1-2. (a) Ngoku kiri omu Abanya Efeso 6:16, busana naki thukayithagha “engabo y’erikirirya”? (b) Ni bibulyo byahi ebyo thukendi kaniako?

WUNAWITHE “engabo y’erikirirya”? (Soma Abanya Efeso 6:16.) Ahathe erithika-thika wunawitheyo. Ng’engabo nene eyikatheghaya omubiri, erikirirya lyawu likakutheghaya okwa by’obutswatswa, eby’obwithi, n’ebyosi ebithekenga Nyamuhanga ebiri omwa kihugho ekitsandire kino.

² Nomwabine, thuli omwa biro “by’enyuma-nyuma,” neryo obo erikirirya lyethu likendibya irinemulengwako. (2 Tim. 3:1) Wanga lebya wuthi engabo yawu y’erikirirya nuku yibye iyinaghumire? Kandi wanga hamba wuthi ndeke engabo yawu y’erikirirya? Thulebaye eby’erisubirya okwa bibulyo ebyo.

3. Ni byahi ebyo abasirikali babya bakakolha okwa syongabo syabu, kandi busana naki?

³ Omwa buthuku bwe Biblia, esyongabo sy’abasirikali isikabyako engobi. Abasirikali ibakabya ibane muhira okwa syongabo kw’amaghutha nuku engobi yibye iyine ndeke n’ekyuma kileke eryasa kw’amakenge. Omusirikali iniakabya amalhangira ahatsandire okwa ngabo yiwe, iniakalhangira athi yikakokothibawa nuku asyakolesayayo omwa wandi malhwa. Eky’erileberyako ekyo kikahamba kithi okw’ikirirya lyawu?

4. Busana naki iwalebya ndeke engabo yawu y’erikirirya, kandi ekyo wanga kikolha wuthi?

⁴ Ng’abasirikali abakera, wutholere iwabya iwunemulebya engabo yawu y’erikirirya n’erisughayo nuku yibye iyinuwene busana n’amalhwa. Ithwe ng’Abakristayo, thuli omwa mwalhwa w’obunyakirimu n’esyonzighu syethu mwamuli emirimu  mibi. (Efe. 6:10-12) Sihali oyuwanga kusughira engabo yawu y’erikirirya. Wanga kolhaki erikirirya lyawu eribya irinaghumire wukalengwako? Eky’erimbere, wutholere iwasaba Nyamuhanga y’obuwathikya. Neryo iwakolesya Ekinywe kya Nyamuhanga erikuwathikya eriyilhangira ngoku Nyamuhanga akakulhangira. (Ebr. 4:12) E Biblia yikabugha yithi: ‘Wikiriraye Yehova n’omuthima wawu wosi, siwuyeghemeraye obuminya bwawu.’ (Emi. 3:5, 6) Wun’ibukire ekyo, thalengekania okwa bya wathwamu lino-lino. Ng’eky’erileberyako, wune wabana ekitsibu ekikalire omwa by’esyosente? Muwan’ibukire omulhaghe wa Yehova owali omu Abaebrania 13:5: “Sinendisyakuleka na kera, kandi sinendi syakusighania nahake”? Omulhaghe oyo mwanalekire iwasika ngoku Yehova akendi kuwathikya? Kyamabya ikwakiri kithya, ekyo kikakanganaya ku wune musugha engabo yawu y’erikirirya.

5. Wangana lhangira erikirirya lyawu iriri lithi wukalebyalyo?

⁵ Iwangana sweka wukalhangira ebyo wulyabana wukalebya erikirirya lyawu. Iwanganabana obutseke obwa wuthalhue wasi. Ng’eky’erileberyako, iwanganalhangira amaghaniryo, amabehi, n’erihwa amani ibyabiritsekya erikirirya lyawu. Eki kyamabya ikyabirikubyako, wanga theya wuthi erikirirya lyawu okw’ithasyatsanda?

6. Ni by’erileberyako byahi eby’eriyilhalikirira eryuwene?

⁶ Hane eriyilhalikirira eryuwene. Ng’eky’erileberyako, kyuwene erilengekania okw’itsemesya Yehova na Yesu. (1 Kor. 7:32) Thwamakolha erilholho erikalire, thukahanga-hangaya kutsibu busana n’erianza erisuba-subania obughuma bwethu na Nyamuhanga. (Esy. 38:18) Kandi thwangana hangya-hangya busana n’erianza eritsemesya omwanze wethu omwa butheke n’eritsomana ebiyithawa bya b’omw’amaka wethu n’abikirirya balikyethu.​—1 Kor. 7:33; 2 Kor. 11:28.

7. Erikwamana na Emisyo 29:25, busana naki sithutholere thukubaha abandu?

⁷ Aliwe, amaghaniryo mangyi angana tsandya erikirirya lyethu. Ng’eky’erileberyako, thwangana bera erighanirya okw’ibana ebyalya ebikaghunza n’esyongyimba. (Mt. 6:31, 32) Erikehya okwa maghaniryo ng’ayo, ithwangana hwerya akaghalha okw’isondekania ebindu by’ekinyamubiri. Ithwanganasa mw’omuthima w’erianza esyosente. Thwamalighira ekyo, erikirirya lyethu omu Yehova irikendi keha neryo ithwabana ebitsibu bingyi eby’obunyakirimu. (Mk. 4:19; 1 Tim. 6:10) Kutse ithwangana bana awandi maghaniryo​—eribera eriyilhalikirira abandi ng’abane mwendi thusima. Ithwangana sagha kutsibu erisekereribwa kutse eriendereribwa kwilhaba eriponesya Yehova. Eriyitheya okwa kabi ako, thutholere ithwasaba Yehova y’erikirirya n’obuthubaha ebya thukayithagha erisingura ekitsibu ekyo.​—Soma Emisyo 29:25; Lk. 17:5.

8. Thutholere ithwakolhaki thwamowa amabehi?

⁸ Sitani, “ise w’amabehi,” akakolesaya abo akasondolha erilhalhania amabehi oku Yehova n’oku balikyethu. (Yn. 8:44) Ng’eky’erileberyako, abakayisamambulha okw’ikirirya bakakolesaya emithahulha yabu n’esyotivi n’eyindi mithahulha erilhalhania amabehi n’erihengemya emyatsi eyihambire okwa kithunga kya Yehova. Amabehi ayo ni maghuma w’okwa “misoha yosi y’omuliro” eya Sitani. (Efe. 6:16) Thutholere ithwakolhaki omundu amatsuka erithubwira-bwira amabehi ng’ayo? Ambi isithwahulikirira! Busana naki? Kundi thuwithe erikirirya omu  Yehova kandi thuyikethere balikyethu. Nibya, sithuli kolongana omwa nzira yosi-yosi n’abakayisamambulha okw’ikirirya. Sithulilighira owosi-wosi kutse ekyosi-kyosi, nibya n’erianza eriminya, ebyo bakabugha.

9. Erihwa amani lyanga thuhambako lithi?

⁹ Erihwa amani lyangana tsekya erikirirya lyethu. Sithwanga gheghena ebitsibu byethu. Thwamakolha ekyo, ithukendibya nga bathayitsomene. Kandi hanganayira ithwahwa amani. Aliwe isithwalighira ebitsibu eribya ibya thukalengekanayako obuli ndambi. Thwamakolha ekyo, ithwangan’ibirirwa ebibuya ebyosi ebya Yehova abirithulhagha. (Erib. 21:3, 4) Erihwa amani lyangana thughunza akaghalha neryo ithwanza eribikyako. (Emi. 24:10) Ambi ekyo isikyathubyako.

10. Wuk’ighaki omwa baruha ya mwali wethu?

¹⁰ Thalebya ngoku mwali wethu e Amerika anemusugha erikirirya liwe nomwakine indi anemuthwanira mwira wiwe oyulhwere kutsibu. Omwa baruha eyo ahandikira ekyaghanda kikulhu, mwahandika athi: “Emibere eyathulimu yikitha obulighe ihayira iyathughunza n’amani, aliriryo amaha wethu anasikire. Ngasima kutsibu emyatsi eya thune mubana eyikahimba erikirirya lyethu n’erithughumya. Omo kwenene thukayithagha amenge aya n’erihiribwa mw’omuhwa. Akaleka ithwalholha embere n’erithuwathikya erighumira ebitsibu ebya Sitani akathulethera.” Ebya mwali wethu abugha bikakanganaya ngoku thwangana singura erihwa amani! Bithi? Ibuka ngoku Sitani yukakulethera ebitsibu. Yikethere ngoku Yehova akendi kuhumulikania. Kandi sima ebyalya by’obunyakirimu ebyo akaha.

11. Erilebya erikirirya lyethu nga linaghumire, thutholere ithwayibulya bibulyo byahi?

¹¹ Wanamalhangira okwa ngabo yawu y’erikirirya aho wutholere eryuwania? Amezi awahwere, muwanathokire eriyitheya okwa maghaniryo mangyi? Wanabirighana erihulikirira amabehi agho abakayisamambulha okw’ikirirya bakalhalhanaya n’erithendi kuba obuhaka nabu? Kandi wanabirisingura erihwa amani? Kyamabya ikwa kiri kithya, erikirirya lyawu irine omwa mibere eyuwene. Aliwe thutholere ithwabya ithunatheghirye kundi Sitani anawithe  ebindi ebyangana kolesya erilhwa nethu. Thulebaye ekighuma ky’okw’ibyo.

12. Erianza ebindu lyangana leka ithwakolhaki?

¹² Erianza ebindu lyangana thulengemerya n’erileka ithuthatsomana engabo yethu y’erikirirya. Omukwenda Paulo mwabugha athi: “Omusirikali oyukakolha omubiiri, anzire eritsemesya omukulhu wiwe, neryo syaliyoghobaya omwa myatsi y’abandi bandu.” (2 Tim. 2:4) Abasirikali Abaroma isibalilighirawa erikolha owundi mubiiri wosi-wosi. Ibikendibya bithi omusirikali amathendi ghendera okwa kihano ekyo?

13. Busana naki omusirikali syabya atholere erikolha esuburu?

¹³ Thalengekania oku kino. Egurupu y’abasirikali ibabya ibane muyibegheresya erilhwa omwa miyali yabu erilhua engyakya, aliwe omughuma w’okw’ibo iniabya isyaliho. Omusirikali oyo ali omwa tawuni, akapanga eduka y’ebyalya. Omw’igholho-gholho, abasirikali bakalebaya ndeke ebyambalho byabu by’amalhwa n’erithyalya emiyali yabu. Aliwe ow’eduka iyo ali okw’ithegheka ebyo akendi syaghulya ekindi kiro. Engyakya esyonzighu isyababulikirirania. Ni musirikali wahi oyukendibya inianayitheghekire n’erighunzerera iniasimwa n’omukulhu wiwe? Iwukendianza erimana ahali wahi​—ahali omusirikali oyulhue inianayitheghekire kutse ahali oyulyalengemeribawa?

14. Ng’abasirikali ba Kristo, ni kyahi ekya thukalhangira mwa ky’obughuli?

¹⁴ Ng’abasirikali abuwene, sithuli lengemeribawa okwa kighendererwa kyethu kikulhu​—erisimwa na Bakamanda bethu, Yehova na Yesu. Thukalhangira ekyo ini ky’obughuli kwilhaba ekyosi-kyosi ekyanga banika omwa kihugho kya Sitani. Thukalhangira thuthi thukabya ithunawithe obuthuku n’akaghalha ebikayithaghisibawa erikolera Yehova n’engabo yethu y’erikirirya n’ebindi ebiri omwa kyambalho kyethu ky’amalhwa eribya ibine omwa mibere eyuwene.

15. Paulo mwathukunga athiki, kandi busana naki?

¹⁵ Mughulhu wosi thutholere ithwabya  ithunatheghirye! Busana naki? Omukwenda Paulo mwabugha athi “abakayitsutsa eribya batheke . . . babirileka erikirirya.” (1 Tim. 6:9, 10) Ekinywe “babirileka erikirirya” kikakanganaya ku thwangana lengemeribwa omw’isondekania ebindu. Neryo ithwangana yilethera “esyongumbu nyingyi nyikiru, esikaghalhaya.” Omwakanya k’erilighira esyongumbu esi eribya omwa muthima wethu, thutholere ithwabilhangira ku ni bindu ebyanga thwaghalya.

16. Omwatsi owali omu Mariko 10:17-22 atholere inialeka ithwalengekania okwa bibulyo byahi?

¹⁶ Thubughe thuthi thunawithe esyosente esyangaghulha bindu bingyi. Mbwino ithwamasobya thwamaghulha ebyo thwanzire aliwe isithuli nabiyithagha? Ku bithe bithya. Aliwe lengekanaya okwa bibulyo bino: Nomuthwangabya ithwangana thoka erighulha ekindu, thunawithe obuthuku bw’erikikolesya n’erikisugha? Kandi, mbwino ithuthayisanga ithwabiribyanza kutsibu? Mbwino olhwanzo olhwa thubiwithire ilhuthaleka thukabya ng’omulhume oyuwaghana erikokya lya Yesu ery’eryongera erikolera Nyamuhanga? (Soma Mariko 10:17-22.) Kwesi thutholere ithwabya omwa ngebe nyolho n’erikolesya endambi yethu n’akaghalha erikolha erisonda lya Nyamuhanga!

17. Ni kyahi ekya thutholere eribya ithun’ibukire?

¹⁷ Thutholere ithwabya ithun’ibukire ngoku thuli omwa malhwa kandi thutholere ithwabya ithunayitheghekire erilhwa buli kiro. (Erib. 12:17) Balikyethu sibanga thuhekera engabo yethu y’erikirirya. Obuli mundu atholere inialholha embere erighumya erikirirya liwe.

18. Ni kyahi ekyaleka abasirikali abakera ibahamba ndeke esyongabo syabu?

¹⁸ Kera, omusirikali iniakasikibawa busana n’obuthubaha bwiwe omwa lhuhi. Aliwe iniakendi yowa mwa wa bbule amasuba eka isyali n’engabo yiwe. Omuroma oyusomire ebyakera ya Tacitus mwahandika athi: “Omusirikali erisigha engabo yiwe omwa malhwa ini kindu ekikahemulha kutsibu.” Eyo ni nzumwa nguma eyabya yikaleka abasirikali ibahamba ndeke esyongabo syabu.

19. Thwanga hamba thuthi ndeke engabo yethu y’erikirirya?

¹⁹ Thukatheghaya engabo yethu y’erikirirya omw’ihindana mughulhu wosi okwa mihindano y’Ekikristayo n’eribwira abandi okwa lina lya Yehova n’Obwami bwiwe. (Ebr. 10:23-25) Eryongera okw’ekyo, thukasoma Ekinywe kya Nyamuhanga buli kiro n’erisaba Yehova erithuwathikya erighendera okwa buhabuli n’obusondoli bwakyo omwa byosi thukakolha. (2 Tim. 3:16, 17) Neryo, sihali kindu ky’amalhwa ekya Sitani angakolesya erilhwa nethu ekyanga thulethera obulhumi bwa kera na kera. (Isa. 54:17) Engabo yethu y’erikirirya yikendi thutheya. Thukendi kolha buthubaha n’abalikyethu. Kandi ithukendi singa amalhwa wethu aw’obuli kiro n’erithunga olhusunzo lhw’eribya okwa lhuhandi lhwa Yesu akasinga Sitani n’abamukwamire.​—Erib. 17:14; 20:10.