1-2. (a) Ni kyahi ekikathuwathikaya erilholha embere erighumira ebitsibu? Soborera. (b) Thukendi kania okuki omo mwatsi ono?

“NGABYA ingalengekania okwa bitsibu ebyo ngalhabamo, ngaminya ngoku sinangathokire eribisingura ahabwaghe.” Wune wathabugha wuthya? Abangyi babiribugha ekyo. Obundi wakibugha wukalengekania okwa mibere wathoka erighumiramo obulhwere obukalire kutse eriholerwa. Wukabya wukalengekania okwa kitsibu ekyo, wukaminya ngoku wathoka erikighumira kundi omulimu abuyirire wa Yehova mwakuha “obuthoki bunene.”​—2 Kor. 4:7-9.

² Kandi thukayithagha omulimu abuyirire erithoka erighana eby’ekihugho kibi kino. (1 Yn. 5:19) Eryongera okw’ekyo, thukayithagha amaaka erilhwa “n’ebirimu by’ebibi.” (Efe. 6:12) Thulebaye esyonzira ebiri esya omulimu abuyirire akathuwathikirayamu erirwanisya ebitsibu byosi ebi. Neryo thukendi lebya ebya thwanga kolha erithoka erighasirwa ndeke omwa mulimu abuyirire.

3. Ni nzira yahi nguma eya Yehova akathuwathikirayamu erighumira ebitsibu?

³ Omulimu abuyirire wa Yehova akathuha amaaka, kutse akaghalha, k’eriberererya ebyosi ebya thutholere erikolha nomuthunawithe ebitsibu. Omukwenda Paulo mwayowa iniakathoka erilholha embere erikolera Yehova nomwanabya awithe ebitsibu kundi mwayikethera “obuthoki bwa Kristo.” (2 Kor. 12:9) Omwa lhubungo lhwiwe olhw’akabiri ng’omumisyonare, Paulo mwakolha kutsibu omw’ithulira n’omw’iyisighika omwa bya syosente. Mw’ikalha e Korinto ewa Akwila na Pirisila. Babya balhuki b’amahema. Kundi Paulo nayu abya mulhuki, ihakabya ebiro ebyo akakolha nabo. (Emib. 18:1-4) Omulimu abuyirire mwaha Paulo y’amaaka w’erikolha omubiiri wiwe n’eriberererya omubiiri wiwe w’erithulira.

4. Erikwamana na 2 Abanya Korinto 12:7b-9, Paulo abya awithe kitsibuki?

 ⁴ Soma 2 Abanya Korinto 12:7b-9. Omwa milhondo eyi, Paulo amanyisayaki akabugha athi awithe “endwalha y’omubiri [erihwa omwa mubiri, NW]”? Erihwa lyamabya omwa mubiri wawu, iwukendibya omwa bulhumi bunene. Neryo Paulo abya iniakabugha athi mwabana ekitsibu ekiri ng’obulhumi obo. Ekitsibu ekyo mwakyahulhamo “omukwenda wa Sitani” oyuwabya ‘akamuhunza.’ Si bugha indi Sitani n’esyombinga siwe babya bakalethera Paulo y’ebitsibu, eribya nga bakakunda erihwa ly’omwa mubiri wiwe. Aliwe emirimu mibi eyo yabere yikalhangira erihwa lya Paulo, yangabya imuyanza eriryongobererya omwa mubiri wiwe, ni bugha ambu, erikanyia obulhumi bwiwe. Paulo mwakolhaki?

5. Yehova mwasubirya athi erisaba lya Paulo?

⁵ Erimbere, Paulo abya anzire inialhusibwamo erihwa eryo. Akabugha athi: “Munasaba Omukama ngendo isathu . . . nyithi anyilhusaye yoko.” Nomwakine indi Paulo mwasaba, erihwa mulithamulhwamo. Mbwino eki kikamanyisaya kithi Yehova mwathowa erisaba lya Paulo? Kwa bithe bithya. Mwasubirya erisaba liwe. Yehova mwathalhusyaho ekitsibu, aliwe mwaha Paulo y’amaaka w’erikighumira. Yehova mwabugha athi: “Obuthoki bwaghe bukahikana omo bolho bwawu.” (2 Kor. 12:8, 9) Kandi busana n’obuwathikya bwa Nyamuhanga, Paulo mwathoka eribya inianatsemire n’erithekana omwa muthima!​—Fil. 4:4-7.

6. (a) Yehova angana subirya athi erisaba lyethu? (b) Ni milhaghe yahi eyiri omwa masako eyikakuha amaaka?

⁶ Nga Paulo, wunewathasaba Yehova wuthi akulhusayeko ekitsibu? Ekitsibu kyamabya imukithahwaho kutse obundi nibya imukyayongera kandi nibya iwabirinasaba kutsibu, muwanayowa Yehova ng’abirikupona? Kyamabya ikwakiri kithya, wibuke eky’erileberyako kya Paulo. Ngoku Yehova anasubiraya emisabe yiwe, nawu akendi subirya eyawu! Yehova angana ghana erilhusyaho ekitsibu. Aliwe erilhabira omwa mulimu abuyirire, akendi kuha amaaka agho wukayithagha erikighumira. (Esy. 61:3, 4) Wanganabya ng’oyuwamahunzwa, aliwe Yehova syanga kusighania.​—2 Kor. 4:8, 9; Fil. 4:13.

7-8. (a) Omulimu abuyirire ali athi ng’erihunga? (b) Petero mwasoborera athi emikolere y’omulimu abuyirire?

⁷ Ni yindi nzira yahi eya omulimu abuyirire akathuwathikirayamu? Ng’erihunga eryuwene okwa ngetse eyabiriyidunga, omulimu abuyirire akaleka ithwalholha embere omwa bitsibu ebiri ng’ekiyagha thunemulindirira ekihugho kihya-kihya ekya Nyamuhanga abirilhagha.

⁸ Kundi omukwenda Petero abya musohi, abya inianasi ndeke eby’erighendya obwathu. Kwesi kyangabya iky’ekyaleka iniakolesya ekinywe ekikabya nga kihambene n’erighendya obwathu akasoborera emikolere y’omulimu abuyirire. Mwahandika athi: “Kusangwa sihali eriminyerera eryahika na kera omw’isonda ly’omundu, nikwa abandu mubabugha ebinywe ebyo Nyamuhanga ahabo ibakasondolibawa n’omulimu abuyirire.” Ekinywe ky’Ekigiriki ekyahindulhawamo “ibakasondolibawa” erikithwalha ngoku kine kikamanyisaya “erihekwa; erisukumwa.”​—2 Pet. 1:21.

9. Petero anza abandu balengekanaye okuki akakolesya ekinywe “ibakasondolibawa”?

⁹ Petero anza abandu balengekanaye okuki akakolesya ekinywe “ibakasondolibawa”? Omuhandiki w’ekitabu kye Emibiri y’Abakwenda ya Luka mwakolesya ekinywe ky’Ekigiriki ekisosene n’ekyo akakania oko bwathu ‘obukahekawa’ n’erihunga. (Emib. 27:15) Omusomi mughuma we Biblia akabugha athi Petero abere akahandika athi abahandika e Biblia ‘basondolibawa,’ mwakolesya ekinywe ekyanga leka abandu ibalengekania okw’ighendya obwathu.  Petero mwabya ng’oyukabugha athi ngoku obwathu bukanasukumawa n’erihunga erihika eyo bukaya, abaminyereri be Biblia n’abahandiki bayo basukumawa n’omulimu abuyirire eriberererya omubiiri wabu. Omusomi iya n’oyo mwabugha athi: “Abaminyereri mubabya ng’abamasumba esyongyimba esy’obwathu.” Neryo na Yehova mwakolha owiwe. Mwabaha “erihunga,” kutse omulimu abuyirire. N’abahandiki be Biblia mubakolha owabu. Mubaghendera okwa busondoli bw’omulimu oyo.

10-11. Ni bindu byahi bibiri ebya thutholere erikolha omulimu abuyirire eribya iniane muthusondolha? Iha eky’erileberyako.

¹⁰ Ni kwenene, Yehova syakikolesaya abandu erihandika amasako abuyirire. Aliwe, omulimu abuyirire akinaha bandu ba Nyamuhanga b’akaghalha. Yehova akinakolha owiwe. Thwanga ghasirwa thuthi omwa mulimu abuyirire? Thutholere ithwalhangira thuthi thukalholha embere erikolha owethu. Ekyo thukakikolha thuthi?

¹¹ Thalengekania okwa ky’erileberyako kino. Oyukaghendaya obwathu erighasirwa omwa lihunga atholere iniakolha bindu bibiri. Eky’erimbere, atholere inialhangira athi obwathu bwiwe bukaghenda eya erihunga likalholha. Obwathu bwiwe isibwendi ghenda bwamabya ibuli haali okwa yiri erihunga. Ekyakabiri, atholere iniasumba n’erisanza ndeke olhukimba olhw’obwathu. Obwathu ibukendi lholha embere, olhukimba lhw’amahamba ndeke erihunga. Kuthya, ithukendi lholha embere omwa mubiiri wa Yehova thwamabya n’obuwathikya bw’omulimu abuyirire. Omulimu erithughasira, thutholere ithwakolha bindu bibiri. Eky’erimbere, thutholere ithwakolha ebya omulimu wa Nyamuhanga akalhaghira abaghombe biwe erikolha. Ekyakabiri, thutholere ithwasangira omwa bindu ebi ngoku thwanga thoka. (Esy. 119:32) Thwamakolha ebi, omulimu abuyirire iniakendi thuha akaghalha k’erilhaba omwa bisunda by’erihakanisibwa n’ebitsibu kandi iniathuwathikya eriyiyinia buthaleghulha thunemulindirira ekihugho kihya-kihya kya Nyamuhanga.

12. Thukayakanaya okuki?

 ¹² Thwamabirithakania okwa nzira ibiri esya omulimu abuyirire akathuwathikirayamu. Omulimu abuyirire akathuha amaaka kandi akathuwathikaya erisighalha bathaleghulha nomuhane ebitsibu. Omulimu abuyirire kandi akaleka ithwalholha embere n’erithuwathikya eribya okwa nzira eyikakolhaya okwa ngebe y’erikotha. Thukayakanaya okwa bindu bbini ebya thutholere ithwakolha erighasirwa ndeke omwa mulimu abuyirire.

13. Ngoku kiri omu 2 Timoteo 3:16, 17, Amasako anga thuwathikya athi, aliwe thutholere ithwakolhaki?

¹³ Eky’erimbere, igha Ekinywe kya Nyamuhanga. (Soma 2 Timoteo 3:16, 17.) Ekinywe ky’Ekigiriki ekikahindulhawamo “atheghekanibawa na Nyamuhanga” kyamathwalhwa ngoku kine kikamanyisaya “Nyamuhanga eribuhira.” Nyamuhanga mwakolesya omulimu wiwe “eribuhira” amalengekania wiwe omwa bahandiki be Biblia. Thukabya thukasoma e Biblia n’erighanirya okwa bya thukasoma, ebihano bya Nyamuhanga bikingira omwa bulengekania n’omuthima wethu. Bikaleka ithwakolha esyombinduka omwa ngebe nuku thutsemesaye Yehova. (Ebr. 4:12) Aliwe omulimu abuyirire erithughasira ndeke, thutholere ithwahiraho obuthuku bw’erigha e Biblia n’erilengekania kutsibu okwa bya thuk’igha. Neryo Ekinywe kya Nyamuhanga ikikendi thusondolha omwa byosi thukakolha n’eribugha.

14. (a) Busana naki ithwabugha thuthi omulimu abuyirire akabya okwa mihindano? (b) Ni kyahi ekyanga thuwathikya erighasirwa ndeke okwa mihindano?

¹⁴ Ekyakabiri, muramaye Nyamuhanga haghuma. (Esy. 22:22) Thwangana bugha thuthi, okwa mihindano yethu h’aho “erihunga likabuhirira.” Omulimu wa Yehova akabya okwa mihindano. (Erib. 2:29) Busana naki ithwabugha thuthya? Kundi thukabya thukahindana thukaramya haghuma n’abalikyethu, thukasaba omulimu abuyirire, ithw’imba esyonyimbo sy’Obwami esiseghemere okwa Kinywe kya Nyamuhanga, n’erihulikirira amahano awaseghemere okwa Biblia agho balikyethu ababirisombolhwa n’omulimu abuyirire bakalhabaya. Kandi omulimu abuyirire iwa n’oyo akawathikaya bali bethu erithegheka n’erilhabya ebipindi byabu. Omulimu abuyirire erithughasira ndeke, thutholere ithwasa ithwabiriyitheghekera erisangira omwa mihindano. Omwa nzira eyo, thukaghasirawa omwa mulimu abuyirire.

15. Omulimu abuyirire akathuwathikaya athi omwa mubiiri w’erithulira?

¹⁵ Ekyakasathu, sangira omwa mubiiri w’erithulira. Thukabya thukakolesya e Biblia omwa mubiiri w’erithulira n’erikangirirya, thukalighira omulimu abuyirire erithuwathikya omw’ithulira lyethu. (Abar. 15:18, 19) Omulimu abuyirire erikughasira ndeke, wutholere iwasangira mughulhu wosi omwa mubiiri w’erithulira n’erikolesya e Biblia kyamathokekana. Enzira nguma eyanga kuthokesya erikolha omubiiri w’erithulira ly’erikolesya ebya thwanga bugha ebiri omwa Akatabu k’Omuhindano ak’Engebe Yethu ng’Abakrisitayo n’Omubiiri Wethu.

16. Enzira y’eribaniramu bweghu-bweghu omulimu abuyirire y’eyahi?

¹⁶ Ekyakani, saba Yehova. (Mt. 7:7-11; Lk. 11:13) Enzira ey’eribana bweghu-bweghu omulimu abuyirire wa Yehova ly’erimusabagho. Sihali ekyanga kakirya emisabe yethu erihika oku Yehova, kutse erikakirya ekihembo kya Nyamuhanga eky’omulimu erithuhikako​—nomuyangabya ngomo kutse nibya Sitani. (Yak. 1:17) Thutholere ithwasaba thuthi nuku thughasirawe omwa mulimu abuyirire? Eribana eky’erisubirya, thukanaye buuli okwa musabe omw’ilebya eky’erileberyako ekikabanika omwa Njiri ya Luka musa. *

17. N’isomo lyahi erya thuk’igha okwa musyo wa Yesu owali omu Luka 11:5-9, 13?

¹⁷ Soma Luka 11:5-9, 13. Omusyo wa Yesu akakanganaya emibere eya thutholere ithwasabiramu omulimu abuyirire. Omwa musyo oyo, omulhume mwabana ebyo ayithagha busana ‘n’erihathikana’ liwe. Mwathasagha erisaba munywani wiwe y’obuwathikya nomwakine indi bwabya omwa kiro kutsibu. (Lebaya eby’eriyeghesya omu Luka 11:8 omwa mwb18 Okwomusanju) Ni kyahi ekya Yesu abugha athi omusyo oyu akathweghesaya okwa musabe? Mwabugha athi: “Mubulhaye, neryo mwasyahabwakyo; musonda-sondaye, neryo mwasyabanakyo; mukongothe oko lhuyi, neryo mwasyakyungulirwalho.” Neryo thuk’ighaki? Omulimu abuyirire erithuwathikya, thutholere ithwasabagho omw’ihathikana.

18. Erikwamana n’omusyo wa Yesu, busana naki ithwayikethera ngoku Yehova akendi thuha omulimu wiwe abuyirire?

¹⁸ Omusyo wa Yesu kandi akaleka ithwalhangira ekikaleka Yehova iniathuha omulimu abuyirire. Omulhume oyuli omwa musyo abyanzire erikokya. Mwayowa iniatholere eriha omugheni wiwe oyuwasa omwa kiro y’ebyalya, aliwe abya isyabiwithe. Yesu mwabugha athi omutaka mwaha omulhume y’ebyalya busana n’erihathikana kutsibu liwe. Ni kyahi ekya Yesu abya iniali okw’ikangirirya? Omundu oyuthahikene amabya iniangana wathikya omutaka wiwe, Yehova Thatha wethu w’elhubulha iniakendi wathikya bungahi abakahathikana erimusaba omulimu wiwe abuyirire! Neryo kwesi, thwangana saba ithunayikethere ngoku Yehova akendi thuha omulimu wiwe abuyirire.​—Esy. 10:17; 66:19.

19. Busana naki ithwayikethera ngoku thukendi singura?

¹⁹ Thwangana yikethera ngoku thukendi singura nomwakine indi Sitani syalyumbaya erithubambira. Busana naki? Kundi omulimu abuyirire akathuwathikaya omwa syonzira ibiri. Ey’erimbere, akathuha amaaka agho thukayithagha erisingura ebitsibu. Eyakabiri, k’akaghalha akakathuwathikaya erilholha embere erikolera Yehova thunalindirire ekihugho kihya-kihya kya Nyamuhanga. Thuthwemu erilhangira thuthi thukaghasirawa ndeke omwa buwathikya bw’omulimu abuyirire!