1-2. (a) Ni bibulyo byahi ebya thukendi kaniako? (b) Ni kyahi ekikakanganaya ngoku Yehova anzire kutsibu erithuwathikya?

 YEHOVA angana thuwathikya erighumira ebitsibu n’erileka ithwabana etseme omwa mubiiri wethu owabuyirire. Akathuwathikaya omwa nziraki? Kandi thwanga ghasirwa thuthi ndeke omwa buwathikya obwa Yehova akaha? Thukendi subirya okwa bibulyo ebi omo mwatsi ono. Aliwe, thuthe thwakania okwa by’erisubirya, thutsuke erikania okwa kibulyo kino ekisosene nabyo: Mbwino kwenene Yehova ananzire erithuwathikya?

² Ekinywe ekya mukwenda Paulo akolesaya omwa baruha yiwe okwa Baebrania kyangana thuwathikya eribana eky’erisubirya. Paulo mwahandika athi: ‘Yehova ni muwathikya waghe, singendi syubaha! Ko abandu banganyikolhaki kwehi?’ (Ebr. 13:6) Ekitabu kighuma ekikakanaya okwa biri omwa Biblia kikakanganaya ngoku ekinywe “muwathikya,” ngoku kikolesibirwe omwa mulhondo oyu, kikamanyisaya omundu oyukanguha eriyatsunira oyuwithe obuyithawa. Thathera akasasani Yehova akanguha eriyawathikya oyuli omwa bitsibu. Ahathe erithika-thika wukalhuaho iwaligha ngoku ekinywe eki kikakanganaya ngoku Yehova anayitheghekire​—ee, anzire kutsibu—​eribya Muwathikya wethu. Yehova anali okwa lhuhandi lhwethu, thwangana yiyinirya ebitsibu byethu ithunatsemire.

3. Ni nzira syahi isathu esya Yehova akathuwathikirayamo eriyiyinirya ebitsibu byethu ithunatsemire?

³ Ni nzira nga syahi esya Yehova akathuwathikirayamo eriyiyinirya ebitsibu byethu ithunatsemire? Eribana eky’erisubirya, thusukule ekitabu kya Isaya. Busana naki? Amangyi w’okwa maminyereri agho Isaya asondolibawa erihandika akahamba oko baghombe ba Nyamuhanga munabwire. Eryongera  okw’ekyo, mughulhu mungyi, Isaya akakanaya oku Yehova omw’ikolesya ebinywe ebyangana thwolhobera eriyitheghererya. Thuthalengekania oku Isaya sura 30. Aho, omwa mubughe owakaleka ithwathera akasasani omwa bulengekania, Isaya akasoborera Yehova ng’akathuwathikaya athi ithwe ng’abandu biwe (1) omw’ihulikirira ndeke n’erisubirya emisabe yethu, (2) omw’ithuha obusondoli, na (3) omw’ithuha emighisa lino n’omwa buthuku obukasa. Leka thulebaye ndeke esyonzira isathu esi esya Yehova akathuwathikirayamo.

4. (a) Yehova mwakania athiki okwa Bayuda ab’omwa biro bya Isaya, kandi erighunzerera ni kyahi ekyo alighira eribya? (b) Ni mahaki agho Yehova aha abathaleghulha? (Isaya 30:18, 19)

⁴  Omwa binywe ebikatsuka Isaya sura 30, Yehova akakanaya okwa Bayuda ‘ng’abaana b’erihona,’ ‘abakathomeka ebibi oko bibi.’ Akalholha embere omw’ibugha athi: “Aba ni bandu b’erihona, . . . abathanzire eriowa erikangirirya ly’Omwami Mukulhu.” (Isa. 30:1, 9) Kundi mubaghana erihulikirira, Isaya mwalhaghulha athi Yehova angabalekire ibabana ebitsibu. (Isa. 30:5, 17; Yer. 25:8-11) Kandi kwenene Abanya Babeli mubabathwalha omwa bunyewa. Nomwabine, habya ihane abandi Bayuda ababya bathaleghulha, neryo Isaya mwabaha omwatsi w’amaha. Mwababwira athi kiro kighuma Yehova akendi syabasubya e Yerusalemu. (Soma Isaya 30:18, 19.) Kandi ekyo ky’ekyanabya kyabere. Yehova mwabalhusya omwa bunyewa. Aliwe, omulhamu wabu syangabere aho n’aho. Ebinywe “Omwami Mukulhu akasonda eribaghanyira” kandi “akalinda” bikakanganaya ngoku hanga lhabire obuthuku bulebe abathaleghulha abo imubalhamibwa. Erithwalira haghuma, Abaisraeli mubaghunza myaka 70 omwa bunyewa mwe Babeli emisighalira y’okw’ibo bathe balighirwa erisuba e Yerusalemu. (Isa. 10:21; Yer. 29:10) Abandu babere babirisuba ewabu, omo mwanya w’emisoni eya bathoghongaya busana n’obunyewa mumwasuba emisoni y’etseme.

5. Ni kakasibwa lyahi eryathukabana omu Isaya 30:19?

⁵ Munabwire thwangana bana erihumulikana omwa binywe bino: ‘Kwenene asyabakwa olhukogho busana n’omulenge w’erilhaka’ lyenyu. (Isa. 30:19) Isaya akathukakasaya ngoku Yehova akendi hulikirira ndeke thukamulhakira, kandi akendi subirya lhuba emilhake yethu. Isaya akongerako athi: “Omughulhu asyowalyo asyabasubirya.” Ebinywe by’erikakasya ebyo bikathwibukaya ngoku Thatha wethu anayitheghekire​—ee, anzire kutsibu—​eriwathikya abakamusaba obuwathikya. Eriminya eki kikaleka ithwayiyinia ithunatsemire.

6. Ebinywe ebiri omwa mulhondo 19 omwa Kihebrania bikakanganaya bithi ngoku Yehova akahulikirira emisabe ey’obuli mughombe wiwe?

⁶ Ni rindi kakasibwa lyahi erihambire okwa misabe yethu erya thwanga bana omwa mulhondo oyu? Yehova akahulikirira emisabe y’obuli mughuma w’okw’ithwe. Busana naki ithwabugha ekyo? Ekitsweka ky’erimbere ekya Isaya sura 30 kikakanaya okwa gurupu kundi Yehova aby’akakania n’abandu biwe ng’egurupu. Nomwakine indi omulhondo 19 omwa Biblia ye Kinandi hakakanganaya hathi Yehova aby’akakania n’egurupu y’abandu, aliwe omwa Kihebrania hakakanganaya hathi aby’akakania n’obuli mundu ahabwiwe. Omwa mubughe oyo hakabugha hathi: “Siwendi syaswalira”; “kwenene asyakukangania olhukogho”; “asyakusubirya.” Iyo nga Thatha w’olhwanzo, Yehova syalibwira mughalha wiwe kutse mwali wiwe oyuhwere amani athi, “Wutholere iwaghuma nga mulikyenyu olya.” Omwakanya k’ekyo, akathulhangira obuli omundu ahabwiwe kandi akahulikirira emisabe yethu.​—Esy. 116:1; Isa. 57:15.

7. Isaya na Yesu bakakanganaya bathi ekiyithawa ky’erisaba omw’ihathikana?

 ⁷ Thukabya thukabwira Nyamuhanga okwa kikathulyambaya, erisubirya lya Yehova ery’aho n’aho lyanganabya iry’erithuha amaaka agho thukayithagha erighumira emibere eya thulimo. Kandi ekitsibu kyethu kyamathendihwa oko ndambi eya thulhue thulengekenie, ithwangana yithagha eribera erisaba Yehova y’amaaka w’erikighumira. Anzire ithwakolha ekyo. Ekyo kilhangirikire omwa binywe bya Isaya bino: “Simuleke [Yehova] akalhuhuka.” (Isa. 62:7) Ekyo kikamanyisayaki? Thutholere ithwasaba Yehova omw’ihathikana eribya nga sithwathamulighira erilhuhuka. Ebinywe bya Isaya bikathwibukaya omusyo wa Yesu owahambire okwa musabe owali omu Luka 11:8-10, 13. Aho Yesu akathuhiramo omuhwa w’erisaba ‘omw’ihathikana’ n’erilholha embere erisaba omulimu abuyirire. Kandi thwangana lemba-lemba Yehova erithuha obusondoli obwa thukayithagha nuku thuthwemo ndeke.

8. Kera, ebinywe ebiri omu Isaya 30:20, 21 mubyabererera bithi?

⁸ Soma Isaya 30:20, 21. Amahe we Babeli abere akaghothera e Yerusalemu habw’omwaka mughuma n’embindi, obulighe obw’abandu balhabamo mubwabya bwa buli kiro ng’omuggati n’amaghetse. Aliwe erikwamana n’omulhondo wa 20 na 21, Yehova mwalhaghanisya Abayuda athi bamayisubamo n’erihindulha emibere yabu, iniakendi balhamya. Akakania oku Yehova ‘ng’Omukangirirya wabu,’ Isaya mwalhaghanisya abandu athi Yehova angabakangirirye ngoku banga muramya omo nzira ey’akaligha. Ebinywe ebi mubyabererera omughulhu Abayuda balhua omwa bunyewa. Yehova mwayikangania ng’Omukangirirya wabu Mukulhu, kandi erilhabira omwa busondoli bwiwe, abandu biwe mubathoka erisuba-subania eriramya ly’okwenene. Munabwire thuwithe omughisa eribya ithuwithe Yehova ng’Omukangirirya wethu Mukulhu.

9. Ni nzira yahi nguma eya Yehova akathuheramo obusondoli munabwire?

⁹ Akalholha embere erikania omwa nzira y’omusyo, Isaya akathukanayako ng’abathendekwa abo Yehova akakangiriraya omo nzira ibiri. Ey’erimbere, Isaya akabugha athi: “Ameso wenyu asyalhangira Omukangirirya wenyu.” Omwa musyo oyu, Omukangirirya akakanganibawa ng’oyuwimene embere sy’abathendekwa. Ni lhusunzo ithwe erighasirwa omw’ikangirirya liwe munabwire. Yehova akathukangiriraya athi? Akakolha eki erilhabira omwa kithunga kiwe. Ka thukasima obusondoli bwiwe obulhangirikire obwa thukathunga  omwa kithunga kiwe! Obusondoli obwa thukabana omwa mihindano y’omwa kithunga n’okwa mihindano eminene-minene kuthya n’omwa bitabu byethu, esyondegheka sye JW Broadcasting^®, n’ebindi bikathuwathikaya eriyiyinirya ebitsibu ithunatsemire.

10. Ni mwanziraki thukowa “ekinywe enyuma [syethu]”?

¹⁰ Isaya akahandika enzira eyakabiri eya Yehova akathukangirirayamo, athi: “Amathwe wenyu asyowa ekinywe enyuma wenyu.” Hano omuminyereri akakanaya oku Yehova ng’omukangirirya oyukahulikirira ndeke oyukwamire abathendekwa biwe b’enyuma, eribakangania enzira y’erilhabamo. Munabwire thukowa omulenge wa Nyamuhanga akasira enyuma syethu. Thuthi? Ebinywe bya Nyamuhanga ebya sondolibawa byahandikawa kera-kera omwa Biblia, emyaka mingyi enyuma. Neryo thukabya thukasoma e Biblia, thukabya ng’abakowa omulenge wa Nyamuhanga akasira enyuma syethu.​—Isa. 51:4.

11. Erithoka eriyiyinia ithunatsemire, ni bindu byahi ebya thutholere erikolha, kandi busana naki?

¹¹ Thwanga ghasirwa thuthi ndeke omwa busondoli obwa Yehova akaha erilhabira omwa kithunga kiwe n’Ekinywe kiwe? Lhangira ebindu bibiri ebya Isaya akabugha. Eky’erimbere, “enzira y’eyi.” Ekyakabiri, “mughendere muyo.” (Isa. 30:21) Sikirighunza eriminya “enzira.” Kandi thutholere ‘ithwaghendera muyo.’ Erilhabira omwa Kinywe kya Yehova, ngoku kikasoborerawa omwa kithunga kiwe, thukaminya ebya Yehova akathuyithaghako. Kandi thukaminya ngoku thwanga ghendera okwa bya thuk’igha. Erithoka eriyiyinia ithunatsemire omwa mubiiri wa Yehova, thutholere ithwaghendera okwa bindu byosi bibiri ebi. Neryo aho imuthukendi yikethera ngoku Yehova akendi thutsumulha.

12. Ngoku kiri omu Isaya 30:23-26, Yehova mwatsumulha athi abandu biwe?

¹² Soma Isaya 30:23-26. Obuminyereri obu mubwabererera buthi Abayuda bakasuba ewabu e Israeli bakalhua omwa bunyewa mwe Babeli? Mubabana emighisa mingyi​—kinyamubiri na bunyakirimu. Yehova mwatsumulha abandu biwe omw’ibaha ebyalya bingyi eby’ekinyamubiri. Aliwe ekikulhu kutsibu, mwabaha ebyalya bingyi eby’obunyakirimu eriramya ly’okwenene likaghenda likasuba-subanibwa. Emighisa y’obunyakirimu eyo abandu ba Nyamuhanga babana okwa buthuku obo yabya yilengire kutsibu ekyosi-kyosi ekyo balhabamo kera. Ngoku kikanganibwe omwa mulhondo 26, Yehova mwongera kutsibu ekyakakalha ky’obunyakirimu. (Isa. 60:2) Emighisa ya Yehova muyawathikya abaghombe biwe erilholha embere erimukolera ibanatsemire kandi ibanathekene “omo butseme bw’omuthima.”​—Isa. 65:14.

13. Obuminyereri obuhambire okw’isuba-subania eriramya ly’okwenene bwabiribererera buthi munabwire?

 ¹³ Obuminyereri obuhambire okw’isuba-subania eriramya ly’okwenene bunathuhambireko namunabwire? Ndeke-ndeke! Omwa nziraki? Eritsuka 1919 E.K., esyomiliyoni sy’abandu babirilhua omwa bunyewa bwe Babeli Mukulhu, amadini wosi w’amabehi. Babirisondolhwa eringira omwa mwanya owuwene kutsibu kwilhaba Ekihugho Ekyalhaghanisibawa ekya Baisraeli. Babirilethwa omwa paradiso ey’obunyakirimu. (Isa. 51:3; 66:8) Eparadiso ey’obunyakirimu eyo niki?

14. Eparadiso ey’obunyakirimu niki, kandi ni bahi abali muyo munabwire? (Lebaya Erisoborera Ekinywe.)

¹⁴ Eritsuka 1919 E.K., abahakabibwa babiritsemera eribya omwa paradiso ey’obunyakirimu. b Endambi yinemulhaba, abawithe amaha w’erisyabya okwa kihugho, “esindi mbuli,” nabu babirikalha omo mwanya w’obunyakirimu oyu kandi babiritsemera emighisa ya Yehova mingyi.​—Yn. 10:16; Isa. 25:6; 65:13.

15. Eparadiso ey’obunyakirimu yiri hayi?

¹⁵ Munabwire, omwanya w’obunyakirimu, kutse eparadiso yiri hayi? Abaramya ba Yehova bali omwa bitsweka byosi eby’ekihugho. Busana n’ekyo, eparadiso ey’obunyakirimu eyo balimu yiri omwa kihugho kyosi. Neryo kwesi, mbulha thwikere hayi omwa kihugho munabwire, thwanganabya omwa paradiso eyo thwamabya ithunemusighika eriramya ly’okwenene n’omuhwa.

16. Thwanga lholha thuthi embere erilhangira obubuya bw’eparadiso ey’obunyakirimu?

¹⁶ Erisighalha omwa paradiso ey’obunyakirimu, ekighuma ky’okwa bindu ebya thutholere ithwakolha, ly’erilholha embere erisima kutsibu ekithunga ky’Ekikristayo ekiri omwa kihugho kyosi. Thwanga kolha ekyo kya thuthi? Omw’ihwerya amalengekania w’okwa bubuya, butsira ebisobyo bya bali muyo. (Yn. 17:20, 21) Busana naki ekyo ni kikulhu? Thalengekania okw’ilinganisya lino. Thukabya ithunasi ngoku thukendi bana emithi muthina-muthina omwa musithu owuwene. Kuthya, eparadiso y’obunyakirimu eyiri omwa bithunga munabwire  yirimo abandu muthina-muthina abakalinganisibawa n’emithi. (Isa. 44:4; 61:3) Thutholere ithwalholha embere erihwerya amalengekania okwa bubuya “bw’omusithu,” butsira okwa bisobyo by’obuli “muthi” owali hakuhi nethu. Sithwanga lighira ebisobyo byethu kutse eby’abandi omwa kithunga bikathulengemerya okw’ilhangira obubuya bw’ekithunga ky’Ekikristayo ekiri omwa kihugho kyosi ekiri bughuma.

17. Obuli mughuma w’okw’ithwe angakolhaki erilhangira athi omwa kithunga mukabya imune obughuma?

¹⁷ Obuli mughuma w’okw’ithwe angakolhaki erilhangira athi obughuma obu bukabya ibuneho? Omw’ibya oyukahiraho obuholho. (Mt. 5:9; Abar. 12:18) Obuli eribya w’erimbere erihiraho obuholho n’abandi omwa kithunga, thukongera okwa bubuya bwe paradiso ey’obunyakirimu. Thukabya ithunibukire ngoku Yehova abiriletha obuli oyuli omwa paradiso y’obunyakirimu omw’iramya ly’okwenene. (Yn. 6:44) Thalengekania Yehova ng’atholere eribya iniakatsema bungahi akalhangira thukakolha kutsibu erighumya obuholho n’obughuma ebiri omwa bandu abo akalhangira mwa b’obughuli​—abaghombe biwe!—​Isa. 26:3; Hag. 2:7.

18. Ni byahi ebya thutholere ithwabya ithunemughaniryako, kandi busana naki?

¹⁸ Thwanga ghasirwa thuthi ndeke omwa mighisa eyo thukabana ithwe ng’abaghombe ba Nyamuhanga? Thwangana lengekania kutsibu okwa bya thuk’igha omwa Kinywe kya Nyamuhanga n’omwa bitabu byethu ebiseghemere okwa Biblia. Erigha n’erighanirya ng’eryo bikendi thuwathikya erikulha-kulhania emibere y’Ekikristayo eyikaleka ‘ithwanzana kutsibu ng’abasubeneko’ omwa kithunga. (Abar. 12:10) Thukabya thukaghanirya okwa mighisa eya thuwithe lino, thukaghumaya obughuma bwethu na Yehova. Kandi erighanirya okwa mighisa eya Yehova abirithulhaghanisya kikendi leka amaha wethu w’erimukolera kera na kera iniabya wonyine-nyine. Ebyosi ebi bikendyongera etseme yethu thukakolera Yehova lino.

19. (a) Ngoku kiri omu Isaya 30:18, ni kyahi ekya thwanga kakasya? (b) Ni kyahi ekikendi thuwathikya eriyiyinia ithunatsemire?

¹⁹ Yehova ‘analindire’ erisyathuhanganira akaletha enduli y’ekihugho kibi kino. (Isa. 30:18) Thuyikethere ngoku Yehova​—“Nyamuhanga w’eribanza lithunganene”—​syendi syalighira ekihugho kya Sitani kikabya ikineho kwilhaba ngoku litholere. (Isa. 25:9) Ithwe haghuma na Yehova thunalindirire ekiro ky’omulhamu ekyo erihika. Thunalindirire ekyo, thwabirithwamu erilholha embere erilhangira olhusunzo lhw’omusabe mwa lhw’obughuli, eriyeghesya Ekinywe kya Nyamuhanga n’erikighenderako, n’erighanirya okwa mighisa yethu. Thunemukolha ekyo, Yehova akendi thuwathikya eriyiyinia ithunatsemire thukamuramya.