OMWATSI W’ERIGHA 47
OLHWIMBO 103 Abalisya—Ni Balhume b’Olhusunzo
Baghalha bethu—Mbwino Munemusimbirira Erikolha ng’Abasyakulhu?
“Ebinywe ebi ni by’eriyikethera: Omulhume amasimbirira eribya mulebererya, akabya iniamayisunza omubiiri mubuya.”—1 TIM. 3:1.
EKIGHENDERERWA
Ebighuma by’okwa bikayithaghisibawa ebiseghemere okwa Masako ebyo mughalha wethu atholere iniaberererya eritholera eribya musyakulhu w’ekithunga.
1-2. Abasyakulhu bakakolha “mibiiri mubuya” yahi?
HAMABYA ihamabirilhaba buthuku bulebe iwunemukolha ng’omughombe omuwathikya, wanganabya iwukisiya iwatholera erikolha ng’omusyakulhu w’ekithunga. Mbwino siwanga simbirira erikolha “omubiiri mubuya” oyu?—1 Tim. 3:1.
2 Omusyakulhu w’ekithunga awithe lhukwamirwaki? Akasondolha omubiiri w’erithulira, iniakolha kutsibu omo syombungo sy’obulisya n’erikangirirya, kandi iniahimba ekithunga omwa by’akabugha n’omwa eby’akakolha. Ahabw’enzumwa mbuya, e Biblia yik’ahulha abasyakulhu abakakolha kutsibu aba ‘mw’abalhume b’olhusunzo.’—Efe. 4:8.
3. Ni byahi ebyanga leka mughalha wethu iniatholera erikolha ng’omusyakulhu w’ekithunga? (1 Timoteo 3:1-7; Tito 1:5-9)
3 Ni byahi ebyanga leka iwatholera erikolha ng’omusyakulhu? Eritholera eribya musyakulhu siriri ng’eritholera erihebwa omubiiri w’ekihugho. Mughulhu mungyi erithoka eribana omubiiri omwa kihugho, ly’eribya iwunawithe ebyo wasi ebya omwinye mubiiri akayithagha. Mbaghane n’ekyo, wamabya iwanzire erisombolhwa erikolha ng’omusyakulhu, siwuli yithagha eribya oyuwasi ndeke erithulira n’erikangirirya lisa. Wutholere iwaberererya ebiri omwa Masako ebyangaleka iwatholera eribya musyakulhu ebiri omwa 1 Timoteo 3:1-7 na Tito 1:5-9. (Soma.) Omo mwatsi ono thukendi lebya ebikayithayisibawa okwa basyakulhu omwa nzira isathu ngulhu-ngulhu: Eribya n’erina libuya omwa kithunga n’eyihya w’ekithunga, eribya ky’erileberyako ekyuwene ng’omuthwe w’eka, n’eribya iwunayitheghekire erikolera ekithunga.
ERIBYA N’ERINA LIBUYA
4. Kikamanyisayaki eribya “butsira kahinira”?
4 Eritholera eribya musyakulhu, wutholere iwabya ‘butsira kahinira,’ ni bugha ambu, eribya n’erina eryuwene omwa kithunga kundi emibere yawu siyiri kanibawako nabi. Ery’ongera okw’ekyo, wutholere iwabya ‘oyukakanibawako ndeke n’ab’eyihya.’ Abathe b’ikirirya bangana bugha nabi oko syonyikirirya syawu sy’Ekikristayo, aliwe sibatholere bakathika-thikira eky’eribya iwuli mundu oyuli mw’okwenene kutse ow’emibere mibuya. (Dan. 6:4, 5) Yibulhaye, mbwino ng’anawithe erina libuya omwa kithunga n’eyihya sy’ekithunga?’
5. Wangakangania wuthi ku wanzire ekibuya?
5 Wamabya ‘iwunanzire ekibuya,’ wukasondaya ebibuya omwa bandi kandi iwabasima busana n’emibere yabu mibuya. Kandi wukatsema erikolera abandi b’ebibuya, nibya n’erikolha bingyi kwilhaba ebikayithayisibawa. (1 Tes. 2:8) Busana naki omubere oyu akayithaghisibawa okwa basyakulhu? Kundi bakakolesaya obuthuku bwabu bw’obughuli eritsomana ekithunga n’erikolha esindi ngwamirwa. (1 Pet. 5:1-3) Nomwabine, etseme eyikalhwiririra omw’ikolera abandi yilengire kutsibu ekyosi-kyosi ekyo wangayithalyako.—Emib. 20:35.
6. Wanga kangania wuthi ku wuli mukokya? (Abaebrania 13:2, 16; Lebaya n’ekisasani.)
6 Wukakanganaya ku wuli mukokya omughulhu wukakolera abandi b’ebibuya, imwamuli n’abathe banywani bawu b’okwa ndungu. (1 Pet. 4:9) Ekitabu kighuma kikakanaya okwa mulhume oyukakokaya kithi: “Olhuyi lhw’enyumba yiwe—n’olhw’omuthima wiwe—bitholere ibyabya ibanakyungwirwe n’okw’abo athasi.” Yibulhaye, ‘Mbwino nganasibwe ng’oyukakokaya abagheni?’ (Soma Abaebrania 13:2, 16.) Omulhume omukokya akasangira haghuma n’abagheni okwa by’awithe ngoku angathoka, imwamune n’abathawithe bingyi haghuma n’abakakolha kutsibu omubiiri wa Yehova, ng’abalebererya b’omuthimbo n’abakasyalhabaya emikania erilhua omwa bindi bithunga.—Enz. 18:2-8;Emi. 3:27; Lk. 14:13, 14; Emib. 16:15; Abar. 12:13.
Abathahenie abawithe omubere w’erikokya banemuthangirira omulebererya oyukabalhama na mukali wiwe (Lebaya enungu 6)
7. Omusyakulhu angakangania athi ngoku si mundu “oyuwanzire esyosente”?
7 “Isi mundu oyuwanzire esyosente.” Eki kikamanyisaya kithi siwulihweraya amalengekania okwa bindu by’ekinyamubiri. Mbulha wuli mugaga kutse munakwa, wukahira eby’Obwami by’embere omwa ngebe yawu yosi. (Mt. 6:33) Wukakolesaya obuthuku bwawu, akaghalha kawu, n’ebindi ebyo wuwitheko omw’iramya Yehova, eritsomana efamile yawu, n’erikolera ekithunga. (Mt. 6:24; 1 Yn. 2:15-17) Yibulhaye: ‘Ngalhangira indi esyosente? Nganatsemera ebiyithawa ebikulhu-bikulhu ebyo ngawithe? Kutse ngahweraya amalengekania w’okw’isondekania esyosente n’eriyibanira ebindu bingyi?’—1 Tim. 6:6, 17-19.
8. Ni mwanzira nga syahi esyo wanga kanganiryamu ku wuli w’emibere ‘y’olhulengo olhutholere’ kandi ‘oyukayikakiraya’?
8 Wamabya ‘w’emibere y’olhulengo olhutholere’ kandi ‘oyukayikakiraya,’ aho, iwukendi thoka eribya oyuthelhabiriranaya omwa byosi ebya wukakolha omwa ngebe yawu. Mwamuli erithendi lhabirirania omw’irya, omw’inywa, omwa myambalire n’emiyipambire, n’omwa by’eriyitsemesya. Siwuli mukobe w’emilembe y’ekihugho. (Lk. 21:34; Yak. 4:4) Wuli mundu oyuhumulikene, nibugha ambu, wukasighalha iwunathekene abandi n’omubanga kukolha nabi. Siwuli ‘muthamiri,’ kutse eriminywa ng’oyukanywa bunene. Yibulhaye, ‘Mbwino engebe yaghe yikanakanganaya ku ngali w’emibere y’olhulengo olhutholere kandi oyukayikakiraya?’
9. Kikamanyisayaki eribya ‘w’obwenge obukakolha ndeke’ kandi ‘oyuyithondekenie’?
9 Wamabya mundu ‘w’obwenge obukakolha ndeke,’ wukaghaniraya ndeke okwa myatsi erikwamana n’emisingyi ye Biblia. Wabirighanirya buuli okwa misingyi eyi, neryo ekyo kyabirileka iwabya n’eriyitheghererya n’amenge. Siwuli thwamu lhuba-lhuba. Omwakanya k’ekyo, wukalhangira wuthi wukayitheghereraya omwatsi wosi. (Emi. 18:13) Ekikalhwiririramu, erithwamu lyawu likahambangana n’amalengekania wa Yehova. Wamabya iwuli mundu ‘oyuyithondekenie,’ wukakolha ebindu omwa buyithondeke kandi wukatheghaya obuthuku. Wasibwe ng’omuyiketherwa kandi ng’oyukakwama obusondoli. Emibere eyi yikendileka iwathunga erina libuya. Neryo, thuthakania okwa eky’Amasako akabugha ekyangaleka iwatholera eribya ky’erileberyako kyuwene ng’omuthwe w’eka.
ERIBYA KY’ERILEBERYAKO KYUWENE NG’OMUTHWE W’EKA
10. Omulhume akasondolha athi ndeke ab’eka yiwe?
10 Wamabya iwuli iba kandi iwunanzire eribya musyakulhu, eky’erileberyako eky’eka yawu kikahamba okw’itholera lyawu. Busana n’ekyo, wutholere ‘iwasondolha ndeke eka yawu.’ Wutholere iwaminywa ng’omuthwe w’eka oyuwithe olhwanzo kandi oyukatsomana eka yiwe. Eki mwamuli erisondolha ab’eka yawu omwa myatsi yosi ey’eriramya lyethu. Busana naki eki ni kikulhu kutsibu? Omukwenda Paulo mwabulya athi: “Omulhume wosi-wosi amabya isyanga thoka erisondolha ndeke eka yiwe, iniakendi tsomana athi ekithunga kya Nyamuhanga?”—1 Tim. 3:5.
11-12. Emibere y’abaana ba mughalha wethu yangahamba yithi okw’itholera liwe? (Lebaya n’ekisasani.)
11 Wamabya iwuli thatha, wutholere iwalhangira wuthi abaana bawu abali ahisi sy’emyaka ikumi na munani, ni ‘baana abakakwowa.’ Wutholere iwabakangirirya n’eribathendeka omo lhwanzo. Aliwe wibuke, ng’abaana bosi, nabo bakanza amasatha n’eriseka. Aliwe busana n’erithendeka lyawu eryuwene, bakendibya bowa, abakasikaya abandi, kandi ab’esyongeso. Kandi wutholere iwalengaho eriwathikya abaana bawu eribya n’obughuma obuwene na Yehova, erighendera okwa misingyi ye Biblia omwa ngebe syabu, n’erikulha-kulhana erihika okw’ibatizibwa.
12 “Oyuwithe abaana abikirirye abathe bawawa kutse bayisamambuli.” Omw’eka mwamabya omwana omwikirirya, neryo akakolha ekibi ekikalire, ekyo kyangahamba kithi oku thatha wiwe? Thatha wiwe amabya imwaghalhamirira erimuthendeka n’erimusuyira, isyenditholera erikolha ng’omusyakulhu.—Lebaya egazeti ye Watchtower ey’Okwerikumi 15, 1996, olhup. 21, enu. 6-7.
Emithwe y’amaaka bakathendeka abaana babu omw’isangira omwa mibiiri muthina-muthina eya Nyamuhanga (Lebaya enungu 11)
ERITSOMANA EKITHUNGA
13. Wangakangania wuthi ku wuli ‘muyitheghererya,’ ‘oyuthemayirira ekiwe’?
13 Baghalha bethu abakakanganaya emibere eyuwene ey’Ekikristayo ni b’obughuli omwa kithunga. Omulhume ‘omuyitheghererya’ akahira h’obuholho. Wamanza eriminywa ng’omundu omuyitheghererya, hulikirira abandi kandi ligha amalengekania wabo. Imune omwa muhindano w’abasyakulhu, wunemwendibya iwunayitheghekire erisighika erithwamu ly’abandi hamabya isihali ekihano kutse omusingyi we Biblia ow’amathwibwa? Eribya ‘oyuthemayirira ekiwe’ kikamanyisaya kithi siwuli mundu oyukakaghathira okw’ikolha ngoku amanza. Wunasi omughaso w’abahabuli bangyi. (Enz. 13:8, 9; Emi. 15:22) ‘Siwuli munegheni’ kutse “oyukahithana lhuba-lhuba.” Omwakanya k’eribya mutsurumi kutse oyukakakalhukana, wukakolesaya obwolho n’amenge. Ng’omulhume w’obuholho, wukalhangira wuthi wukahira h’obuholho, n’omwa mibere eyikalire kutsibu. (Yak. 3:17, 18) Ebinywe byawu byolho-byolho byangan’olhobya ababirihaghuka, imwamune n’abahakani.—Abat. 8:1-3; Emi. 20:3; 25:15; Mt. 5:23, 24.
14. Erithendibya “mwikirirya muhyaka” n’eribya “muthaleghulha” bikamanyisayaki?
14 Mughalha wethu oyuwanga tholera eribya musyakulhu w’ekithunga syatholere akabya “mwikirirya muhyaka.” Sibugha indi wutholere iwabya iwamabirighunza myaka mingyi walibatizibirwe, aliwe hatholere ihatsuka erilhaba akathuku iwe erikulha bunyakirimu. Wuthe wasombolhwa eribya musyakulhu, wutholere iwatsuka erikangania ku wuyikehirye nga Yesu, kandi ku wunayitheghekire erilinda Yehova erikuha olhukwamirwa lhwosi-lhwosi. (Mt. 20:23; Fil. 2:5-8) Wangana kangania ku ‘wuli muthaleghulha’ omw’amakirira Yehova n’ebihano biwe ebithunganene n’erighendera okwa busondoli obwa ekithunga kiwe kikaha.—1 Tim. 4:15.
15. Mbwino ni buthekwa-buthekwa indi omusyakulhu atholere iniabya mbuyi eyikalhabaya emikania eyuwene kutsibu? Soborera.
15 Amasako akakanganaya ndeke-ndeke ngoku omusyakulhu atholere iniabya “oyuwasi erikangirirya.” Mbwino eki kikamanyisaya kithi wutholere iwabya iwuli mbuyi eyikalhabaya emikania eyuwene kutsibu? Eyihi. Nomwabine indi abasyakulhu bangyi abanatholere si mbuyi esyasi ndeke erilhabya emikania, bakakangiriraya ndeke omw’ithulira n’okwa sy’ombungo sy’erilisya. (Lebaya na 1 Abanya Korinto 12:28, 29 na Abanya Efeso 4:11.) Nomwabine, wutholere iwakolha kutsibu erilengaho eryuwania erikangirirya lyawu. Thwang’uwania thuthi erikangirirya lyethu?
16. Wang’ongera wuthi eryuwania erikangirirya lyawu? (Lebaya n’ekisasani.)
16 “Oyuk’amakirira ndeke ekinywe ky’ekwenene.” Erithoka eribya oyukakangiriraya ndeke, lhangira wuthi erikangirirya lyawu ahali abandu bangyi n’erihabulha eryo wukaha omundu ahathe abandi bikaseghemera okwa Kinywe kya Nyamuhanga. Ibya oyukayeghesaya ndeke e Biblia n’ebitabu byethu. (Emi. 15:28; 16:23) Wukayeghesya, lebaya ndeke erisoborera erihikire ery’Amasako. Kandi wukakangirirya, lengaho erihika okwa mithima y’abahulikiriri. Iwukendyuwania erikangirirya lyawu wamasaba abasyakulhu abasi ndeke b’amenge n’erighendera kugho. (1 Tim. 5:17) Abasyakulhu batholere ibabya ‘abakahimba’ balikyabo; aliwe okwa bundi buthuku banatholere ibabahabulha kutse nibya ‘eribakunga.’ Bakakolha ebyosi bibiri, mughulhu wosi abasyakulhu batholere ibakikolha omwa lhukeri. Wamabya iwune mwolho kandi ow’olhwanzo kandi oyukaseghemeraya erikangirirya liwe okwa Kinywe kya Nyamuhanga, erikangirirya lyawu irikendi ghasa kundi iwukendibya iwamagherererya Omukangirirya Mukulhu, Yesu.—Mt. 11:28-30; 2 Tim. 2:24.
Omughombe omuwathikya akakolesya akaghisa k’eribya n’omusyakulhu oyuwasi bingyi erigha ng’angakolesya athi e Biblia akakangirirya. Kandi omughombe omuwathikya anemuyibegheresya ngoku angalhabya omukania wiwe embere sy’ekiyo (Lebaya enungu 16)
LHOLHA EMBERE ERISIMBIRIRA ERIHEBWA OLHUSUNZO
17. (a) Ni kyahi ekyanga wathikya abaghombe abawathikya erilholha embere erisimbirira olhusunzo? (b) Ni byahi ebyo abasyakulhu batholere ibabya iban’ibukire bakalebya mughalha wethu ng’anasombolhawe erikolha ng’omusyakulhu? (Lebaya akasanduko “ Simulhabiriranaye Mukalebya Mughalha Wethu ng’Anatholere.”)
17 Enyuma w’erilhaba omwa bikayithaghisibawa eritholera eribya musyakulhu w’ekithunga, abandi abaghombe abawathikya banganayowa nga sibendi syatholera. Aliwe wibuke ngoku Yehova n’ekithunga kiwe sibali kuyithaghako eriberererya ebikayithaghisibawa ebyo omwa nzira eyihikene. (1 Pet. 2:21) Kandi nibya, omulimu wa Yehova ow’amaaka w’akakuwathikaya erikulha-kulhania emibere eyi. (Fil. 2:13) Mbwino hane omubere mulebe ogho wunatholere eryuwania? Omwa musabe kibwireko Yehova. Sekulhaya okwa mwatsi oyo, kandi saba omughuma w’okwa basyakulhu y’amenge nga wang’uwania wuthi.
18. Abaghombe abawathikya abosi bakahiribawa mw’omuhwa ow’erikolhaki?
18 Kwesi ithwe bosi, nibya n’abanemukolha ng’abasyakulhu, thulhole embere erikulha-kulhania emibere eyamakanibwako omwa mwatsi ono. (Fil. 3:16) Mbwino wuli omughombe omuwathikya? Simbirira erihebwa olhusunzo! Saba Yehova erikuthendeka n’erikubumba-bumba nuku wongere eribya w’omughaso omw’imukolera n’ekithunga. (Isa. 64:8) Yehova ka atsumule akaghalha ako wukahiraho eritholera erikolha ng’omusyakulhu.
OLHWIMBO 101 Erikolha Omwa Bughuma
