erilembera Mughalha wiwe nomwakine indi sibabya baghuda.  (Abalawi 12:8; Luka 2:24) Yesu abere abiributhwa, Maria “mwamuhira omw’ithuba eryo esyonde sikaliramo, kusangwa sihabya mwanya busana nabo omwa nyumba y’abalhaliriri.” (Luka 2:7) Yehova kw’anza, angalhangire athi Yesu akabuthirawa omo mwanya owuwene. Aliwe mwanza Yesu akulire omw’eka eyikahira eriramya Nyamuhanga ly’embere. Oku Yehova ekyo ky’ekyabya kikulhu kutsibu.

⁸ Omwatsi owahambire okw’ibuthwa lya Yesu oyu akathukanganaya amalengekania wa Yehova okwa bindu by’ekinyamubiri. Abandi babuthi banzire abaana babu ibathunga ebindu by’ekinyamubiri ebyuwene kutsibu, nomukyangabya ikikendi tsandya obughuma bwabu na Yehova. Aliwe kilhangirikire ndeke-ndeke ngoku Yehova akalhangira obughuma bwethu nayu ikya kindu kikulhu kutsibu. Wune waligha amalengekania wa Yehova oko mwatsi oyu? Ebya wukakolha bikakanganayaki?​—Soma Abaebrania 13:5.

9, 10. Thwanga kangania thuthi ku thukalhangira erithwikalya abandi ngoku Yehova akalhangiralyo?

⁹ Ekindi ky’erileberyako ky’ekihambire okwa mibere Yehova akalhangiriramu oyukathwikalhaya abandi, ni bugha ambu, oyukaleka abandi ibakolha ekibi kutse erileka erikolera Yehova. Yesu mwabugha athi: “N’oyo wasyaleka omughuma w’okwa baana balere aba, abakanyikiriraya, akanyilhuako, lyowene kumbe omundu oyo angasengerwako olhusu lhunene oko bikya biwe, iniaghuswa omo ngetse.” (Mariko 9:42) Ebinywe ebi si by’amasatha! Kandi thunasi ngoku Yesu ali nga Thatha wiwe. Neryo thwangana kakasya ngoku Yehova akapona kutsibu omundu amathwikalya omughuma w’okw’abakwamire Yesu.​—Yoane 14:9.

¹⁰ Thukanalhangira erithwikalya abandi ngoku Yehova na Yesu bakalilhangira? Ebya thukakolha bikakanganayaki? Ng’eky’erileberyako, thwangananza omulembe mulebe w’emyambalire n’emiyipambire. Aliwe ithukendi kolhaki erithwamu lyethu lyamaponesya abandi omwa kithunga kutse eribalethamo amalengekania w’obutswatswa? Olhwanzo busana n’abalikyethu ilhunemwendileka ithwaleka ebyo thwanzire?​—1 Timoteo 2:9, 10.

11, 12. Thukendi yitheya thuthi thwam’igha eripona ekya Yehova aponire n’eribya n’omubere w’eriyikakirya?

¹¹ Eky’erileberyako kyakasathu kya kino: Yehova aponire ebibi. (Esyonyimbo 5:4) Ni kwenene anasi ku hakanayira ikyathukalira erikolha ekihikire kundi sithuhikene. Nomwabine, anzire ithwapona ebibi, ngoku abiponire. (Soma Esyonyimbo 97:10.) Thwamaghanirya okwa kikaleka Yehova iniapona ebindu bibi, ikikendi thuwathikya eriyira amalengekania wiwe mwa wethu kandi ikyathuha akaghalha k’erighana erikolha ebithuwene.

¹² Thwam’igha eripona ekibi, ikikendi thuwathikya kandi erilhangira ngoku ebindi bindu ni bibi nomwakine indi e Biblia siyiribikanayako. Ng’eky’erileberyako omulingo w’obutswatswa ow’erihotholera okwa bihinga, anemughenda akakanyirira munabwire omwa kihugho. Abandi bakayowa bathi ekyo sikiri ng’erikolha emyatsi y’engyingo  n’omundu, neryo bakalengekanaya bathi si kibi. * (Lebaya omwatsi ahikwa.) Aliwe mbwino Yehova nayu kw’akanayowa athya? Wibuke, Yehova aponire obubi bw’omulingo wosi-wosi. Neryo thubye haali okwa kindu kyosi-kyosi ekibi omw’igha erithunga omubere w’eriyikakirya n’eripona ekya Yehova aponire.​—Abanya Roma 12:9.

13. Busana naki thutholere ithwaghanirya lino okwa mibere eya Yehova akalhangiriramu emyatsi nuku thusyathwamu ndeke obuthuku bw’embere?

¹³ Thukayeghesya, thutholere ithwaghanirya Yehova ng’akalhangira athi emyatsi kundi ikyangana syathuwathikya erithwamu ndeke. Neryo, thwamasyayisanga omwa mibere eyikayithagha erithwamu aho-n’aho, isikyendithubulikirirania kutsibu. (Emisyo 22:3) Thulebaye eby’erileberyako birebe omwa Biblia.

14. Thuk’ighaki okwa kya Yozefu asubiraya muka Potifari?

¹⁴ Muka Potifari abere akalengesya erithetha Yozefu, Yozefu mwalhuaho iniaghana. Kwesi, Yozefu abya iniabirighanirya Yehova ng’akalhangira athi obutheke. (Soma Enzuko 39:8, 9.) Yozefu mwabwira muka Potifari athi: “Nangakolha erilholho lingaha eri lyo nyithi, n’erihalya oku Nyamuhanga kwehi?” Eki kikakanganaya ngoku abya iniabirikolha amalengekania wa Nyamuhanga mwa wiwe. Kandi ibbwa nethu? Iwukendi kolhaki oyo mukakolha nayu amatsuka erikuyanziriryako? Kandi ibbwa omundu amathuma okwa simu yawu kw’emeseji kutse ekisasani ky’obutswatswa? * (Lebaya omwatsi ahikwa.) Ikikendi thwolhobera erisighalha bathaleghulha oku Yehova thwamabya ithwabirisangwa thw’igha n’eriligha amalengekania wiwe oko myatsi ng’eyo n’eribya ithwabirithwamu ekyo thwangakolha.

15. Thwanga sighalha thuthi bathaleghulha oku Yehova, ng’Abaebrania basathu?

¹⁵ Lebaya n’eky’erileberyako ky’Abaebrania basathu abasibwe mwa Sadiraki, Mesaki, na Abedenego. Omwami Nebukadeneza abere akahamulha athi baramaye esanamu eyikolirwe omwa horo eyo akokothaya, mubaghanira ighuma. Ekya basubiraya omwami mukyakangania ku babya ibabirisangwa balengekania okwa kyangabya bamasighalha bathaleghulha oku Yehova. (Eriluayo 20:4, 5; Danieli 3:4-6, 12, 16-18) Ibbwa munabwire? Wangakolhaki oyukuhere omubiiri amabugha athi wuheyo esyosente busana n’ekiro kikulhu ekihambene n’edini y’amabehi? Omwakanya k’erilinda ekiri ng’ekyo kitsuke eribya, ikikendibya kibuya erisangwa thwaghanirya lino Yehova ng’akalhangira athi emyatsi ng’eyo. Neryo thwamasyayisanga omwa mibere ng’eyo, ikikendi syathwolhobera erikolha n’eribugha ekihikire, ngoku Abaebrania basathu bakolha.

16. Eriyitheghererya ndeke amalengekania wa Yehova kyanga thuwathikya kithi omughulhu thulhwere?

¹⁶ Erighanirya okwa malengekania wa Yehova  kyangana thuwathikya erisighalha bathaleghulha okw’iyo thwamalhwalha. Ni kwenene, sithwanga ligha erihirwako omusasi kutse ebitsweka byagho bikulhu-bikulhu bbini. (Emibiri 15:28, 29) Aliwe hane eyindi mithambirire eyirimo erikolesya omusasi eyikayithagha obuli Mukristayo eriyithwiramu erikwamana n’emisingyi ye Biblia. Obuthuku obuwene obw’erithwamu bw’obwahi? Mbwino mw’omughulhu thuli okwa sipatara, obundi omwa bulhumi n’omwa kahathikano ak’erithwamu lhuba-lhuba? Eyihi. Buno bw’obuthuku bw’erisekulya, ithwasulirirya ekihandiko ekyangaliwa n’ebilhaghiro ng’ekada eya DPA ekyanga soborera ekyo thwanzire, n’erikania na dokita wethu. * (Lebaya omwatsi ahikwa.)

17-19. Busana naki ni ky’omughaso erigha lino amalengekania agho Yehova awithe oko myatsi? Iha eky’erileberyako.

¹⁷ Erighunzerera, lengekanaya okwa kya Yesu asubiraya Petero aho n’aho akamuhana ekiwire athi: “Mukama, Nyamuhanga aghanaye ekyo.” Kilhangirikire ngoku Yesu abya iniabirighanirya kutsibu okwa bya Nyamuhanga aby’anzire akole n’okwa maminyereri awahambire okwa ngebe yiwe n’olhuholho lhwiwe hano okwa kihugho. Eriminya eryo mulyamuha akaghalha k’erisighalha muthaleghulha oku Yehova n’erihayo engebe yiwe mwa buhere busana n’ithwe bosi.​—Soma Matayo 16:21-23.

¹⁸ Munabwire, Nyamuhanga anzire ithwabya banywani biwe kandi ithwakolha ngoku thwangathoka erithulha engulhu yuwene. (Matayo 6:33; 28:19, 20; Yakobo 4:8) Aliwe abandi bandu, nibya ibane n’ekilhubirirwa ekyuwene bangana lengesya erithughunza amani, ngoku Petero anabwira Yesu. Ng’eky’erileberyako, oyukuhere omubiiri anganakw’ongera esyosente aliwe iwunasi kukikendileka iwakolha buthuku bunene kandi iwuthathunga endambi y’erihindana n’erithulira n’abandi omwa kithunga. Kutse obundi wuli munyasukuru, neryo  abasomesya bawu ibakuha akaghisa ak’erilhua eka ewenyu erithasy’ongera ekisomo kyawu. Ekyo kyamabya, wunemwendi yithagha erisaba, erisekulya, n’erikania n’ab’eka yenyu kutse abasyakulhu wuthe wathwamu? Ni kibuya lino erigha Yehova ng’akalhangira athi emyatsi n’erikolha amalengekania wiwe mwa wawu. Neryo wamasyahebwa ebindu ebi, iwukendi lhangira eri isi lengwako erikalire. Wukaminya ekyonyine-nyine ekya wutholere erikolha kusangwa wabirisangwa wathwamu erihwerya amenge wawu okw’ikolera Yehova.

¹⁹ Wangana lengekania n’okwa yindi mibere eyanganabya kitsumbukirania eyanga lenga okwa buthaleghulha bwawu oku Yehova. Omo kwenene, sithwanga yitheghekera obuli mubere owangabyaho. Aliwe thwamaghanirya okwa malengekania wa Yehova thukayeghesya, ithwangan’anguhirwa eryibuka ekya thwabirigha n’eriminya ngoku thwangakikolesya omwa mibere yosi-yosi. Neryo thukayeghesya, thuminye Yehova ng’akalhangira athi emyatsi, thukole amalengekania wiwe mwa wethu, n’erilengekania eki nga kyanga thuwathikya kithi erithwamu lino n’omwa buthuku bw’embere.

20, 21. (a) Busana naki thukendi syatsemera obwiranda bwethu omwa kihugho kihya-kihya? (b) Lino thwanga tsemera thuthi ngebe?

²⁰ Ithwe bosi thulindirire kutsibu ekihugo kihya-kihya. Abangyi omw’ithwe bawithe amaha w’erisyikalha kera na kera okwa kihugho Paradiso. Omwisi sy’Obwami bwa Nyamuhanga, thukendi syabya bwiranda okwa bulhumi n’eriaghalhwa lyosi eryo thukabana omwa mughulhu mubi ono. Kandi ahathe erithika-thika, thukendisyabya ithunawithe obwiranda bw’erisombolha erikwamana n’ebya thwanzire n’ebiri okwa muthima wethu.

²¹ Aliwe ekyo sikirimanyisaya kithi obwiranda bwethu bukendisyabya isibuwithe lhubibi. Abandu abakayikehaya bakendisyabya ibanemuthwamu erikwamana n’ebihano bya Yehova Nyamuhanga n’amalengekania wiwe. Kandi eki kikendi syabalethera etseme nene n’obuholho bungyi. (Esyonyimbo 37:11) Aliwe thunalindire obuthuku obo, na munabwire thwangana tsemera engebe thukakolha amalengekania wa Nyamuhanga mwa wethu.