1-2. Ithwe bosi thukahambawako thuthi n’obuthe bulingirirania?

 YESU mwaha omukya owahambire okwa mukwakali oyuwahathikana omutsweri athi amukanganaye obulingirirania. Ahathe erithika-thika, abangyi b’okwa bigha ba Yesu mubayitheghererya omukya oyo kundi omwa buthuku bwiwe abandu ba buli kiro ibakakanganibawa obuthe bulingirirania. (Lk. 18:1-5) Nethu munabwire omukya oyu akathughasira kundi ithwe bosi thwanakanganibirwe obuthe bulingirirania okwa buthuku bulebe.

² Omwa kihugho munabwire, akasolholho, obuthe bulingirirania, n’erinubibwa bikanyirire, neryo sikirithuswekaya thukakanganibwa obuthe bulingirirania. (Omu. 5:8) Sithuli lengekanaya thuthi balikyethu bangana thukolha nabi, aliwe ekyo kyanganabya. Ni kwenene, balikyethu sibali hakanisaya ekwenene. Aliwe sibahikene. Thwangan’igha bingyi okwa ekya Yesu akolha abahakani babi bakamukangania obuthe bulingirirania. Thwamabya ithwangana ghumisirizya abahakani abakathukanganaya obuthe bulingirirania, neryo kwesi thwanga ghumisirizya bungahi abikirirya balikyethu! Yehova akayowa athi abali omwa kithunga kutse abathe omwa kithunga bamathukangania obuthe bulingirirania? Mbwino akanatsomana?

3. Mbwino Yehova akanatsomana omughulhu thukakanganibawa obuthe bulingirirania, kandi busana naki?

³ Yehova atsomene kutsibu emibere eyo abandi bakathuthwaliramu. “Yehova anzire eribanza [obulingirirania].” (Esy. 37:28) Yesu akathukakasaya athi Yehova “akendisyalhangira athi bakabana obulingirirania omwa byalhuba” okwa buthuku obutholere. (Lk. 18:7, 8) Akisiya iniaghunzaho eriaghalhwa lyethu eryosi n’obuli mulingo ow’obuthe bulingirirania.—Esy. 72:1, 2.

4. Munabwire, ni buwathikya bwahi obo Yehova akathuha?

 ⁴ Thunalindirire obuthuku omughulhu hakendi syabya erithunganene, Yehova akathuwathikaya erighumira obuthe bulingirirania. (2 Pet. 3:13) Akathukangiriraya eriyihighulha okw’ikolha ekindu ekithe ky’amenge omughulhu thukakolhawa nabi. Erilhabira omu Mughalha wiwe, Yehova akathuha eky’erileberyako ekihikene ekyangathuwathikya erighumira obuthe bulingirirania. Kandi akathuha amenge agho thwanga kolesya thukakanganibwa obuthe bulingirirania.

YITHEGHAYE OKWA EBYA WUKAKOLHA WUKAKANGANIBWA OBUTHE BULINGIRIRANIA

5. Busana naki thutholere ithwayitheya okwa byathukakolha thwamakanganibwa obuthe bulingirirania?

⁵ Obuthe bulingirirania bwanganaleka ithwayiponera kandi ithwabya omwa bulighe. (Omu. 7:7) Abathaleghulha nga Yobu na Habakuki, nabu mubayowa bathya. (Yobu 6:2, 3; Hab. 1:1-3) Nomwakine indi eriyowa ng’eri ni ry’obuhangiranwa, thutholere ithwayitheya okw’ikolha ebindu by’obukiru.

6. Eky’erileberyako kya Abusaloma kikathweghesayaki? (Lebaya n’ekisasani.)

⁶ Thwamakanganibwa obuthe bulingirirania, ithwangananza eriyighunzira emyatsi omwa nzira eyithatholere. Erikolha ekyo kyanganaleka emyatsi iyatsandira ighuma. Thalengekania okwa ky’erileberyako kya mughalha w’omwami Dawudi ya Abusaloma. Mwahithana kutsibu omughulhu mwali wabu ya Tamari ahambawa kinyamakara n’omwana wa thatha wiwe ya Amnoni. Erikwamana n’Emighambo ya Musa, Amnoni aby’atholere erithibwa. (Law. 20:17) Nomwakine indi kyabya kikayitheghereribwa Abusaloma erihithana, syabya awithe obuthoki obw’eriyighunzira emyatsi.—2 Sam. 13:20-23, 28, 29.

7. Obuthe bulingirirania mubwahamba buthi okwa muhandiki w’esyonyimbo ahabw’obuthuku bulebe?

⁷ Abakakanganaya obuthe bulingirirania bamathendi suyirwa, ithwangana lengekania thuthi sikiwithe mughaso erikolha ebihikire. Thalengekania okwa muhandiki w’esyonyimbo oyuwalhangira ababi bakakulha-kulhana kwilhaba abathunganene. Mwabugha athi: “Ababi ku bali bathya! Bawithe bingyi.” (Esy. 73:12) Obuthe bulingirirania obo aby’akalhangira mubwaleka iniathayikethera emighisa eyikalhwiririra omw’ikolera Yehova, mwabugha athi: “Neryo munalenga eriminya omwatsi oyu, muneya omwatsi oyu iniakalire.” (Esy. 73:14, 16) Neryo, mwabugha athi: “Nikwa  ingye nabya hakuhi n’erithogha; ebisando byaghe byabya ibikasonda erisunukalha [erithendera].” (Esy. 73:2) Ekiri ng’ekyo mukyabya okwa mughalha wethu oyo thukendyahulha mwa Alberto.

8. Obuthe bulingirirania mubwahamba buthi oku mughalha wethu mulebe?

⁸ Alberto mwahangirirwa indi akiba esyosente sy’ekithunga. Ekyalhwiririramu mwaherya esyonzunzo siwe kandi abandi omwa kithunga abakiminyako mubabya isibakimusikirye. Akabugha athi: “Munakwa ekinigha, namahithana, kandi n’eriyiponera.” Mwalighira eriyowa nabi liwe erihamba okwa bunyakirimu bwiwe, kandi mwaghunza emyaka ithano inianasebebere. Eky’erileberyako eki kikakanganaya ekyangabya thwamahithana kutsibu busana n’obuthe bulingirirania.

GHERERERAYA EMIBERE YESU AGHUMIRAMO OBUTHE BULINGIRIRANIA

9. Ni buthe bulingirirania bwahi obo Yesu ayiyiniraya? (Lebaya n’ekisasani.)

⁹ Yesu mwahiraho eky’erileberyako ekyuwene akaghumira obuthe bulingirirania. Thalengekania okwa buthe bulingirirania obo abana erilhua okwa bandu imwamune n’ab’efamile yiwe. Abahughu biwe abathikirirye mubabugha bathi abiribya musire, abakulhu  b’amadini mubamuhangirira bathi akakolongana n’esyombinga, n’abasirikali baba Roma mubamusekerera, bamamuswirya, n’erighunzerera bamamw’itha. (Mk. 3:21, 22; 14:55; 15:16-20, 35-37) Aliwe, Yesu mwayiyinirya obuthe bulingirirania obwosi obu ahathe erithuhulya. Eky’erileberyako kiwe kikathweghesyaki?

10. Yesu mwaghumira athi obuthe bulingirirania? (1 Petero 2:21-23)

¹⁰ Soma 1 Petero 2:21-23. a Yesu mwathuhiriraho eky’erileberyako ekyuwene eky’erikwama thukakanganibwa obuthe bulingirirania. Abya inianasi omughulhu w’erihuna n’omughulhu w’erikania. (Mt. 26:62-64) Mwathasubirya okwa buli mwatsi owabamubughako owathahikire. (Mt. 11:19) Iniakabya akabugha, isyalitsuma abakamwendereraya kutse eribahayira. Yesu mwayikakirya kundi “mwayihira omwa byalha by’oyukatswera ebithunganene.” Yesu mwaminya ngoku ekikulhu kutsibu w’amalengekania agho Yehova awithe okwa myatsi. Mwayikethera ngoku Yehova akendi syaghunzaho obuthe bulingirirania okwa buthuku obutholere.

11. Thwanga kakirya emibughire yethu omwa nzira nga syahi? (Lebaya n’ebisasani.)

¹¹ Thwangana gherererya Yesu omw’iyikakirya omwa ebya thukabugha thukakanganibwa obuthe bulingirirania. Obundi obuthe bulingirirania ni buke-buke, neryo ithwangana thwamu erikwama kya bugheghena. Kutse thwangana thwamu erihuna nuku thuyihighule okw’ibugha ekindu ekikendi tsandirya ighuma emyatsi. (Omu. 3:7; Yak. 1:19, 20) Okwa bundi buthuku, thwangana yithagha  eribugha thwamalhangira obuthe bulingirirania kutse erilhwira okwa kwenene. (Emib. 6:1, 2) Thwamathwamu erikania thutholere ithwalengaho erikania ithunathekene kandi omw’isikya.—1 Pet. 3:15. b

12. Thukayihira thuthi “omwa byalha by’oyukatswera ebithunganene”?

¹² Kandi thwangana gherererya Yesu “omw’iyihira omwa byalha by’oyukatswera ebithunganene.” Abandi bamathuthungako amalengekania mabi kutse erithukolha nabi, thukayikethera ngoku Yehova anasi okwenene. Eriyikethera ng’eryo lyangana thuwathikya eriyiyinirya erikolhwa nabi kundi thunasi ngoku Yehova awithe erisyahengulha emyatsi. Thukayikakiraya okw’ihithana kutse eribika ekinigha omwa mithima yethu, omw’isighira Yehova y’emyatsi. Eriyowa ng’eryo lyangana leka ithwakolha ebithatholere, ithwabulha etseme, kandi lyangana tsandya obughuma bwethu na Yehova.—Esy. 37:8.

13. Ni kyahi ekyanga thuwathikya erithoka erilholha embere erighumira obuthe bulingirirania?

¹³ Okwenene kuli kuthi, sithwanga thoka erigherererya Yesu kikumi okwa kikumi. Okwa bundi buthuku, thwangana kolha kutse eribugha ebindu ebikendi leka ithwayikubyabwomo enyuma waho. (Yak. 3:2) Kandi obuthe bulingirirania bulebe bwangana thulethera obulhumi omw’iyowa na kinyamubiri, ebindu ebyangana kalha erighumira. Ekyo kyamabya ikyanakubereko, yikethere ngoku Yehova anasi ebya wukalhabamo. Kandi Yesu oyuwanaghalhawa busana n’obuthe bulingirirania, akendi kukwira obulighe busana n’eriyowa eryo wuwithe. (Ebr. 4:15, 16) Ery’ongera okw’ithuha eky’erileberyako ekihikene ekya Yesu, Yehova akathuha amenge awuwene awangathuwathikya erighumira obuthe bulingirirania. Leka thukanaye okwa milhondo ibiri erilhua omwa kitabu ky’Abanya Roma eyangana thuwathikya.

‘LEKA ERIHITHANA LYA NYAMUHANGA LIKOLE’

14. Kikamanyisayaki ‘erileka erihithana lya Nyamuhanga likole’? (Abanya Roma 12:19)

¹⁴ Soma Abanya Roma 12:19. Omukwenda Paulo mwahira omwa Bakristayo mw’omuhwa ‘w’erileke erihithana lya Nyamuhanga likole.’ Thukaleka erihithana lya Yehova likole omw’imuleka alethe obulingirirania okwa buthuku obutholere kandi omwa nzira yiwe. Mughalha wethu John abere abirikanganibwa obuthe bulingirirania, mwabugha athi: “Nabya w’erirwanisya eky’eryanza eriyikolera okwa myatsi ngoku nganzire. Abanya Roma 12:19 muhangwathikya erilinda Yehova.”

15. Busana naki kyuwene erilinda Yehova erihengulha omwatsi?

¹⁵ Thukaghasirawa thwamalinda Yehova erihengulha omwatsi. Thwamakolha ekyo, ithukendi yihighulha okwa muheke n’eriyiponera erikasa thukalengaho erianza eriyikolera okwa emyatsi ahabwethu. Yehova anayitheghekire erithuwathikya. Akabya ng’oyukabugha athi: ‘Wunyilekere obuthe bulingirirania obo ngendi yira eky’erikolha.’ Thwamaligha omulhaghe wa Yehova ow’eribugha athi “nasyaliha,” isithwendi hithana lhughumerera, ithukendibya ithunayikethere ngoku akendikolha okwa mwatsi omwa nzira eyuwene. Ekyo ky’ekyawathikaya John, oyukanibweko ahanyuma. Akabugha athi, “Namakwama kyalinda Yehova iniakendyuwania omwatsi omwa nzira eyuwene kwilhaba eyaghe.”

 “WUKINDE EKIBI OMO KIBUYA”

16-17. Erisaba lyanga thuwathikya lithi ‘erikinda ekibi omo kibuya’? (Abanya Roma 12:21)

¹⁶ Soma Abanya Roma 12:21. Paulo kandi mwabwira Abakristayo athi ‘bakinde ekibi omo kibuya.’ Omw’Ikangirirya lya Yesu ery’okwa Kithwe, mwabugha athi: “Mulhole embere erianza esyonzighu syenyu kandi musabire abakabendereraya.” (Mt. 5:44) Nayu mwakolha ikyan’ekyo. Thwangabya ithwamalengekania okw’ighalhwa erya Yesu ayiyiniraya abasirikali Abaroma bakamuhanika okwa muthi. Ithwangana tsuka erilengekania okwa bulhumi obo alhabamo kuthya n’erithendihebwa ekitsumbi n’obuthe bulingirirania obo ayiyiniraya.

¹⁷ Yesu mwathakindwa n’obuthe bulingirirania obo abana. Omwakanya k’eritsuma abasirikali abo, mwasaba athi: “Thatha, baghanyire, kundi sibasi ebyo bakakolha.” (Lk. 23:34) Thwamasabira abakathukolha nabi, ekyo kikakehaya eriyowa lyethu ery’eribika ekinigha n’erihithana n’erihindulha amalengekania awathuwithe okw’abakathuponesaya.

18. Erisaba mulyawathikya lithi Alberto na John erighumira obuthe bulingirirania?

¹⁸ Erisaba mulyawathikya baghalha bethu babiri abalyakanibawako omo mwatsi ono erighumira obuthe bulingirirania obo bakanganibawa. Alberto akabugha athi: “Munasabira baghalha bethu abanyikanganaya obuthe bulingirirania. Munasaba Yehova mirundi mingyi indi angwathikaye erithendi bera erilengekania okwa buthebulingirirania obu.” Eky’obutseme , Alberto anemuthasyakolera Yehova buthaleghulha. John akabugha athi: “Ngendo nyingyi, iningasabira mughalha wethu oyuwanyihithanaya. Emisabe ng’eyo iyikanyiwathikaya erimuthungako amalengekania awatholere, ahathe erimutswera. Kandi emisabe eyo muyaleka ingathekana omwa bulengekania.”

19. Thutholere ithwakolhaki erihika aho enduli y’omughulhu ono yikendi syasira? (1 Petero 3:8, 9)

¹⁹ Sithwangaminya nga ni buthebulingirirania bwahi obo thukisiya ithwakanganibwa omughulhu mubi ono athali ahwaho. Ekyosi-kyosi ekyanga thwasira, isithwalekeraho erisaba Yehova y’obuwathikya. Kandi thugherereraye ebya Yesu akolha akakolhwa nabi n’erilholha embere erighendera okwa misingyi ye Biblia. Thwamakolha ekyo, ithukendibya ithunasi ngoku Yehova akendi syathutsumulha.—Soma 1 Petero 3:8, 9.