1-2. (a) Busana naki abahyaka omo butheke batholere ibayikethera Yehova? (Esyonyimbo 37:3, 4) (b) Omo mwatsi ono thukendi kania okuki?

WUKISIYA iwingira omo butheke, kutse wuli muhyaka omo butheke? Kyamabya ikwa kiri kithya, ahathe erithika-thika wulindirire eritsemera engebe n’omundu oyo wanzire kutsibu. Nomwabine, obutheke bunawithe ebitsibu byabu, kandi hane erithwamu likulhu erya mwanga kolha. Emibere mukaghunziramo ebitsibu ebyo n’erithwamu erya mukakolha bikendi hamba oko tseme yenyu ahabw’emyaka. Mwamayikethera Yehova, imukendi thwamu ndeke, obutheke bwenyu ibwongera erighuma, kandi imwongera eritsema. Mwamathendi ghendera okwa malengekania wa Nyamuhanga, imwangana bana ebitsibu n’obutheke bwenyu ibwabulha mw’etseme.​—Soma Esyonyimbo 37:3, 4.

² Nomwakine indi omwatsi ono atheghekirwe busana n’abahyaka omwa butheke, akendi kania okwa bitsibu ebya batheke abosi banga bana. Akendi kania okwa bya thwang’ighira okwa ky’erileberyako ekya balhume n’abakali balebe abathaleghulha ab’omwa Biblia bahiraho. Eby’erileberyako bye Biblia ebi bikathweghesaya amasomo agho thwanga ghenderako omo mibere muthina-muthina y’engebe, n’omwa butheke. Kandi thukendi lebya ebya thwang’ighira okwa byalholirweko by’abandi abali omo butheke abamunabwire.

3-4. Ni bitsibu byahi ebya bahyaka omo butheke banga bana?

³ Abandi bandu bangana bwira abahyaka omo butheke bathi babye omo ngebe eya buli kiro. Ng’eky’erileberyako, ababuthi n’abandi bahughu bangana hira okwa bahyaka aba kw’akahathikano  k’eributha abaana aho naho. Kutse abanywani n’abahughu bangana bahathikana bathi bathunge oko wabu okuwene n’eribya n’ebindu binene.

⁴ Bamathendi yitheya, abathahenie ibangana thwamu ebyanga leka ibayingirya omo mabanza. Neryo omulhume na mukali wiwe ibangana yisanga ibali okw’ikolha kutsibu nuku bathuhe amabanza ayo. Omubiiri iniangana tsuka eringirira endambi eyo batholere ibakoleramu eriyeghesya, eriramya ly’eka, n’erithulira. Abathahenie aba bangana yisanga ibali kubulha okwa mihindano habw’erikolha buthuku buuli bakanza bathi bathunge sente nene kutse erilhangira bathi sibali heraya omubiiri wabu. Busana n’ekyo, sibali bana okwa highisa ehikatsemesaya ehy’erikanyiryamo omubiiri wabu oku Yehova.

5. Eky’erileberyako kya Klaus na Marisa kyamakweghesyaki?

⁵ Ebyalholirweko bikakanganaya ngoku erihwerya engebe yethu okwa by’ekinyamubiri siririletha etseme. Thalengekania okwa ekya Klaus na mukali wiwe Marisa baminya okw’eki. * Babere batsuka obutheke bwabu abosi ibakakolha buthuku bwosi nuku babye omo ngebe eyuwene. Aliwe omo muthima, ibakayowa isibatsemire. Klaus akabugha athi: “Thwabya thuwithe bingyi by’ekinyamubiri, aliwe bunyakirimu isi thuwithe n’ekilhubirirwa n’ekighuma. Okwenene kuli kuthi, engebe iyiyighoba-ghobanirye kandi ebikalyambaya ini bingyi.” Obundi nawu wabiriyilhangirira ngoku erikwamirira ebindu by’ekinyamubiri siryathakulethera etseme. Kyamabya ikwakiri kithya, si wuhwe amani. Erilengekania okwa by’erileberyako ebyuwene ebya bandi kyangana kuwathikya. Thuthatsuka erilebya ebyo abiba bang’ighira okwa ky’erileberyako ekya Mwami Yosafati ahiraho.

6. Ngoku kiri omw’ihabulha eriri omwa Emisyo 3:5, 6, Omwami Yosafati mwakolhaki akabana ekitsibu ekikalire?

⁶ Abiba, hakanayira imwayowa esyongwamirwa syenyu isyabiri balithohera? Byamabya ikwabiri bithya, imwangana ghasirwa omo ky’erileberyako ky’Omwami Yosafati. Yosafati ng’omwami, aby’awithe olhukwamirwa lhw’eritheya ekihanda kyosi! Olhukwamirwa lhunene kutsibu olho mwalhuberererya athi? Yosafati mwakolha ekyosi-kyosi eritheya abo aby’akasondolha. Mwahimba emiyi ye Yuda n’eritheghekania amahe awakalire aw’abasirikali abalhabire omu 1,160,000. (2 Emy. 17:12-19) Enyuma waho, Yosafati mwabana ekitsibu ekikalire kutsibu. Amahe manene w’Abaamoni, Abamoabu, n’abalhume b’okwa bithwe bye Seiri mubabubahisya iyo, eka yiwe, n’abandu biwe. (2 Emy. 20:1, 2) Yosafati mwakolhaki? Mwasaba Yehova y’obuwathikya n’akaghalha. Eki kyabya kihambene n’erihabulha ly’amenge eriri omwa Emisyo 3:5, 6. (Soma.) Omusabe wa Yosafati ow’eriyikehya owali omwa 2 Emyatsi y’Emigulu 20:5-12, akakanganaya ng’aby’ayikethere Thatha wiwe w’elhubulha ow’olhwanzo ya bungahi. Yehova mwasubirya athi omusabe wa Yosafati?

7. Yehova mwasubirya athi omusabe wa Yosafati?

 ⁷ Yehova mwakania na Yosafati erilhabira omwa Mulawi ya Yahazieli. Yehova mwabugha athi: “Muyitheke, muhangane, mulhangire erilhamya ly’Omwami Mukulhu eriri haghuma nenyu.” (2 Emy. 20:13-17) Eyo ka si nzira ya buli kiro ey’erilhwiramo amalhwa! Aliwe, obusondoli obo sibwalhua oko mundu; bwalhua oku Yehova. Inianayikethere ndeke Nyamuhanga, Yosafati mwakolha ngoku anabwirawa. Iyo n’abandu biwe babere bakayalhwa n’esyonzighu syabu, mwahira embere sy’amahe wiwe y’abimbi abathe n’eby’amalhwa, butsira abasirikali abasi ndeke eby’amalhwa. Yehova mwathalhabirya Yosafati y’ahisi; Mwakinda esyonzighu.​—2 Emy. 20:18-23.

8. Abiba mwang’ighaki okwa ky’erileberyako kya Yosafati?

⁸ Abiba, mwangan’ighira okwa ky’erileberyako kya Yosafati. Muwithe olhukwamirwa lhw’eritsomana eka yenyu, neryo mukole kutsibu eritheyayo n’erisighikayo. Omughulhu mukabana ebitsibu, imwangana yowa nga mwangana yighunzirabyo inywibene-bene. Aliwe, murwanisaye amalengekania w’eriyikethera amaaka wenyu. Omwakanya k’ekyo, iwune iwuwene saba Yehova y’obuwathikya. Eryongera okw’ekyo, iwune na mukali wawu saba erilhua oko muthima. Sondaya obusondoli bwa Yehova omw’isoma e Biblia n’ebitabu ebya kithunga kya Nyamuhanga kikathuha, kandi ghendera okwa buhabuli obo wukabana. Abandi bangana ghana erilighirana n’erithwamu erya wukakolha eriseghemere okwa Biblia, kandi nibya ibangana bugha bathi wuli mukiru. Ibangana bugha bathi esyosente n’ebindu by’ebikendi theya ndeke eka yawu. Aliwe wibuke eky’erileberyako kya Yosafati. Mwayikethera Yehova kandi amakangania ekyo omwa mikolere. Yehova mwathasighania omulhume muthaleghulha oyo, nawu syendi kusighania. (Esy. 37:28; Ebr. 13:5) Ni byahi ebyo abathahenie banga kolha nuku babye omo ngebe y’etseme haghuma?

9. Thwanga bugha thuthiki okwa muminyereri Isaya na mukali wiwe?

⁹ Omuminyereri Isaya na mukali wiwe mubahira erikolera Yehova ly’embere omo ngebe. Isaya abya muminyereri, kandi obundi na mukali wiwe angabya iniabya inianawithe emibiiri y’obuminyereri, kundi akahulhawamo “omuminyereri w’obukali.” (Isa. 8:1-4) Ibo ng’abathahenie, kilhangirikire ngoku mubahwerya amalengekania wabu okw’iramya Yehova. Ibo ka ni ky’erileberyako ekyuwene okwa bathahenie munabwire!

10. Erigha okwa maminyereri we Biblia kyanga wathikya kithi abathahenie erithwamu erikolera Yehova ya bingyi ngoku banga thoka?

¹⁰ Munabwire abathahenie bangana hira erikolera Yehova ly’embere omo ngebe omw’ikolha ekyosi-kyosi ekya banga thoka omo mubiiri wiwe. Bangana ghumya eriyikethera lyabu omu Yehova omw’iyeghesya amaminyereri we Biblia haghuma n’erilhangira ngoku mughulhu wosi akabererera. * (Tito 1:2) Bangana lengekania okwa bya banga kolha omw’iberererya amaminyereri malebe awe Biblia. Ng’eky’erileberyako, ibangana sangira omw’iberererya obuminyereri bwa Yesu obukabugha buthi engulhu yuwene yasyathulhughanibwa omo kihugho kyosi enduli yithe yasa. (Mt. 24:14) Abathahenie bakabya bakongera erilhangira ngoku obuminyereri bwe Biblia bunemubererera, erithwamu lyabu ery’erikolera Yehova ya bingyi ngoku banga thoka kwa likanongera lithya.

11. Pirisila na Akwila mubathoka erikolhaki, kandi busana naki?

¹¹ Abahyaka omo butheke bangan’ighira oku Pirisila na Akwila, abatheke Abayuda ababya bikere omwa muyi we Roma. Babya ibabiryowa okwa ngulhu yuwene eyihambire oku Yesu kandi ibabiribya Bakristayo. Ahathe erithika-thika, babya ibanatsemere emibere eyo babyamo. Aliwe, engebe muyahinduka kitsumbukirania omughulhu Omuthabali Mukulhu ya Klaudio ahamulha athi Abayuda abosi balhue e Roma. Thalengekania ekyo nga kyanga hambire kithi oku Akwila na Pirisila. Babya b’erisighania omwanya ogho babiribeghera, eriyasondya ah’erikalha, n’erithasyayatsukisya omubiiri wabu w’erilhuka esyohema omo wundi mwanya. Mbwino embinduka eyi yangana lekire ibalemwa erithasyahira emyatsi y’Obwami y’embere? Obundi wunasi eky’erisubirya okwa kibulyo ekyo. Eyo bahumira e Korinto, Akwila na Pirisila mubatsuka eriwathikya omo kithunga n’erikolha haghuma n’omukwenda Paulo erighumya balikyabu b’eyo. Enyuma waho, mubaghenda omo sindi tawuni eyabya obuyithawa bw’abathuliri. (Emib. 18:18-21; Abar. 16:3-5) Batholere eribya imubatsemera haghuma engebe eyuwene kandi eyikalhua mw’ebibuya!

12. Busana naki abathahenie batholere ibayihiriraho ebilhubirirwa by’obunyakirimu?

¹² Munabwire abathahenie bangana gherererya Pirisila na Akwila omw’ihira emyatsi y’Obwami y’embere. Endambi eyitholere eya abathahenie banga kaniryamo okwa bilhubirirwa byabu mw’omughulhu bali omwa buthethane. Abathahenie bakabya bakathwamu haghuma n’erilengaho erihika okwa bilhubirirwa byabu by’obunyakirimu ebyo, bakabana ehighisa hingyi hy’eriyilhangirira obuwathikya bw’omulimu wa Yehova. (Omu. 4:9, 12) Thalengekania okwa ky’erileberyako kya Russell na Elizabeth. Russell akabugha athi, “Ithune omo buthethane, kwilhabirirya ithukakanaya okwa bilhubirirwa byethu by’obunyakirimu.” Elizabeth akabugha athi, “Muthwabya n’erikanirania eryo nuku thukendi syabya thukabana ebikathuyithagha erithwamu, thukendi syalhangira thuthi ebya thukathwamu ebyo sibiri thulemesaya eriberererya ebilhubirirwa ebyo.” Emibere eya  Russell na Elizabeth babyamo muyabalighira erihumira e Micronesia eriyakolera eyiri obuyithawa bw’abathuliri.

13. Ngoku kiri omwa Esyonyimbo 28:7, thwamayikethera Yehova imukendi lhwiririraki?

¹³ Nga Russell na Elizabeth, abathahenie bangyi babirithwamu erihayo obuthuku bungyi ngoku banga thoka omwa mubiiri w’erithulira n’erikangirirya omw’ithendi yingirya omo yindi myatsi mingyi. Abathahenie bakabya bakayihiriraho ebilhubirirwa ebitholere omo mubiiri wa Yehova n’erikolha haghuma eribiberererya, mukalhwiririra ebibuya bingyi. Bakendi yilhangirira ngoku Yehova akabatsomana, eriyikethera lyabu omw’iyo iryongera, kandi ibabana etseme y’okwenene.​—Soma Esyonyimbo 28:7.

14. Omukwenda Petero na mukali wiwe mubakangania bathi ku bayikethere omulhaghe owali omu Matayo 6:25, 31-34?

¹⁴ Abathahenie bangan’ighira okwa ky’erileberyako ekya mukwenda Petero na mukali wiwe bahiraho. Mezi nga mukagha kutse omwaka alilholire oku Yesu omurundi wiwe w’erimbere, omukwenda Petero abya w’erikolha erithwamu likulhu. Petero mwakolha omubiiri w’obusohe erisighika eka yiwe. Neryo Yesu abera akakokya Petero athi amukwame mughulhu wosi, Petero mwabya w’erilengekania okw’eka yiwe. (Lk. 5:1-11) Petero mwathwamu erikwama Yesu omo mubiiri wiwe w’erithulira. Mwathwamu ndeke! Kandi thuwithe enzumwa mbuya eyanga leka ithwaghunzerera thuthi mukali wa Petero mwasighika erithwamu liwe. E Biblia yikakanganaya ngoku muka Petero ihakanayira iniaghenda haghuma nayu Yesu alilhubukire. (1 Kor. 9:5) Ahathe erithika-thika, eky’erileberyako kiwe ng’omukali muthahibwa Omukristayo mukyaleka Petero iniabugha inianawithe obwiranda akahabulha abiba n’abakali Abakristayo. (1 Pet. 3:1-7) Ni kwenene, Petero na mukali wiwe mubayikethera omulhaghe wa Yehova ow’eribugha indi iniakendi batsomana bamahira Obwami bw’embere.​—Soma Matayo 6:25, 31-34.

15. Ekyalholirweko kya Tiago na Esther kyamakweghesyaki?

¹⁵ Mwamabya imwamathaghunza myaka mike omo butheke, mwanga lholha muthi embere erikulha-kulhania eriyisunza lyenyu ly’erikolera Yehova ya bingyi? Enzira nguma ly’erigha okwa byalholirweko by’abandi abathahenie. Ng’eky’erileberyako, imwangana soma emyatsi eyikabera eryasira ahisi sy’omuthwe “Mubayihayo Ahathe Erikakwa.” Emyatsi ng’eyo muyawathikya Tiago na Esther, abathahenie abikere e Brazil, eribya n’eriyisunza linene ery’erikolera ahali obuyithawa. Tiago akabugha athi: “Thwabere thwabirisoma ebyalholirweko ebikakanganaya ngoku Yehova akawathikaya abaghombe biwe abamunabwire, nethu muthwanza eriyilhangirira obusondoli n’obuwathikya bwa Yehova.” Erighunzerera mubahumira e Paraguay, eyo babiribya ibanemukolera omwa bulhambu bwa Bapotigwizi eritsuka 2014. Esther akabugha athi: “Erisako eryo thwanzire kutsibu ni Abanya Efeso 3:20. Ngendo nyingyi, thwabirilhangira ebinywe ebi bikathuberererako omwa mubiiri wa Yehova.” Omo baruha eya Paulo ahandikira Abanya Efeso eyo, mwalhaghanisya athi Yehova akendi thuha bingyi kwilhaba ebyo thukasaba. Omulhaghe oyo k’ahikire!

16. Abahyaka omo butheke banga saba bahi b’amenge bakalebya ebilhubirirwa byabu omo ngebe?

¹⁶ Munabwire abahyaka omo butheke bangana ghasirwa omwa byalholirweko ebya bandi ababir’igha eriyikethera Yehova. Abandi abathahenie banganabya ibamabirighunza myaka mingyi omwa mubiiri w’omughulhu wosi. Busana  naki iwuthabasaba amenge wamayowa iwutholere erilebya ebilhubirirwa byawu? Eyi ni yindi nzira ey’erikanganiryamu ku wuyikethere Yehova. (Emi. 22:17, 19) N’abasyakulhu bangana wathikya abahyaka omo butheke erihiraho ebilhubirirwa n’eriberereryabyo.

17. Ni kyahi ekyabya oku Klaus na Marisa, kandi ekyalholirweko kyabu kikathweghesayaki?

¹⁷ Aliwe okwa bundi buthuku, erithwamu lyethu ery’eryongera erikolha bingyi lyangana ghana eribya ngoku thulhue thulengekenie. Thalengekania okwa ky’erileberyako kya Klaus na Marisa, abakanibweko okw’itsuka. Myaka isathu balithahenie, mubalhua ewabu bamayawathikya okwa buhimbe bw’ekyaghanda kye Finland. Aliwe, mubaminya ngoku sibendi lighirwa eribyayo habw’amezi awalhabire oku mukagha. Okw’itsuka mubayiponera. Buthuku buke enyuma waho, bamakokibwa eriyigha omubughe w’Olhuharabu, kandi lino ibanatsemire banemukolera omwa bulhambu obukabughawamo Olhuharabu omwa kindi kihugho. Akabya akasubya ameso w’enyuma, Marisa akabugha athi: “Kikitha engitsi erisighania ebya wulhue wubeghere n’eriyikethera Yehova n’omuthima wosi. Aliwe nabirilhangira ngoku Yehova mughulhu wosi akathuwathikaya omo syonzira esya thuthalengekenie. Nabere nabiriyilhangirira eki, eriyikethera lyaghe omu Yehova mulyongera erighuma.” Ngoku eky’erileberyako eki kikakanganaya, wangana kakasya ngoku Yehova mughulhu wosi akendi kuhemba wamamuyikethera n’omuthima wawu wosi.

18. Abathahenie banga kolhaki erilholha embere eriyikethera Yehova?

¹⁸ Obutheke ni kihembo erilhua oku Yehova. (Mt. 19:5, 6) Anzire abathahenie ibatsemera ekihembo ekyo. (Emi. 5:18) Abahyaka omo butheke, busana naki imuthalebya nga mukakolesaya muthi engebe yenyu? Munemukolha ekyosi-kyosi ekyo mwanga thoka erikangania Yehova nga mukasima bungahi ebihembo ebyo abiribaha? Mukanaye na Yehova omo musabe. Musekulhaye omo Kinywe kiwe mw’emisingyi eyihambire okwa mibere eyamulimu. Neryo mughendere okw’ihabulha erya Yehova akabaha. Imwangana kakasya ngoku imukendibya n’engebe eyitsemire kandi eyikalhua mw’ebibuya mwamakolera Yehova omwa butheke bwenyu!