DIANA ni w’emyaka eyilhabire omu 80 kandi hamabirihwa myaka nga yan’eyo inianemwaghalhwa. Mwira wiwe oyuwabya alhwere obulhwere bwe Alzheimer (obwongo erithendi kolha ndeke) kandi iniane ahakalembererawa abakulire, mwaholha. Baghalha biwe babiri nabu mubaholha, kandi inialhwere ekansa y’omw’ibere. Aliwe balikyethu bakabya bakalhangira Diana okwa mihindano kutse omw’ithulira, akabya inianatsemire.

John mwakolha ng’omulebererya w’omuthimbo habw’emyaka eyilhabire omu 43. Inianzire olhusunzo lhwiwe lhwa kutsibu kandi isyali lengekanaya athi angana kolha n’owundi mubiiri. Aliwe, mwabya iniatholere erileka omubiiri w’eribungira ebithunga eriyathwanira omuhughu wiwe. Balikyethu ababya basi John bakabya bakamubana okwa mihindano emike-mike n’eminene-minene, bakalhangira iniane ngoku anabya. Akinatsemire kutsibu.

Kikathokekana kithi Diana na John eribya ibanatsemire? Oyunemwaghalhwa angabya athi inianatsemire? Omundu angatsema athi amabya ini w’erisighania olhusunzo olhw’awithe olhw’anzire? E Biblia yikathuha eky’erisubirya. Yikabugha yithi: “Abandu abathunganene basyatsemera ebyo Mwami Mukulhu abirikolha.” (Esyonyimbo 64:10) Thwangana yitheghererya ekwenene eyi ya ndeke thwamaminya ekyanga thuha etseme eyithahwa n’ekithe kyanga thuhereryayo.

Mughulhu mungyi ebindu birebe bikanaletha etseme. Ng’eky’erileberyako, thalengekania okwa mulhume n’omukali abanzene abakathahanaya. Kutse omundu oyukayabya mubuthi kutse oyuwamabana olhusunzo lhuhyaka omwa mubiiri wa Yehova. Ebindu ebi bikaletha etseme kundi ebyosi ni bihembo erilhua oku Yehova. Abirithuhiriraho endegheka y’obutheke, amaaka w’eribya n’abaana, n’omubiiri w’erikolha omwa kithunga kiwe.​—Enzuko 2:18, 22; Esyonyimbo 127:3; 1 Timoteo 3:1.

Aliwe, ebindu birebe ebikaletha etseme byangabya by’omughulhu muke. Eky’obulighe, oyo wuli nayu omwa butheke angana leghulha kutse iniaholha. (Ezekieli 24:18; Hosea 3:1) Abaana bangana ghana eriowa ababuthi  na Nyamuhanga, obundi nibya ibahighithwa. Ng’eky’erileberyako, baghalha ba Samweli mubathakolera Yehova omwa nzira eyitholere, na Dawudi mwabana ebitsibu bingyi omw’eka yiwe busana n’erikolha erilholho na Batiseba. (1 Samweli 8:1-3; 2 Samweli 12:11) Ebindu ng’ebi byamabya, sibiriletha obutseme aliwe bikaletha obulighe n’obulhumi bunene.

Kuthya, hakanayira ithwabya isithwendi lholha embere erikolha olhukwamirwa lhwethu omwa mubiiri wa Yehova busana n’obulhwere kutse eritsomana ab’omw’eka, kutse busana n’embinduka omwa kithunga. Abangyi ababiribya ini b’erileka esyongwamirwa syabu bakabugha bathi bakabya ibane mwibuka etseme eyo babya bakabana.

Thukalhuaho ithwalhangira ngoku etseme ng’eyo yanganabya y’obuthuku buke. Neryo hane omulingo w’etseme eyangabyaho kera na kera nomuthwangabana ebitsibu omwa ngebe? Yitholere iyabyaho, kundi Samweli, Dawudi, n’abandi mubathaherya etseme yabu bakabana ebitsibu.

Yesu abya inianasi ndeke-ndeke etseme nga niki. Athaliasa okwa kihugho, e Biblia yikathubwira yithi ‘mwatsemera emighulhu yosi embere sya Yehova.’ (Emisyo 8:30) Abere akasa okwa kihugho, ihakanayira iniabana ebitsibu ebikalire. Aliwe, Yesu mwabana etseme omw’ikolha erisonda lya Thatha wiwe. (Yoane 4:34) Kandi ibbwa omwa bulhumi bwiwe bw’erighunzerera? Thukasoma thuthi: ‘Mwayiyinia okwa muthi, aby’asi obutseme obwasyabya biwe.’ (Abaebrania 12:2) Neryo thwangan’igha bingyi okwa bindu bibiri ebya Yesu abugha okwa tseme ey’okwenene.

Buthuku bughuma, abigha 70 mubahika oku Yesu bakalhua omw’ithulira. Babya batsemire busana n’ebyosi ebyo babya ibabirikolha, nibya n’erihigha esyombinga. Aliwe Yesu mwababwira athi: “Simutseme kusangwa ebirimu bibi byabiribowa, nikwa mutseme kusangwa amena wenyu abirisakwa elhubulha.” (Luka 10:1-9, 17, 20) Ni kwenene, erisimwa na Yehova ni kikulhu kutsibu kandi kikaletha obutseme bunene kwilhaba owundi mubiiri wosi-wosi.

Okwa bundi buthuku, Yesu abere anemukanirya endeko, omukali Omuyuda mwanza kutsibu erikangirirya lya Yesu n’erimubwira athi mama wiwe atholere eribya iniatsemire eribya n’omwana oyuli ng’iwe. Aliwe Yesu mwamusubirya  athi: “Ko bithe bithya, nikwa obutseme buli oko bakowa ekinywe kya Nyamuhanga n’erikolhakyo!” (Luka 11:27, 28) Eriyisyethera abaana bethu kyanganaleka ithwatsema. Aliwe ekikathulethera etseme eyithehwa ly’eriowa Yehova n’eribya n’engolongana eyuwene nayu.

Thukatsema kutsibu thukaminya ngoku Yehova akathusima. Kandi nomwakine indi si thwanga tsemera ebitsibu, sibyanga thulhusya kw’etseme yethu. Nibya, thwamabya bathaleghulha omwa bitsibu, obutseme bwethu bukongera. (Abanya Roma 5:3-5) Kandi, Yehova akaha omulimu wiwe okw’abo abakamuyikethera, n’obutseme ni kighuma ky’okwa mikolere y’omulimu. (Abanya Galatia 5:22) Ekyo kikathuwathikaya eriyitheghererya ekikaleka Esyonyimbo 64:10 ihabugha hathi: “Abandu abathunganene basyatsemera ebyo Mwami Mukulhu abirikolha,” kutse basyatsemera omu Yehova.

Kandi eki kikasoborera ekyaleka Diana na John ibabya ibanatsemire nomubanabana ebitsibu ebikalire. Diana akabugha athi: “Nabiriyira Yehova mwa busaghiro bwaghe, ngoku omwana akakolha omubuthi mwa busaghiro bwiwe.” Akongerako athi: “Ngayowa iniabirinyitsumulha omw’inyiha amaaka w’erilholha embere erithulira mughulhu wosi inganatsemire.” Ni kyahi ekyawathikaya John eribya inianatsemire n’eriyihwerya omw’ithulira enyuma w’erileka olhusunzo lhwiwe? Akabugha athi: “Eritsuka 1998 omughulhu nathumawa eriyakangirirya okwa Sukuru y’Abasyakulhu n’Abaghombe Abawathikya, nabiriongera eriyeghesya kwilhaba enyuma.” Akabugha athi esyombinduka esyo iyo na mukali wiwe bakolha syathokekana kundi mughulhu wosi ibakabya ibanayitheghekire erikolha omubiiri wosi-wosi owa Yehova akabaha. Akongerako athi: “Thwabirikolhagho ahathe eriyikubya bwomo.”  

Abandi bangyi babiriyilhangirira ngoku ebiri omu Esyonyimbo 64:10 ni kwenene. Thalengekania okwa mulhume na mukali wiwe abaghunza emyaka eyilhabire omu 30 ibanemukolera okwa Beteli e Amerika. N’enyuma waho mubathumwa ng’abatemburi b’embaghane. Mubabugha bathi: “Ni kya buli kiro eribya n’obulighe wukaherya ekyo wanzire,” aliwe mubongerako bathi: “Siwangabya omwa bulighe kera na kera.” Babere bakanahika eyo bathumawa, mubatsukiraho erithulira n’ekithunga. Kandi mubabugha bathi: “Muthwasaba busana n’ebindu birebe. Erilhangira emisabe yethu yikasubwamu mukyathuhimba n’erithulethera etseme. Thwabere thukanahikayo, abandi omwa kithunga mubatsuka obutemburi, kandi muthwatsumulhwa thwamabana abigha babiri be Biblia abakakulha-kulhana.”

Ni kwenene, si kyolho eribya iwunatsemire mughulhu wosi. Hakendibya ihane mubya obuthuku ithwabya omwa bulighe. Aliwe Yehova akathughumaya omwa binywe ebiri omu Esyonyimbo 64:10. Nibya n’omughulhu thuhwere amani, thwangana kakasya ngoku thwamasighalha bathaleghulha nomuhangabyaki, ‘thwasyatsemera omu Yehova.’ Kandi thwangana lindirira omughulhu omulhaghe wa Yehova owa “olhubulha lhuhya-lhuhya n’ekihugho kihya-kihya” asyabererera. Neryo obuli mundu akendi syahikana kandi ‘mighulhu yosi iniatsema n’eritsanga’ busana n’ebyosi ebyo Yehova akendi syakolha.​—Isaya 65:17, 18.

Thathera akasasani ngoku bikendisyabya. Thukendisyabya n’amaghalha awahikene n’eribuka obuli kiro ithunawithe akaghalha. Nomuthwangabya imuthwabana ebindu ebiri bithi kera ebyathulethera obulighe, sibyendi syasathulethera obulighe. Yehova akathukakasaya athi “emyatsi y’erimbere siyendi syasyibukwa, kutse erihika oko muthima.” Thukendi syathangirira abanze bethu ababiriholha n’eriyowa ng’ababuthi ab’omusika w’emyaka 12 oyo Yesu alhubukaya: “Mubasweka n’erisweka inene.” (Mariko 5:42) Erighunzerera, obuli mundu okwa kihugho akendi syathunganana ndeke n’eritsemera omu Yehova kera na kera.