OMWA buthuku bwe Biblia, omwimaniri iniak’imanira omuyi kutse ebindu by’owundi mundu. Ekinywe kye Kihebrania ne Kigiriki ekikahindulhawamo “omwimaniri” kikanathasyamanyisaya omulebererya kutse omusondoli w’omuyi.

Omughulhu Yozefu mughalha wa Yakobo, abya mukobe e Misiri, mwabya mwimaniri w’enyumba y’omukama wiwe. Omukama wiwe Omunya Misiri “mwahira ebyosi abya awithe omo byalha bya Yozefu.” (Enz. 39:2-6) Enyuma waho, Yozefu abere akabya muthabali w’amaaka omwa Misiri, mwahira okwa nyumba yiwe kw’omwimaniri.​—Enz. 44:4.

Omwa biro bya Yesu, abinye bithaka ibak’ikalha omwa syotawuni haali okwa malima wabu. Neryo abinye ebithaka ibakasombolha abatheya erilebererya emibiiri eyo abakoli bakakolha omwa malima ayo.

In’indi oyukatholera eribya mwimaniri kutse mutheya? Omuhandiki Omuroma ow’omwa kighonye ky’erimbere ya Columella mwabugha athi omukobe oyukasombolhawa eribya mulebererya kutse mutheya iniatholere eribya “mundu oyunabyasi.” Iniatholere iniabya mundu oyukalhangira athi abakoli bakakolha aliwe kandi isi mutsurumi. Mwongerako athi: “Ekikulhu omutheya syatholere akalengekania athi asi obuli kindu, n’eriminya ngoku atholere inialholha embere eriminya ebindu bihyaka.”

Ekinywe kya Nyamuhanga kikakolesaya eky’erileberyako ky’omwimaniri erikangania emibiiri eyikakolhawa omwa kithunga ky’Ekikristayo. Ng’eky’erileberyako, omukwenda Petero akahira omwa Bakristayo mw’omuhwa w’erikolesya amaaka agho Nyamuhanga abiribaha ‘erikolerana omo lhusunzo olho, ng’abatheya.’​—1 Pet. 4:10.

Yesu nayu mwakolesya eky’erileberyako ky’omutheya omwa musyo owali omu Luka 16:1-8. Nomwabine, omwa buminyereri obuhambire okw’ibyaho lya Yesu ng’Omwami, mwakakasya abamukwamire ngoku akendi sombolha “omughombe oyutheleghulha n’ow’amenge,” kutse “omwimaniri oyutheleghulha.” Omubiiri mukulhu ogho mwimaniri oyo ly’eriha abakwamire Kristo ebyalya by’obunyakirimu omwa biro by’enduli bino. (Mt. 24:45-47; Lk. 12:42) Thutsemire kundi thukathunga ebitabu ebikahimba erikirirya lyethu ebya omwimaniri oyutheleghulha akatheghekanaya n’erithuha omwa kihugho kyosi.