1. Ni kibulyo kyahi ekyo thwanga yibulya?

MBWINO hakanayira iwayibulha-bulha wukalengekania okwa bikayabya​—erithoghothibwa ly’amadini w’amabehi, eribambira lya Gogi owa Magogi, n’olhuhi lhwe Harmagedoni? Wunewathayibulya wuthi, ‘Mbwino obuthuku obo bukendisyabya bukahika, nganemwendisyathoka erisighalha muthaleghulha ebindu ebikubahisaya ebi bikabya?’ Wamabya iwanayibulirye ebibulyo ng’ebyo, omwatsi ono owakakanaya okwa binywe bya Yesu ebiri omw’isako erihirikirire omwatsi ono, bitholere ibyakuwathikya. Yesu mwabwira abigha biwe athi: “Simuhanga-hangaye emithima yenyu; mwikiriraye.” (Yn. 14:1) Erikirirya erighumire likendi thuwathikya erilindirira ebikayabya ithunasikire.

2. Thwanga ghumya thuthi erikirirya lyethu, kandi thukendi kania okuki omo mwatsi ono?

² Thwangana ghumya erikirirya lyethu ery’erisikira erirengwako erikayasa omw’ilebya nga thukasika bungahi erikirirya lyethu likalengwako lino. Thwamalengekania ngoku thukayithwa thukabana ebitsibu lino, ithwangana minya aha thukayithagha erighumiryamo erikirirya lyethu. Obuli erilengwako erya thukalhabamo, erikirirya lyethu likongera erighuma. Eki kikendi syathuwathikya erighumira ebitsibu eby’obuthuku obukayasa. Omo mwatsi ono, thukendi lebya emibere ini eyakanganaya ngoku abigha ba Yesu mubayithagha eryongera erikirirya lyabu. Neryo thukendi lebya ngoku thwanga ghumira ebitsibu ebiri ng’ebyo munabwire kandi ngoku ebi byanga thuthegheka busana n’obuthuku obukasa.

3. Ngoku kiri omu Matayo 6:30, 33 ni nzumwa yahi eyihambire okw’ikirirya eya Yesu akanganaya ndeke?

³ Ni kya buli kiro omuthwe w’eka erianza eriha mukali wiwe n’abaana biwe b’ebyalya, esyongyimba, n’ah’erikalha. Mughulhu  wosi eki sikyolho omwa mighulhu eyikalire eno. Abandi balikyethu sibakiwithe mibiiri, kandi nomwakine indi banemuhiraho akaghalha kanene, babirilemwa eribana eyindi mibiiri. Abandi bakaghana emibiiri eyo Abakristayo bathatholere erikolha. Omo mibere yosi eyi, thukayithagha erikirirya erighumire ngoku omwa nzira ndebe Yehova akendi lhangira athi thukabana ebiyithawa by’eka yethu. Yesu mwakangania ndeke-ndeke abigha biwe b’eki omw’ikangirirya liwe ly’okwa kithwe. (Soma Matayo 6:30, 33.) Thwamabiriligha ndeke-ndeke ngoku Yehova syendisya thusighania, ithukendi thoka erihira amalengekania wethu ah’atholere​—okwa myatsi y’Obwami. Thukendibya thunemulhangira ngoku Yehova akathuwathikaya kinyamubiri, thukendyongera eriyithunda hakuhi nayu n’erikirirya lyethu iryaghuma.

4-5. Ni byahi ebya wathikaya eka nguma erighumira amaghaniryo w’ebiyithawa byabu by’ekinyamubiri?

⁴ Thulebaye ngoku eka nguma e Venezuela yayilhangirira obuwathikya bwa Yehova yikabana erihangya-hangya busana n’ebiyithawa byayu by’ekinyamubiri. Buthuku bughuma, eka ya Castro iyikabana ebiyithawa byayu omw’ikolera omwa famu yabu. Neryo ekigurupu ky’abayaya ekiri n’esyombundu mukyabasaghulha eririma lyabu n’eribathibithako. Thatha ya Miguel, akabugha athi: “Lino thukabana ebiyithawa byethu omw’ikunga okwa akalima kake. Ngatsuka ekiro omw’isaba Yehova indi athuhe ebiyithawa byethu by’ekiro ekyo.” Engebe yabirikalira eka eyi, aliwe busana n’erikirirya linene omwa maaka wa Thatha wethu w’olhwanzo aw’eribaha ebiyithawa byabu bya buli kiro, mughulhu wosi ab’eka ya Castro bakahindana okwa mihindano n’erisangira omw’ithulira. Bakahira emyatsi y’Obwami y’embere omwa ngebe yabu, kandi Yehova akabaha ebyo bakayithagha.

⁵ Omo mibere eyikalire eyi, Miguel na mukali wiwe Yurai babirihira amalengekania okwa mibere Yehova abiribatsomaniramo. Okwa bundi buthuku, Yehova abirikolesya balikyethu eribawathikya kinyamubiri kutse eriwathikya Miguel eribana akabiiri akatholere. N’okwa bundi buthuku, Yehova abiribaha ebiyithawa byabu erilhabira omwa buwathikya obukalhua okwa kyaghanda ky’omuthahulha. Yehova syali athabasighania. Busana n’ekyo, babiriyilhangirira erikirirya ly’eka yabu likongera. Abere abiryahulha eky’erileberyako kirebe ekikakanganaya ngoku Yehova mwabawathikya, omwana wabu w’obukali omukulhu ya Yoselin, akabugha athi: “Kikahumulikanaya eriyilhangirira ndeke-ndeke obuwathikya bwa Yehova. Ngamulhangira ng’omunywani oyukaleka ingabyaho.” Akongerako athi: “Erilengwako eryo thwabiribana ng’eka lyabirithutheghekera erilengwako erikalire ery’obuthuku obukasa.”

6. Wanga ghumya wuthi erikirirya lyawu omughulhu wuli omwa bunakwa?

⁶ Mbwino wuli omwa bunakwa? Kyamabya ikwakiri kithya, iwuli omwa mibere eyikalire. Aliwe, emibere n’omwa yinakukalire, wangana kolesya obuthuku obu erihimba erikirirya lyawu. Saba Yehova n’erisoma ebinywe bya Yesu ebiri omu Matayo 6:25-34  n’eribighaniryako. Lengekanaya okwa byalholirweko ebya munabwire ebikakanganaya ngoku Yehova akatsomana abakayihweraya omwa mibiiri y’ekiteokrasi. (1 Kor. 15:58) Erikolha ekyo kikendi ghumya eriyikethera lyawu ngoku Thatha wethu w’elhubulha akendi kuwathikya ngoku anawathikaya abandi abali omwa mibere ng’eyawu. Anasi ebya wukayithagha, kandi anasi ngoku angakuhabyo. Wukendibya wunemuyilhangirira obuwathikya bwa Yehova, erikirirya lyawu likendyongera erighuma nuku wanga syathoka erighumira erirengwako erikalire erikayasa.​—Hab. 3:17, 18.

7. Ngoku kiri omu Matayo 8:23-26, “ekihunga” mukyalenga kithi okw’ikirirya ly’abigha?

⁷ Ekihunga kyabere kyasanga Yesu n’abigha biwe okwa ngetse, mwakolesya ekyabya ekyo eribawathikya erilhangira aho bakayithagha eryongereramo erikirirya lyabu. (Soma Matayo 8:23-26.) Ekihunga kyabere kinemuhitha n’amaghetse inianemuyighusa omo bwathu, Yesu iyo abya inianaghotsere buholho. Abigha abakwire obuba babere bamubukya n’eribugha bathi abalhamaye, omwa bwolho-bwolho Omukama mwababulya athi: “Busana naki mukubaha kwehi? Inywe bandu b’erikirirya like!” Abigha ababya bakwire obuba babya batholere ibaminya ngoku si kyanga kalira Yehova eritheya Yesu n’abo ali nabu. Erisomo ni lyahi? Erikirirya erighumire lyangana thuwathikya erighumira “ekihunga” ekyosi-kyosi, mbulha ni kyonyine-nyine kutse eyihi.

8-9. Erikirirya lya Anel mulyalengwako lithi, kandi ni byahi ebya muwathikaya?

⁸ Thulebaye ngoku erikirirya erighumire lyawathikaya mwali wethu omuhuru ya Anel owe Puerto Rico, erighumira erilengwako erikalire. “Ekihunga” kiwe kyabya kyonyine-nyine. Erilengwako liwe lyatsuka 2017 omughulhu ekihunga ekikahulhawamo Maria kyatheraya enyumba yiwe. Ekihunga ekyo mukyaleka iniaherya n’omubiiri wiwe. Anel akaligha athi: “Omwa biro ebikalire ebyo, munayibulha-bulha kutsibu, aliwe munigha eriyikethera Yehova erilhabira omwa musabe n’erithendi lighira amaghaniryo erinyighunza amani.”

⁹ Anel ak’ahulha ekindi kindu ekyamuwathikaya erighumira ekitsibu kiwe​—obwowa. Akabugha athi: “Erighendera okwa busondoli bw’ekithunga mukyaleka ingabya inganathekene. Munayilhangirira obuwathikya bwa Yehova omw’ihumulikania ly’obunyakirimu erya nabana kuthya n’omwa buwathikya bw’ekinyamubiri obo balikyethu bamba.” Akongerako athi: “Yehova mwanyiha bingyi kwilhaba n’ebyo namusaba, kandi erikirirya lyaghe mulyaghuma kutsibu.”

10. Wangakolhaki wamabana “ekihunga”?

¹⁰ Wunemughumira “ekihunga” omwa ngebe yawu? Byanganabya ini bitsibu ebikasa busana n’ebitsinduli. Kutse kyanganabya isi kihunga ekyonyine-nyine, ng’obulhwere obukalire obwabirileka iwahwa amani n’eribulha eky’erikolha. Hanganayira iwabya omo maghaniryo, aliwe isiwalighira amaghaniryo wawu akakulemesya eriyikethera Yehova. Yithunde hakuhi  nayu omw’imusaba erilhua okwa muthima. Ghumaya erikirirya lyawu omw’ighanirya okwa buthuku Yehova akuwathikirayamo kera. (Esy. 77:11, 12) Wangana yikethera ngoku syanga kusighania​—lino, na kera na kera.

11. Busana naki thutholere ithwathwamu eriowa abakathusondolha?

¹¹ Ni kindi kyahi ekyanga kuwathikya erighumira ebitsibu? Ngoku Anel akabugha, bw’obwowa. Igha eriyikethera abo Yehova na Yesu bakayikethera. Okwa bundi buthuku, abasombwerwe erithusondolha bangana thuha obusondoli obo ithwe thukalhangira isibutholere. Aliwe, Yehova akatsumulha obwowa. Thunasi erilhua omwa Kinywe kiwe n’okwa byalholirweko bya baghombe abathaleghulha ngoku obwowa bukalhamaya esyongebe. (Eri. 14:1-4; 2 Emy. 20:17) Ghaniraya okwa by’erileberyako ng’ebyo. Erikolha ekyo likendi ghumya erithwamu lyawu ly’erighendera okwa syondegheka sy’ekithunga lino n’omwa buthuku obukasa. (Ebr. 13:17) Neryo isihendibya enzumwa eyanga leka iwasagha ekihunga ekikayasa.​—Emi. 3:25.

12. Ebiri omu Luka 18:1-8 bikakanganaya bithi ngoku erikirirya n’erighumira obuthe bulingirirania bihambene?

¹² Yesu abya inianasi ngoku obuthe bulingirirania bwangahambire nabi okw’ikirirya ly’abigha biwe. Eribawathikya eribughumira, mwaha omusyo owali omwa kitabu kya Luka. Yesu mwaha omusyo w’omukwakali oyuwahathikana erisaba omutsweri oyuthathunganene erikanganibwa obulingirirania. Omukwakali abya inianayikethere ngoku erihathikana liwe likendi ghanduka. Erighunzerera, omutsweri mwowa erisaba liwe. Erisomo. Yehova ni w’obulingirirania. Yesu mwabugha athi: “Neryo Nyamuhanga nayu syendi syaha abayisoghawa biwe eribanza [obulingirirania] kwehi? Abakamulhakira oko musibo n’omwa kiro kwehi?” (Soma Luka 18:1-8.) Neryo Yesu mwongerako athi: ‘Omughalha w’Omundu omughulhu asyasa, asyabana erikirirya omo kihugho kwehi?’ Thwamabana obuthe bulingirirania, thutholere ithwakangania erikirirya eriri ng’ery’omukwakali omw’ighumisirizya n’erihathikana lyethu. Busana n’erikirirya ng’eryo, ithwangana yikethera ngoku Yehova akendi thuwathikya. Kandi thutholere ithw’ikirirya omwa maaka w’omusabe. Okwa bundi buthuku, emisabe yethu yangana lhwiririra mw’ebya thuthalhue thulengekenie.

13. Omusabe mwawathikya athi eka nguma eyabya iyabirikanganibwa obuthe bulingirirania?

¹³ Lengekanaya okwa kyalholirweko kya mwali wethu Vero, oyuwikere e Democratic Republic of Congo. Omughulhu omo kyalu kyabu mwabya olhuhi, Vero, mwira wiwe oyuthikirirye, na mwali wiwe ow’emyaka 15 mubathibitha. Omwa nzira, eka eyi, muyasanga omukangyi w’abasirikali ababimanaya n’eribubahisya bathi bakab’itha. Vero abere akatsuka eririra, mwali wiwe mwamuhumulikania omw’isaba omwa mulenge muuli n’erisubirira omwa lina lya Yehova omwa musabe wiwe. Abere akaghunza erisaba, kamanda w’abasirikali  mwamubulya athi, “Iwe musika, nindi yuwakukangiriraya erisaba?” Mwasubirya athi, “Mama waghe yuwanyeghesaya omw’ikolesya eky’erileberyako ekiri omu Matayo 6:9-13.” Kamanda mwabugha athi, “Musika, ghenda buholho n’ababuthi bawu, kandi Yehova Nyamuhanga wenyu abatheghaye!”

14. Ni byahi ebyanga lenga okw’ikirirya lyethu, kandi ni byahi ebikendi thuwathikya erighuma?

¹⁴ Ebyalholirweko ng’ebi bikathweghesaya ngoku sithutholere thuk’ibirirwa omughaso w’erisaba. Ibbwa emisabe yawu yamathendi subwamo aho n’aho kutse omo nzira y’embaghane? Ng’omukwakali oyuli omwa musyo wa Yesu, lholha embere erisaba, iwunayikethere ngoku Nyamuhanga wethu syendi kusighania kandi ngoku endambi yikendi hika iniasubirya emisabe yawu kandi omwa nzira ndebe. Lholha embere erisaba Yehova y’omulimu wiwe abuyirire. (Fil. 4:13, NWT) W’ibuke ngoku Yehova akisiya iniakutsumulha ndeke erihika n’okwa kiika iwe eribirirwa eriaghalhwa lyawu erya kera. Omwa buwathikya bwa Yehova, wukendibya wunemughumira ebitsibu buthaleghulha, wukendi syathoka erighumira eby’obuthuku obukasa.​—1 Pet. 1:6, 7.

15. Ngoku kiri omu Matayo 17:19, 20, ni kitsibu kyahi ekyo abigha ba Yesu babana?

¹⁵ Yesu mwakangirirya abigha biwe athi erikirirya likendi bawathikya erisingura ebikabalemesaya. (Soma Matayo 17:19, 20.) Buthuku bughuma, mubanalemwa erihigha embinga, nomwakine indi okwa bundi buthuku banabya bakakolha ekyo. Ekitsibu kyabya iniki? Yesu mwasoborera athi babya bakayithagha eryongera erikirirya. Mwababwira athi bamabya n’erikirirya erighumire ibakendi thoka erihumya ebitsibu ebiri ng’ebithwe! Nethu munabwire, thwangana bana ebitsibu ebikalire ithwayowa nga sithwanga bisingura.

16. Erikirirya lyabiriwathikya lithi Geydi erighumira ekitsibu n’obulighe bw’eriholerwa?

¹⁶ Lengekanaya okwa ky’erileberyako kya Geydi, mwali wethu e Guatemala. Mwira wiwe ya Edi, mw’ithibwa bakalhua okwa mihindano bakasuba eka. Erikirirya lya Geydi lyabirimuwathikya lithi erighumira obulighe bw’eriholerwa? Akabugha athi: “Erisaba likanyiwathikaya erighusira Yehova y’amalighe waghe, ekindu ekikaleka ingayowa buholho. Ngayilhangirira eritsomana lya Yehova erilhabira omw’eka yaghe n’abanywani baghe omwa kithunga. Eriyihwerya omwa mubiiri wa Yehova kikakehaya obulhumi bwaghe n’erinyiwathikya erilholha embere obuli kiro ahabwakyo isingatha hangya-hangya kutsibu busana n’omungya. Busana n’ekya nyibereko eki, nabiriminya ngoku mbulha n’ilengwako eriri lithi eryo nangabana obuthuku obukasa, ngendi syathoka eririghumira busana n’obuwathikya bwa Yehova, Yesu, n’ekithunga.”

17. Thwanga kolhaki thwamabana ekitsibu ekiri ng’ekithwe?

¹⁷ Wune omwa bulighe busana n’eriholerwa? Hiraho obuthuku bw’erighumya erikirirya  lyawu omwa maha w’erilhubuka omw’isoma emyatsi ye Biblia ey’abalhubukibawa. Mbwino wuli omwa bulighe busana n’omuhughu wawu erihighithwa? Yeghesaye nuku wuyikakasiraye ngoku enzira ya Nyamuhanga ey’erikunga y’eyuwene kutsibu. Mbulha wuwithe kitsibuki, kikolesaye ng’akaghisa k’erighumiryamo erikirirya lyawu. Bwira Yehova y’ebyosi ebiri okwa muthima. Isiwayisolholha, aliwe omwakanya k’ekyo sighalha iwune hakuhi n’abalikyethu. (Emi. 18:1) Sangira omwa mibiiri eyikendi kuwathikya eriyiyinia, nomuwangabya w’erikolhayo iwunemuthoghongya emisoni. (Esy. 126:5, 6) Lholha embere n’endegheka yawu y’erihindana, erithulira, n’erisoma e Biblia. Kandi hweraya amalengekania w’okwa mighisa eya Yehova akutheghekere. Wukendibya wunemulhangira ngoku Yehova akakuwathikaya, erikirirya lyawu omw’iyo likendyongera erighuma.

18. Wamalhangira erikirirya lyawu mw’obutseke bulebe, iwukendi kolhaki?

¹⁸ Ebitsibu byawu, ebya kera kutse ebya munabwire, byamabya ibyabirikukangania ngoku erikirirya lyawu si righumire ndeke, isiwahwa amani. Lhangira eki ng’akaghisa k’erighumiryamu erikirirya lyawu. Saba ekiri ng’eky’abakwenda ba Yesu basaba, ababugha bathi: “Wukanyaye erikirirya lyethu.” (Lk. 17:5) N’ekindi, lengekanaya okwa by’erileberyako ebya thwamabirikaniako omo mwatsi ono. Nga Miguel na Yurai, ibuka emighulhu eyosi eyo Yehova akuwathikirayamu. Nga mwali wa Vero na Anel, saba Yehova erilhua okwa muthima, kutsibu-tsibu omughulhu wuli omwa kitsibu ekikalire. Kandi nga Geydi, minya ngoku Yehova angana kuwathikya erilhabira omw’ab’eka yenyu n’abanywani. Wamalighira Yehova erikuwathikya erilhaba omwa bitsibu byawu lino, iwukendyongera eriyikethera ngoku akendi kuwathikya erighumira ekitsibu kyosi-kyosi ekyanga kwasira.

19. Ni yikethera lyahi erya Yesu aby’awithe, kandi ni yikethera lyahi erya wutholere iwabya nalyo?

¹⁹ Yesu mwawathikya abigha biwe erilhangira aho bakayithagha eryongera erikirirya lyabu, aliwe abya inianasi ngoku omwa buwathikya bwa Yehova bakendi singura ndeke erilengwako eryanga bahikako. (Yn. 14:1; 16:33) Abya inianayikethere ngoku erikirirya erighumire likendi leka endeko nene iyalhama okwa bulighe bunene. (Erib. 7:9, 14) Wunemwendi syabya mughuma w’okw’ibo? Busana n’olhukogho lhwa Yehova, iwukendi syabya mughuma w’okw’ibo wamakolesya akaghisa kosi-kosi lino erighumya erikirirya lyawu!​—Ebr. 10:39.