Nabuthawa 1983. Nabuthawa ingane ndeke, aliwe nabere ingahikya myaka ikumi, munatsuka eriowa obulhumi bunene omwa mubiri wosi. Habere hahwa myaka ng’ibiri, engyakya nguma munabuka isinangathasyathoka erighenda. Nomunanalengaho bungahi erisumba amaghulhu, mwabya isimukiri mani. Eritsuka ekiro ekyo, sindi nathasyaghenda. Obulhwere bwaghe mubwanyikusya. Namunabwire, ngakine muke ng’omwana.

Mezi make nali lhwere kandi isinangathasyathoka erilhua eka, Abema ba Yehova babiri mubanyibungira. Abagheni ibakabya bakasa, mughulhu mungyi ini ngabisama, aliwe ekiro ekyo munalighira abakali abo erikania naghe. Babere bakakania okwa Paradiso, mun’ibuka ebyo nabya inabiriowa ingane w’emyaka ng’ithano. Okwa buthuku obo, omumisyonare oyukahulhawamo Jethro, oyuwabya ikere e Suriname, iniakabungira omwa kyalu kyethu murundi mughuma omwa kwezi kandi iniak’igha e Biblia na thatha waghe. Jethro iniakanyitsomana ndeke. Munamwanza kutsibu. Kandi, sokulhu na mukaka ibakananyithwalha okwa mihindano y’Abema eyabya yikabya omwa kyalu kyethu. Neryo ya Florence, omughuma w’okwa bakali abanyibungira ekiro ekyo, abere akanyibulya athi nganangananza eriminya bingyi, munabugha indi ee.

Florence mwasubulha na mwira wiwe ya Justus, neryo bamatsuka er’igha naghe e Biblia. Babere baminya ngoku singasi erisoma, mubanyiwathikya erigha erisoma. Enyuma w’obuthuku bulebe, munathoka erisoma. Kiro kighuma, abathahenie abo, mubambwira bathi babirithumwa e Suriname. Eky’obulighe, e Orealla siyabya oyuwanga lholha embere erigha naghe. Aliwe, eky’obutseme, Yehova mwabya iniananyibukire.

Buthuku buke, omutemburi ya Floyd mwasa e Orealla, kandi mwanyihikako akathulira nyumba okwa nyumba. Abere akambwira okw’igha e Biblia, munasenyenyia. Mwambulya athi, “Wukasenyenyaya habwaki?” Munamubwira indi nabirighunza erigha e brokyuwa Omuhangiki Akathuronda Kwaki? kandi nabiritsuka erigha ekitabu Knowledge That Leads to Everlasting Life. * Munamubwira ekyalekire inaleka erigha. Floyd mwaghunzerera erigha naghe ekitabu Knowledge, aliwe kandi nayu mwathumwa ehandi. Kandi munabya isingakiwithe ow’erinyeghesya e Biblia.

Aliwe, omwa 2004, abatemburi b’embaghane babiri ya Granville na Joshua, mubathumwa  e Orealla. Mubathulira nyumba okwa nyumba, kandi bamanyibana. Babere bakanyibulya ngangananzire erigha, munasenyenyia. Munababwira indi bighe naghe ekitabu Knowledge eritsuka okwa nzuko. Nanza eriminya ngabane mwendi nyikangirirya ebyo nyine-nyine ebyo abakangirirya baghe b’erimbere banyikangiriraya. Granville mwambwira athi emihindano yinemubya omwa kyalu kyethu. Nomwakine indi nabya inamabirighunza myaka ng’ikumi isindi nathalhua eka, munanza erihindana. Neryo Granville mwasyanyenda n’erinyihira omwa kaggali k’abalema n’erinyithwalha okwa Kisenge ky’Obwami.

Enyuma waho, Granville mwanyihira mw’omuhwa w’eringira omwa Sukuru y’Ekiteokrasi. Mwabugha athi: “Wuli mulema, aliwe wangana bugha. Kiro kighuma, wukendi syaha omukania w’abandu abosi. Kikendi syabya.” Ebinywe biwe ebikahimba mubyanyighumya.

Munatsuka erisangira omw’ithulira na mughalha wethu ya Granville. Aliwe, esyonzira nene omwa kyalu kyethu isitsandire neryo akaggali isikangathoka erisilhabamo. Neryo munabwira Granville indi anyihire omwa ggadi-ggadi n’erinyikukuma. Ekyo mukyawathikya kutsibu. Munabatizibwa Okwakani 2005. Buthuku buke, baghalha bethu mubanyithendeka erikolha okwa bitabu omwa kithunga n’okwa radio omwa Kisenge ky’Obwami.

Neryo, eky’obulighe, omwa 2007 thatha waghe mwaholera omwa aksidenti y’obwathu. Eka yethu muyabya omwa bulighe bunene. Granville mwasaba haghuma nethu n’erithubwira emyatsi ye Biblia eyikahumulikanaya. Enyuma w’emyaka ibiri, muthwabana ekindi kitsibu ekikalire—Granville mwaholera omwa aksidenti y’obwathu.

Ekithunga kyethu kike kandi ekiri omwa bulighe mukyabya isikikiwithe musyakulhu, aliwe omughombe muwathikya mughuma. Olhuholho lhwa Granville mwalhwanyitha obulighe; abya munywani waghe w’okwa ndungu. Omwa buthaleghulha iniakanyiwathikaya bunyakirimu na kinyamubiri. Okwa muhindano owakwamako aliholire, nabya ngwithe olhusunzo lhw’erisoma Akaleberyo. Munanathasoma esyonungu ibiri sy’erimbere, aliwe munatsukiraho erilira n’emisoni yamabera eriyisendera. Munakwama ky’erilhua embere.

Munatsuka eriyowa ndeke balikyethu b’omwa kindi kithunga bakasa e Orealla erisyathuwathikya. N’ekyaghanda ky’omuthahulha mukyathuma omutemburi w’embaghane ya Kojo. Ekikanyitsemesaya, mama waghe na mughalha wethu omulere mubatsuka erigha neryo bamabatizibwa. Neryo omwa Kwakasathu 2015, munasombolhwa eribya mughombe muwathikya. Buthuku buke enyuma waho, munalhabya omukania waghe w’erimbere ow’abandu bosi. Ekiro ekyo, inganasenyenyirye kandi inganatsemire mun’ibuka ebya Granville anyibwira myaka mirebe enyuma, athi: “Kiro kighuma, wukendi syaha omukania w’abandu abosi. Kikendi syabya.”

Erilhabira omwa syondegheka sye JW Broadcasting^®, nabiriminya abandi balikyethu abali omwa mibere ng’eyaghe. Aliwe nomubane balema, ni bingyi ebyo bakakolha, kandi banatsemire. Naghe, hane ebyo nangakolha. Eriyisunza lyaghe ery’eriha Yehova akaghalha ako ngawithe mulyanyihira mw’omuhwa w’eribya mutemburi w’omughulhu wosi. Kandi ibbwa omwatsi owangathabya ngayitsulirye owanabana Okwomwenda 2019! Okwezi oko munaminya ngoku nabirisombolhwa ng’omusyakulhu w’ekithunga ekiri mw’abathuliri nga 40.

Ngasima kutsibu balikyethu ab’igha naghe kandi abanyiwathikaya erikolera Yehova. Ekikulhu kutsibu, ngasima kutsibu eribya Yehova isyathanyibirirwa.