1. Kikamanyisayaki eribya ithunayitheghirye? (2 Timoteo 4:5)

 OMUGHULHU thukabana ebitsibu, obuthaleghulha bwethu oku Yehova n’ekithunga kiwe bwangana lengwako. Thwanga rwanisya thuthi ebitsibu ng’ebi? Thutholere ithwalholha embere eriyitheya n’eribya ithunabukire, ‘ithunasikire omw’ikirirya.’ (Soma 2 Timoteo 4:5.) Thukabya ithunayitheghirye omw’isighalha ithunathekene, erilengekania ndeke, n’erilengaho erilhangira emyatsi ngoku Yehova akalhangirayo. Thwamakolha ekyo, eriyowa lyethu isiryendi sondolha amalengekania wethu.

2. Thukendi kania okuki omo mwatsi ono?

² Omo mwatsi owahwere, muthwakanirye okwa bitsibu bisathu ebya thwanga bana ebikasira eyihya sy’ekithunga. Omo mwatsi ono, thukendi kania okwa bitsibu bisathu ebya thukabana omwa kithunga ebyanga lenga okwa buthaleghulha bwethu oku Yehova. Bya bino (1) omughulhu thukayowa Omukristayo mulikyethu iniabirithukolha nabi, (2) omughulhu thukakungawa, na (3) omughulhu kikathukalira erighenda-ghendania n’esyombinduka sy’ekithunga. Thwanga lholha thuthi embere eribya ithunayitheghirye n’eryamakirira Yehova n’ekithunga kiwe buthaleghulha thukabana ebitsibu ng’ebi?

3. Hanganayira ithwakolhaki thwamayowa thuthi Omukristayo mulikyethu abirithukolha nabi?

³ Wunewathayowa Omukristayo mulikyethu obundi oyuwithe olhukwamirwa iniabirikukolha nabi? Obundi, mughalha wethu oyo syakighenderera erikukolha nabi. (Abar. 3:23; Yak. 3:2) Nomwabine,  eby’akolha byangabya imubyakuponesya. Wangabya imuwakuba othulho wukalengekania oko mwatsi oyo. Nibya wangabya imuwayibulya, ‘Braza amabya iniangana kolha eki, kwenene eki nina kithunga kya Nyamuhanga?’ Ahathe erithika-thika Sitani anzire ithwayowa thuthya. (2 Kor. 2:11) Amalengekania awathatholere ng’ayo angana leka ithwayighabulha oku Yehova n’ekithunga kiwe. Neryo thwamayowa mughalha wethu kutse mwali wethu iniabirithukolha nabi, thwanga lholha thuthi embere eriyitheya n’eriyihighulha okwa malengekania mabi ayo?

4. Yozefu mwabya athi inianayitheghirye akakolhwa nabi, kandi thwang’ighaki okwa ky’erileberyako kiwe? (Enzuko 50:19-21)

⁴ Isiwahithana. Omughulhu Yozefu abya mulengwa, baghalha babu abakulhu mubamukolha nabi. Mubamupona, n’abandi b’okw’ibo nibya mubanza n’erimwitha. (Enz. 37:4, 18-22) Erighunzerera, mubamughulya omwa bukobe. Busana n’ekyo, Yozefu mwabana ebitsibu ebikalire ebyaghunza emyaka nga 13. Yozefu angabya imwabulha kwenene Yehova ng’anamwanzire. Kandi angabya imwabulha Yehova ng’abirimusighania omughulhu akayithagha obuwathikya. Aliwe Yozefu mwathahithana. Omwakanya k’ekyo, mwasighalha inianayitheghirye omw’ibya inianathekene. Abere abana akaghisa ak’erithuhulya, mwayikakirya okw’ikolha ekyo kandi amakangania kw’anzire baghalha babu abo neryo amabaghanyira. (Enz. 45:4, 5) Yozefu akolha athya kundi mwathoka erilengekania ndeke. Omwakanya k’erihira amalengekania okwa bitsibu biwe, mwahira ameso oko mwatsi mukulhu​—ekighendererwa kya Yehova. (Soma Enzuko 50:19-21.) Thuk’ighaki? Omundu amakukolha nabi, isiwahithana oku Yehova kutse eribulha ng’abirikusighania. Omwakanya k’ekyo, ghaniraya okwa mibere anemukuwathikiryamo eriyiyinirya ekitsibu. Eryongera okw’ekyo, abandi bamakukolha nabi, lengaho erikuningira ebisobyo byabu omo lhwanzo.​—1 Pet. 4:8.

5. Miqueas mwasighalha athi inianayitheghirye omughulhu ayowa iniabirikolhwa nabi?

⁵ Thalengekania okwa ky’erileberyako kya munabwire eky’omusyakulhu w’ekithunga erilhua e South America ya Miqueas. b Ak’ibuka omughulhu ayowa baghalha bethu balebe abawithe esyongwamirwa ibabirimukolha nabi kutsibu. Mwabugha athi: “Nabya isindi nathabya omwa bitunturo ebiri ng’ebi. Munakwa engitsi. Iningakuba othulho, kandi iningathoghongaya emisoni busana n’eriyibulha-bulha.” Nomubyanabya bithya, Miqueas mwabya inianathekene n’erilengaho kutsibu erikakirya eriyowa liwe. Iniakasaba mughulhu wosi, erisaba Yehova athi amuhe omulimu wiwe abuyirire n’akaghalha k’eriyiyinia. Kandi mwasondya omwa bitabu byethu mw’emyatsi eyanga muwathikya. Thuk’ighaki? Wamayowa mulikyenyu iniabirikukolha nabi, sighalha iwunathekene kandi lengaho erikakirya eriyowa lyosi-lyosi erithatholere erya wangabya nalyo. Iwanganabya isiwasi emibere eyalhuemo eyangabya iy’eyiryaleka iniabugha kutse erikolha athya. Neryo kanaya na Yehova omwa musabe, musabe akuwathikaye wulhangire emyatsi ngoku mulikyenyu oyo akalhangirayo. Erikolha ekyo kikendi leka iwaminya ngoku mulikyethu angabya isyalya kighenderera neryo iwamughanyira. (Emi. 19:11) Wibuke, Yehova anasi emibere eya wulimo kandi akendi kuha akaghalha akawukayithagha eriyiyinia.​—2 Emy. 16:9; Omu. 5:8.

6. Busana naki ni kikulhu erilhangira erikunga lya Yehova ng’enzira ey’akathukanganirayamo olhwanzo lhwiwe? (Abaebrania 12:5, 6, 11)

⁶ Erikungwa lyangana letha obulhumi omwa muthima. Aliwe thwamahwerya amalengekania okwa bulhumi obo busa, ithwangana tsuka  eriyowa thuthi erikunga eryo sirilhuemo obulingirirania kutse thuthi sirilhue lithutholere. Busana n’ekyo, ithwangana yithalya okwa kindu ky’embaghane​—erilhangira erikunga ng’enzira eya Yehova akathukanganirayamo olhwanzo. (Soma Abaebrania 12:5, 6, 11.) Kandi thwamalighira eriyowa lyethu lithuthabaleko, ithwanganaha Sitani y’akaghisa k’erikolesya eriyowa lyethu. Anzire ithwaghana erikungwa erya thukahebawa kandi ibbwa n’eky’akabi kutsibu, anzire ithwayighabulha oku Yehova n’ekithunga kiwe. Wamabya iwabirikungwa, wanga sighalha wuthi iwunayitheghirye?

7. (a) Ngoku kikanganibwe omwa kisasani, Petero abere abiriligha erikungwa, Yehova mwamukolesya athi? (b) Eky’erileberyako kya Petero kikakweghesayaki?

⁷ Ligha erikungwa, kandi kolha esyombinduka esikayithaghisibawa. Mirundi nga y’eyo, Yesu mwakunga Petero embere sy’abandi bakwenda. (Mk. 8:33; Lk. 22:31-34) Petero mwayowa nabi! Aliwe, Petero mwathaleghulha oku Yesu. Mwaligha erikungwa ery’ahebawa kandi mw’ighira okwa bisobyo biwe. Busana n’ekyo, Yehova mwahemba Petero busana n’obuthaleghulha bwiwe kandi amamuha esyongwamirwa esirithohire omwa kithunga. (Yn. 21:15-17; Emib. 10:24-33; 1 Pet. 1:1) Eky’erileberyako kya Petero kikathweghesayaki? Thukayighasira kuthya n’abandi omughulhu thukaghana erihira ameso okw’ihemuka erikasa busana n’erikungwa, omughulhu thukaligha erihengulhwa, n’erikolha esyombinduka esikayithaghisibawa. Thwamakolha ekyo, thukongera eribya b’omughaso embere sya Yehova n’abalikyethu.

8-9. Bernardo abere abirikungwa, okw’itsuka mwayowa athi, kandi ni kyahi ekya muwathikaya erihengulha amalengekania wiwe?

⁸ Thalengekania okwa kyabya oku Bernardo, mughalha wethu owe Mozambique. Mwalhusibwa okwa busyakulhu. Okw’itsuka Bernardo mwayowa athi? Akabugha athi, “Munahithana kundi mundanza erikunga eryo nahebawa.” Mwayibulha-bulha akalengekania abandi omwa kithunga ng’abakendi mulhangira bathi. Akabugha athi, “Munaghunza amezi nga wayo erithasyabya n’amalengekania awatholere okwa mibere eyo n’erithasyayikethera Yehova n’ekithunga kiwe.” Ni kyahi ekya wathikaya Bernardo eribya n’amalengekania awatholere?

⁹ Bernardo mwahengulha amalengekania wiwe. Akasoborera athi: “Ingane musyakulhu, iningakolesaya Abaebrania 12:7 eriwathikya  abandi eribya n’amalengekania awatholere okw’ikunga lya Yehova. Neryo munayibulya, ‘Nindi oyukayithagha erighendera okw’isako eri?’ Abaghombe ba Yehova abosi​—naghe imwangane.” Neryo Bernardo mwayira ebindi eby’akakolha erithasyaghumya eriyikethera liwe omu Yehova n’ekithunga Kiwe. Mwongera endegheka yiwe y’erisoma e Biblia n’erighanirya buuli. Nomwakine indi abya inianemuyilhalikirira balikyabo ng’abakendi mulhangira bathi, mwalengaho erithulira haghuma nabu n’erisangira omwa mihindano. Endambi muyahika, Bernardo amathasyasombolhwa ng’omusyakulhu. Nga Bernardo, wamakungwa, lengaho erithendi hira ameso okw’ihemuka, ligha erihabulhwa, kandi kolha esyombinduka esikayithaghisibawa. c (Emi. 8:33; 22:4) Wamakolha ekyo, wutholere iwaminya ngoku Yehova akendi kuhemba busana n’erimwamakirira n’ekithunga kiwe buthaleghulha.

10. Ni mbindukaki omwa kithunga eyangabya imuyalenga oko buthaleghulha bw’abalhume balebe Abaisraeli?

¹⁰ Esyombinduka sy’ekithunga syangana lenga okwa buthaleghulha bwethu. Thwamathendi yitheya, ithwangana silighira erithughabulha oku Yehova. Ng’eky’erileberyako, thalengekania okwa syombinduka omwa kithunga kya Yehova hakabya Emighambo ya Musa ngasyangabya imusyahamba sithi okwa bandi Baisraeli. Emighambo yithe yahirwaho, emithwe y’eka ibabakakolha emibiiri y’abahereri. Ibakahimba ebiherero n’eriherera Yehova busana n’amaka wabu. (Enz. 8:20, 21; 12:7; 26:25; 35:1, 6, 7; Yobu 1:5) Aliwe Emighambo yabere yahirwaho, emithwe y’eka mubabya b’erileka olhusunzo olho. Yehova mwasombolha abahereri erilhua omw’eka ya Haruni eribya bakahayo obuhere. Embinduka omwa kithunga eyo yabere yabirihirwaho, omuthwe w’eka owosi-wosi oyuthe w’omw’eka ya Haruni iniamayitswatsika erikolha ng’omuhereri, iniakithibawa. d (Law. 17:3-6, 8, 9) Mbwino embinduka eyi ni nguma y’okwa syonzumwa esyaleka Kora, Datani, Abiramu, n’abakulhu 250 ibahakanisya obuthoki bwa Musa na Haruni? (Emig. 16:1-3) Sithwasi. Mbulha ni kyahi okw’ebi, Kora n’abamuyiyungako mubalemwa erisighalha bathaleghulha oku Yehova. Wanga kolhaki esyombinduka omwa kithunga syamalenga okwa buthaleghulha bwawu?

11. Thuk’ighaki okwa ky’erileberyako ky’abandi Bakohati Abalawi?

¹¹ Sighika ndeke esyombinduka sy’ekithunga. Omwa lhughendo lhwabo omwa mbwarara, Abakohati ibakakolha esyongwamirwa sy’embaghane kutsibu. Abaisraeli ibakabya bakahuma omwa kilhaliriro, abaghuma b’okwa Bakohati ibakaheka erisanduko ly’endaghane ibabya embere sy’abandu bosi. (Emig. 3:29, 31; 10:33; Yos. 3:2-4) Olhu ka lhwabya lhusunzo! Aliwe emyatsi muyahinduka Abaisraeli babirihika omwa Kihugho Ekyalhaghanisibawa. Erisanduko mulyabya isirikiyithagha erihekwa-hekwa. Neryo Solomono abere akabya mwami, abandi Bakohati mubahebwa omubiiri w’eribya bimbi, abandi batheya b’esyongyo, n’abandi batheya b’ebighona. (1 Emy. 6:31-33; 26:1, 24) Omo Biblia sihali ahakakanganaya hathi Abakohati mubanayineghenia kutse erisaba bathi bahebawe emibiiri ey’embaghane kutsibu kundi kukyabya kithya erilhua enyuma. Ni kyahi ekya thwanga bighirako? N’omuthima wosi sighika esyombinduka esya ekithunga kya  Yehova kikakolha, imwamune n’esyosi-syosi esikahamba okwa lhusunzo lhwawu. Bana etseme omwa lhusunzo lhwosi-lhwosi olhwa wukahebawa. Wibuke ngoku olhusunzo lhwawu silhwolhukaleka iwabya w’obughuli. Yehova akalhangira obwowa bwawu mwa bw’obughuli kwilhaba olhusunzo lhwosi-lhwosi.​—1 Sam. 15:22.

12. Zaina mwayowa athi akalhusibwa okwa Beteli?

¹² Thalengekania okwa ky’erileberyako kya Zaina, mwali wethu ow’omwa Middle East, oyo wabana embinduka omwa lhusunzo lhwiwe n’eriherya olhusunzo olhw’anzire kutsibu. Mwathumwa omw’ithulira enyuma w’erikolera okwa Beteli habw’emyaka eyilhabire omu 23. Akabugha athi: “Embinduka omwa lhusunzo lhwaghe muyanyisisirya kutsibu. Munayowa nga singakiwithe mughaso kandi iningabera eriyibulya, ‘Ni hayi aho nalemirwe?’” Eky’obulighe, balikyethu balebe omwa kithunga mubongera okwa bulhumi bwiwe omw’imubwira bathi: “Ku wabya iwune mundu mubuya, ekithunga sikyanga kulhusirye okwa lhusunzo lhwawu.” Habw’obuthuku, Zaina mwahwa amani kandi iniakalira omwa kiro obuli kiro. Aliwe akabugha athi: “Mundalighira eki kikaleka ngathika-thikira ekithunga kya Yehova kutse olhwanzo lhwa Yehova.” Zaina mwathoka athi erisighalha inianayitheghirye?

13. Zaina mwakolhaki erirwanisya eriyowa liwe erithatholere?

¹³ Zaina mwathoka erirwanisya eriyowa erithatholere. Athi? Mwasoma emyatsi omwa bitabu byethu eyihambire okwa kitsibu kiwe. Omwatsi “Wangana Ghumira Erihwa Amani!” omwa Watchtower ey’Okwakabiri 1, 2001, mwamuwathikya kutsibu. Omwatsi oyo akasoborera ngoku omuhandiki we Biblia ya Mariko angabya nayu imwarwanisya eriyowa ng’eryo akabana esyombinduka omwa lhusunzo lhwiwe. Zaina akibuka bino, “Eky’erileberyako kya Mariko mukyanyiwathikya erirwanisya erihwa amani.” Zaina kandi mwasighalha iniane bughuma n’abanywani biwe. Mwathayisolholha; kandi mwathahwerya amalengekania okw’iyowa liwe. Mwaghunzerera athi omulimu wa Yehova akakolera omwa kithunga kiwe kandi athi abakasondolha bamutsomene kutsibu. Aliwe kandi mwaminya ngoku ekithunga kitholere ikyakolha ngoku kyanga thoka erilhangira kithi omubiiri wa Yehova akakoleka.

14. Ni mbinduka yahi omwa kithunga eyakalira Vlado, kandi ni kyahi ekya muwathikaya?

 ¹⁴ Vlado, omusyakulhu w’ekithunga ow’emyaka 73 e Slovenia, mukyamukalira omughulhu ekithunga ekyo abyamo kyayungawa okwa kindi n’Ekisenge ky’Obwami ekyo aby’akahindaniramo kyakingawa. Akabugha athi: “Mundayitheghererya ekyanga leka Ekisenge ky’Obwami ekyuwene kithya ikyabya isikyanga thasyakolesibwa. Munayiponera kundi thwabya imuthwanamakisuba-subania. Indi murandi, kandi ebighuma by’okwa bindu bihyaka ebirimu n’ingye nakolhabyo. Kandi eriyunga ebithunga bya haghuma eri, mulyayithagha erikolha esyombinduka esyathukalira ithwe ng’abathuliri abakulire omo myaka.” Ni kyahi ekya wathikaya Vlado erisighika obusondoli? Akasoborera athi: “Erighenda-ghendania n’esyombinduka esya ekithunga kya Yehova kikakolha, mughulhu wosi mukalhwiririra emighisa. Esyombinduka esi nibya sikathuthegheka busana n’esyombinduka nene-nene esy’obuthuku obukasa.” Mbwino kinemukukalira erighenda-ghendania n’esyombinduka esikasa busana n’eriyunga ebithunga bya haghuma kutse embinduka omwa lhusunzo? Wukiminye ngoku Yehova akayitheghereraya eriyowa lyawu. Wamasighika esyombinduka ng’esyo n’eryamakirira buthaleghulha Yehova n’ekithunga ekyo anemukolesya, ahathe erithika-thika wukendi syatsumulhwa.​—Esy. 18:25.

15. Thwanga sighalha thuthi ithunayitheghirye thukabana ebitsibu omwa kithunga?

¹⁵ Thunemuseghera hakuhi n’enduli y’omughulhu mubi ono, thubye ithunasi ngoku thukendi bana ebitsibu omwa kithunga. Ebitsibu ebyo byangana lenga okwa buthaleghulha bwethu oku Yehova. Neryo thutholere ithwabya ithunayitheghirye. Thwamayowa Omukristayo mulikyethu iniabirithukolha nabi, isithwalighira ekyo kikaleka thukahithana. Wamakungwa, ambi isiwahira ameso w’okw’ihemuka erikasa busana n’erikungwa, ambi iwaligha erihabulhwa, kandi ambi iwakolha esyombinduka esikayithaghisibawa. Kandi ekithunga kya Yehova kyamakolha esyombinduka esikakuhambako, n’omuthima wosi lighasyo kandi ghondera obusondoli.

16. Wanga lholha wuthi embere eriyikethera Yehova n’ekithunga kiwe?

¹⁶ Wangana lholha embere eriyikethera Yehova n’ekithunga kiwe obuthaleghulha bwawu bukalengwako. Aliwe erithoka erikolha ekyo, wutholere iwabya iwunayitheghirye, ni bugha ambu, erisighalha iwunathekene, erilengekania ndeke, n’erilhangira emyatsi ngoku Yehova akalhangirayo. Ithwamu erigha okwa bakanibweko omwa Biblia abathoka ndeke erighumira ebitsibu ng’ebyo kandi ghaniraya okwa by’erileberyako byabu. Saba Yehova y’obuwathikya. Kandi isiwayisolholha okwa kithunga. Neryo nomubyangabya bithi, Sitani syendi thoka erikughabulha oku Yehova kutse ekithunga Kiwe.​—Yak. 4:7.