OMWATSI W’ERIGHA 45
OLHWIMBO 138 Omuthwe w’Esyombwe Ni Lhukengerwa
Ighira Okwa Binywe by’Erighunzerera eby’Abalhume Abathaleghulha
“Abasyakulhu b’abawithe amenge, n’omo biro bingyi muli eriminya?”—YOBU 12:12.
EKIGHENDERERWA
Erighondera Yehova Nyamuhanga likaleka ithwabana emighisa yiwe lino n’erisyahebwa engebe y’erikotha omwa buthuku obukasa.
1. Busana naki ithw’ighira okwa bakulire?
ITHWE bosi thukayithagha obusondoli erithoka erikolha erithwamu likulhu omwa ngebe. Thwangana bana obungyi b’okwa busondoli obo erilhua okwa basyakulhu b’ekithunga n’abandi Bakristayo abakulire omwa myaka. Bamabya ibakulire omwa myaka kw’ithulhaba, isithwalengekanaya thuthi erihabulha lyabu lyabirihwa okwa buthuku. Yehova anzire ithw’ighira okwa bakulire. Babirilhaba omu bingyi omwa ngebe kw’ithulhaba neryo basi bingyi, babirithunga eriminya, n’amenge.—Yobu 12:12.
2. Omwatsi ono akendi kania okuki?
2 Omwa biro bye Biblia, Yehova mwakolesya abakulire abathaleghulha erihimba n’erisondolha abandu biwe. Ng’eky’erileberyako, thalengekania oku Musa, Dawudi, n’omukwenda Yohana. Mubathabyaho okwa buthuku bughumerera, n’emibere eyo babyamo siyabya yisosene n’ahake. Ibakisigha ibaholha, mubaha abalere b’erihabulha ery’amenge. Obuli mughuma w’okwa balhume abakulire abathaleghulha aba mwahira omuwathu w’okwa mughaso w’eribya mwowa oku Nyamuhanga. Yehova mwalhangira athi ebinywe byabu bikahandikawa busana nethu munabwire. Mbulha thuli balere kutse bakulhu, thwangana ghasirwa omw’ilengekania okw’ihabulha lyabu. (Abar. 15:4; 2 Tim. 3:16) Omo mwatsi ono, thukendi kania okwa binywe by’erighunzerera by’abalhume basathu abakulire aba n’amasomo agho thwang’igha okwa ebyo babugha.
“OBUNGYI BW’EBIRO BY’ENYU”
3. Musa mwakolera Nyamuhanga n’abandu biwe omwa nzira ki?
3 Musa mwayihayo oku Yehova n’omuthima wosi. Mwakolha ng’omuminyereri, omutsweri, kamanda kandi ng’omuhandiki. Musa abya iniabirilhaba omwa bingyi! Mwasondolha ekihanda kye Israeli erilhua omwa bukobe e Misiri kandi mwayilhangirira ebithiko-thiko bingyi bya Yehova. Yehova mwamukolesya erihandika ebitabu bithano by’erimbere-mbere bye Biblia, Esyonyimbo 90, kandi obundi na Esyonyimbo 91. Kandi obundi yuwahandika ekitabu kya Yobu.
4. Ni bahi abo Musa ahiramo omuhwa, kandi busana naki?
4 Iniakisigha iniaholha, inianawithe emyaka 120, Musa mwabirikira abaana ba Israeli ba haghuma erib’ibukya ebyo balhangira n’ebyo balhabamu. Ibakine minyethu, abaghuma b’okwa bahulikiriri biwe babya ibabiriyilhangirira ebikaswekaya bingyi n’ebithiko-thiko ebyo Yehova akolha kuthya n’eritswera liwe oko banya Misiri. (Eri. 7:3, 4) Babya ibabirilhaba omo Ngetse ye Ngulha eyabiriyighaba kabiri kandi ibabirilhangira erithoghothibwa ly’amahe wa Farao. (Eri. 14:29-31) Omwa mbwarara, mubayilhangirira Yehova akabatheya n’eribatsomana. (Ebi. 8:3, 4) Ekihanda kye Israeli kyabya ikikisiya iky’ingira omwa Kihugho Ekyalhaghanisibawa, neryo Musa mwakolesya akaghisa k’erighunzerera aka erihira omwa bandu mw’omuhwa. a
5. Ebinywe by’erighunzerera ebya Musa ebiri omo Eryibuka Ebihano 30:19, 20 mubyaleka Abaisraeli ibakakasyaki?
5 Ni byahi ebyo Musa abugha? (Soma Eryibuka Ebihano 30:19, 20.) Ekihanda kye Israeli kyabya kilindirire obuthuku obuwene obukasa. Omw’itsumulhwa na Yehova, Abaisraeli bangabereho ahabw’obuthuku buuli omwa kihugho ekyo Yehova abya iniabiribalhaghanisya. Kandi ka ky’abya kihugho ekyuwene, ekiri mw’omubogha! Musa mwakikaniako athi: “Emiyi minene-minene mibuya, eyo muthahimba, n’amanyumba aghoswire mw’ebindu ebyuwene, ebyo muthusulhayamo, n’ebiriba ebithakwire, ebyo muthathakulha, n’amalima w’ebinyu, n’emithi y’emizeituni, eyo muthahera.”—Ebi. 6:10, 11.
6. Busana naki Nyamuhanga mwalighira ebindi bihanda erikinda e Israeli?
6 Musa kandi mwakunga Abaisraeli. Erithoka erilholha embere eribya omwa kihugho kyabu eky’omubogha, babya b’erighondera ebihano bya Yehova. Musa mwababwira athi ‘bayisoghe engebe’ omw’ihulikirira Yehova ‘n’erimwamakirira.’ Aliwe, Abaisraeli mubaghana Yehova. Habere halhaba buthuku, Yehova mwalighira Abasuria n’enyuma waho abanya Babeli eribakinda n’eribathwalha omwa bunyewa—2 Bam. 17:6-8, 13, 14; 2 Emy. 36:15-17, 20.
7. Ebinywe bya Musa bikathweghesayaki? (Lebaya n’ekisasani.)
7 Thuk’ighaki? Obwowa bukalhamaya esyongebe syethu. Ng’Abaisraeli ababya ibakisiya ibahika omwa Kihugho Ekyalhaghanisibawa, nethu thukisiya ithw’ingira omwa kihugho kihya-kihya ekyo Nyamuhanga abirilhaghanisya, eyo thukendisyalhangirira ekihugho kikahinduka mwa paradiso. (Isa. 35:1; Lk. 23:43) Diabolo n’esyombinga siwe bakendisyabya isibakiriho. (Erib. 20:2, 3) Amadini w’amabehi awak’iha abandu b’oku Yehova akendi syabya isyakiriho. (Erib. 17:16) Esyogavumente esikanubaya abandu abali ahisi sy’obusondoli bwasyo sisyendi syabyaho. (Erib. 19:19, 20) Omwa paradiso simwendisyabya bayisamambuli. (Esy. 37:10, 11) Abandu ehosi bakendi syaghondera ebihano bya Yehova ebithunganene, ebikaleka ihabya obughuma, n’obuholho. Busana n’ekyo, bakendi sy’anzana n’eriyiketherana. (Isa. 11:9) Ayo ka ni maha awuwene kutsibu! Kandi ibbwa ekikulhu kutsibu, thwamowa Yehova, ithukendi syalholha embere eribya omwa kihugho paradiso butsira ahabw’ebikumi by’emyaka aliwe kera na kera.—Esy. 37:29; Yn. 3:16.
Thwam’owa Yehova ithukendisyabya omwa kihugho paradiso isihabw’emyaka bikumi bisa aliwe kera na kera (Lebaya enungu 7)
8. Omulhaghe w’engebe y’erikotha mwawathikya athi omumisyonare mulebe? (Yuda 20, 21)
8 Thwamathendi birirwa omulhaghe wa Nyamuhanga ow’engebe y’erikotha, ithukendianza erimwamakirira n’omuthwangabana bitsibuki. (Soma Yuda 20, 21.) Omulhaghe oyo kandi angana thuhira mw’omuhwa w’erirwanisya erilemererwa lyethu. Omumisyonare mulebe oyuwamabirighunza omwa Afrika mw’emyaka mingyi oyuwabya akarwanisya erilengwako ly’erikolha ekibi akabugha athi: “Eriminya ngoku amaha waghe aw’eribyaho kera na kera ali omw’akabi mukyaleka ingathwiramu ighuma erirwanisya ekitsibu ekyo n’erisaba Yehova mughulhu wosi. Neryo, busana n’obuwathikya bwiwe, munathoka erikirwanisya.”
“IWATHOKA ERIBANA OMUGHISA”
9. Ni bitsibu byahi ebya Dawudi abana omwa ngebe yiwe?
9 Dawudi abya mwami w’abandu ba Yehova kandi abya muthaleghulha oku Nyamuhanga. Kandi abya mwimbi, musakangyi, mulhwi, kandi muminyereri. Mwabana ebitsibu bingyi. Ahabw’emyaka mingyi, mw’abya ng’omuthibithi, akasagha Omwami Saulo ow’obuha. Abere abiribya mwami, Dawudi kandi mw’abya w’erithibitha erilhamya engebe yiwe omughulhu mughalha wiwe Abusaloma anza erinyegha ekithumbi kiwe ky’Obwami. Nomwabine indi Dawudi mwabana ebitsibu n’erisobya, mwasighalha muthaleghulha oku Nyamuhanga erihika okwa lhuholho lhwiwe. Yehova mwamukaniako ‘ng’omundu oyo anzire.’ Ka thutholere ithwahulikirira erihabulha lya Dawudi!—Emib. 13:22; 1 Bam. 15:5.
10. Busana naki Dawudi mwahabulha mughalha wiwe Solomona, oyuwamusubuka?
10 Ng’eky’erileberyako, thalengekania okw’ihabulha eryo Dawudi aha mughalha wiwe Solomona, oyuwamusubuka. Omulhwana omulere oyu abya iniabirisombolhwa na Yehova erilholha embere erisighika eriramya ly’okwenene n’erihimba ehekalhu eyangahere Nyamuhanga y’olhukengerwa. (1 Emy. 22:5) Solomona angabwene ebitsibu. Ni byahi ebyo Dawudi angamubwire? Leka thulebaye.
11. Ngoku kiri omwa 1 Abami 2:2, 3, ni menge wahi agho Dawudi aha Solomona, kandi ebinywe ebi mubyabya bithi by’okwenene? (Lebaya n’ekisasani.)
11 Dawudi mwabugha athiki? (Soma 1 Abami 2:2, 3.) Dawudi mwabwira mughalha wiwe athi amowa Yehova, angabwene emighisa. Kandi ahabw’emyaka mingyi, Solomona mwabana emighisa mingyi. (1 Emy. 29:23-25) Mwahimba ehekalhu eyuwene, amahandika ebitabu birebe bye Biblia, kandi ebighuma by’okwa binywe biwe bikabanika omwa bindi bitabu bye Biblia. Mwaminywa busana n’amenge wiwe n’obugaga bwiwe. (1 Bam. 4:34) Aliwe ngoku Dawudi anasoborera, Solomona angabwene emighisa kwa sighalha iniane mwowa embere sya Yehova Nyamuhanga. Eky’obulighe, Solomona abere anemukulha mwatsuka eriramya esindi nyamuhanga. Yehova mwabya isyakimusimire, kandi Solomona mwaherya amenge aw’erithabalha omwa buthunganene n’obulingirirania.—1 Bam. 11:9, 10; 12:4.
Ebinywe bya Dawudi eby’erighunzerera ebyo abwira mughalha wiwe Solomona bikathuwathikaya erilhangira ngoku thwam’owa Yehova, iniakendithuha amenge aw’erithwamu ndeke (Lebaya enungu 11-12) b
12. Thwang’ighaki omwa binywe bya Dawudi?
12 Thuk’ighaki? Obwowa bukaletha emighisa. (Esy. 1:1-3) Omwa kwenene, Yehova syali akathathulhagha erithuha obugaga n’olhukengerwa ng’olhwa Solomona. Aliwe thwamowa Nyamuhanga wethu, iniakendi thuha amenge awangathuthokesya erithwamu ndeke. (Emi. 2:6, 7; Yak. 1:5) Emisingyi yiwe yangana thusondolha omwa myatsi eyihambire okwa mubiiri, esukuru, eby’eriyitsemesya, n’eby’esyosente. Erighendera okwa menge wa Nyamuhanga likendi thutheya okwa kabi akakalhwirira omw’ithendiowa. (Emi. 2:10, 11) Ithukendi kulha-kulhania amanywani awaghumire. Kandi ithukendi bana obusondoli obwa thukayithagha erithoka eribya n’esyofamile esitsemire.
13. Ni kyahi ekyawathikaya Carmen erisingura omwa ngebe?
13 Carmen, oyuwikere e Mozambique, mwalengekania athi erisoma kali-kali kyangalekire iniasingura omwa engebe. Mwaghenda okwa yunivasite n’eriyasomerera eby’erithera esyopulani sy’amanyumba. Akabugha athi: “Munanza ebya nabya ing’igha, aliwe mukyanyithwalira obuthuku n’akaghalha kanene. Iningabya okwa sukuru erilhua saha nguma n’embindi esy’engyakya erihika saha ikuminibiri esy’erigholho. Ikikakalha erighenda okwa mihindano, kandi n’obunyakirimu bwaghe mubwasebebera. Munakiminya ngoku ngabya ingali mukolera abakama babiri. (Mt. 6:24) Mwasaba busana n’emibere eyo abyamu kandi amasekulya omwa bitabu byethu. Ak’ongerako athi: Abasyakulhu na mama waghe babere babirinyihabulha, munathwamu erileka eyunivasite n’eriyakolera Yehova mughulhu wosi. Eki mukyangwathikya erithwamu ndeke omwa ngebe yaghe, kandi singali yikubayabwomo.”
14. Musa na Dawudi babya bawithe mwatsi mukulhu wahi?
14 Musa na Dawudi mubanza Yehova kandi mubaminya ngoku ni kikulhu erimwowa. Omwa binywe byabo by’erighunzerera, mubahira omwa bahulikiriri babo mw’omuhwa w’erikwama eky’erileberyako kyabo omw’amakirira Yehova Nyamuhanga wabo. Kandi abosi babiri mubakunga bathi abangasighenie Yehova, bangabere isibakiri banywani biwe kandi bangaherirye emighisa eyo abya iniabiribalhagha. Nethu munabwire erihabulha lyabu likathughasira. Enyuma w’ebighana bingyi, owundi mughombe wa Yehova mwakangania omughaso w’eribya muthaleghulha oku Nyamuhanga.
SIHALI ETSEME EYILENGIRE EYI
15. Ni byahi ebya omukwenda Yohana ayilhangirira?
15 Yohana yuwabya mukwenda mwanzwa wa Yesu Kristo. (Mt. 10:2; Yn. 19:26) Yohana iniakaghenda na Yesu omw’ithulira liwe lyosi, mwayilhangirira ebithiko-thiko biwe, kandi mwasighalha muthaleghulha okw’iyo n’omwa mighulhu eyikalire. Mwalhangira Yesu ak’ithibwa kandi mwamulhangira iniabirilhubukibwa. Kandi mwayilhangirira Ekikristayo kikakulha-kulhana omwa kighana ky’erimbere erilhua omw’ibya gurupu nyike y’abathaleghulha erihika okw’ithulhughanibwa ly’engulhu yuwene “okwa bandu bosi omwa kihugho.”—Kol. 1:23.
16. Ni bahi ababirighasirwa omwa syobaruha sya Yohana?
16 Okw’ighunzerera ly’engebe yiwe, Yohana mwathunga olhusunzo olhw’erihandika Ekinywe kya Nyamuhanga ekyasondolibawa. Mwahandika ebikaswekaya ‘ebyo Yesu Kristo abisulha.’ (Erib. 1:1) Yohana mwahandika ekitabu ky’Enjiri ekiri omwa lina liwe. Kandi mwahandika esyobaruha isathu esyasondolibawa. Ebaruha yiwe yakasathu mwahandikirayo Omukristayo omuthaleghulha ya Gayo, oyo Yohana aby’akalhangira ng’omwana wiwe mwanzwa ow’obunyakirimu. (3 Yn. 1) Okwa buthuku obo, hatholere eribya ihabya bangyi abo Yohana aby’akalhangira ng’abaana biwe b’obunyakirimu. Ebya omusyakulhu muthaleghulha oyu ahandika byabiribya ibinemuhimba abigha ba Yesu abosi erihika namunabwire.
17. Ngoku kiri omu 3 Yohana 4, ni kyahi ekikaletha etseme nene?
17 Yohana mwahandikaki? (Soma 3 Yohana 4.) Yohana mwakania okwa tseme eyikalhwiririra omwowa Nyamuhanga. Okwa buthuku obo, abandi babya ibanemulhalhania esyongangirirya sy’amabehi n’erileka ihabya erighabulhana. Aliwe, abandi mubalholha embere ‘erikwama ndeke omwatsi w’ekwenene.’ Mubowa Yehova kandi ‘mubakwama ebihano biwe.’ (2 Yn. 4, 6) Abakristayo abathaleghulha aba mubatsemesya Yohana na Yehova iyuwene-wene.—Emi. 27:11.
18. Thwang’ighaki omwa binywe bya Yohana?
18 Thuk’ighaki? Obuthaleghulha bukaletha etseme. (1 Yn. 5:3) Ng’eky’erileberyako, thutsemire habw’eriminya ku thukatsemesaya Yehova. Akatsema akalhangira thukaghana erilengwako ly’ekihugho kandi thukaligha ekwenene. (Emi. 23:15) Abamalaika nabo bakatsema bakalhangira eki. (Lk. 15:10) Nethu thwangana tsema thukalhangira obuli mughuma w’okw’ithwe akasighalha muthaleghulha, kutsibu-tsibu akabana ebitsibu n’erilengwako. (2 Tes. 1:4) Neryo omughulhu ono akendisyabya abirihwaho, thukendisyatsema kutsibu thukaminya ngoku muthwakangania obuthaleghulha bwethu oku Yehova nibya n’omwa kihugho ekithaberweko na Sitani.
19. Ni byahi ebya mwali wethu Rachel akabugha ebihambire okw’eghesya abandi b’ekwenene? (Lebaya n’ekisasani.)
19 Thukatsema kutsibu thukeghesya abandi oku Yehova. Rachel, owe Dominican Republic, akayowa ini lhusunzo olhukatsemesaya kutsibu erikangirirya omundu oku Nyamuhanga wethu mubuya oyo thukakolera. Akabya akalengekania okwa baana biwe ab’obunyakirimu, akabugha athi: “Sinangathoka erisoborera etseme eyo ngawithe busana n’erilhangira abo ngeghesaya bak’ongera erianza Yehova n’erigha erimuyikethera, kuthya n’erihindulha esyongebe syabo nuku bathoke erimutsemesya. Eriyowa eryo lirengire akaghalha kosi-kosi ako n’ahiraho n’ebyosi ebya nayithalhayako inganza eribakangirirya.”
Thukabana etseme thukakangirirya abandi erianza n’eryowa Yehova ng’ithwe (Lebaya enungu 19)
GHASIRAWA OMWA BINYWE BY’ERIGHUNZERERA EBY’ABALHUME ABATHALEGHULHA
20. Ni byahi ebyathusosenemu na Musa, Dawudi, na Yohana?
20 Musa, Dawudi, na Yohana babyaho omwa mughulhu n’emibere eyithasosene n’eyo thulimo. Aliwe thuwithe bingyi abya thusosenemu nabo. Mubakolera Nyamuhanga w’okwenene, nethu kuthya. Ng’ibo, thukasaba Yehova, ithwamuyikethera, n’erimusaba obusondoli. Kandi ng’abalhume abakera abo, thuyikethere ngoku Yehova akatsumulha abakamwowa.
21. Ni mighisa yahi eyo abakaghendera okw’ihabulha ery’abalhume abathaleghulha nga Musa, Dawudi na Yohana balindirire?
21 Neryo kwesi, ka thulhole embere, erighendera okwa binywe eby’erighunzerera eby’abalhume abakulire abo omw’owa ebihano bya Yehova. Neryo ithukendibana emighisa y’okwenene omwa byosi ebya thukakolha. Thwasyahebwa engebe ‘n’obungyi bw’ebiro,’ ni bugha ambu eribyaho kera na kera! (Ebi. 30:20) Kandi thukendisyabya n’etseme ey’eritsemesya Thatha wethu mwanzwa ow’elhubulha oyukaberereraya emilhaghe yiwe yosi omwa syonzira esyo thuthe thwanga yitheghererya kutse erilengekaniako.—Efe. 3:20.
OLHWIMBO 129 Thukendi Lholha Embere Eriyiyinia
a Abangyi b’okwa Baisraeli abalhangira ebithiko-thiko ebya Yehova akolha okwa Ngetse y’Engulha mubathalhangira Ekihugho Ekyalhaghanisibawa. (Emig. 14:22, 23) Yehova mwabugha athi abalhume ab’emyaka 20 erilholha endatha bangaholere omwa mbwarara. (Emig. 14:29) Nomwabine, Yosua, Kalebu, n’abandi bangyi ab’okwa lhulengo lhw’abalere n’ab’ekihanda ky’Abalawi mubalhama n’erilhangira eribererera ly’emilhaghe ya Yehova omughulhu Abaisraeli basoka Olhusi lhwe Yorodani n’eringira omwa Kihugho Ekyalhaghanisibawa.—Ebi. 1:24-40.
b ERISOBORERA EKISASANI OKWA: Amalembe: Dawudi akaha mughalha wiwe Solomona y’ebinywe by’erighunzerera eby’amenge. Amali: Balikyethu bane okwa Sukuru y’Abatemburi bakaghasirawa omw’ithendekwa ly’ekiteokrasi.
