Paul: Thwabya ithwabiritsema! Kwabya Kwerikuminakughuma 1985, kandi thwabya ithunemughenda okwa mubiiri wethu w’erimbere ow’obumisyonare—e Liberia, omwa West Africa. Endege eyo thwabyamu muy’ikira e Senegal. Anne mwabugha athi, “Omwa saha nga nguma thuk’ibya ithwamahika e Liberia!” Neryo muthw’owa ekirango ekikabugha kithi: “Abakaghenda e Liberia batholere ibakima omwa ndege. Sithwendi yayo kundi yabiribya abandu balebe abakanza erihaho egavumente.” Ebiro ikumi ebyakwamako, muthw’ikalha n’abamisyonare e Senegal, ithukowa okwa makuru ngoku abandu bangyi banemukwa kandi ngoku egavumente siyirilighira abandu erilhua omo manyumba wabo—ababya bakaghana erikolha ekyo ibakalhasawa.

Anne: Thwabya bandu abakayighendeserezaya kutsibu. Nibya erilhua omwa bulere, ngabya ngasibwe mwa Annie oyukabya inianayilhalikirire. N’erikyuruka enguda nyisa-nyisa iningabya mw’obuba! Aliwe thwabya ithwabirithwamu erighenda okwa mubiiri wethu.

Paul: Ingye na Anne thwabuthirawa omwa bulhambu bughuma ebulengera lyuba bwe England. Busana n’erihiribwa mw’omuhwa n’ababuthi baghe na mama wa Anne, ithwe bosi babiri muthwatsuka obutemburi thukanaghunza esiniya. Mubasighika kutsibu eriyisunza lyethu ery’eringira omwa mubiiri w’omughulhu wosi. Inganawithe emyaka 19, munathunga olhusunzo olhw’erighenda okwa Beteli, kandi thwabere thwabirithahangania Anne mwanyiyiyungako okwa Beteli omwa 1982.

Anne: Muthwanza e Beteli, aliwe thwabya thwanzire erikolera ahali obuyithawa bunene. Erikolha n’abanabya bamisyonare okwa Beteli mukyaleka eriyisunza lyethu ly’eribya bamisyonare iryongera. Ithukakihira omwa misabe yethu obuli kiro ahabw’emyaka isathu, neryo mukyathutsemesya kutsibu thukabana ebaruha eyathukokaya erighenda okwa kilasi eya 79 eye Gileadi omwa 1985! Muthwahebwa olhusunzo lhw’eriyakolera e Liberia, omwa West Africa.

Paul: Muthwaghendera omwa ndege ey’erimbere eyalighirawa erisuba e Liberia. Abandu babya ibakinakwire obuba kandi isibalirighirawa erilhua omo manyumba wabo. N’abali omo katali ibakabya ibamowa omulenge munene owakalhua omwa matoka ikikab’itha obuba. Erithoka eribya ithunathekene, obuli kiro omwa kiro ithukasoma akatsweka kake erilhua  omo kitabu ky’Esyonyimbo. Aliwe thwabya thwanzire kutsibu omubiiri wethu. Anne abya mumisyonare oyukaghenda omw’ithulira, naghe ngabya okwa Beteli, iningakolha na John Charuk. a Munamwighirako bingyi kundi abya inianasi bingyi by’okwa ebyo balikyethu babya bakalhabamu.

Anne: Ni kyahi ekyaleka ithwabeghera lhuba e Liberia? Busana n’olhwanzo lhunene olho balikyethu bathukanganaya, kandi ini bathaleghulha. Muthwayowa ithwabiribya bughuma nabo; kandi mubabya r’ihika lyethu lihyaka. Ebya bathubwira mubya thughumya bunyakirimu. Erithulira eyo mulyathutsemesya. Abo thukathulira ibakapona wamakania nabo bike! Abandu ibakabya ibanemukania okwa bibulyo ebihambire okwa Biblia okwa syonzira. Ikyolhobire erikwama kyayingirya omwa mukania wabu. Thwabya thuwithe abigha be Biblia bangyi erihika okw’ibya ikikathukalira erigha n’abosi. Muthwatsemera obuthuku obo!

Paul: Omwa1989, ihamabirilhaba myaka ini ithune omwa kaholho kake, muhabya embinduka eyik’ubahisaya—muhabya olhuhi. Abarebo mubahamba omwanya ow’abyamo e Beteli ebiro 2, Okwomusanju, 1990. Ahabw’amezi asathu muthwabya isithwangathasya kanirania n’abali omwa bindi bihugho, imwamune n’ab’efamile yethu n’Ekyaghanda kikulhu ky’ekihugho kyosi. Yabya amalhwa, enzalha, n’erihamba abakali kinyamakara. Ebitsibu mubyalholha embere ahabw’emyaka 14 kandi mubyahamba nabi okwa kihugho kyosi ekyo.

Anne: Muhabya amalhwa n’erithangana ly’ebihanda. Abasirikali abali n’esyombundu ibanambere omwa mibere eyithayitheghereribawa mubayitsatsanga omwa nzira, n’eryingira omwa buli nyumba n’erihekamu ekyosi-kyosi ekyo banzire. Abandi ibakalhangira er’itha abandu “ng’erikera esyongoko”. Babya ibabirithomengekania ebinda okwa mukangyi, n’ebindi hakuhi ne Beteli. Abema abathaleghulha mub’ithibwa, imwamune n’abamisyonare bethu babiri.

Abema mubahira esyongebe syabu sy’omw’akabi bakabisa abandi ababya b’omwa bihanda ebyo babya bakanza er’itha. Abamisyonare n’abanya Beteli nabu mubakolha ikyan’ekyo. Okwa Beteli, abaghuma b’okw’ababya ibabirisighania amaka wabu, ibakakesaya omwa bisenge by’ekabunu n’abandi mubabya nethu omwa bisenge by’eyighulhu eby’ekayina. Muthwabya omwa kisenge kyethu n’efamile y’abandu musanju.

Paul: Obuli kiro, abasirikali ibakalengesaya eryasa okwa Beteli eryanza eriminya nga thunawithe abandu abo thubisire. Thwabya ithuwithe abalindi bbani: ababiri ibakabya ibanemulebererya omw’idirisa n’abandi babiri ibakatheghaya okwa geti. Ababiri ababya okwa geti ibamaleka ebyalha byabu by’embere, ikikamanyisaya kithi sihali butsibu. Aliwe ibamahira ebyalha byabu by’enyuma syabu, ikikamanyisaya kithi abasirikali batsurumire, neryo ababya bakalebererya omw’idirisa ibakalhwaho ibabisa balikyethu.

 Anne: Habere halhaba wiki nyingyi, egurupu y’abasirikali abahithene mub’ingira okwa Beteli kinyamakara. Ingye na dada mulebe muthwayikyingira omwa kinabiro omuli ekabada eyirimo akanya kake k’eribisamamo. Dada oyo mwayihathathania omwa kanya ako. Abasirikali babya ibabiryasa omwa bisenge by’eyighulhu eby’ekayina ibane n’esyombundu. Ibanahithene, mubaswirya okwa lhuyi lhwethu. Paul mwabalemba-lemba athi, “Mukali waghe anemukolesya ekinabiro.” Erithasyathonda ekabada n’erisubyamo ebindu ebilhuemo, mukyathwalha ndambi kandi kyangalekire ibanyowa, neryo munatsuka eritukumira kutsibu ingye wosi. Neryo nangakyungwire indi olhuyi? Munasaba kikuthu-kuthu, erilemba-lemba Yehova indi angwathikaye. Neryo munakyungulha olhuyi kandi namathoka eribaramukya inganathekene. Omughuma w’okw’ibo mwanyisukuma, amaghenda ahali ekabada, amakyungulhayo, n’erihamo ehibbaho hyosi ehikabya kw’ebindu. Mwasweka akeya isimuli mundu. Neryo iyo n’egurupu yiwe mubasondekania omwa bindi bisenge n’omwa lhuthwe lhwe nyumba. Aliwe mubathabanayo mundu.

Paul: Ahabw’amezi, thwabya isithuwithe ebyalya ebikaghunza. Aliwe muthwabyaho busana n’ebyalya by’obunyakirimu. Eriramya ly’engyakya ly’okwa Beteli ly’eryabya “eky’engyakya” kyethu kisa, kandi ithwe bosi ithukasima akaghalha ako lyabya likathuhiramo.

Ebyalya byonyine-nyine n’amaghetse kubyahwaho, erileka ithwe n’abandi thukalhua okwa Beteli eriyabisondya, obundi abo thubisire bang’ithibirwe. Okwa bundi buthuku, emibere n’endambi eyo Yehova abya akathuheramo ebiyithawa byethu ikikabya nga kithiko-thiko. Yehova mwathuha ebiyithawa byethu kandi amathuwathikya erithekana.

Emibere y’ekihugho yabare yinemw’ongera erikalha, n’ekwenene kuyan’ongera yithya erikolerya. Balikyethu ibakabera erithibitha erilhamya esyongebe syabo, aliwe erikirirya lyabu irikasighalha irinaghumire kandi ibanathekene. Abandi mubabugha bathi ebyo balhabamo omwa lhuhi byabya “bikabatheghekera obulighe bunene.” Abasyakulhu n’abaghalha bethu balere abathubaha mubayihayo erisondolha. Babere babirithibitha, mubasighalha ibane bughuma n’eritsukiraho erithulira omwa bulhambu buhyaka kandi mubahimba omwa kisuki mw’Ebisenge by’Obwami ebyalhuba-lhuba omw’ikolesya ekyosi-kyosi ekya babana n’eritsuka erihindaniramo. Omwa buthuku obukalire obo, emihindano muyahira omwa balikyethu mw’omuhwa n’erithulira mulyaleka ibaghuma. Thwabere thunemughaba ebindu eby’erikolesya, mukyathutsemesya balikyethu bakathusaba esyobbaga esy’erikolesya omw’ithulira omwakanya k’esyongyimba. Abandu abali omwa bulighe kandi abali omwa bitsibu ebikalire mubahulikirira engulhu yuwene. Mubasweka busana n’amalengekania mabuya n’etseme eyo Abema babya nayu; mubakolerya ng’ekyakakalha omwa mibere ey’omwirima owosi oyo. (Mt. 5:14-16) Omuhwa w’abalikyethu mwaleka abaghuma b’okwa basirikali abatsurumire ibabya baghalha bethu.

Paul: Muhanayira thwamabya ab’erilhua e Liberia, emirundi isathu muthwaghenda aliwe ithukaghunzayo  buthuku buke, n’emirundi ibiri ithukaghunzayo mwaka mughuma-mughuma. Mwali wethu mughuma omumisyonare mwasoborera ndeke eriyowa lyethu athi: “Okwa Gileadi, mubathweghesya erihira omuthima wethu wosi okwa lhusunzo lhwethu, kandi muthwakolha ekyo. Neryo erisighania balikyethu omwa mibere ng’eyo ikikabbuna omuthima!” Eky’obutseme, muthwalholha embere erisighika balikyethu n’omubiiri w’erithulira e Liberia ithune omwa bihugho ebibathimbireko.

Anne: Omwa Kwakathano 1996, abbani b’okw’ithwe mubaghenda omo motoka ye Beteli eyabyamo ebihandiko bingyi by’omughaso ebihambire okwa mubiiri ow’erithulira owe Liberia. Muthwanza erighenda kilomita 16 erihika omo mwanya owathekene okwa wundi musirya w’etawuni. Aho naho omwanya ogho thwabyamo mwabambirwa. Abasirikali abahithene mubalhasanga amasasi omo kyanya, bamathwimania, bamakurira abasathu b’okwithwe b’eyihya, neryo bamafugha emotoka Paul iniakinemo. Muthwasighalha aho ithunakukubere. Kitsumbukirania, muthwalhangira Paul inianemwasira omwa kingungu ky’abandu embumu yiwe iyinemulhua mw’omusasi. Omw’iyibulha-bulha, muthwalengekania thuthi babirimulhasa, aliwe neryo muthwaminya ngoku sibathamulhasa, kundi ku bamulhasa sy’angathokire erighenda! Omughuma w’okw’abasirikali abya iniabirimuhumba akamusukumira eyihya sy’ematoka. Eky’obutseme, kyabya kironda kike.

Emotoka ey’amahe ey’etrasipoti eyabya yoswire mw’abandu banene abakwire obuba yabya iyine hakuhi. Muthwaghendera kuyo kw’eyihya ithunahambirire okwa kalemereryo. Omufuyi wayo mwafuwayo okwa sipidi nene, kandi thwabalha hake erithogha. Muthwamubwira thuthi imanaye emotoka, aliwe kundi abya akwire obuba bunene mwathakolha ekyo. Muthwathathogha okwa motoka, aliwe yabere y’imana thwabya ithwabirilhuha kandi ithunemutukumira basana n’erikwa obuba.

Paul: Muthwasamalirana ithune omwa syongimba esikinire, kandi esitamangukire n’erisweka ngoku thukineho. Muthwakesya omwa kisahu ky’endege, omwabya endege eyabya iyabirilhasangwa omwa masasi, eyathuthwalha e Sierra Leone ekiro ekyakwamako. Thwabere thwahika e Sierra Leone muthwatsema kundi thwabya ithukineho aliwe muthwayilhalikirira kutsibu busana n’Abakristayo balikyethu abasighalha e Liberia.

Anne: Thwabere thwahika okwa Beteli omwa Freetown, e Sierra Leone, muthwabya omwa butheya kandi muthwatsomanwa ndeke. Aliwe munatsuka ery’ibuka ebyo thwalhabamu. Omw’ithungyi, iningabya omwa buba bunene n’ebinyithimbireko ibikabya nga ni biruru kandi ibyabya ng’ebithenaho. Omwa kiro, iningahahamuka, ingatukumira, n’eriyowa ngahakayabya ekindu ekikalire. Ikikanyikalira erihumulha. Paul mwanyihambako neryo amasaba haghuma naghe. Muthwimba esyonyimbo sy’Obwami erihika aho nabya isingakitukumira. Munayowa ngangendibya musire kandi nga sinangathasyathoka erikolha ng’omumisyonare.

Sinendi sy’ibirirwa nahake ekyakwamako. Omwa wiki iyaneyo muthwahebwa esyagazeti ibiri. Enguma yabya Awake! ey’Okwomukagha 8, 1996. Mwabya omwatsi “Erighumira Eribya mw’Engitsi.” Neryo munayitheghererya ekyaleka ingabya mw’engitsi. Eyakabiri yabya e Watchtower ey’Okwakathano 15, 1996, eyabya mw’omwatsi “Ni Hayi Aho Bakiha Akaghalha Kabu?” E Watchtower yabya mw’ekisasani ky’ekinyurughunzu ekihuthere. Omwatsi mwasoborera ngoku ekinyurughunzu kyangana lholha embere erirya n’erihulhuka nomwakine indi kinawithe ebipupa ebihuthere, omwa buwathikya bw’omulimu wa Yehova thwangana lholha embere eriwathikya abandi nomuthwangabya ithuhwere amani. Ebi byabya byalya ebikahimba ebyalhua oku Yehova ebyasira okwa buthuku obutholere. (Mt. 24:45) Erisekulya okwa mwatsi oyu n’erihira emyatsi eyikakanaya okwa mwatsi oyu ya haghuma mukyangwathikya. Obuthuku bwabere bunemulhaba, munabya isinangathasy’ibuka ebindu bibi ebyo nalhabamu.

Paul: Ithukabya thukasuba e Liberia eyo thwabya thukayowa iy’ewethu, ithukatsema kutsibu. Omwaka wa 2004 abere akahwa, thwabya ithwamabirighunza hakuhi emyaka nga 20 omwa mubiiri wethu. Olhuhi lhwabya ilhwabirihwamu. Habya ihane esyondegheka sy’obuhimbe okwa kyaghanda ky’omuthahulha. Aliwe kitsumbukirania muthwasabwa erikolha owundi mubiiri muhyaka.

Eki mukyathukalira kutsibu. Thwabya ithwabiribya bughuma n’erihiika lyethu ly’obunyakirimu—thwanga  thokire thuthi erighuma? Kundi muthwanasighania esyofamile syethu esyo thwanzire thukaghenda okwa sukuru ye Gileadi, thwabya ithwabiriyilhangirira ngoku eriyikethera Yehova kikalhwiriramo emighisa, neryo muthwaligha. Muthwayakolera omwa kihugho ekyabya hakuhi, e Ghana.

Anne: Muthwalira kutsibu thukalhua e Liberia. Muthwasweka mughalha wethu Frank, ow’amenge kandi oyukulire omwa myaka, akathubwira athi: “Mutholere imwathw’ibirirwa! Neryo mwasoborera athi, thunasi ngoku muthe mwangathw’ibirirwa, aliwe mutholere imwahira omuthima wenyu wosi okwa lhukwamirwa lhwenyu lhuhyaka. Yehova yuwabahalho, neryo muhire amalengekania wenyu oko balikyethu abali eyo.” Eki mukyathughumya n’erileka ithwayithegheka erisondya abanywani bahyaka eyo abake buyira bababya bathwasi omwa kihugho ekyo thuthabya thwasiko bingyi.

Paul: Aliwe, mukithathwalha buthuku buuli erianza erihiika lyethu lihyaka ery’obunyakirimu erye Ghana. Yabya Abema bangyi! Obuthaleghulha n’erikirirya erighumire ery’abanywani bethu abahyaka mubyathweghesya bingyi. Thwabere thwabirikolera e Ghana ahabw’emyaka 13, muthwabana ekindi kindu ekyo thuthayitsulirye. Muthwasabwa erikolera okwa kyaghanda ky’omuthahulha kye East Africa e Kenya. Nomwakine indi muthwakwa balikyethu be Ghana ne Liberia b’olhukando, mukyathwolhobera erinywana balikyethu abathaleghulha abe Kenya. Thukinakolera omwa bulhambu bunene obuli mw’obuyithawa bunene kutsibu.

Anne: Ahabw’emyaka mingyi, nabirilhaba omwa bik’itha obuba. Emibere eyik’itha obuba kandi eyikaletha amaghaniryo yangana thuhambako kinyamubiri n’omw’iyowa. Sithuli theghibawa okw’ebi omwa nzira ey’ekithiko-thiko. Namowa amasasi n’esyobomu, enda yaghe yikalhuma n’ebyalha byaghe ibyasanyarara. Aliwe, nabir’igha eriyikethera obuwathikya obo Yehova akathuha, imwamune n’obuwathikya bw’abalikyethu. Kandi nabirilhangira ngoku thwamabya n’endegheka ey’eribera eriyeghesya bunyakirimu, Yehova iniakendi thuwathikya erisighalha ithune omwa mubiiri wethu.

Paul: Abandi ibangana thubulya bathi, “Munanzire omubiiri wenyu?” Ebihugho byanganabya ibyuwene, aliwe byangana bulha mw’obuholho kandi ibyabya mw’emibere eyikalire. Neryo, ni kyahi ekyo thwanzire kwilhaba ekihugho? Balikyethu b’obughuli, erihiika lyethu. Nomuthwangabya thulhwire omwa mibere muthina-muthina, okwenene kuli kuthi, thuwithe malengekania maghuma. Muthwalengekania thuthi thwathumawa erisyabaghumya, aliwe okwenene kuli kuthi, n’ibo babirithughumya.

Obul’ihuma, ithukayilhangirira ekithiko-thiko ekya munabwire: balikyethu. Ekikulhu thwamabya ithune omwa kithunga, thuwithe erihiika kandi thuli omwa butheya. Thuyikethere ngoku thwamalholha embere eriyikethera Yehova, akendi thughumya erikwamana n’ebiyithawa byethu.—Fil. 4:13.