Ebyanga Thuwathikya Eriyeghesya Mughulhu Wosi
KIKANA kukalira erilholha embere n’endegheka yawu y’eriyeghesya e Biblia mughulhu wosi kandi eyikatsemesaya? Ithwe bosi ekyo kikanathubyako okwa bundi buthuku. Aliwe thalengekanaya okwa ebya thukanakolha obuli kiro, ng’eryogha. Eryogha likathwalha obuthuku n’akaghalha, aliwe thukayowa ndeke thwabirikolha ekyo! Eriyeghesya e Biblia nalyo lyanganaleka ithwayowa ndeke. (Efe. 5:26) Leka thulebaye amenge malebe awanga thuwathikya:
Kolha endegheka. Endegheka y’eriyeghesya e Biblia ni nguma y’okwa “bikulhu kutsibu” eby’Omukristayo athatholere akagheghena. (Fil. 1:10, NWT) Erikuwathikya erikwama endegheka yawu, busana naki iwuthahirayo aha wangalhangirirayo lhuba, ng’okwa rubahu kutse okwa lhukyo lhw’efriji? Kutse ikyangana kuwathikya erihira omwa simu yawu mwe alamu eyanga kw’ibukya endambi yawu y’eriyeghesya yithe yahika.
Ghenda-ghendanaya n’ebiyithawa byawu. Kikana kw’olhobera erihwerya amalengekania wawu w’okwa kindu ahabw’obuthuku buuli kutse eribera erikolha ekyo ahabw’obuthuku buke-buke? N’iwe wasi ndeke emibere yawu. Ghenda-ghendanaya n’endegheka yawu y’eriyeghesya erikwamana n’emibere yawu. Wamakwa obughatha endambi yawu y’eriyeghesya yikahika, busana naki iwuthathwamu eriyeghesya ahabw’esyodakika ikumi buyira? Omw’iyeghesya nibya n’ahabw’akathuku kake ako, iwukend’igha myatsi mingyi. Kandi wamabiritsuka, ikikendi kuhira mw’omuhwa w’erilholha embere—Fil. 2:13, NWT.
Sangwa wasombolha emyatsi eyo wukendi yeghesya. Wam’ikalha neryo wukabulha nga wuyeghesaye okuki, wanganabya isiwuli kolesaya ndeke obuthuku bwawu. (Efe. 5:16) Busana naki iwuthahandika elisti ey’emyatsi eyo wang’anza eriyeghesyako? Wam’ibuka ekibulyo kyosi-kyosi, kihandike. Kandi obuli ghunza eriyeghesya, iwangan’ongera okwa listi yawu kw’emyatsi eyo wang’anza erithasyayeghesyako.
Kolha esyombinduka kikayithaghisibwa. Lengaho erikolha esyombinduka omwa ndegheka yawu, ng’obuthuku obo wukaghunza wukayeghesya kutse emyatsi eyo wukasombolha. Ekikulhu si w’omughulhu wukayegheserayamo, obuthuku obo wukaghunza, kutse ebya wukayeghesaya—aliwe ly’eriyeghesya mughulhu wosi.
Omwa kwenene thukaghasirawa omw’ibya n’endegheka y’eriyeghesya mughulhu wosi. Thukayithunda hakuhi na Yehova, ithw’igha erithwamu ndeke kandi ithwayowa ndeke.—Yos. 1:8.
