1. Ni lhukwamirwa lhwahi olho Yehova abiriha ababuthi?

YEHOVA mwahangika omulhume n’omukali ab’erimbere ini b’eributha abaana. E Biblia yikabugha ndeke-ndeke yithi: “Abaana ni lhusunzo olhukalhua oko Mwami Mukulhu.” (Esy. 127:3) Ekyo kikamanyisayaki? Thubughe thuthi omunywani iniakubwira athi wumubikire esyosente siwe kandi nene kutsibu. Iwukendi yowa wuthi? Iwukendi minya ngoku akuyikethere. Aliwe iwabulha nga wukendi sibika wuthi ndeke. Yehova, omunywani wethu kundu, akaha ababuthi b’ekindu eky’eritheya eky’obughuli bunene kwilhaba esyosente. Akabaha olhukwamirwa olhw’eritsomana abaana babu n’erilhangira bathi bakabya ibanatsemire.

2. Ni bibulyo byahi ebya thukendi kaniako?

² Nindi oyutholere erithwamu abathahenie nga babuthe n’obuthuku bw’eributhiramu? Kandi ababuthi banga kolhaki abaana babu eribya n’etseme? Thulebaye emisingyi mirebe omwa Kinywe kya Nyamuhanga eyanga wathikya Abakristayo abathahenie erithwamu ndeke.

3. (a) Nindi oyutholere erithwamu abathahenie nga babuthe? (b) Ni misingyi yahi eye Biblia eyo abanywani n’abahughu b’abathahenie batholere ibabya iban’ibukire?

³ Omwa sindi kalikya, abandu bakalindirira okwa abalyathahanaya  kw’abaana aho n’aho. Abahughu n’abandi bangana bahathikana bathi babuthe. Jethro, mughalha wethu e Asia, akabugha athi, “Omwa kithunga, ababuthire bakahathikana abathahenie abathabuthire bathi babuthe.” Owundi mughalha wethu ya Jeffrey akabugha athi, “Abandi bakabwira abathawithe abaana bathi sibendi syabana oyukabalembera babirikekelhuha.” Nomwabine, abathahenie batholere ibayithwiramu nga babuthe. Eryo n’ithwamu lyabu; ni lhukwamirwa lhwabu. (Gal. 6:5) Ni kwenene, abanywani n’abahughu bakasunzira abalyathahanaya b’etseme. Aliwe abosi batholere ibabya iban’ibukire ngoku eributha n’erithendi butha n’ithwamu lyabu.​—1 Tes. 4:11.

4-5. Ni myatsi yahi ibiri eyo abathahenie batholere ibakaniraniako, kandi ni buthuku bwahi obutholere obo batholere ibakania kuyo? Soborera.

⁴ Abathahenie abakathwamu eributha batholere ibakanirania okwa bibulyo bibiri by’omughaso bino: Eky’erimbere, ni buthuku bwahi obo banzire ibabuthiramu? Ekyakabiri, banzire ibabutha baana bangahi? Ni buthuku bwahi obutholere obw’erikaniraniamu okwa bibulyo ebi? Kandi busana naki ebibulyo bibiri ebyo ni by’omughaso?

⁵ Abangyi bakabya bathe bingira omwa butheke, bakatsuka erikania okwa ky’eributha abaana. Busana naki? Kundi ni kikulhu ibo eribya n’amalengekania maghuma oko mwatsi oyo. Kandi batholere ibalebya nga banayitheghekere olhukwamirwa olho. Abandi bakathwamu erilinda mwaka mughuma kutse ibiri imubabutha kundi eribya mubuthi kikayithagha obuthuku n’akaghalha. Bakalhangira bamalinda ikikendi leka ibatsuka eribeghera obutheke n’erighumya obunywani bwabu.​—Efe. 5:33.

6. Ni kyahi ekyo abandi abathahenie babirithwamu erikolha busana n’ebiro ebyo thulimu?

⁶ Abandi Bakristayo babirithwamu erigherererya baghalha basathu ba Noa n’abakali babu. Abathahenie basathu abo mubathabutha abaana bakan’ingira omwa butheke. (Enz. 6:18; 9:18, 19; 10:1; 2 Pet. 2:5) Yesu mwalinganisya obuthuku bwethu ‘n’ebiro bya Noa,’ kandi ahathe erithika-thika thuli omwa “biro by’enyuma-nyuma.” (Mt. 24:37; 2 Tim. 3:1) Ekyo kikanaleka abandi ibathwamu erithendi butha nuku babane obuthuku bunene obw’erisangira omwa mubiiri wa Yehova.

7. Emisingyi eyiri omu Luka 14:28, 29 na Emisyo 21:5 yanga wathikya yithi abathahenie?

⁷ Abathahenie ab’amenge bakabya bakathwamu nga babuthe kandi nga babuthe  bangahi bakatsuka erilebya ng’abangana thoka. (Soma Luka 14:28, 29.) Ababirikulya abaana babiriminya ngoku eribakulya sikiriyithagha esyosente sisa aliwe kandi kikayithagha obuthuku n’akaghalha. Neryo abathahenie batholere ibayibulya ebibulyo nga bino: ‘Mbwino ithwe bosi thukendi yithagha erikolha nuku thubane ebiyithawa by’eka? Thwanabirilighirana okwa ebya thukayithagha omw’eka yethu? Ithwe bosi thwamabya b’erikolha, inindi oyukendi thulemberera abaana bethu? Nindi oyukendi bakangirirya?’ Bamakanirania ndeke okwa bibulyo ebyo, ibakendibya ibamakolesya ebinywe ebiri omu Emisyo 21:5.​—Soma.

8. Ni bitsibu byahi ebyo abathahenie bakabana, kandi ni kyahi ekyo omulhume oyuwithe olhwanzo atholere iniakolha?

⁸ Omwana akayithagha obuthuku n’eritsomana erya babuthi biwe abosi. Neryo ababuthi bamayisanga ibabirithunga abaana banene abakabya ng’abalingirirene omo myaka, kyangana kalha eritsomana obuli mwana ngoku litholere. Abandi abathunga abaana balere-balere ng’abanabo bakabugha bathi ni mubiiri. Mama iniangana yowa iniabirilhuha kinyamubiri n’omwa bwongo. Ekyo kyangana hamba okw’iyeghesya liwe, erisaba, n’erisangira omw’ithulira? Ekindi kitsibu ly’erilengemeribwa okwa mihindano n’erithendi ghasirwa muyo. Omulhume oyuwithe olhwanzo atholere iniakolha ekyo angathoka eriwathikya mukali wiwe okwa bulembere bw’abaana eka n’okwa mihindano. Ng’eky’erileberyako, iniangana wathikya mukali wiwe okwa mibiiri y’eka. Akayithagha erikolha kutsibu nuku abosi baghasirawa omwa ndegheka y’Eriramya ly’Eka. Abathatha Abakristayo batholere ibaghenda n’ab’eka yabu omw’ithulira mughulhu wosi.

9-10. Ababuthi batholere ibakolhaki eriwathikya abaana babu?

⁹ Ni byahi ebyo ababuthi batholere ibakolha eriwathikya abaana babu erianza Yehova? Banga theya bathi abaana babu okwa kihugho kibi kino? Thulebaye ebighuma by’okwa by’ababuthi banga kolha.

¹⁰ Saba obuwathikya bwa Yehova. Eky’erileberyako ni Manoa na mukali wiwe, ababuthi ba Samusoni. Manoa abere akaminya ku bakayabutha omwana, mwasaba Yehova y’obusondoli ngoku banga kulya omwana oyo.

11. Ababuthi banga gherererya bathi eky’erileberyako kya Manoa ekiri omu Abatsweri 13:8?

¹¹ Nihad na Alma, abe Bosnia ne Herzegovina, mub’ighira okwa ky’erileberyako kya Manoa. Bakabugha bathi: “Nga Manoa,  muthwasaba Yehova erithukangirirya ngoku thwangabya babuthi babuya. Yehova mwasubirya emisabe yethu omo nzira nyingyi​—omo Masako, ebitabu ebiseghemere okwa Biblia, emihindano emike-mike n’eminene-minene.”​—Soma Abatsweri 13:8.

12. Ni ky’erileberyako kyahi ekya Yozefu na Maria bahiriraho abaana babu?

¹² Ibya eky’erileberyako ekyuwene. Ni kwenene wutholere iwabya iwune mubwira abaana bawu; aliwe, ebya wukakolha ibikendi bahambako kutsibu. Ahathe erithika-thika, Yozefu na Maria mubahiriraho abaana babu eky’erileberyako ekyuwene. Yozefu iniakakolha kutsibu eribana ebiyithawa by’eka yiwe. Kandi mwabahira mw’omuhwa w’erianza eby’obunyakirimu. (Ebi. 4:9, 10) Nomwakine indi erikwamana n’Emighambo, Yozefu syabya akayithaghisibwa erithwalha eka yiwe e Yerusalemu “obuli mwaka” okwa Kiro Kikulhu ky’Erikyuruka, aliwe iniakabathwalhayo. (Lk. 2:41, 42) Abandi bathatha omwa buthuku obo bangabya imubalhangira olhughendo olho nga lhukabatabura, eribalira obuthuku, n’esyosente nene. Aliwe, Yozefu inianzire eby’obunyakirimu kandi iniakakangiriraya abaana biwe erikolha ekyo. N’ekindi, Maria abya asi ndeke Amasako. Ahathe erithika-thika, ebyo abya akabugha n’emikolere yiwe mubyaleka abaana biwe ibanza Ekinywe kya Nyamuhanga.

13. Abathahenie baghuma mubakwama bathi eky’erileberyako kya Yozefu na Maria?

¹³ Nihad na Alma, abo thulyakanayako, mubanza erigherererya eky’erileberyako kya Yozefu na Maria. Ekyo mukyabawathikya kithi erikulya omwana wabu erianza n’erikolera Nyamuhanga? Bakabugha bathi, “Omwa ky’erileberyako kyethu, muthwalengaho erikangania omwana wethu ngoku ni kibuya erighendera okwa misingyi ya Yehova.” Nihad akongerako athi, “Hiraho eky’erileberyako ekyo wanzire abaana bawu ibakwama.”

14. Busana naki ababuthi batholere ibaminya banywani ba baana babu?

¹⁴ Wathikaya abaana bawu erithunga abanywani abuwene. Ababuthi abosi babiri batholere ibaminya abanywani ba baana babu n’ebyo bakakolha. Ekyo mwamuli ababuthi eriminya abo abaana babu bakakaniranaya nabu okwa mithahulha y’erikanirania n’okwa syosimu syabu. Abanywani abo bangana hamba okwa malengekania n’emikolere y’abaana.​—1 Kor. 15:33.

15. Ababuthi bak’ighaki okwa ky’erileberyako kya Jessie?

¹⁵ Ni kyahi ekya babuthi banga kolha bamabya isibasi eby’ekombyuta n’esyosimu? Jessie, omubuthi w’obulhume e Philippines, akabugha athi: “Ithwasi bike okwa by’etekinologia. Aliwe ekyo mukithathulemesya eribwira abaana bethu okwa bitsibu ebikalhwiririra omwa by’etekinologia.” Jessie mwathaghania abaana biwe erikolesya eby’etekinologia ambu kundi iyo syabyasi ndeke. Akabugha athi: “Munahira omwa baana baghe mw’omuhwa w’erikolesya eby’etekinologia erigha owundi mubughe, erithegheka emihindano, n’erisoma e Biblia buli kiro.” Mwamabya imuli babuthi, munemwasoma n’erikanirya abaana benyu okw’ihabulha erihambire okw’ithumirana esyomeseji n’ebisasani eriri omwa katsweka “Teenagers” okwa jw.org^®? Wune wakanirania nabu okwa syovidiyo Nindi Oyukasondolha​—Niwe Kutse Ebyuma Byawu by’Etekinologia? na Kolesaya Ndeke Emithahulha ye Intaneti ey’Erikanirania? * Omwatsi oyo angana kuwathikya wukakangirirya abaana bawu ngoku banga kolesya ndeke eby’etekinologia.​—Emi. 13:20.

16. Ababuthi bangyi babirikolhaki, kandi mwabirilhwiriraki?

 ¹⁶ Ababuthi bangyi bakanahiriraho abaana endegheka y’erisiba n’abali ky’erileberyako ekyuwene omw’ikolera Nyamuhanga. Ng’eky’erileberyako, N’Déni na Bomine, abathahenie abali e Côte d’Ivoire, mughulhu mungyi bakakokaya omulebererya w’omuthimbo eribya ewabu. N’Déni akabugha athi: “Eki mukyahamba ndeke okwa mwana wethu. Mwatsuka obutemburi neryo lino akakolha ng’omulebererya omuwathikya.” Mbwino nawu wanganabya n’endegheka eyiri ng’eyi?

17-18. Ababuthi batholere ibatsuka mughulhu wahi erithendeka abaana babu?

¹⁷ Thendeka abaana ibakine balere. Kyuwene ababuthi erithendeka abaana babu ibakine balere. (Emi. 22:6) Lengekanaya oku Timoteo, oyo endambi yahika amatsuka eribya akabunga n’omukwenda Paulo. Mama wa Timoteo ya Euniki na mukaka wiwe ya Loisi mubamukangirirya ‘eritsuka omwa bwana bwiwe.’ 2 Tim. 1:5; 3:15.

¹⁸ Abandi abathahenie e Côte d’Ivoire, ya Jean-Claude na Peace, mubathoka eriwathikya abaana babu mukagha erianza Yehova n’erimukolera. Ni kyahi ekyabawathikaya? Mubakwama eky’erileberyako kya Euniki na Loisi. Bakabugha bathi, “Muthwakangirirya abaana bethu Ekinywe kya Nyamuhanga eritsuka omwa bwana, eritsuka akanabuthwa.”​—Ebi. 6:6, 7.

19. Erikangirirya abaana Ekinywe kya Nyamuhanga mwamuliki?

¹⁹ Kikamanyisayaki erikangirirya abaana bawu Ekinywe kya Yehova? “Erikangirirya” kikamanyisaya “erithendeka n’eribibukya omw’isubiriramo.” Erikolha ekyo, ababuthi batholere ibabana obuthuku bw’eribya n’abaana babu mughulhu wosi. Hakanayira ikyaghunza amani eribera erikangirirya abaana omw’isubiriramo. Aliwe ababuthi, bakalhangira eki ng’akaghisa k’eriwathikya abaana babu eriyitheghererya Ekinywe kya Nyamuhanga n’erikighenderako.

20. Soborera ngoku Esyonyimbo 127:4 hanga kolesibwa erikulya abaana.

²⁰ Minya ndeke abaana bawu. Esyonyimbo 127 hakalinganisaya abaana n’emisoha.  (Soma Esyonyimbo 127:4.) Ngoku emisoha yangana kolhwa omwa bindu muthina-muthina kandi iyabya isiyingene-ngene, n’abaana si basosene. Neryo ababuthi batholere ibaminya ngoku banga thendeka obuli mwana. Abathahenie abe Israeli eya munabwire abawathikaya abaana babiri erikolera Yehova bakabugha bathi ekyabawathikaya kya kino, “Obuli mwana ithukamweghesaya e Biblia iyuwene.” Nomwabine, obuli mwimaniri w’eka yukathwamu erigha omwa mibere eyo nga kinatholere kutse nga kyangana thokekana.

21. Ni buwathikya bwahi obwa ababuthi banga bana oku Yehova?

²¹ Hanganayira ababuthi ibayibulha-bulha busana n’ebitsibu ebyo bakabana, aliwe abaana ni kihembo erilhua oku Yehova. Anayitheghekire erikuwathikya. Akahulikirira emisabe y’ababuthi. Kandi akasubiraya emisabe eyo erilhabira omwa Biblia, ebitabu byethu, n’eky’erileberyako n’erihabulha ery’abandi babuthi ababirikulya abaana omwa kithunga.

22. Ebighuma by’okwa bibuyanga ebya ababuthi bangaha abaana babu by’ebyahi?

²² Abandi bandu bakabugha bathi erikulya abaana ni mubiiri w’erikolha habw’emyaka 20, aliwe omo kwenene, eribya mubuthi siriri ryathahwa. Ebighuma by’okwa bibuyanga ebya bangaha abaana babu lhw’olhwanzo, obuthuku, n’erithendeka eriseghemere okwa Biblia. Erithendeka eryo likahamba okwa buli mwana omwa nzira muthina-muthina. Aliwe, abangyi omw’ibo ababirikulibwa n’ababuthi abanzire Yehova, bakayowa nga Joanna Mae, mwali wethu e Asia oyuwabugha athi: “Ngabya ingalengekania okw’ithendeka eryo nabana okw’ababuthi baghe, ngabasima kutsibu busana n’erinyihabulha n’erinyikangirirya eryanza Yehova. Mubathakwama ky’erinyibutha lisa, aliwe mubamba engebe eyiwithe ekighendererwa.” (Emi. 23:24, 25) Esyomiliyoni sy’abalikyethu ku bakanayowa bathya.