1. Yehova akathulighira erikolhaki?

YEHOVA akathulighira eriyithwiramu enzira y’erikwama. Akathukangiriraya ngoku thwanga thwamu ndeke, n’erithuwathikya eribya ndeke thwamathwamu ebikamutsemesaya. (Esy. 119:173) Thukabya thukongera erighendera okwa menge awali omwa Kinywe kya Nyamuhanga, thuk’ongera erithwamu ndeke.—Ebr. 5:14.

2. Thwangana bana kitsibu kyahi enyuma w’erithwamu?

² Aliwe n’omughulhu thukathwamu ndeke, thwangana lemwa erighunza ebyo thwatsuka. Lebaya eby’erileberyako bino: Mughalha wethu omulere iniathwamu erisoma e Biblia eyosi. Iniakolha ekyo habw’esyowiki nyike aliwe ahabw’esyonzumwa ndebe inialemwa. Mwali wethu iniathwamu erikolha obutemburi bw’omughulhu wosi aliwe iniabera erihindulha ebiro by’eritsukiramu. Abasyakulhu ibathwamu haghuma eryongera eribungira esyombuli aliwe amezi inialhaba isibali batsuka erikolha ekyo. Emibere eyi simighumerera, aliwe hane aho yisosene. Abosi mubathaberererya erithwamu lyabu. Abakristayo ab’omwa kighonye ky’erimbere abe Korinto mubabana ekitsibu ng’ekyo. Thulebaye ebya thwanga bighirako.

3. Abanya Korinto mubathwamu erikolhaki, aliwe mubyabya bithi?

³ Angabya iniabya mwaka 55 E.K., Abanya Korinto bakathwamu okwa mwatsi mulebe. Mubaminya ngoku balikyethu e Yerusalemu ne Yudea bali omwa bitsibu n’obunakwa kandi ngoku ebindi bithunga binemusorokya esyosente eribawathikya. Busana n’olhukeri n’obwenge, Abanya Korinto mubathwamu  eriwathikya neryo bamabulya omukwenda Paulo nga banga wathikya bathi. Mwabathumira obusondoli n’erisombolha Tito erisisorokya. (1 Kor. 16:1; 2 Kor. 8:6) Enyuma w’amezi make, Paulo mwaminya ngoku Abanya Korinto sibathakolha ngoku bayilhagha. Busana n’ekyo, ebyo bangahereyo byangabere isibiribyabanika ebindi bithunga bikathuma obuwathikya bwabyo e Yerusalemu.—2 Kor. 9:4, 5.

4. Ngoku kiri omu 2 Abanya Korinto 8:7, 10, 11, Paulo mw’ibukya Abanya Korinto erikolhaki?

⁴ Abanya Korinto babya ibabirithwamu ndeke, kandi Paulo mwabasima busana n’erikirirya lyabu erighumire n’omuthima wabu w’erihithya. Aliwe kandi mwabya w’erib’ibukya eribugha ekyo babya ibabiritsuka. (Soma 2 Abanya Korinto 8:7, 10, 11.) Eky’erileberyako kyabu kikathukanganaya ngoku nibya n’Abakristayo abathaleghulha bangana lemwa eriberererya erithwamu lyabu.

5. Ni bibulyo byahi ebyo thukendi subirya?

⁵ Ng’Abanya Korinto, nethu kyangana thukalira eriberererya erithwamu lyethu. Busana naki? Busana n’obuthahikana, thwangana bera eriyilhagha-lhagha. Kutse ebikabya kitsumbukirania byangana leka ikithathokekana eriberererya erithwamu lyethu. (Omu. 9:11; Abar. 7:18) Thwanga kolhaki thwamabya thwanzire erilebya ndeke erithwamu erya thwakolha n’erithwamu nga thuhindule? Kandi thwanga kolhaki erilhangira thuthi thukabughirira ebyo thwabiritsuka?

6. Ni mughulhu wahi thwanga yithagha erihindulha erithwamu?

⁶ Hane ebya thukathwamu ebya thuthe thwanga hindulha. Ng’eky’erileberyako, thukamakirira erithwamu lyethu ly’erikolera Yehova, n’erithwamu eribya bathaleghulha okwa oyo thuli nayu omwa butheke. (Mt. 16:24; 19:6) Aliwe, ebindi ebya thukathwamu byangana yithagha erihindulhwa. Busana naki? Kundi emibere yikahinduka. Ni byahi ebyanga thuwathikya erithwamu ndeke?

7. Ni kyahi ekyathutholere ithwasaba, kandi busana naki?

⁷ Saba amenge. Yehova mwasondolha Yakobo erihandika athi: “Hamabya omundu omwakathi-kathi kenyu oyukabulha amenge, abulhaye Nyamuhanga oyukaha ndeke oko bandu bosi butsira buhemu.” (Yak. 1:5) Omwa nzira ndebe, ithwe bosi ‘thukabulha amenge.’ Neryo yikethere Yehova wukathwamu n’omughulhu kyanga kuyithaghisya erihindulha erithwamu. Yehova akendi kuwathikya erithwamu ndeke.

8. N’isekulya lyahi erya thutholere ithwakolha thuthe thwathwamu?

⁸ Sekulhaya ndeke. Soma Ekinywe kya Nyamuhanga, ebitabu by’ekithunga kya Yehova, n’erikania n’abo wukayikethera. (Emi. 20:18) Erisekulya ng’eryo likayithaghisibawa wuthe wathwamu nga wuhindule omubiiri, erihuma, kutse okwa kisomo ky’amenge ekitholere ekyanga kuwathikya erikolera Yehova.

9. Thukaghasirawa thuthi thwamayibera b’okwenene?

⁹ Lebaya ndeke ebilhubirirwa byawu. Yehova akalhangira ekilhubirirwa kyethu ky’erimukolera mwa kikulhu. (Emi. 16:2) Anzire ithwabya mw’okwenene omo myatsi yosi. Neryo thukathwamu, nethu thwanzire ithwayibera b’okwenene n’embere sy’abandi bikahika okwa bilhubirirwa byethu. Thwamathendibya mw’okwenene, ikyangana thukalira eriberererya erithwamu lyethu. Ng’eky’erileberyako, mughalha wethu omulere anganathwamu eribya mutemburi w’omughulhu wosi. Aliwe enyuma w’obuthuku bulebe, inialemwa eriberererya esyosaha esikayithaghisibawa neryo iniabulha etseme omw’ithulira liwe. Angabya  imwalengekania athi ekighendererwa kiwe kikulhu eky’erikolha obutemburi ly’eritsemesya Yehova. Aliwe, ekilhubirirwa kiwe sikyangabya obundi ikyabya iry’erianza eritsemesya ababuthi biwe kutse owundi mundu oyo akayighomba?

10. Ni kyahi ekikayithaghisibawa erikolha esyombinduka?

¹⁰ Thalengekania okwa mwigha we Biblia oyukathwamu erileka erinywa ethaba. Nomwakine indi kikalire, iniathoka eriyikakirya habw’ewiki kutse wiki ibiri, aliwe kandi iniasubirayo. Erighunzerera, iniathoka erilekayo! Erianza Yehova n’erianza erimutsemesya ibyamuwathikya erileka omutse oyo.—Kol. 1:10; 3:23.

11. Busana naki wutholere iwayihiriraho ebilhubirirwa?

¹¹ Yihirireho ebilhubirirwa. Wamabya n’ebilhubirirwa, ikikendi kwolhobera eribiberererya. Ng’eky’erileberyako, wangana thwamu eribya wukasoma e Biblia. Aliwe wamabya wuthawithe endegheka, iwangana lemwa eriberererya ekilhubirirwa kyawu. * Kutse abasyakulhu banganathwamu haghuma eryongera erithasyabungira esyombuli, aliwe amezi inialhaba isibali batsuka erikolha ekyo. Erithoka ekyo, ibangana yibulya ebibulyo nga bino: “Thwanabiriminya balikyethu abanga ghasirwa omw’eki? Thwanabirihiraho obuthuku bw’eribabungira?”

12. Thwangana yithagha erikolhaki, kandi busana naki?

¹² Kolha ebyo wangana thoka. Sihali oyuwithe endambi, eby’erikolesya, kutse akaghalha k’erikolha ebyosi ebyo anzire. Neryo busana n’ekyo ibya n’obuyitheghererya kandi kolha ebyo wanga thoka. Kyamayithaghisibwa, iwangana hindulha erithwamu lyawu wamalhangira isiwanga thoka eriliberererya. (Omu. 3:6) Thubughe thuthi, wabirilebya ndeke erithwamu lyawu, wabirikolha esyombinduka esikayithaghisibawa, n’eriyowa iwukendi liberererya. Hano hane ebindu bithano ebyanga kuwathikya eribughirira ebyo wabiritsuka.

13. Wangabana wuthi amaaka agho wukayithagha eriberererya erithwamu lyawu?

¹³ Saba amaaka w’eriyira eky’erikolha. Nyamuhanga anganakuha “amaaka w’eriyira eky’erikolha” n’aw’eriberererya erithwamu lyawu. (Fil. 2:13, NW) Neryo saba Yehova y’omulimu wiwe abuyirire erikuha amaaka agho wukayithagha. Lholha embere erisaba nomuwanga yowa nga siwuthasubwamo lhuba. Ngoku Yesu abugha: “Mubulhaye, mwasyahabwa [omulimu abuyirire].”—Lk. 11:9, 13.

14. Omusingyi owali omu Luka 14:28 angakuwathikya athi eriberererya erithwamu lyawu?

¹⁴ Hiraho emitheghekere. (Soma Luka 14:28.) Erithoka eribughirira ebyo wabiritsuka, hiraho emitheghekere. Neryo wutholere iwakwama-kwamania emitheghekere eyo. Kuthya, wukathwamu, handika ebya wukendi kolha eriberererya erithwamu lyawu. Eritsutsanga emibiiri eminene-minene mwa mike-mike kyangana leka iwathoka erikolhayo. Paulo mwabwira Abanya Korinto athi babye bakabika kake-kake “oko buli kiro ky’eyenga” omwakanya k’erilinda bathi bakendi syasorokya akahika. (1 Kor. 16:2) Kandi eritsutsanga emibiiri eminene-minene mwa mike-mike kyanganaleka iwuthayowa nga wukendi lemwa.

15. Ni kyahi ekyanga kolhwa wabirihiraho emitheghekere?

¹⁵ Wamahandika ebyo wutheghekire erikolha, neryo ikikendi kwanguhira eribikolha. (1 Kor. 14:40) Ng’eky’erileberyako, abasyakulhu batholere ibasombolha omusyakulhu  oyukendibya akahandika ebyo bakathwamu, oyukendi kwama-kwamania erithwamu eryo, n’ekiro ky’eriliberererya. Abasyakulhu abakaghendera okwa busondoli obu bakabya ibakendi berererya ndeke erithwamu lyabu. (1 Kor. 9:26) Nawu wangana kolha ekiri ng’ekyo. Ng’eky’erileberyako, wangana handika eby’erikolha buli kiro n’eribithonda ngoku wanzire ibyasubungukana. Eki ikikendi leka iwathoka eribughirira ebyo wabiritsuka kandi omwa buthuku buke.

16. Ni kyahi ekikathasyayithaghisibawa eriberererya erithwamu lyawu, kandi Abanya Roma 12:11 hakaghumaya hathi ekyo?

¹⁶ Yikase. Kikayithagha akaghalha erikwama-kwamania emitheghekere yawu n’eribughirira ebyo wabiritsuka. (Soma Abanya Roma 12:11.) Paulo mwabwira Timoteo athi ‘ayihe n’eriyitsinga’ okw’ibya mukangirirya mubuya. Erihabulha eryo likahamba n’okwa bindi bilhubirirwa by’obunyakirimu.—1 Tim. 4:13, 16.

17. Thwanga kolesya thuthi Abanya Efeso 5:15, 16 eriberererya erithwamu lyethu?

¹⁷ Kolesaya ndeke obuthuku bwawu. (Soma Abanya Efeso 5:15, 16.) Hiraho obuthuku bw’eriberererya erithwamu lyawu kandi isiwabuhindulha. Yitheghaye okw’ilengekania wuthi wukalinda obuthuku obutholere; ibwangana syaghana eribanika. (Omu. 11:4) Iwayitheya okw’ilighira ebithawithe mughaso erikulira obuthuku n’akaghalha akawukayithagha erikolha ebikulhu kutsibu. (Fil. 1:10, NW) Kyamathokekana, hiraho obuthuku obwawuthe wanga taburwamu. Bwira abandi ngoku wukayithagha obuthuku obw’erihira amalengekania okwa kyawukakolha. Ibuka er’ihako esimu yawu n’erilebya esyomeseji kutse emithahulha y’erikanirania okwa bundi buthuku. *

18-19. Ni kyahi ekyanga kuwathikya erilholha embere eriberererya erithwamu lyawu nomuwangabana ebitsibu?

¹⁸ Lengekanaya okwa byanga lhwiririramu. Ebikalhwiririra omw’ithwamu lyawu biri ng’olhughendo. Wamabya wanzire erihika eyo wukaghenda, iwukendi lholha embere enzira nomuyangabya iyilibire, neryo iwayithagha erisondya eyindi nzira eyikendi kuhikya. Kuthya, thwamalengekania okwa bikalhwiririra omw’ithwamu lyethu, isithwendi bikyako lhuba thukabana ebitsibu kutse ebikathukakiraya.—Gal. 6:9.

¹⁹ Kikalire erithwamu ndeke, kandi kyangana kalha eriberererya erithwamu lyethu. Aliwe busana n’obuwathikya bwa Yehova wangana bana amenge n’amaaka agho wukayithagha eribughirira ebyo wabiritsuka.