BALIKYETHU bangyi abalhua omwa bihugho byabu ebithakulha-kulene eriyikalha omwa bindi bihugho babirisuba ewabu. Busana n’olhwanzo olho bawithire Yehova n’abandu, babirisuba omwa bihugho ebiri mw’obuyithawa bw’abathuliri b’Obwami. (Mt. 22:37-39) Ni byahi ebyo babiriyithalyako, kandi babiribana mighisaki? Eriminya, thukanaye okwa kihugho kye Cameroon omwa Afirika.

Omwa 1998 mughalha wethu ya Onésime mwahuma ewabu e Cameroon. Mwaghunza emyaka 14 iniane omwa kihugho ky’eyihya. Kiro kighuma, okwa mihindano, mwowa eky’erileberyako ekihambire okwa mubiiri w’erithulira. Embuyi muyabugha yithi, “Abanywani babiri bamabya ibanemusohera omwa myanya eyiri mbaghane neryo owundi iniahamba esiswe nene kwilhaba owundi, mbwino oyuli ahathe esiswe isyendi ghenda ahali oyuli ahali esiswe nene?”

Eky’erileberyako ekyo mukyaleka Onésime inialengekania okw’isuba e Cameroon eyiri esiswe nene sy’obunyakirimu eriwathikya abathuliri abaliyo. Aliwe abya awithe eriyilhalikirira. Anganathokire eribeghera emibere y’ewabu enyuma w’erighunza emyaka yosi eyo omwa kihugho ky’eyihya? Eriminya ng’angana beghera, Onésime mwabungira e Cameroon habw’amezi mukagha. Neryo omwa 2012, mwahumirayo, eriyikalhayo.

Onésime akabugha athi: “Munayithagha eribeghera ekihuhania n’emibere y’engebe. Omwa Kisenge ky’Obwami, munayithagha eribeghera erithasy’ikalha okwa syofomu.” Inianatsemire akabugha athi, “Ngabya ingahwerya amalengekania okwa mihindano, kunganabirirawa nyithya ebithumbi ebyuwene.”

Omwa 2013, Onésime mwathahya Géraldine, oyuwasuba e Cameroon akalhua e France eyo abya iniabirikalha habw’emyaka mwenda. Ni mighisa yahi eyo abathahenie aba babana busana n’erihira eby’ekiteokrasi by’embere omwa ngebe yabu? Onésime akabugha athi: “Ingye na mukali waghe, muthwaghenda okwa Sukuru y’Abathuliri b’Obwami kandi thwamakolera okwa Beteli. Omo mwaka mughuma musa, abigha be Biblia 20 omwa kithunga kyethu mubabatizibwa. Lino ngayowa ingali omwa mwanya owatholere ‘ow’erisoheramo.’” (Mk. 1:17, 18) Géraldine akongerako athi: “Nabiribana mighisa mingyi kwilhaba ngoku nabya ingalengekania.”

Judith abya iniabirihumira e Amerika aliwe mwanza erikanyirirya omubiiri wiwe w’erithulira. Akabugha athi, “Obuli erisuba e Amerika ingalhua okw’ibungira ab’eka e Cameroon, iningalira busana n’erisighania abigha bangyi abo ngalhue inabiritsukisya.” Aliwe, Judith mwasagha erisuba e Cameroon. Abya awithe omubiiri owaliko esyosente ndeke owabya akaleka iniathoka erithwanira thatha wiwe e Cameroon. Aliwe, busana n’eriyikethera  Yehova, Judith mwahuma. Akabugha athi mwakandira ebibuya birebe omwa kihugho ky’eyihya. Mwasaba Yehova amuwathikaye erikolha esyombinduka kandi omulebererya w’omuthimbo na mukali wiwe mubamughumya.

Judith akabya akasubya ameso w’enyuma, akabugha athi, “Omo myaka isathu munabana obutseme bw’eriwathikya abandu bbani erihika okw’ibatizibwa.” Judith mwatsuka erikolha ng’omutemburi w’embaghane. Munabwire, akakolha na mwira wiwe, Sam-Castel, omwa mubiiri w’obulebererya. Kandi ibbwa thatha wa Judith? Judith n’ab’eka yabu mubabana esipatara omwa kihugho ky’eyihya eyasemezeraya thatha wiwe ya bbule. Eky’obutseme, erisemezya mulyaghenda ndeke.

Mughalha wethu oyukahulhawa mo Victor mwahumira e Canada. Abere abirisoma omwatsi omwa Kaleberyo owahambire okw’isoma kali-kali, mwalengekania okwa by’esukuru yiwe. Mwaleka eby’eyunivasite amasombolha akabiiri ako akendi somera habw’obuthuku buke. Akabugha athi, “Ekyo mukyaleka ingabana omubiiri wa lhuba, n’erikolha ekyo nabya inabirikandira​—obutemburi.” Enyuma waho, Victor mwathahya Caroline, kandi abathahenie aba mubabungira e Cameroon. Omwa lhubungo lhwabu olho, mubabungira ekyaghanda ky’omuthahulha, eyo abalikyethu balebe babahirira mw’omuhwa ow’erilengekania okw’isyakolera e Cameroon. Victor akabugha athi, “Muthwalhangira isihali ekyanga leka ithwaghana, kandi kundi ithuwithe engebe nyolho, muthwaligha erikokya eryo.” Nomwakine indi Caroline abya awithe ebitsibu by’amaghalha, mubathwamu erihuma.

Victor na Caroline mubatsuka erikolha ng’abatemburi b’omughulhu wosi busana n’erianzisibwa linene eryo babana omw’ithulira. Akasente ako babika mukabawathikya ahabw’obuthuku nga bwa n’obo. Enyuma waho mubasuba e Canada eriyakolha habw’amezi make, ekyabathokesaya erisuba e Cameroon n’erilholha embere n’obutemburi. Mubabana mighisaki? Mubaghenda okwa Sukuru y’Abathuliri b’Obwami, bamakolha ng’abatemburi b’embaghane, kandi lino ni baghombe abakahimba Ebisenge by’Obwami. Victor akabugha athi, “Erisighania engebe yethu eyuwene mukyaleka ithwayilhangirira obuwathikya bwa Yehova.”

Omwa 2002, mughalha wethu ya Alain, iniane okwa yunivasite kwe Germany, mwasoma etrakit Youths​—What Will You Do With Your Life? Ebyo asoma mubyaleka iniayihiriraho ebilhubirirwa bihyaka. Omwa 2006, mwaghenda okwa Sukuru y’Abasyakulhu n’Abaghombe Abawathikya neryo mwathumwa e Cameroon, ekihugho ekyo abuthirawamo.

E Cameroon, Alain mwabana omubiiri w’erikolha biro bike omwa wiki. Enyuma waho, mwabana omubiiri ow’esyosente nene, aliwe mwayilhalikirira athi angana hamba okw’ithulira liwe. Neryo abere akahebwa olhusunzo lhw’erikolha ng’omutemburi w’embaghane, mwalhuaho inialigha. Oyumuhere omubiiri mwamwongera omusara, aliwe Alain mwathahindulha erithwamu liwe. Enyuma waho, Alain mwathahya Stéphanie, oyuwabya iniabirikalha e France habw’emyaka mingyi. Ni bitsibu byahi ebyo Stéphanie abana abirihumira e Cameroon?

Stéphanie akabugha athi: “Munabana ehitsibu hinene ehihambire okwa maghalha, aliwe munabya ingane mubana omubatsi neryo munahumulikana.” Abathahenie aba mubahembwa busana n’eriyiyinia lyabu. Alain akabugha athi: “Thwabere  thukayathulira omwa kyalu ekiri haali ekikahulhawamo Katé, muthwabana abandu bangyi abanzire erigha e Biblia. Enyuma waho, muthwabya ithwangan’igha nabu okwa simu. Ababiri b’okwa bigha be Biblia aba mubabatizibwa, n’egurupu muyatsuka omwa kyalu eki.” Stéphanie akongerako athi: “Sihali etseme eyirengire eriwathikya abandu erihika okw’iyihayo oku Yehova. Erikolera eno, thwabiriyilhangirira etseme eyo mirundi mingyi.” Munabwire, Alain na Stéphanie bakakolha omubiiri w’obulebererya bw’omuthimbo.

Gisèle abatizibawa inianemusomera eby’obudokita e Italy. Engebe nyolho ya mughalha wethu na mukali wiwe abatemburi abamw’eghesaya e Biblia muyamutsemesya, neryo mwanza erikolha bingyi omwa mubiiri w’erithulira. Neryo Gisèle mwatsuka erikolha ng’omutemburi w’omughulhu wosi akaghunza esukuru.

Gisèle abyanzire erisuba e Cameroon nuku akolere Yehova ya bingyi, aliwe aby’awithe ebikaleka iniayilhalikirira. Akabugha athi, “Munabya w’eriherya akaghisa k’eribya ndulhani ye Italy n’erisighania abanywani n’abahughu, abali e Italy.” Nomwabine, Okwakathano 2016, Gisèle mwasuba e Cameroon. Buthuku bulebe enyuma waho, mwathahibwa na Léonce, n’ekyaghanda ky’omuthahulha kye Cameroon mukyalighira abathahenie aba erighenda e Ayos, e tawuni eyirimo obuyithawa bw’abathuliri b’Obwami.

Engebe ye Ayos yabya yithi? Gisèle akabugha athi: “Amasenyerezi iniakanabulha habw’esyowiki, neryo ithwabya isithwanga thunga omuliro okwa syosimu syethu. Buthuku bunene isisiribyako. Mun’igha eritsumba okwa syongwe, ithukaghenda n’esyoggadi-ggadi n’esyotoki thukayatheha amaghetse omwa kiro okwa kanu isikuli bandu banene.” Ni kyahi ekya wathikaya abathahenie aba erighuma? Gisèle akabugha athi: “Omulimu wa Yehova, mwira waghe oyukanyisighika, n’abahughu n’abanywani eribya ibanemuthuhumulikania n’erithusighika omwa by’esyosente mukyathuwathikya.”

Mbwino Gisèle anatsemire busana n’erisuba omwa kihugho kiwe? Akabugha athi: “Ee! Ahathe erithika-thika. Okw’itsuka habya ihane ebitsibu n’erihwa mani, aliwe thwabere thwabiribisingura, ingye na mwira waghe muthwayowa imuthwakolha ekyonyine-nyine ekyo thwabya thutholere erikolha. Thukayikethera Yehova kandi thukayowa ithuli hakuhi-kuhi nayu.” Léonce na Gisèle mubaghenda okwa Sukuru y’Abathuliri b’Obwami, kandi lino bakakolha ng’abatemburi b’embaghane ab’obuthuku buke.

Ng’abasohi abakakanganaya obuthubaha omwa mibere muthina-muthina ey’obuthuku nuku bahambe esiswe nene, abakasuba omwa kihugho ky’ewabu bakayithalhaya okwa bindi nuku bawathikaye ab’emithima myolho abanzire erihulikirira omwatsi w’Obwami. Ahathe erithika-thika, Yehova akendi sy’ibuka abathuliri ab’omuhwa aba busana n’olhwanzo olho babirikangania busana n’erina liwe. (Neh. 5:19; Ebr. 6:10) Wamabya iwabirihumira omwa bihugho by’eyihya, kandi omwa kihugho ky’ewenyu imune obuyithawa bw’abathuliri b’Obwami, mbwino wanganasubayo? Wamakolha ekyo, iwukendi bana emighisa mingyi.​—Emi. 10:22.