OMWATSI W’ERIGHA 45
Ngoku Yehova Akathuwathikaya Erikolha Omubiiri Wethu w’Erithulira
“Basyaminya ko hali omuminyereri oyo wabiribya omo kathi-kathi kabu.”—EZE. 2:5.
OLHWIMBO 67 ‘Wuthule Engulhu Yuwene’
EBIKENDI KANIBWAKO a
1. Ni kyahi ekyo thwangabya ithunasi, kandi ni kyahi ekyo thutholere ithwaminya?
THWANGANABYA ithunasi ngoku thukendi bana erihakanisibwa omwa mubiiri wethu w’erithulira. Erihakanisya eryo lyangan’ongera omwa buthuku obukasa. (Dan. 11:44; 2 Tim. 3:12; Erib. 16:21) Nomwabine, thutholere ithwaminya ngoku Yehova akendi thuha obuwathikya. Busana naki? Yehova abiribya iniane muwathikya abaghombe biwe eriberererya esyongwamirwa syabu—nomusyangabya isikalire sithi. Ng’eky’erileberyako, thulebaye ebindu birebe ebyabya omwa ngebe y’omuminyereri Ezekieli, oyo wathulira Abayuda abanyewa e Babeli.
2. Yehova mwabugha athiki okwa bandu b’omwa bulhambu obo Ezekieli athuliramo, kandi thukendi kania okuki omo mwatsi ono? (Ezekieli 2:3-6)
2 Abandu ababya omwa bulhambu obo Ezekieli athuliramo babya bathi? Yehova mwabakaniako ‘ng’abakalha-kalire,’ “abatsibu,” kandi ‘ababirihona.’ Ibakahuthalhaya ng’amahwa kandi ibakalire ng’esyonge. Ky’ekyaleka Yehova iniabera eribwira Ezekieli athi: “Siwubahe”! (Soma Ezekieli 2:3-6.) Ezekieli mwathoka omubiiri wiwe w’erithulira kundi (1) Yehova yuwamuthuma, (2) omulimu wa Nyamuhanga mwamuha amaaka, na (3) Ebinywe bya Nyamuhanga mubyaghumya erikirirya liwe. Ebindu bisathu ebi mubyawathikya bithi Ezekieli? Kandi bikathuwathikaya bithi munabwire?
YEHOVA YUWATHUMA EZEKIELI
3. Ni binywe byahi ebitholere eribya imubyaghumya Ezekieli, kandi Yehova mwakangania athi kw’akendi musighika?
3 Yehova mwabwira Ezekieli athi: “Ngakuthuma.” (Eze. 2:3, 4) Ebinywe ebi bitholere eribya imubyaghumya Ezekieli. Busana naki? Ahathe erithika-thika mwibuka ngoku Yehova mwakolesya ebinywe ibya n’ebyo akathuma Musa na Isaya ng’abaminyereri Biwe. (Eri. 3:10; Isa. 6:8) Kandi Ezekieli abya inianasi emibere Yehova awathikirayamu abaminyereri babiri abo erisingura ebitsibu. Neryo Yehova abere akabwira Ezekieli engendo ibiri athi: “Ngakuthuma,” omuminyereri mwabya n’enzumwa mbuya eyanga leka iniayikethera obuwathikya bwa Yehova. N’ekindi, omwa kitabu kya Ezekieli, ngendo nyingyi thukabanamo ebinywe bino: “Ekinywe ky’Omwami Mukulhu mukyambikako.” (Eze. 3:16; 6:1) Ebinywe ebyo bitholere eribya imubyaleka Ezekieli inialigha ngoku Yehova yulyamuthuma. Eryongera okw’ekyo, eribya Ezekieli iniabya mughalha w’omuhereri, thatha wiwe atholere eribya imwamukangirirya ngoku erilhua kera Yehova abirikangania kw’akasighika abaminyereri Biwe. Yehova abya iniabiribwira Isaka, Yakobo, na Yeremia, ebinywe bino: “Indi haghuma nawu.”—Enz. 26:24; 28:15; Yer. 1:8.
4. Ni binywe byahi ebikahumulikanaya ebitholere eribya imubyaha Ezekieli y’amaaka?
4 Abaisraeli abosi banga kolireki bakowa erithulira lya Ezekieli? Yehova mwabugha athi: “Ekihanda kya Israeli sibendi syaligha erikwowa, kusangwa sibeligha erinyowa.” (Eze. 3:7) Omw’ighana Ezekieli, abandu babya ibamaghana Yehova. Ebinywe ebyo mubyakakasya Ezekieli ngoku abandu erimughana sikirimanyisaya kithi abirilemwa iyo ng’omuminyereri. Yehova kandi mwakakasya Ezekieli athi omughulhu eritswera eryo akathulhughanaya likendi syabererera, abandu bakendi syaminya ngoku ‘omuminyereri abya iniane omo kathi-kathi kabu.’ (Eze. 2:5; 33:33) Ahathe erithika-thika ebinywe ebikahumulikanaya ebyo mubyaha Ezekieli y’amaaka agho ayithagha eriberererya omubiiri wiwe w’erithulira.
NAMUNABWIRE YEHOVA YUKATHUTHUMA
Nga Ezekieli, abandu bangana ghana erithuhulikirira kandi ibathuhakanisya, aliwe thunasi ngoku Yehova ane haghuma nethu (Lebaya enungu 5-6)
5. Ngoku kiri omu Isaya 44:8, ni hayi aho thuk’iha amaaka?
5 Kuthya nethu thukabana amaaka omw’iminya ngoku thukathumawa na Yehova. Akathuha ekitsumbi omw’ithwahulhamo “abalhangiri” biwe. (Isa. 43:10) Olho ka ni lhusunzo lhunene! Ngoku Yehova anabwira Ezekieli athi: “Siwubahe,” Yehova akathubwira athi: “Simuthithimane.” Busana naki sihali nzumwa eyanga leka thukubaha abakathuhakanisaya? Nga Ezekieli, thukathumawa na Yehova kandi akathusighika.—Soma Isaya 44:8.
6. (a) Yehova akaghumaya athi ngoku akendi thuwathikya? (b) Ni hayi aho thuk’iha erihumulikana n’amaaka?
6 Yehova akaghumaya ngoku akendi thuwathikya. Ngahathya, Yehova athali abugha athi: “Inywe muli balhangiri baghe,” mwabugha athi: “Omughulhu wukalhaba omo maghetse, nasyabya haghuma nawu, n’erilhaba omo syonyusi, sisyendi syakubwayirako. Omughulhu wukalhaba omo muliro siwendi syahya, kutse ekirimi ky’omuliro sikyendi syakuhisya.” (Isa. 43:2) Omwa mubiiri wethu w’erithulira, hakanayira ithwabana ebitsibu ebiri ng’esyonyusi n’ebiri ng’omuliro. Nomwabine, omwa buwathikya bwa Yehova, thukalholha embere erithulira. (Isa. 41:13) Ngoku kyanabya omwa biro bya Ezekieli, abangyi munabwire bakaghana omwatsi wethu. Thukabya ithun’ibukire ngoku nomubanga ghanagho, ekyo sikirimanyisaya kithi thwabirilemwa ithwe ng’Abema ba Nyamuhanga. Thukabana erihumulikana n’amaaka omw’iminya ngoku thukatsemesaya Yehova thukalholha embere erithulhughania omwatsi wiwe buthaleghulha. Omukwenda Paulo mwabugha athi: “Obuli mundu asyahembwa na Nyamuhanga ngoku omubiiri wiwe ali.” (1 Kor. 3:8; 4:1, 2) Mwali wethu mughuma oyuwabirikolha obutemburi habw’omughulhu muuli, akabugha athi: “Kikanyitsemesaya eriminya ngoku Yehova akahemba akaghalha akathukahiraho.”
OMULIMU WA NYAMUHANGA MWAHA EZEKIELI Y’AMAAKA
Omwa syonzoli Ezekieli akalhangira ekiggali kya Yehova, esikaghumaya eriyikethera liwe ngoku Yehova akendi muwathikya eriberererya omubiiri wiwe w’erithulira (Lebaya enungu 7)
7. Ezekieli iniakabya akalengekania okwa syonzoli esyo alhangira, iniakayowa athi? (Lebaya ekisasani ky’okwa kidipa.)
7 Ezekieli mwalhangira ngoku omulimu wa Nyamuhanga ni w’amaaka. Omo syonzoli, mwayilhangirira omulimu abuyirire akakolera omwa bihangikwa eby’amaaka eby’ekirimu n’omwa biringo binene-binene eby’ekiggali kya Yehova. (Eze. 1:20, 21) Ezekieli mwakolhaki? Mwahandika ebyabya. “Omughulhu nalhangirakyo, munathulhama kibiri-biri.” Busana n’erisweka, Ezekieli mwawa okwa kithaka. (Eze. 1:28) Enyuma waho, Ezekieli iniakabya akalengekania okwa syonzoli esikasisimulha esyo, kitholere eribya imukyamuwathikya eryongera eriligha ngoku omwa buwathikya bw’omulimu wa Nyamuhanga, akendi berererya omubiiri wiwe w’erithulira.
8-9. (a) Erilhaghira lya Yehova mulyaha Ezekieli yaki? (b) Yehova mwongera athi eriha Ezekieli y’amaaka busana n’obulhambu bwiwe obukalire?
8 Yehova mwalhaghira Ezekieli athi: “Mughalha w’omundu, wuhangane oko bisandu byawu, nyithoke eribugha nawu!” Erilhaghira eryo kuthya nʼomulimu wa Nyamuhanga mubyaha Ezekieli yʼamaaka agho ayithagha erihangana okwa kithaka. Ezekieli mwahandika athi: “Omulimu mwanyingiramo mwanyihangania oko bisandu byaghe.” (Eze. 2:1, 2) Enyuma waho kandi omw’ithulira liwe lyosi, Ezekieli mwasondolhwa “n’ebyalha” bya Nyamuhanga—ni bugha ambu, omulimu abuyirire wa Nyamuhanga. (Eze. 3:22; 8:1; 33:22; 37:1; 40:1) Omulimu wa Nyamuhanga mwaha Ezekieli y’amaaka w’erikolha omubiiri ogho ahebawa—omubiiri w’erithulira abandu ababya omwa bulhambu bwiwe ‘ab’embumo eyikalire n’obutsibu.’ (Eze. 3:7) Yehova mwabwira Ezekieli: “Nabiriyira obusu bwawu erikalha oko musu wabo, n’embumo yawu erikalha okwa syombumo syabo. Nga almasi erikalha kwilhaba omuthero, ko nabiriyira embumo yawu. Siwubahebo, kutse erihahukya omuthima embere syabo.” (Eze. 3:8, 9) Yehova mwabya ng’oyukabwira Ezekieli athi: ‘Obuthowa bw’abandu isibwakughunza amani. Ngendi kuha amaaka.’
9 Enyuma waho, omulimu wa Nyamuhanga mwasumba Ezekieli n’erimuthwalha omwa bulhambu obo athuliramu. Ezekieli mwahandika athi: “Ebyalha by’Omwami Mukulhu mubyanyikalhako n’amaaka.” Mukyathwalira omuminyereri y’ewiki erigha n’eriyitheghererya omwatsi owakayathulira. (Eze. 3:14, 15) Neryo Yehova mwamubwira athi aghende omo bwerere eyo ‘omulimu amwingiriramo.’ (Eze. 3:23, 24) Ezekieli mwabya iniamabiriyithegheka eritsuka erithulira.
OMULIMU WA NYAMUHANGA AKATHUHA AMAAKA MUNABWIRE
Ngoku kyanabya oku Ezekieli, ni byahi ebikathuwathikaya munabwire erikolha omubiiri w’erithulira? (Lebaya enungu 10)
10. Ni buwathikya bwahi obo thukayithagha erikolha omubiiri wethu w’erithulira, kandi busana naki?
10 Ni buwathikya bwahi obwa thukayithagha erikolha omubiiri w’erithulira? Eribana eky’erisubirya, lengekanaya okwa kyabya oku Ezekieli. Athali atsuka omubiiri wiwe w’erithulira, omulimu wa Nyamuhanga mwamuha amaaka agho ayithagha. Munabwire, ngoku kyanabya oku Ezekieli, thukathoka omubiiri wethu w’erithulira busana n’obuwathikya bw’omulimu wa Nyamuhanga. Busana naki? Kundi Sitani akalhwa nethu nuku imanaye omubiiri wethu w’erithulira. (Erib. 12:17) Okwa malengekania w’abandu, thukabya nga sithwanga thoka n’ahake erilhwa na Sitani. Aliwe erilhabira omwa mubiiri wethu w’erithulira, thunemumukinda! (Erib. 12:9-11) Omwa nziraki? Thukabya thukasangira omwa mubiiri wethu w’erithulira, thukakanganaya ngoku sithulyubaha emihayo ya Sitani. Obuli erithulira, Sitani akakindawa. Neryo kwesi, eribya ithukathoka omubiiri wethu w’erithulira nomuhane erihakanisibwa, kikaleka ithwaghunzerera thuthiki? Thwangana ghunzerera thuthi Yehova akathuha amaaka w’omulimu abuyirire kandi thuthi akathusima.—Mt. 5:10-12; 1 Pet. 4:14.
11. Ni kyahi ekya omulimu wa Nyamuhanga akendi thukolera, kandi thwanga lholha thuthi embere eribanagho?
11 Ni rindi kakasibwa lyahi eryo thukabana omw’iminya ngoku Yehova mwaha Ezekieli y’amaaka w’erithulira? Omulimu wa Nyamuhanga angana leka ithwabya n’amaaka w’erighumira ekitsibu kyosi-kyosi ekya thukabana omwa mubiiri w’erithulira. (2 Kor. 4:7-9) Neryo kwesi thwanga kolhaki nuku thulhole embere eribana omulimu wa Nyamuhanga? Thutholere ithwasabagho omw’ihathikana, ithunayikethere ngoku Yehova akendyowa emisabe yethu. Yesu mwakangirirya abigha biwe athi: “Mubulhaye, . . . musonda-sondaye, . . . mukongothe oko lhuyi.” Omw’isubirya ekyo, Yehova akendiha omulimu abuyirire okwa bakamusabagho.—Lk. 11:9, 13; Emib. 1:14; 2:4.
EBINYWE BYA NYAMUHANGA MUBYAGHUMYA ERIKIRIRYA LYA EZEKIELI
12. Ngoku kiri omu Ezekieli 2:9–3:3, omukunzo alhua hayi kandi abya mwaki?
12 Si w’omulimu wa Nyamuhanga musa owaha Ezekieli y’amaaka aliwe n’ebinywe bya Nyamuhanga mubyaghumya erikirirya liwe. Omo syonzoli, Ezekieli mwalhangira ebyalha ibinahambire omukunzo. (Soma Ezekieli 2:9–3:3.) Omukunzo oyo alhua hayi? Abya mwaki? Mwaghumya athi Ezekieli? Leka thulebaye. Omukunzo alhua okwa kithumbi kya Nyamuhanga eky’obwami. Yehova angabya imwakolesya omughuma w’okwa bamalaika bbani abo Ezekieli abya iniabirilhangira erimuha omukunzo. (Eze. 1:8; 10:7, 20) Mwabya ebinywe bya Nyamuhanga—omwatsi munene w’eritswera ogho Ezekieli abya w’eribwira abanyewa abathowa. (Eze. 2:7) Omwatsi oyo aby’ahandikire okwa mukunzo embere n’enyuma.
13. Yehova mwabwira Ezekieli athi akole athi omukunzo, kandi busana naki aby’asihirire?
13 Yehova mwabwira omuminyereri wiwe athi alye omukunzo kandi asulhaye enda yiwe mw’omukunzo oyo. Omwa bwowa, Ezekieli mwalya omukunzo owosi. Ekitsweka ky’esyonzoli eki kikamanyisayaki? Ezekieli mwayithagha eriyitheghererya ndeke omwatsi ogho abya iniakayathulha. Abya w’erilighagho nuku amuhire mw’omuhwa w’erithulhagho. Neryo ekindu ekikaswekaya mukyabya. Ezekieli mwaminya ngoku omukunzo oyo “asihirire ng’obuki.” (Eze. 3:3) Busana naki? Oku Ezekieli, ekitsumbi eky’erimanira Yehova kyabya ekyalholirweko ekisihirire kutse ekikatsemesaya. (Esy. 19:8-11) Mwasima eribya Yehova imwamuligha erikolha ng’omuminyereri wiwe.
14. Ni kyahi ekya wathikaya Ezekieli eriyitheghekera omubiiri wiwe?
14 Enyuma waho, Yehova mwabwira Ezekieli athi: “Ebinywe byaghe byosi ebyo ngendi kubwira, wangirirebyo omwa muthima wawu, wuhulikirire ndeke.” (Eze 3:10) Omwa busondoli obo, Yehova mwabwira Ezekieli athi abye inian’ibukire ebinywe ebiri omwa mukunzo n’eribighaniryako. Erikolha ekyo mukyaghumya erikirirya lya Ezekieli. Kandi mukyamuha omwatsi ow’erithulha ow’akahamba okwa bandu. (Eze. 3:11) Busana n’omwatsi wa Nyamuhanga eribya okwa muthima wiwe n’okwa minywe yiwe, Ezekieli abya iniamabiriyitheghekera omubiiri wiwe n’eriberereryagho.—Thasyalebaya na Esyonyimbo 19:14.
EBINYWE BYA NYAMUHANGA BIKATHUGHUMAYA MUNABWIRE
15. Erithoka eriyiyinia, ni byahi ebyo thukayithagha ‘eriangirira omwa muthima’?
15 Erithoka eriyiyinia omwa mubiiri wethu w’erithulira, nethu thukayithagha erilholha embere erighumibwa omwa binywe bya Nyamuhanga. Thukayithagha ‘eryangirira omwa muthima’ ebyosi ebyo Yehova akathubwira. Munabwire Yehova akakanaya nethu erilhabira omwa Kinywe kiwe, e Biblia. Thwanga kolhaki erilhangira thuthi Ekinywe kya Nyamuhanga kikalholha embere erihamba okwa malengekania, eriyowa, n’ebilhubirirwa byethu?
16. Thwanga yitheghererya thuthi Ekinywe kya Nyamuhanga?
16 Ngoku ebyalya by’ekinyamubiri bikanathuha amani, thukabana amani bunyakirimu thuk’igha Ekinywe kya Nyamuhanga n’erikighaniryako. Thuk’ibuka erisomo erihambire okwa mukunzo. Bikabya bikahika okwa Kinywe kya Nyamuhanga, Yehova anzire ithusulyakyo omo nda yethu, ni bugha ambu, eriyitheghereryakyo ndeke. Thwangana kolha ekyo erilhabira omw’isaba, erisoma, n’erighanirya. Eky’erimbere, thukasaba thukathegheka omuthima wethu eryangirira amalengekania wa Nyamuhanga. Neryo ithwasoma omwatsi we Biblia. N’ekindi, ithw’imana hake erighanirya, erilengekania kutsibu okwa bya thwamabirisoma. Imukendi lhwiririraki? Thukabya thukongera erighanirya, kwa thukan’ongera thuthya eriyitheghererya Ekinywe kya Nyamuhanga.
17. Busana naki ni kikulhu erighanirya okwa bya thukasoma omwa Biblia?
17 Busana naki ni kikulhu erisoma e Biblia n’erighanirya kuyo? Erikolha ekyo kikathuha akaghalha akathukayithagha erithulha omwatsi w’Obwami lino n’erisyathulhughania omwatsi owakalire ow’eritswera ogho thwangana syathulha omwa buthuku obukayasa. Kandi thukabya thukaghanirya okwa mibere ya Yehova emibuyanga, obughuma bwethu nayu bukaghuma. Busana n’ekyo, thukabana ekindu ekisihirire, kutse ekikatsemesaya—erithekana n’eritsemera ebyo thuwithe.—Esy. 119:103.
THUKAHIRAWA MW’OMUHWA W’ERIYIYINIA
18. Ni kyahi ekyo abandu b’omwa bulhambu bwethu bakendi syaminya, kandi busana naki?
18 Ezekieli abya muminyereri, ithwe eyihi. Aliwe, thwabirithwamu erilholha embere erithulha omwatsi owasondolibawa ogho Yehova abirilhangira athi akabya iniane omwa Kinywe kiwe erihika aho akendi syabughira athi omubiiri w’erithulira amahwa. Endambi y’eritswera yikendi syabya yikahika, abandu omwa bulhambu bwethu sibendi syabya n’enzumwa eyanga leka ibabugha bathi mubathakungwa kutse bathi Nyamuhanga mwabagheghena. (Eze. 3:19; 18:23) Omwakanya k’ekyo, bakendi syaminya ngoku omwatsi ogho thwathulha alhua oku Nyamuhanga.
19. Ni byahi ebikendi thuha amaaka w’eriberererya omubiiri wethu w’erithulira?
19 Ni kyahi ekikendi thuha amaaka w’eriberererya omubiiri wethu w’erithulira? Bya n’ebindu bisathu ebyaghumaya Ezekieli. Thukalholha embere erithulira kundi thunasi ngoku thwathumawa na Yehova, omulimu abuyirire wa Nyamuhanga akathuha amaaka, kandi Ekinywe kya Nyamuhanga kikaghumaya erikirirya lyethu. Busana n’obuwathikya bwa Yehova, thukahirawa mw’omuhwa w’erikolha omubiiri wethu w’erithulira n’eriyiyinia “erihika oko nduli.”—Mt. 24:13.
OLHWIMBO 65 Lholha Embere!
a Omo mwatsi ono, thukendi kania okwa bindu bisathu ebya wathikaya omuminyereri Ezekieli erikolha omubiiri wiwe w’erithulira. Thukendibya thunemukania oko mibere Yehova awathikirayamu omuminyereri wiwe oyu, thukendi ghumya eriyikethera lyethu ngoku Yehova akendi thuwathikya erikolha omubiiri wethu.