1. Busana naki ithwe bosi thukayithagha erihumulikanibwa?

ITHWE bosi thukayithagha erihumulikanibwa. Obundi thuwithe eryubaha, eriponesibwa, n’erihanga-hangya. Thwanganabya ithukaghalhawa busana n’obulhwere, erikulha omo myaka, kutse eriholerwa. Abandi omw’ithwe abandi banemubakolha nabi. Eryongera okw’ebyo, abandu abathuthimbireko banemwongera eribya batsurumi. Omo kwenene, “emighulhu eyikalire” eno yikakanganaya ku thuli omwa “biro by’enyuma-nyuma” kandi ngoku obuli kiro thunemuseghera hakuhi n’ekihugho kihya-kihya. (2 Timoteo 3:1) Ebyo bine aho, obundi thwamabirilinda habw’obuthuku buuli eribererera ly’emilhaghe ya Yehova, kandi ebitsibu byethu byanganabya ibinemwongera. Neryo ni hayi aho thwangabana erihumulikanibwa?

2, 3. (a) Ni byahi ebya thwasi oku Habakuki? (b) Busana naki ithwalebya ndeke ekitabu kya Habakuki?

² Thulebaye ekitabu kya Habakuki eribana eky’erisubirya  okwa kibulyo ekyo. Nomwakine indi Amasako syalithubwira bingyi ebihambire okwa ngebe ya Habakuki, ekitabu kiwe kikahumulikanaya kutsibu. Erina Habakuki lyangabya irikamanyisaya “Erikumbathira Okwa Kikuba omo Lhwanzo.” Eki kyanganamanyisya emibere Yehova akakiranirayamu abaramya biwe. Kutse kyanganamanyisya emibere abaramya biwe bakamakirira Yehova. Habakuki mwakania na Nyamuhanga n’erimubulya ebibulyo birebe. Yehova mwasondolha Habakuki erihandika erikanirania eryo, kundi abya inianasi ngoku nethu likendi syathughasira.​—Habakuki 2:2.

³ Erikanirania eri eryabya ahakathi-kathi k’omuminyereri oyuli omw’ihanga-hangya na Yehova lisa lya Biblia yikathubwira oku Habakuki. Aliwe ekitabu kiwe ni kitsweka ky’okwa “byosi ebyasakawa erimbere” omwa Kinywe kya Nyamuhanga, erithuha “eriyitsingirira n’erihanda omuthima, ithwathoka eribya n’amaha.” (Abanya Roma 15:4) Ekitabu kya Habakuki kyanga wathikya kithi obuli mughuma w’okw’ithwe? Kyangana thuwathikya erilhangira ekya kikamanyisaya eriyikethera Yehova. Kandi obuminyereri bwa Habakuki bukathukakasaya ngoku thwangana thunga erithekana nomuthwangabya ithuwithe bitsibu bingahi.

4. Ni kyahi ekyaleka Habakuki iniahanga-hangya?

⁴ Soma Habakuki 1:2, 3. Habakuki abyaho omwa buthuku obukalire kutsibu. Abandu ababya bamuthimbireko babya babi kandi b’ithi, neryo mukyamwitha bulighe bunene. Ehosi, iniakalhangira Abaisraeli bakakolhana nabi. Habakuki mwayibulya: ‘Obubi bwosi obu bukendi syahwa mughulhu wahi? Busana naki Yehova syathanguha eribughunzaho?’ Mwayowa isyawithe buwathikya. Neryo mwasaba Yehova ayire eky’erikolha. Habakuki angabya imwatsuka n’erilengekania athi Yehova syakitsomene abandu biwe kutse athi syanga bawathikya. Wune wathayowa wuthya?

5. Thwang’ighaki omwa kitabu kya Habakuki? (Lebaya ekisasani ekiri okw’itsuka.)

⁵ Mbwino Habakuki eribulya ebibulyo ebi abya iniabirileka eriyikethera Yehova n’emilhaghe yiwe? Eyihi! Habakuki abya akasaba Yehova amuwathikaye omw’ihanga-hangya n’ebitsibu eby’alimu, ekikakanganaya ngoku abya isyalyahwa amaha aliwe ngoku akinamuyikethere. Ahathe erithika-thika, Habakuki abya akwire obuba n’eriyibulha-bulha. Mwathayitheghererya ekikaleka Yehova iniathayira eky’akakolha n’ekikaleka inialeka iniaghalhwa kutsibu. Yehova eribya imwasondolha Habakuki erihandika erihanga-hangya liwe kikathwaghesaya erisomo likulhu. Sithutholere thukasagha eribwira Yehova erihanga-hangya kutse eriyilhalikirira lyethu. Nibya ibbwa, omwa lhukeri akathubwira athi ithwasaba n’erimubwira eriyowa lyethu lyonyine-nyine. (Esyonyimbo 50:15; 62:8) Emisyo 3:5 hakabwira ithwe bosi hathi: “Wikiriraye Omwami Mukulhu n’omuthima wawu wosi, susyeyeghemeraya obuminya bwawu.” Habakuki mwaghendera okwa binywe ebi omwa ngebe yiwe.

6. Busana naki ni kikulhu erisaba?

 ⁶ Habakuki mwayikethera Yehova, Omunywani kandi Thatha wiwe, kandi amahiraho akaghalha k’eriyithunda hakuhi nayu. Habakuki mwathakwama ky’eribera eriyilhalikirira busana n’emibere abyamu n’erilengesya erighunza yoho. Omwakanya k’ekyo, mwahira eriyowa n’erihanga-hangya liwe omwa musabe. Eki ni ky’erileberyako ekyuwene okw’ithwe. Yehova, Oyukahulikirira emisabe, akabugha athi ithwamukangania ku thumuyikethere omw’isaba n’erimubwira emilyambo yethu. (Esyonyimbo 65:2) Thwamakolha eki, ithukendi lhangira ngoku akasubiraya erisaba lyethu. Ithukendi yowa ndeke akathuhumulikania n’erithusondolha. (Esyonyimbo 73:23, 24) Akendi thuwathikya eriyitheghererya ngoku akalhangira emibere eyathulimu, mbulha thuli omwa bitsibu ebiri bithi. Ahathe erithika-thika, erisaba Yehova ni nguma y’okwa syonzira mbuyanga sy’erikangania ku thumuyikethere.

7. Yehova mwakolhaki Habakuki akamubwira ebikamulyambaya?

⁷ Soma Habakuki 1:5-7. Enyuma wa Habakuki eribwira Yehova erihanga-hangya liwe, angabya imwabulha Yehova ng’akendi yowa athi. Yehova nga Thatha w’olhwanzo, mwayitheghererya eriyowa lya Habakuki. Mwaminya ngoku Habakuki akaghalhawa kandi ku akasaba obuwathikya. Neryo Yehova mwathahangabura Habakuki aliwe mwamubwira ekyo akisiya iniakolera Abayuda abaleghulha. Nibya, Habakuki anganabya iyuwabya mundu w’erimbere Yehova eribwira ngoku erisuyirwa lyabu liri hakuhi-hakuhi.

8. Busana naki erisubirya lya Yehova siryo Habakuki abya alindirire?

⁸ Yehova mwasoborera Habakuki ngoku anatheghekire eky’erikolha. Abya w’erisuyira abandu be Yuda ababi kandi ab’ithi. Yehova eribugha athi eki kikendisyabya “omwa biro byenyu,” abya iniakakanganaya ngoku eritswera eri lyangabere Habakuki iniakineho kutse abandi Baisraeli ab’omwa buthuku bwiwe. Erisubirya lya Yehova lyabya mbaghane okwa lya Habakuki abya akalindirira. Abakaldea, kutse Abanya Babeli, ibakalire kutsibu. Ini b’ithi kwilhaba n’Abaisraeli, kundi Abaisraeli ibo banabya ibanasi emisingyi ya Yehova. Neryo busana naki Yehova iniathwamu erikolesya ekihanda ekikafiri ekikalire erisuyira abandu biwe? Eki kyang’ongere erinuba lye Yuda. * (Lebaya omwatsi ahikwa.) Wangayowire wuthi ku wabya in’iwe Habakuki?

9. Ni bindi bibulyo byahi ebya Habakuki abulhaya?

⁹ Soma Habakuki 1:12-14, 17. Nomwakine indi Habakuki mwaminya ngoku Yehova akendi kolesya Abanya Babeli erisuyira abandu babi, abya iniakinawithe ebikamulyambaya. Aliwe mwayikehya kandi amathwamu erilholha embere eriyikethera Yehova. Nibya mwabugha athi mughulhu wosi Yehova ni “Lhukuka” kutse ribwe liwe. (Isaya 26:4) Habakuki inianasi ndeke-ndeke ngoku Nyamuhanga ni w’olhwanzo kandi w’olhukeri, neryo mwathasagha eribulya Yehova ebindi bibulyo, nga: Busana naki Yehova inialighira emyatsi omwa Yuda eryongera eritsanda n’abandu biwe eryongera eriaghalhwa? Busana naki syaliyira eky’erikolha aho-n’aho? Busana naki Omuthoki w’Ebyosi ‘akahuna’ n’erithungerera obubi ehosi? Kandi nibya, Yehova ‘y’Oyubuyirire,’ kandi awithe “ameso awatukwire awathe angathoka eririgha ebibi.”

10. Busana naki hanganayira ithwayowa nga Habakuki?

 ¹⁰ Hanganayira nethu ithwayowa nga Habakuki. Thukahulikirira Yehova. Thumuyikethera kandi thukasoma n’erigha Ekinywe kiwe, ebikaghumaya amaha wethu. Thwangan’owa n’okwa milhaghe yiwe thukahulikirira ebya kithunga kiwe kikathukangiriraya. Aliwe ithwanganabya ithukinayibulhaya, ‘Eriaghalhwa lyethu likendihwaho kiroki?’ Thwangan’ighira okwa kindi ekya Habakuki akolha.

11. Habakuki mwathwamu erikolhaki?

¹¹ Soma Habakuki 2:1. Erikanirania lya Habakuki na Yehova mulyamuha erithekana omwa bulengekania. Mulyaleka inialinda Yehova ayire eky’erikolha. Habakuki mwasuba omw’ithwamu liwe omughulhu abugha athi: “Litholere inalinda ekiro ky’obulighe kyo bukuthu.” (Habakuki 3:16) N’abandi baghombe ba Nyamuhanga abathaleghulha nabu omw’ighumisirizya mubalinda Yehova ayire eky’erikolha. Eky’erileberyako kyabu kikathughumaya kundi kikakanganaya ngoku nethu thwanganakolha ekiri ng’ekyo.​—Mika 7:7; Yakobo 5:7, 8.

12. Thwang’ighaki oku Habakuki?

¹² Thwang’ighaki okw’ithwamu lya Habakuki? Eky’erimbere, sithutholere thukaleka erisaba Yehova nomuthwangabya ithuwithe bitsibu bingahi. Ekyakabiri, thutholere ithwahulikirira ebya Yehova akathubwira erilhabira omwa Kinywe kiwe n’ekithunga kiwe. N’ekyakasathu, omw’ighumisirizya thutholere ithwalinda Yehova ayire eky’erikolha n’eriyikethera ngoku akendi thuhumulikania okwa bulhumi bwethu okwa buthuku bwiwe. Thwamagherererya Habakuki, ithukendi thekana omwa bulengekania kandi ithwathoka eriyiyinia. Amaha wethu akendi thuwathikya eriyitsingirira n’eritsema nomuthwangabya ithuwithe ebitsibu ebiri bithi. Thuyikethere ngoku Thatha wethu w’elhubulha akendi yira eky’akakolha.​—Abanya Roma 12:12.

13. Yehova mwahumulikania athi Habakuki?

¹³ Soma Habakuki 2:3. Thwangana yikethera ngoku Yehova mwatsema Habakuki erithwamu erimulinda ayire eky’erikolha. Omuthoki w’Ebyosi abya inianasi ekyonyine-nyine ekikaghalhaya Habakuki, neryo mwahumulikania omuminyereri oyu kandi omo lhwanzo amamukakasya ngoku akendi subirya ebibulyo biwe ebikalhua okwa muthima. Habakuki abya iniakayathekana okw’ihanga-hangya liwe lyosi. Yehova mwabya ng’akabwira Habakuki athi: “Iwe ghuma kandi nyiyikethere. Ngendi subirya erisaba lyawu, nomukyangalhangirika nga kyamathwalha ndambi.” Yehova mw’ibukya Habakuki ngoku abirisangwa asombolha endambi y’eriberererya mw’emilhaghe yiwe. Neryo mwabwira Habakuki athi alhole embere erilinda. Erighunzerera, Yehova syangalhabirye omuminyereri oyu y’ahisi.

14. Thutholere ithwathwamu erikolhaki thukabana ebitsibu?

 ¹⁴ Nethu thukayithagha erilinda Yehova eriyira eky’erikolha. Kandi thutholere ithwahulikirira ndeke eby’akathubwira. Neryo ithukendi sika n’erithekana omwa bulengekania nomuthwangabya ithuwithe bitsibu ebiri bithi. Yesu mwabugha athi sithutholere thukahira amalengekania okwa “mighulhu n’ebirimo” ebyo Nyamuhanga athe athubwirako. (Emibiri 1:7) Thutholere ithwayikethera ngoku Yehova anasi obuthuku obutholere obw’erithuwathikiryamu. Busana n’ekyo, sithutholere thukalhuha aliwe thutholere ithwayikehya n’erighumisirizya n’eribya n’erikirirya omu Nyamuhanga. Kandi thunemulindirira, thutholere ithwakolesya ndeke obuthuku bwethu n’erikolera Yehova ngoku thwanga thoka.​—Mariko 13:35-37; Abanya Galatia 6:9.

15, 16. (a) Ni milhaghe yahi eyo thwangabana omwa kitabu kya Habakuki? (b) Emilhaghe eyi yikathweghesayaki?

¹⁵ Yehova mwalhagha athi: “Omuthunganene embere sya Nyamuhanga asyabyaho busana n’erikirirya liwe,” kandi “ekihugho kyasyasulha n’eriminya ly’olhukengerwa lhw’Omwami Mukulhu.” (Habakuki 2:4, 14) Aho, Yehova akalhagha erihererya engebe y’erikotha abo abakaghumisirizaya n’erimuyikethera.

¹⁶ Omulhaghe oyo owali omu Habakuki 2:4 ni mukulhu kutsibu indi n’omukwenda Paulo  mwasuba mugho ngendo isathu omwa syobaruha siwe! (Abanya Roma 1:17; Abanya Galatia 3:11; Abaebrania 10:38) Thwangana yikethera ngoku nomuthwangabana ebitsibu ebiri bithi, thukendi syalhangira emilhaghe ya Yehova yikabererera thwamamuyikethera. Yehova anzire ithwahira amalengekania w’okwa maha wethu w’obuthuku obukasa.

17. Yehova akathukakasaya erithukoleraki thwamamuyikethera?

¹⁷ Ekitabu kya Habakuki kirimo erisomo likulhu okw’ithwe bosi abali omwa biro by’enyuma-nyuma. Yehova akalhaghanisaya engebe y’erikotha okwa muthunganene wosi-wosi oyukamuyikethera. Neryo thulhole embere erighumya eriyikethera lyethu omu Nyamuhanga, mbulha thuwithe ebitsibu n’eriyilhalikirira eriri lithi. Ekya Yehova abwira Habakuki kikathukakasaya ngoku akendi thusighika n’erithulhamya. Omwa bwolho-bwolho akathusaba erimuyikethera n’erilinda omw’iyitsingirira endambi ey’abirihiraho Obwami bwiwe erithabalha ekihugho. Okwa buthuku obo, ekihugho kikendi syosulhamo abandu abakaramaya Yehova abatsemire kandi abawithe obuholho.​—Matayo 5:5; Abaebrania 10:36-39.

18. Ebinywe bya Yehova mubyahamba bithi oku Habakuki?

¹⁸ Soma Habakuki 3:16-19. Ekya Yehova abwira Habakuki mukyamuhambako kutsibu. Habakuki mwaghanirya okwa by’eriswekya ebya Yehova abya iniabirikolera abandu biwe kera. Neryo eriyikethera liwe omu Yehova mulyaghuma. Mwayikethera ngoku Yehova syendiamalha! Ekyo mukyahumulikania omuminyereri oyu, nomwakine indi abya inianasi kw’akendibya inianemwaghalha erihika buthuku bulebe. Habakuki mwabya isyakiwithe erithika-thika. Omwakanya k’ekyo, mwathunga erikirirya erisikire ngoku Yehova akendi mulhamya. Erithwalira haghuma, ebya Habakuki akabugha omwa mulhondo 18 byanganabya bighuma by’okwa binywe bikulhu-bikulhu ebikathukanganaya eriyikethera ebya thukasoma omwa Biblia. Abandi basomi bikirirye bathi bikamanyisaya bithi: “Nasyayisumbanga n’obutseme omo Mukama; Ngendi syayitsangura busana n’eritsemera omu Nyamuhanga.” Eri ka n’isomo likulhu! Yehova syalithasubulira okw’ithuha emilhaghe mibuyanga ey’obuthuku obukasa, aliwe kandi abirithukakasya ngoku akendi berererya emilhaghe eyo lino-lino.

19. Yehova angathuhumulikania athi ngoku anahumulikanaya Habakuki?

¹⁹ Erisomo likulhu eryo thuk’igha omwa kitabu kya Habakuki ly’ery’eriyikethera Yehova. (Habakuki 2:4) Erilholha embere eriyikethera Yehova, thutholere ithwaghumya obughuma bwethu nayu. Neryo thutholere ithwakolha bino. (1) Ithwalholha embere erisaba, eribwira Yehova ebyosi ebikaleka ithwahanga-hangya n’ebikathulyambaya. (2) Ithwahulikirira ndeke ebya Yehova akathubwira omwa Kinywe kiwe, n’erikwama obusondoli obw’akathuha erilhabira omwa kithunga kiwe. (3) Ithwabya bathaleghulha n’eriyitsingirira thukalindirira Yehova eriberererya emilhaghe yiwe. Ebyo bya Habakuki akolha. Nomwakine indi akatsuka erikania na Yehova aby’awithe ebikamulyambaya, erighunzerera, mwahumulikana n’eritsema! Thwamagherererya Habakuki, nethu ithukendi humulikanibwa omw’ikumbathirwa ly’olhwanzo erya Thatha wethu w’elhubulha, Yehova. Mbwino hane erindi humulikanibwa erilengire eri eryo thwangabana omwa kihugho kibi kino?