OMWATSI W’ERIGHA 46
OLHWIMBO 49 Eritsemesya Omuthima wa Yehova
Baghalha Bethu—Mbwino Munemusimbirira Eribya Abaghombe Abawathikya?
“Erihithya likaletha obutseme bunene kwilhaba erihebwa.”—EMIB. 20:35.
EKIGHENDERERWA
Erihira omwa baghalha bethu ababatizibirwe mw’omuhwa w’erisimbirira n’eritholera eribya baghombe abawathikya.
1. Omukwenda Paulo mwalhangira athi abaghombe abawathikya?
ABAGHOMBE abawathikya bakakolha emibiiri y’omughaso omwa bithunga. Kilhangirikire ngoku omukwenda Paulo mwasima abalhume abathaleghulha aba. Ng’eky’erileberyako, omughulhu ahandikira Abakristayo be Filipi, mwakikangania kutsibu-tsibu omw’iramukya abaghombe abawathikya haghuma n’abasyakulhu.—Fil. 1:1.
2. Mughalha wethu oyukahulhawamo Luis akayowa athi okwa lhukwamirwa lhwiwe ng’omughombe omuwathikya?
2 Baghalha bethu bangyi ababatizibirwe, mbulha bakine balere kutse babirikulha, bakabana etseme nene bakakolha ng’abaghombe abawathikya. Ng’eky’erileberyako, Devan abya w’emyaka 18 akabya mughombe muwathikya. Okwa lhundi lhuhandi, mughalha wethu oyukahulhawamo Luis mwasombolhwa ng’omughombe omuwathikya akatsuka emyaka yiwe ya 50. Mwakangania eriyowa eryo abangyi bakabya nalyo akabugha athi, “Ngayowa ini lhusunzo lhunene erikolha ng’omughombe omuwathikya, kutsibu-tsibu namalengekania okwa lhwanzo lhunene olho ekithunga kyabirinyikangania!”
3. Ni bibulyo byahi ebya thukendi kaniako?
3 Wamabya iwuli mughalha wethu oyubatizibirwe aliwe isiwuli wabya mughombe omuwathikya, mbwino siwanga kikolha mwa kilhubirirwa kyawu? Ni byahi ebyanga kuhira mw’omuhwa w’erikolha ekyo? Kandi ni byahi ebya wangakolha erikwamana n’Amasako ebyanga leka iwatholera? Omo mwatsi ono, thukendi lebya eby’erisubirya okwa bibulyo ebyo. Aliwe thuthatsuka erikania okwa lhukwamirwa lhw’omughombe omuwathikya.
OMUGHOMBE OMUWATHIKYA AWITHE LHUKWAMIRWAKI?
4. Omughombe omuwathikya awithe lhukwamirwaki? (Lebaya n’ekisasani.)
4 Omughombe omuwathikya ni mughalha wethu oyubatizibirwe oyu sombwerwe n’omulimi abuyirire eriwathikya abasyakulhu erikolha emibiiri y’omughaso mingyi omwa kithunga. Abandi baghombe abawathikya bakalhangira bathi abathuliri banawithe obulhambu n’ebitabu ebikaghunza omwa mubiiri wabo w’erithulira. Abandi bakawathikaya omw’iyonza n’erisugha Ekisenge ky’Obwami. Kandi abaghombe abawathikya bakakolha ng’abathangiriri kandi ibakolha okwa byuma by’emirenge n’esyovidiyo omwa mihindano. Emibiiri mingyi eyo abaghombe abawathikya bakakolha ni y’omughaso munene. Aliwe, abaghombe abawathikya ni balhume abakahira eby’obunyakirimu by’embere; banzire Yehova kandi bakaghendera okwa bihano biwe ebithunganene. Kandi banzire kutsibu Abakristayo balikyabo. (Mt. 22:37-39) Mughalha wethu oyubatizibirwe angasimbirira athi eribya omughombe omuwathikya?
Abaghombe abawathikya bakagherereraya Yesu omw’iyihayo erikolera abandi (Lebaya enungu 4)
5. Kikamanyisaki erisimbirira eribya omughombe omuwathikya?
5 E Biblia yikathondogholha ebyangaleka mughalha wethu iniatholere erisombolhwa ng’omughombe omuwathikya. (1 Tim. 3:8-10, 12, 13) Wangana simbirira olhusunzo olhu omw’iyeghesya ebikaleka iwatholera ebiri omo Masako n’erilengaho eribighenderako. Aliwe wutholere iwatsuka erilebya ndeke ekilhubirirwa kyawu eky’erianza eribya omughombe omuwathikya.
NI KYAHI EKIKAKUHIRA MW’OMUHWA OW’ERISIMBIRIRA ERIBYA OMUGHOMBE OMUWATHIKYA?
6. Ni kyahi ekyanga kuhira mw’omuhwa w’erikolera balikyenyu b’omubiiri wosi-wosi? (Matayo 20:28; Lebaya n’ekisasani ky’okwa .)
6 Ebyosi ebya Yesu Kristo oyuli ky’erileberyako kyethu kikulhu akolha, abikolha busana n’olhwanzo olhw’awithire Thatha wiwe n’abandu. Olhwanzo olho mulhwaleka iniakolha kutsibu n’erikolha emibiiri eyahisi busana n’abandi. (Soma Matayo 20:28; Yn. 13:5, 14, 15) Olhwanzo lhwamabya ilhwa lhukakuhira mw’omuhwa, Yehova akendi kutsumulha n’erikuwathikya erihika okwa kilhubirirwa kyawu ky’eritholera eribya omughombe omuwathikya.—1 Kor. 16:14; 1 Pet. 5:5.
Omwa ebya akolha, Yesu mw’akakangirirya abakwenda biwe erikolera abandi omw’iyikehya omwakanya k’eriyisonderya ebitsumbi (Lebaya enungu 6)
7. Busana naki mughalha wethu atholere iniayihighulha okwa miyiheko?
7 Mughulhu mungyi, abandu omwa kihugho bakayighomba abakayihamaya. Kwabithe bithya omwa kithunga kya Yehova. Mughalha wethu oyuwanzire abandi, nga Yesu kw’akolha, syalianza erithabalha okwa bandi kutse erilhangirwa mw’ow’ekitsumbi. Omundu w’emiyiheko ng’oyo amasombolhwa omwa kithunga, inianganaghana erikolha emibiiri y’ahisi eyikayithaghisibawa eritsomana esyombuli sya Yehova esy’obughuli. Angana yowa emibiiri eyo nga siyimutholere. (Yn. 10:12) Yehova syanga tsumulha akaghalha k’owosi-wosi oyukayipipa kutse oyukayiheka.—1 Kor. 10:24, 33; 13:4, 5.
8. Ni habulha lyahi erya Yesu aha abakwenda biwe?
8 Muhanayira nibya n’abanywani ba Yesu ab’okwa ndungu bamasimbirira esyonzunzo busana n’esyonzumwa esithatholere. Thulebaye ekyabya okwa babiri b’okwa bakwenda ba Yesu—Yakobo na Yohana. Mubasaba Yesu bathi abahe ebitsumbi by’embere-mbere omwa Bwami bwiwe. Yesu mwathabatsemera busana n’emiyilhabiriryo. Omwakanya k’ekyo, mwasoborera abakwenda abosi 12 athi: “Oyuwanzire eribya mukulhu omwakathi-kathi kenyu atholere iniabya mukoli wenyu, n’oyuwanzire eribya w’erimbere omwakathi-kathi kenyu atholere iniabya mukobe w’abosi.” (Mk. 10:35-37, 43, 44) Baghalha bethu abakasimbirira eribya abaghombe abawathikya ibanawithe ebilhubirirwa ebyuwene—ni bugha ambu, eby’erikolera abandi—bakaghasira ekithunga.—1 Tes. 2:8.
NI KYAHI EKYANGA GHUMYA ERIYISUNZA LYAWU LY’ERISIMBIRIRA ERIBYA OMUGHOMBE OMUWATHIKYA?
9. Wanga ghumya wuthi eriyisunza lyawu ly’erisimbirira eribya omughombe omuwathikya?
9 Ahathe erithika-thika, wanzire Yehova kandi wanzire erikolera abandi. Nomwabine, wanganabya isiwuwithe eriyisunza ery’erikolha eyindi mibiiri eya omughombe omuwathikya atholere iniakolha. Wanga ghumya wuthi eriyisunza lyawu ly’erianza erikolha? Busana naki iwuthalengekania okwa tseme eyikalhwiririra omw’ikolera balikyenyu? Yesu mwabugha athi: “Erihithya likaletha obutseme bunene kwilhaba erihebwa.” (Emib. 20:35) Mwaghendera okwa musingyi oyu. Mwabana etseme y’okwenene busana n’erikolera abandi, nawu iwukendi banayo.
10. Yesu mwakangania athi ku mwatsema akakolera abandi? (Mariko 6:31-34)
10 Thulebaye eky’erileberyako ekikakanganaya ngoku Yesu mwatsema akakolera abandi. (Soma Mariko 6:31-34.) Buthuku bughuma, Yesu n’abakwenda biwe babya ibabirilhuha. Babya ibanemughenda omo mwanya ow’athe mw’abandu nuku bayalhuhuke hake. Aliwe abandu bangyi mubabatsuka embere, bakanza Yesu abakangiriraye. Angana ghanire. Kundi nibya, iyo n’abanywani biwe sibabya “bawithe n’endambi y’erilhuhuka nibya n’ey’erirya.” Kutse Yesu anganabwire abandu athi baghende abibabwira ekwenene nguma kutse ibiri. Aliwe busana n’olhwanzo, “mwatsuka eribakangirirya emyatsi mingyi.” Kandi mwalholha embere eribakangirirya erihika aho buthuku bwirira. (Mk. 6:35) Mwakolha ekyo, butsira kundi aby’atholere erikikolha, aliwe kundi ‘mwabakwira obulighe.’ Mwanza eribakangirirya kundi aby’abanzire. Yesu mwabana etseme nene busana n’erikolera abandi.
11. Yesu mwakolera athi abahulikiriri biwe omwa nzira eyikaghasa? (Lebaya n’ekisasani.)
11 Yesu abere akakolera abandu, mwathasubulira okw’ibakangirirya. Mwabaha n’ebiyithawa byabu by’ekinyamubiri. Omwa nzira y’ekithiko-thiko, mwababanira ebyalya neryo amabiha abigha biwe athi babaghabirebyo. (Mk. 6:41) Omw’ikolha ekyo, mwakangirirya abigha biwe ngoku bangakolera abandi. Kandi mwabakangania ngoku emibiiri eyikaghasa eyo—ng’eya abaghombe abawathikya bangakolha—ni y’omughaso munene. Thalengekania okwa tseme eyo abakwenda babana bakakolha na Yesu omw’ighabira abandu b’ebyalya ebyabanika omwa nzira y’ekithiko-thiko erihika aho ‘abosi balira n’ery’ughutha’! (Mk. 6:42) Oyu si w’omurundi mughuma musa ogho Yesu ahiriramo ebiyithawa by’abandi by’embere okwa biwe. Mwakolesya engebe yiwe yosi y’okwa kihugho erikolera abandu. (Mt. 4:23; 8:16) Yesu mwabana etseme n’erithekana busana n’erikangirirya abandi na busana n’eritsomana ebiyithawa byabo inianayikehirye. Nawu ahathe erithika-thika, iwukendi yibanira etseme nene wamasimbirira eribya omughombe omuwathikya iwunawithe ebilhubirirwa ebyuwene.
Olhwanzo olho wuwithire Yehova n’eriyisunza ly’erikolera abandi bikendi kuhira mw’omuhwa w’erikolera ekithunga omwa nzira eyosi-yosi (Lebaya enungu 11) a
12. Busana naki obuli mughuma w’okwithwe syatholere akalengekania athi syawithe eky’angakolha omwa kithunga?
12 Wamayowa wuthi siwuwithe amaaka w’embaghane, isiwahwa amani. Ahathe erithika-thika, wunawithe emibere eyangaleka iwabya w’omughaso omwa kithunga. Erilhabira omw’isaba, wangana ghasirwa ndeke omw’isoma omwatsi wa Paulo owali omwa 1 Abanya Korinto 12:12-30. Ebinywe bya Paulo bikakanganaya ndeke-ndeke ngoku nawu, ng’obuli mughombe wa Yehova, wukayithaghisibawa kandi wuli w’omughaso omwa kithunga. Lino, wamabya isiwuli waberererya ebikayithaghisibawa eritholera eribya omughombe omuwathikya, isiwabikyako. Omwakanya k’ekyo, busana naki iwuthakolha ekyosi-kyosi ekyo wangathoka nuku wubye w’omughaso embere sya Yehova n’abalikyenyu? Yikethere ngoku abasyakulhu bakendi lengekania okwa maaka wawu bikahika okwa lhusunzo lhwosi-lhwosi olho bangakuha.—Abar. 12:4-8.
13. Ni kyahi ekya thutholere ithwaminya okwa bingyi ebikaleka abalhume abasombwerwe ibatholera?
13 Lengekanaya okwa yindi nzumwa eyangaleka iwatholera eribya mughombe muwathikya: Ebingyi by’okwa bikaleka omundu iniatholera bikayithaghisibawa okwa Bakristayo abosi. Kundi nibya, Abakristayo abosi batholere ibayithunda hakuhi na Yehova, ibayibanira etseme y’erihithya, n’erihiraho eky’erileberyako ekyuwene omwa ngebe y’Ekikristayo. Kutsibu-tsibu, ni byahi ebya baghalha bethu bangakolha erisimbirira eribya abaghombe abawathikya?
NGOKU WANGA SIMBIRIRA ERIBYA OMUGHOMBE OMUWATHIKYA
14. Kikamanyisayaki eribya ‘oyuthethwalha emyatsi mwa y’olhutseghe-tseghe’? (1 Timoteo 3:8-10, 12)
14 Leka thulebaye ebighuma by’okwa bikaleka omundu iniatholera ebiri omu 1 Timoteo 3:8-10, 12. (Soma.) Omughombe muwathikya atholere iniabya ‘oyuthethwalha emyatsi mwa y’olhutseghe-tseghe.’ Ekinywe ekyo kyangana thasyahindulhwa mwa “oyutholere erisikibwa,” “oyusikibwe,” kutse “ow’ekitsumbi.” Eki sikirimanyisaya kithi siwanga thasya seka kutse erisatha. (Omu. 3:1, 4) Aliwe, siwutholere wukalhangira esyongwamirwa syawu mwa sy’olhutseghe-tseghe. Wamabya iwunasibwe ng’omuyiketherwa kandi ng’omuyisiwa, ekithunga ikikendi kusikya.
15. Ebinywe “isibabya b’othulimi thubiri” na “isibabya n’omururu w’erighoba omwa nzira eyithatholere” bikamanyisayaki?
15 “Isibabya b’othulimi thubiri” kikamanyisaya kithi ebya wukabugha wukabimanyisaya, wuli w’okwenene, kandi muyiketherwa. Wukaberereraya ebya wukabugha, kandi siwuli theba abandi. (Emi. 3:32) “Isibabya n’omururu w’erighoba omwa nzira eyithatholere” kikamanyisaya kithi wuli w’okwenene omwa suburu yawu n’omwa by’esyosente. Isiwendi lhangira obunywani bwawu n’Abakristayo balikyenyu ng’akaghisa k’erikoleramu esyosente.
16. (a) Ebinywe “sibabye banywi b’obwabu bunene” bikamanyisayaki? (b) Kikamanyisayaki eribya ‘n’obunyamuthima-thima obuhenirye’?
16 “Isibabya banywi b’obwabu bunene” kikamanyisaya kithi siwutholere wukaminywa ng’omunywi. Eribya ‘n’obunyamuthima-thima obuhenirye’ kikamanyisaya kithi wukaghendera okwa bihano bya Yehova. Nomwakine indi siwuhikene, wukatsemera obuholho obukasa busana n’eribya n’obughuma obuwene na Nyamuhanga.
17. Mughalha wethu anga kangania athi ku ni muyiketherwa ‘anemulebibwa ng’anatholere’? (1 Timoteo 3:10; lebaya n’ekisasani.)
17 “Erilebibwa nga banatholere” kikamanyisaya kithi wabirikangania ngoku wangana yiketherwa kandi wangana hebwa olhukwamirwa. Busana n’ekyo, abasyakulhu bakendibya bakakuha olhukwamirwa, ghendera ndeke okwa busondoli bwabo n’eby’erighenderako ebya ekithunga kikaha. Lhangira wuthi wukayitheghereraya ndeke ebiri omwa lhukwamirwa olho kandi nga lhutholere ilhwahwa mughulhu wahi. Wukendibya wunemukolha ndeke obuli lhukwamirwa, abandi omwa kithunga bakendi lhangira n’erisima erikulha-kulhana lyawu. Abasyakulhu, mubye imunayitheghekire erithendeka baghalha bethu ababatizibirwe. (Soma 1 Timoteo 3:10.) Omwa kithunga kyenyu mune baghalha bethu ababatizibirwe abamatsuka emyaka yabu y’obulengwa kutse abalere kw’aho? Bane ky’erileberyako kibuya bikahika okw’iyeghesya? Bakana subiraya okwa mihindano n’erisangira omw’ithulira mughulhu wosi? Kyamabya ikwakiri kithya, mubahe esyongwamirwa esibatholere erikwamana n’emyaka yabu n’emibere eyo balimu. Omwa nzira eyi, baghalha bethu abalere aba bakendibya ‘ibamalebibwa nga banatholere.’ Neryo emyaka yabu y’obulengwa iyikendibya yikayahwa, ibanganabya ibamabiritholera eribya abaghombe abawathikya.
Omw’iha baghalha bethu ababatizibirwe b’esyongwamirwa, abasyakulhu bangana ‘balebya nga banatholere’ (Lebaya enungu 17)
18. Ebinywe “sihali oyukabahandikirira kw’omwatsi” bikamanyisayaki?
18 “Sihali oyukabahandikirira kw’omwatsi” kikamanyisaya kithi sihali lhubanza olhukalire olhwanga kuhirwako. Ni kwenene, Abakristayo bangana hangirirwa. Yesu mwahangirirwa, kandi mwalhaghulha athi ekiri ng’ekyo kyangabere n’okwa bigha biwe. (Yn. 15:20) Aliwe, wamalholha embere n’emibere yawu mibuya nga Yesu kw’akolha, iwukendibya n’erina eryuwene omwa kithunga.—Mt. 11:19.
19. Eribya “balhume abawithe mukali mughuma-mughuma” mwamuliki?
19 ‘Abalhume abawithe mukali mughuma-mughuma.’ Wamabya iwuli omwa butheke, wutholere iwaghendera okwa kihano kya Yehova eky’erimbere eky’obutheke—mulhume mughuma, mukali mughuma. (Mt. 19:3-9) Omulhume Omukristayo syatholere akasingira. (Ebr. 13:4) Aliwe ni bingyi ebikayithaghisibawa. Wutholere iwabya muthaleghulha oku mukali wawu, isiwulibya n’amalengekania awathatholere okwa bandi bakali.—Yobu 31:1.
20. Omulhume angasondolha athi eka yiwe “omwa mibere eyuwene”?
20 ‘Abakasondolha abaana babu n’amaka wabu omwa mibere eyuwene.’ Wamabya iwuli muthwe w’eka, siwutholere wukalhangira esyongwamirwa syawu mwa sy’olhutseghe-tseghe. Sondolha eriramya ly’eka mughulhu wosi. Mughulhu wosi sangira omw’ithulira n’obuli mughuma w’omw’eka yawu ngoku wanga thoka. Wathikaya abaana bawu eribya n’obughuma obughumire na Yehova. (Efe. 6:4) Omulhume oyukatsomana ab’efamile yiwe akakanganaya ngoku anganatsomana ekithunga.—Thasyalebaya na 1 Timoteo 3:5.
21. Wamabya isiwuli wabya mughombe omuwathikya, wanga kolhaki?
21 Baghalha bethu, wamabya isiwuliwabya omughombe omuwathikya, kisi-kisi omw’isaba lengekanaya okwa biri omwa mwatsi ono. Yeghesaye okwa bikayithaghisibawa eritholera eribya omughombe omuwathikya kandi kolha kutsibu erithoka eribiberererya. Lengekanaya okwa lhwanzo lhunene olho wuwithire Yehova n’abalikyenyu. Ongera eriyisunza lyawu ly’eribakolera. (1 Pet. 4:8, 10) Bana etseme eyikalhwiririra omw’ikolera erihiika lyawu ly’obunyakirimu. Thukasaba thuthi Yehova atsumule akaghalha ako wukahiraho erisimbirira erikolha ng’omughombe omuwathikya!—Fil. 2:13.
OLHWIMBO 17 “Nyanzire”
a ERISOBORERA EBISASANI Okwa: Okwa malembe, omw’iyikehya Yesu anemukolera abigha biwe; okwa mali, omughombe omuwathikya anemuwathikya mughalha wethu oyukulire omwa myaka omwa kithunga.
