Wunanzire iwaghasirwa ndeke omw’iyeghesya lyawu? Iwangana lengesya amenge ano erithoka eribana omwanya ow’eriyegheseryamo owathekene:

• Sombolha omwanya owatholere. Kyamathokekana, sondaya omwanya owathondire ndeke kandi owanemu ekyakakalha ekikaghunza. Wangan’ikalha okwa kithumbi kutse iwakolesya emeza, kutse iwanganathwamu erisondya omwanya owathekene eyihya.

• Sondaya omwanya owathe mw’abandu. Yesu iniakathwamu erisaba “omwa ngyakya-ngyakya” kandi ‘n’eyithe abandu.’ (Mk. 1:35) Kyamabya isikyangathokekana eribana omwanya owathe mw’abandu, iwangana bwira ab’efamile yawu kutse abaw’ikere nabu omwa nyumba okwa ndegheka yawu y’eriyeghesya n’eribasaba erithendi kusurusuthya.

• Isiwalengemeribawa. Yihighule okwa byangakulengemerya. Wamakolesya esimu yawu kutse etabuleti wukayeghesya, kehaya omulenge wabyo nuku sibikutabure. Wamalengekania okwa kindu kirebe eky’erikolha, kihandike nuku wukikole enyuma waho. Wamalemwa erihwerya amalengekania w’okw’iyeghesya lyawu, lhuhuka kake kutse yinanule.