ABANDI bamathukangania obwenge [olhukeri], kikaleka ithwayowa ndeke. Kikathuhumulikanaya eriminya ngoku bathutsomene. Kundi thukasima abandi bakathukangania olhukeri, thwang’igha thuthi eribya b’olhukeri?

Omundu w’olhukeri akatsomana abandi n’erikikangania omwa mibughire n’omwa mikolere. Syalikwama ky’eribya mwolho. Aliwe, akakolongana n’abandi omwa lhukeri kundi abanzire kandi akayitheghereraya eriyowa lyabu. Ekikulhu kutsibu, olhukeri ni kitsweka ky’okwa mikolere y’omulimu abuyirire wa Nyamuhanga. (Abanya Galatia 5:22, 23) Yehova anzire ithwabya b’olhukeri, neryo leka thulebaye ngoku iyo na Mughalha wiwe babirikangania olhukeri kandi ngoku nethu thwanga gherererya eky’erileberyako kyabu.

Yehova akakanganaya abosi b’olhukeri, nibya n’okwa “bathesima n’abandu babi.” (Luka 6:35) Ng’eky’erileberyako, Yehova “akahulhukaya eryuba liwe okwa babi n’oko babuya, kandi akathuma embulha okwa bathunganene n’oko bathathunganene.” (Matayo 5:45) Nibya n’abandu abatheligha bathi Yehova y’Omuhangiki bangana ghasirwa omwa lhukeri lhwiwe kandi ibabya ibanatsemire omwa ngebe.

Eky’erileberyako kikulhu eky’olhukeri lhwa Yehova ky’eky’akolera Adamu na Eva. Imubanamabirisobya, “mubalhandira haghuma ebikoma by’omuthini, mubayirabyo mo ngyimba.” Aliwe, Yehova mwaminya ngoku bamabirilhua omw’irima lye Edeni, bakendi yithagha esyongyimba esyanga batheya ndeke, kundi ekithaka mukyathakirwa n’eryosulhamo “emisaki-saki n’amahwa.” Neryo Yehova omwa lhukeri mwabakokotherya “esyongyimba sy’engobi.”​—Enzuko 3:7, 17, 18, 21.

Nomwakine indi Yehova ni w’olhukeri okwa “bathesima n’abandu babi,” kutsibu-tsibu ni w’olhukeri okwa baghombe biwe abathaleghulha. Ng’eky’erileberyako, omughulhu Zekaria abya muminyereri, omumalaika mwakwa obulighe kundi Abaisraeli mubaleka erihimba ehekalu ya Yehova e Yerusalemu. Yehova mwahulikirira ebya mumalaika abugha n’erimusubirya omo “binywe byuwene eby’erikirania.” (Zekaria 1:12, 13) Yehova kw’anabya athwere athya n’omuminyereri Eliya. Muhanabya obuthuku omuminyereri Eliya amayowa iniabirihwa amani n’eriyowa iniali iyuwene neryo amasaba Yehova athi amwithe. Yehova mwakangania kw’atsomene eriyowa lya Eliya neryo mwathuma omumalaika eriyamughumya. Kandi mwakakasya omuminyereri ngoku syali iyuwene. Olhukeri lhwa Yehova mulhwahira omu Eliya mw’omuhwa w’erilholha embere omwa mubiiri wiwe. (1 Abami 19:1-18) Omwa baghombe ba Yehova abosi, nindi oyo wangabugha wuthi abirigherererya ndeke olhukeri lhwa Yehova?

Omughulhu Yesu abya okwa kihugho, abandu mubalhangira ngoku abya w’olhukeri. Isyatsurumire kandi isyalikaka abandi erikolha ebyo anzire. Mwatsomana abandi n’eribugha athi: “Mwase okw’ingye, inywe bosi ko mukanuba n’eriheka ebirithohire, ngendi balhuhukya.  . . . Kusangwa engomo yaghe ni nyibuya.” (Matayo 11:28-30) Kundi abya w’olhukeri, abandu ibakamukwama ehosi-hosi eyo akaya. Busana n’eribakwira obulighe, Yesu mwabaha ebyalya, amabalhamya, n’eribakangirirya “emyatsi mingyi” eyihambire oku Thatha wiwe.​—Mariko 6:34; Matayo 14:14; 15:32-38.

Yesu mwayitheghererya eriyowa ly’abandu kandi mwakolongana nabu omwa lhukeri n’omwa mibere ey’obuyitheghererya. Nibya, n’omughulhu ahathathene, omwa lhukeri iniakawathikaya obuli mundu oyukamuhikako. (Luka 9:10, 11) Lengekanaya okwa kyabya oko mukali oyuwabya alhwere obulhwere bw’erilhua kw’omusasi. Mwanza erilhamibwa, neryo mwathulha okwa lhukimba lhwa Yesu. Aliwe erikwamana n’Emighambo ya Musa, syabya atholere erikolha ekyo kundi abya mutsandirya. (Abalawi 15:25-28) Yesu mwakolhaki? Mwathakania nayu omw’imutsurumira. Mwalhangira ngoku aby’akwire obuba, neryo mwamukwira obulighe kundi abya iniabiriaghalhwa habw’emyaka 12. Mwamubwira athi: “Mwali waghe, erikirirya lyawu lyamakulhamya. Wughende buholho, wulhamibawe kw’endwalha yawu.” (Mariko 5:25-34) Omo kwenene, Yesu abya w’olhukeri!

Omwa by’erileberyako ebya thwamabirikaniako, thwamabirigha ngoku thwamabya b’olhukeri, ithukendi kolha ebindu birebe eriwathikya abandi. Yesu mwakangania eki ngoku ni ky’omughaso akaha omusyo w’Omusamaria mubuya. Omuyuda abya iniabirinyewa, eriswiribwa, n’erimusigha aholere okwa nzira. Omusamaria oyuwalhabaho mwakwira omulhume oyu y’obulighe, nomwakine indi Abasamaria n’Abayuda ibaponangene. Olhukeri mulhwaleka Omusamaria iniawathikya omulhume oyo. Mwoya ebironda biwe n’erimuthwalha omwa hotele. Omusamaria mwathuha omwinye hotele erithwanira Omuyuda kandi mwayilhagha erithuha ebindi ebikendi kolesibwa.​—Luka 10:29-37.

Olhukeri lhukendi leka ithwabya n’obuyitheghererya kandi abakahumulikanaya butsira omwa bya thukakolha bisa aliwe n’omwa byathukabugha. E Biblia yikabugha yithi: “Erilithoha ly’omuthima w’omundu likamukondomaya, nikwa ekinywe kibuya kikatsemesayagho.” (Emisyo 12:25) Olhukeri n’obubuya byamathusukuma eribugha ebikahimba abandi, ikikendi leka ibatsema. * (Lebaya omwatsi ahikwa.) Ebinywe byethu by’olhukeri bikendi kangania ku thubatsomene kandi ibyaleka ikyabolhobera erighumira ebitsibu omwa ngebe.​—Emisyo 16:24.

Ithwebosi thunawithe amaaka w’erikangania olhukeri kundi Nyamuhanga mwahangika abandu bosi omwa kisosekanio kiwe. (Enzuko 1:27) Ng’eky’erileberyako, Yulio, omukulhu w’emilhondo y’abasirikali Abaroma, oyuwabya awithe olhukwamirwa lhw’erithwalha omukwenda Paulo ye Roma, “mwakolha Paulo yo ndeke, mwamuha ehamuli y’eriyabana abira biwe n’eriwathikibwa” omwa muyi we Sidona. (Emibiri 27:3) Obwathu obwa Paulo n’abandi babyamu bwabere bwawa omo ngetse ibane omwa lhughendo olhu, abandu be Melita ‘mubabayira ndeke kutsibu’ ni bugha ambu eribakangania olhukeri n’eribakirya omuliro w’eryotha. (Emibiri 28:1, 2) Abandu aba mubakolha ekindu ekyuwene. Aliwe, eritsemesya Yehova, omundu atholere iniabya w’olhukeri mughulhu wosi, butsira okwa buthuku bulebe.

Yehova anzire ithwayira olhukeri mwa mubere wethu omwa ngebe. Ky’ekikaleka iniathubwira athi ‘thuyire emithima’ y’olhukeri. (Abanya Kolosai 3:12) Aliwe si kyolho eribya w’olhukeri mughulhu wosi. Busana naki? Obundi si thuli kanganaya olhukeri kundi thuli b’esisoni, sithuli buholho, kutse thuli mw’eriri ng’iyitsomana. Kutse kyangana thukalira erikangania olhukeri abakathukolha nabi. Aliwe thwamasaba omulimu abuyirire n’erilengaho erigherererya Yehova, iniakendi thuwathikya eribya b’olhukeri.​—1 Abanya Korinto 2:12.

 Thwangaminya thuthi ah’eryuwania eryongera eribya b’olhukeri? Yibulhaye: ‘Nganahulikirira ndeke abandi n’erilengaho eriyitheghererya eriyowa lyabu? Abandi bamayithagha obuwathikya ngana kilhangira? Ni mughulhu wahi nakanganaya olhukeri oko yuthe muhughu waghe kutse munywani waghe?’ Neryo hiraho ebilhubirirwa, ng’eriminya bingyi ebihambire okwa bandu abo wuli nabu, kutsibu-tsibu abali omwa kithunga. Omwa nzira eyi iwukendi minya ebitsibu byabu n’ebyo bakayithagha. N’ekindi, lengaho erikangania abandi b’olhukeri ngoku nawu wanganza ibakukanganialho. (Matayo 7:12) Erighunzerera, saba Yehova y’obuwathikya, nayu akendi tsumulha akaghalha kawu k’erianza eribya w’olhukeri.​—Luka 11:13.

Omukwenda Paulo abere akathondogholha ebindu ebyaleka iniabya mughombe mubuya, ekighuma ky’okw’ibyo lhwabya ilhw’olhukeri. (2 Abanya Korinto 6:3-6) Abandu mubanza Paulo kundi abya akabugha n’erikolha eby’olhukeri, kandi ibakayowa iniabatsomene. (Emibiri 28:30, 31) Nethu, thwamabya b’olhukeri, abandi ibangananza erigha bingyi okwa kwenene. Thwamakangania abandu bosi b’olhukeri, nibya n’abakathukolha nabi, ikyanganahamba okwa mithima yabu neryo ibahindulha amalengekania wabu. (Abanya Roma 12:20) Obundi enyuma waho ibanza erigha ebihambire okwa Biblia.

Omwa Paradiso, obuli mundu akendisyabya w’olhukeri. Abakendi syalhubuka bakendi syakanganibwa olhukeri, abandi igho murundi w’erimbere. Ahathe erithika-thika, eki kikendi syabahira mw’omuhwa w’erikangania abandi b’olhukeri. Kundi nibya ibbwa, omundu oyuthawithe olhukeri kandi oyuthyanza eriwathikya abandi syendi syalighirwa eribya omo Bwami bwa Nyamuhanga. Abandu abawithe olhwanzo kandi ab’olhukeri basa babakendi syabyaho kera na kera omwa Paradiso. (Esyonyimbo 37:9-11) Kikendi syabya kihugho ekiri ndeke kandi ekiri mw’obuholho! Nibya, n’obuthuku obo buthe bwahika, thwangana ghasirwa omw’ibya b’olhukeri. Thuthi?

E Biblia yithi: “Omundu w’erighanyira [w’olhukeri] akakolera ekirimu kiwe ky’ebibuya.” (Emisyo 11:17) Abandu bakanza ibabya n’omundu w’olhukeri, kandi mughulhu mungyi nabu bakamukanganaya olhukeri. Yesu mwabugha athi: “Olhulengo olho mukalengamo mwasyalengerwalho.” (Luka 6:38) Neryo ni kyolho omundu w’olhukeri eribana abanywani babuya n’erilholha embere iniane nabo.

Omukwenda Paulo mwabwira ab’omwa kithunga kye Efeso athi ‘banzane, babye n’emithima eyihehere, babuyirane.’ (Abanya Efeso 4:32) Abosi abali omwa kithunga bamabya b’olhukeri n’erikwira abandi b’obulighe, ekithunga ikikendi ghuma kandi ikyabya bughuma. Sithwanganza eritsweba-tsweba balikyethu, eribathonga, kutse eribugha omwa lhughalha-ghalha ebinywe ebikalire kutse ebyanga huthalya. Aliwe, ebya thukabugha bitholere mughulhu wosi ibyabya ebikawathikaya n’ebikahimba. (Emisyo 12:18) Neryo, ekithunga ikikendi kolera Yehova n’obutseme.

Ngoku thwamabir’igha, olhukeri ni mubere owakakanganibawa omwa buli kindu ekyo thukabugha n’erikolha. Kandi thwamabya b’olhukeri, thukagherereraya Nyamuhanga w’olhwanzo kandi omwenge, Yehova. (Abanya Efeso 5:1) Eki kikaghumaya ekithunga kyethu kandi ikyahira omwa bandi mw’omuhwa w’erimukolera. Neryo thukole ngoku thwanga thoka nuku abandi banga lhangira ngoku Abema ba Yehova ni bandu b’olhukeri!