OMWATSI W’ERIGHA 47
Isiwalighira Ekyosi-kyosi Erikughabulha oku Yehova
“Iwe Mwami Mukulhu, ngayikethera iwe.”—ESY. 31:14.
OLHWIMBO 122 Musike, Simusegha-seghane!
EBIKENDI KANIBWAKO a
1. Thukaminya thuthi ngoku Yehova anzire eriyithunda okw’ithwe?
YEHOVA akathukokaya athi thuyithunde hakuhi nayu. (Yak. 4:8) Anzire iniabya Nyamuhanga wethu, Thatha wethu, kandi Munywani wethu. Akasubiraya emisabe yethu kandi akathuwathikaya omwa mughulhu w’ebitsibu. Kandi akakolesaya ekithunga kiwe erithukangirirya n’erithutheya. Aliwe thutholere ithwakolhaki eriyithunda hakuhi na Yehova?
2. Thwanga yithunda thuthi hakuhi na Yehova?
2 Thwangana yithunda hakuhi na Yehova omw’imusaba n’erisoma Ekinywe kiwe n’erikighaniryako. Thukabya thukakolha ekyo, thukongera erimwanza n’erimusima. Kikathuhira mw’omuhwa w’erimwowa n’erimuha eripipa erimutholere. (Erib. 4:11) Thukabya thukongera eriminya Yehova, kwa thukan’ongera thuthya eriyikethera iyo n’ekithunga kiwe ekyo abirihiraho erithuwathikya.
3. Diabolo akalengaho athi erithughabulha oku Yehova, aliwe ni byahi ebikendi thuwathikya erithendi sighania Nyamuhanga wethu n’ekithunga kiwe? (Esyonyimbo 31:13, 14)
3 Nomwabine, Diabolo akalengaho erithughabulha oku Yehova, kutsibu-tsibu omughulhu thukabana ebitsibu. Akakolha ekyo ky’athi? Lyolho-lyolho akalengaho eritsekya eriyikethera lyethu omu Yehova n’ekithunga kiwe. Aliwe thwangana ghana ebithegho biwe. Erikirirya lyethu lyamabya irinaghumire kandi eriyikethera lyethu omu Yehova lyamabya isiritsinga-tsingire, isithwendi sighania Nyamuhanga wethu n’ekithunga kiwe.—Soma Esyonyimbo 31:13, 14.
4. Omo mwatsi ono thukendi kania okuki?
4 Omo mwatsi ono, thukendi kania okwa bitsibu bisathu ebyangasira eyihya sy’ekithunga; obuli kitsibu kyangana tsekya eriyikethera lyethu omu Yehova n’ekithunga kiwe. Ebitsibu ebi byanga thughabulha bithi oku Yehova? Kandi thwanga kolhaki erisingura akaghalha aka Sitani akahiraho?
OMUGHULHU THUKABANA EBITSIBU
5. Ebitsibu byanga tsekya bithi eriyikethera lyethu omu Yehova n’ekithunga kiwe?
5 Hakanayira ithwabana ebitsibu—ng’erihakanisibwa omw’eka kutse eribya isithukiwithe mubiiri. Ebitsibu ng’ebyo byanga tsekya bithi eriyikethera lyethu omwa kithunga kya Yehova kandi ibyathughabulha okw’iyo? Thwamabya omwa bitsibu ahabw’obuthuku buuli, ithwanganahwa amaha n’eribbunika muthima. Sitani akakolesaya ehighisa ng’ehyo n’erianza thuthike-thikire olhwanzo olho Yehova athuwithire. Diabolo anzire ithwalengekania thuthi eriaghalhwa lyethu likalhua oku Yehova kutse ekithunga Kiwe. Ekindu ng’ekyo mukyanabya okwa bandi Baisraeli e Misiri. Okw’itsuka mubaligha ngoku Yehova yuwasombolha Musa na Haruni eribalhusya omwa bukobe. (Eri. 4:29-31) Aliwe omughulhu Farao ongera erikalya engebe yabu, mubatsweba Musa na Haruni busana n’ebitsibu byabu, omw’ibabwira bathi: ‘Mwabiritsandya erikumba lyethu eribya nye omo meso wa Farao, n’okwa meso w’abaghombe biwe, erihira omuyali w’omo byalha byabo erithwitha.’ (Eri. 5:19-21) Mubatsweba abaghombe ba Nyamuhanga abathaleghulha. Ekyo ka kyabya ky’obulighe! Wamabya iwabirighunza mughulhu muuli iwune omwa bitsibu, wang’ongera wuthi erighumya eriyikethera lyawu omu Yehova n’ekithunga kiwe?
6. Thuk’ighaki oku muminyereri Habakuki bikahika okw’ighumira ebitsibu? (Habakuki 3:17-19)
6 Bwira Yehova y’ebyosi ebiri okwa muthima omw’imusaba, kandi musondayeko obuwathikya. Omuminyereri Habakuki mwabana ebitsibu bingyi. Muhanayira amabulha Yehova ng’anamutsomene. Neryo mwabwira Yehova y’eriyowa liwe omw’imusaba. Mwabugha athi: ‘Iwe Mwami Mukulhu, nasyakolyahi ingalira busana n’eriwathikibwa, nawu siwulisonda eriowa kwehi? Busana naki wukaleka inasamalira obubi kwehi?’ (Hab. 1:2, 3) Yehova mwasubirya omusabe owakalhua okwa muthima ow’omughombe wiwe muthaleghulha oyo. (Hab. 2:2, 3) Abere abirighanirya okwa bya Yehova abirikolha erilhamya abandu biwe, Habakuki mwabana etseme kandi. Mwaligha ndeke-ndeke ngoku Yehova amutsomene kandi kw’akendi muwathikya erighumira ekitsibu kyosi-kyosi. (Soma Habakuki 3:17-19.) Thuk’ighaki? Wamabana ebitsibu, saba Yehova kandi mubwire eriyowa lyawu. Neryo musondayeko obuwathikya. Wamakolha ekyo, iwukendi yikethera ngoku Yehova akendi kuha amaaka agho wukayithagha eriyiyinia. Kandi wukendibya wukayilhangirira obuwathikya bwiwe, erikirirya lyawu likendyongera erighuma.
7. Ni kyahi ekya muhughu wa Shirley alengesaya erimulighisya, kandi ni kyahi ekyaleka eriyikethera liwe omu Yehova irithahwa?
7 Lholha embere n’endegheka yawu y’obunyakirimu. Thalhangira ngoku erikolha ekyo mukyawathikya mwali wethu Shirley, owe Papua e New Guinea, omughulhu abana ebitsibu. b Eka yobu Shirley yabya nyinakwa, kandi ihakanayira ikyabakalira eribana ebyalya ebikaghunza. Omuhughu wiwe mwalengaho eritsekya eriyikethera liwe omu Yehova. Omuhughu mwabugha athi: “Wukabugha wuthi omulimu abuyirire wa Nyamuhanga anemubawathikya, neryo obuwathikya bwagho buli hayi? Efamile yenyu yikine nyinakwa. Wunemutsandya obuthuku bwawu erithulira.” Shirley akaligha athi: “Munayibulya: ‘Mbwino Nyamuhanga anathutsomene kutse eyihi?’ Neryo aho naho munasaba Yehova n’erimubwira obuli kindu ekiri omwa bulengekania bwaghe. Munalholha embere n’endegheka yaghe y’erisoma e Biblia n’ebitabu byethu, namalholha n’embere erithulira n’erihindana okwa mihindano.” Buthuku buke-buke, mwatsuka eriyilhangirira ngoku Yehova anemutsomana eka yabo. Eka yabo muyithabulha eky’erirya, kandi mubabya ibanatsemire. Shirley akabugha athi: “Munayowa Yehova inianemusubirya emisabe yaghe.” (1 Tim. 6:6-8) Wamamakirira endegheka yawu y’obunyakirimu, nawu kuthya isiwendi lighira ebitsibu kutse erithika-thika bikakughabulha oku Yehova.
OMUGHULHU BAGHALHA BETHU AB’OLHUKWAMIRWA BAKAKOLHAWA NABI
8. Ni byahi ebyangabya okwa baghalha bethu b’olhukwamirwa omwa kithunga kya Yehova?
8 Erilhabira omwa by’emedia n’emithahulha y’erikanirania, esyonzighu syethu sikalhalhanaya amabehi n’ebinyambwirwa oku baghalha bethu ab’olhukwamirwa omwa kithunga kya Yehova. (Esy. 31:13) Abandi baghalha bethu babirihirwa omwa ngomo n’erihirwa kw’emisango ng’esyongoli sy’ebibi. Abakristayo ab’omwa kighana ky’erimbere mubalhaba omwa bitsibu ebiri ng’ebyo omughulhu omukwenda Paulo ahangirirawa n’erihirwa omwa ngomo. Mubakolhaki?
9. Abandi Bakristayo mubakolhaki omukwenda Paulo akahirwa omwa ngomo?
9 Abandi Bakristayo ab’omwa kighana ky’erimbere mubaleka eriwathikya omukwenda Paulo omughulhu ahirawa omwa ngomo e Roma. (2 Tim. 1:8, 15) Busana naki? Mbwino mubakwa esisoni kundi omukwenda Paulo mwathwalhwa ng’engoli y’ebibi? (2 Tim. 2:8, 9) Kutse mubakwa obuba bathi nabu bangan’endereribwa? Mbulha ni kyahi okw’ebi, thalengekania Paulo ng’atholere eribya imwayowa athi. Abya iniabirighumira ebitsibu bingyi n’eritsama engebe yiwe busana nabo. (Emib. 20:18-21; 2 Kor. 1:8) Ambi isithwabya ng’abasighanaya Paulo omughulhu abya omwa buyithawa! Ni kyahi ekya thutholere ithwabya ithun’ibukire balikyethu b’olhukwamirwa bam’endereribwa?
10. Ni kyahi ekya thutholere eribya ithun’ibukire baghalha bethu b’olhukwamirwa bam’endereribwa, kandi busana naki?
10 Ibuka ekikaleka ithw’endereribwa kandi nga likalhua okundi. Timoteo Wakabiri 3:12 hakabugha hathi: “Abosi abanzire erikwama engebe y’erikenga Nyamuhanga n’erimathikana na Kristo Yesu, basyendereribwa.” Neryo sithutholere thukasweka Sitani akalhubirira eribambira baghalha bethu b’olhukwamirwa. Ekilhubirirwa kiwe kiri kithi eribambira ng’eryo likendi leka ibaleghulha n’eryubaha.—1 Pet. 5:8.
Nomwakine indi Paulo abya omwa ngomo, buthubaha Onesiforo mwamusighika. Munabwire, balikyethu bakasighika balikyabo abali omwa ngomo, ngoku kikanganibwe omwa ky’erilhangirirako (Lebaya enungu 11-12)
11. Eky’erileberyako kya Onesiforo kikathweghesayaki? (2 Timoteo 1:16-18)
11 Lholha embere erisighika baghalha bethu kandi bamakirire buthaleghulha. (Soma 2 Timoteo 1:16-18.) Omukristayo ow’omwa kighana ky’erimbere oyukahulhawamo Onesiforo mwakolha ekiri mbaghane omughulhu Paulo ahirawa omwa ngomo. “Mwathabya n’esisoni busana n’amahulhulha [wa Paulo] omwa nyumba y’omuliki.” Omwakanya k’ekyo, Onesiforo mwasondya Paulo kandi abere akamubana, mwasondekania esyonzira sy’erimuwathikiryamo. Omw’ikolha ekyo, Onesiforo mwabya iniamatsama engebe yiwe. Thuk’ighaki? Sithutholere thukalighira eryubaha abandu likathusaghisya kutse erithukakirya erisighika baghalha bethu abak’endereribawa. Omwakanya k’ekyo, thubalhwireko n’eribawathikya. (Emi. 17:17) Bakayithagha olhwanzo n’obuwathikya bwethu.
12. Thuk’ighaki oku balikyethu abe Russia?
12 Thalengekania okwa mibere balikyethu abe Russia babiriwathikiryamo abikirirya balikyabo banzwa abali omwa ngomo. Omughulhu abandi bakathondesibawa, balikyethu bangyi bakasa omwa koti erisyabasighika. Thuk’ighaki? Baghalha bethu ab’esyongwamirwa bamakanibwako nabi, erihirwa omwa ngomo, kutse eriendereribwa, isithwasagha. Thubasabire, thutsomane ab’omw’eka yabu, n’erisondekania esindi nzira esy’eribawathikiryamo.—Emib. 12:5; 2 Kor. 1:10, 11.
OMUGHULHU THUKASININGULIRAWA
13. Erisiningulirwa lyanga tsekya lithi eriyikethera lyethu omu Yehova n’ekithunga kiwe?
13 Abahughu bethu abathikirirye, abathukakolha nabu, kutse abathukasoma nabo bangana thusiningulira busana n’omubiiri wethu w’erithulira kutse busana n’erighendera okwa bihano bya Yehova eby’esyongeso. (1 Pet. 4:4) Bangana bugha bathi: “Ngakwanzire iwe ng’omundu, aliwe edini yenyu yikababoherera kutsibu kandi ni y’enyuma-nyuma.” Abandi bangana thutsweba-tsweba busana n’emibere thukakolonganiramo n’abahighithirwe, ibabugha bathi: “Ni kyahi ekyanga leka imwabugha muthi muwithe olhwanzo?” Ebinywe ebiri ng’ebi byangana thulethamo erithika-thika. Ithwangana tsuka eriyibulya: ‘Mbwino Yehova akanyiyithaghako ebya ngathe nanga thoka? Mbwino ekithunga kiwe kikanyiboherera kutsibu?’ Wamabya iwune omwa mibere eyiri ng’eyo, wanga yithunda wuthi hakuhi na Yehova n’ekithunga kiwe?
Yobu mwathaligha amabehi w’ababya bakayahulhamo banywani biwe abamusiningulira. Omwakanya k’ekyo, mwathwamu erisighalha muthaleghulha oku Yehova (Lebaya enungu 14)
14. Thwanga kolhaki abandi bakathusiningulira busana n’erighendera okwa bihano bya Yehova? (Esyonyimbo 119:50-52)
14 Ithwamu eryamakirira ebihano bya Yehova. Yobu abya mulhume oyuwamakirira ebihano bya Yehova nomwanasekereribawa busana n’erikolha ekyo. Omughuma w’okw’ababya bakayahulhamo banywani ba Yobu nibya mwalengaho erimulighisya athi Nyamuhanga syaleghene mbulha Yobu amaghendera okwa bihano bya Nyamuhanga kutse eyihi. (Yobu 4:17, 18; 22:3) Aliwe Yobu mwaghana eriligha amabehi ng’ayo. Abya inianasi ngoku ebihano bya Yehova ebihambire oko kibuya n’ekibi bihikire, kandi mwathwamu eribyamakirira. Mwathalighira abandi erithwa obuthaleghulha bwiwe. (Yobu 27:5, 6) Thuk’ighaki? Isiwalighira erisiningulirwa likaleka wukathika-thikira ebihano bya Yehova. Lengekanaya okwa bya wabiriyilhangirira. Mirundi mingyi wanganabya iwabiriyilhangirira ngoku ebihano bya Yehova bihikire kandi ku bikakughasira. Ithwamu erisighika ekithunga ekikamakirira ebihano ebyo. Neryo nomuwanga siningulirwa bungahi ekyo isikyendi kughabulha oku Yehova.—Soma Esyonyimbo 119:50-52.
15. Ni kyahi ekyaleka Brizit iniasiningulirwa?
15 Thalengekania okwa kyalholirweko kya Brizit, mwali wethu e India. Abahughu biwe mubamusiningulira busana n’erikirirya liwe. Buthuku buke alibatizibirwe omwa 1997, mwira wiwe oyuthe mwema mwabya isyakiwithe mubiiri. Neryo mwathwamu athi iyo, Brizit, n’abaana biwe b’obukali baghende eyiri ababuthi biwe, ababya bikere omwa yindi tawuni. Aliwe Brizit mwabana ebindi bitsibu binene-binene. Kundi mwira wiwe abya isyakiwithe mubiiri, Brizit abya w’erikolha kutsibu erisighika eka yiwe. Eryongera okw’ekyo, ekithunga ekyangabere hakuhi kyabya kilomita nga 350. Eky’obulighe, ab’oku mwira wiwe mubamuhakanisya busana n’erikirirya liwe. Emibere muyongera erikalha kyamaleka eka ya Brizit iyabya y’erithasyahuma. Neryo kitsumbukirania, mwira wiwe mwaholha. Enyuma waho, omughuma w’oku bali biwe mwaholha busana n’ekansa inianawithe myaka 12 misa. Eryongera erikalya emyatsi, abahughu ba Brizit mubamutsweba busana n’ebyabya ebi. Mubabugha bathi kw’athabya Mwema wa Yehova, ebitsibu ebyosi ebi sibyangabere. Nomubyanabya bithya, Brizit mwalholha embere eriyikethera Yehova n’erisighalha muthaleghulha oko kithunga kiwe.
16. Brizit mwatsumulhwa athi busana n’eryamakirira Yehova n’ekithunga kiwe?
16 Kundi Brizit abya ikere haali okwa kithunga, omulebererya w’omuthimbo mwamuhira mw’omuhwa w’erithulira omwa bulhambu bwiwe n’erikolera emihindano y’eka ewiwe. Okw’itsuka, mwayowa eki ikyamamukalira. Aliwe mwaghendera okwa busondoli. Iniakabwira abandi okwa ngulhu yuwene, iniakolha emihindano eka ewiwe, n’erihiraho endambi y’eriramya ly’eka n’abali biwe. Mumwalhwiririraki? Brizit mwathoka eritsukisya n’eryeghesya abigha bangyi be Biblia, kandi abaghuma b’okwa bigha biwe mubabatizibwa. Omwa 2005 mwatsuka erikolha ng’omutemburi w’omughulhu wosi. Mwahembwa busana n’eriyikethera Yehova n’erisighalha muthaleghulha okwa kithunga kiwe. Bali biwe banemukolera Yehova buthaleghulha, kandi lino omwa bulhambu obo muli ebithunga bibiri! Brizit akaligha ngoku Yehova mwamuha amaaka w’erighumira ebitsibu biwe n’eriyiyinirya erisiningulirwa ery’abahughu biwe.
SIGHALHA MUTHALEGHULHA OKU YEHOVA N’EKITHUNGA KIWE
17. Thutholere ithwathwamu erikolhaki?
17 Sitani anzire ithwikirirya thuthi Yehova akathusighanaya omwa bitsibu kandi thuthi erisighika ekithunga kya Yehova likongera erithukalirya engebe. Sitani anzire ithubaha omughulhu baghalha bethu ab’olhukwamirwa bakabughawako amabehi, bak’endereribawa, kutse erihirwa omwa ngomo. Kandi erilhabira omw’isiningulha, anzire eritsekya eriyikethera lyethu omwa bihano bya Yehova n’ekithunga Kiwe. Aliwe, thunasi ndeke ebithegho biwe bibi kandi sithuli thebibawa. (2 Kor. 2:11) Ithwamu erighana amabehi wa Sitani n’erisighalha muthaleghulha oku Yehova n’ekithunga Kiwe. Wibuke, Yehova syendi syakusighania. (Esy. 28:7) Busana n’ekyo, isiwalighira ekyosi-kyosi kikakughabulha oku Yehova!—Abar. 8:35-39.
18. Thukendi syakania okuki omo mwatsi owakakwamako?
18 Omo mwatsi ono, thwamabirikania okwa bitsibu ebyangasira eyihya sy’ekithunga. Aliwe kandi eriyikethera lyethu omu Yehova n’ekithunga kiwe lyangana lengwako omwa bitsibu ebikasira omo kithunga. Thwanga thoka thuthi erighumira ebitsibu ng’ebyo? Thukendi syakania okw’ekyo omo mwatsi owakakwamako.
OLHWIMBO 118 ‘Wukanyaye Erikirirya Lyethu’
a Erithoka eriyiyinia buthaleghulha omwa biro by’enyuma-nyuma bino, thutholere ithwalholha embere eriyikethera Yehova n’ekithunga kiwe. Diabolo akalengaho erikolesya ebitsibu erighunzaho eriyikethera eryo. Omwatsi ono akendi kania okwa bitsibu bisathu ebyo Diabolo akakolesaya n’ebyo thwanga kolha eribirwanisya.
b Awandi mena abirihindulhwa.