Kyangabya isi ky’ekyo. Sitani mwathabwira Eva athi amalya okwa kighuma ekyo Nyamuhanga abugha athi isikyalibawa, iniakendi holha okwa mubiri aliwe ekirimu kiwe ikyabya ikineho. Sitani abere akakania na Eva omw’ikolesya enzoka, mwabwira Eva athi amalya oko muthi ‘syendi syaholha’ nahake. Amanyisaya athi Eva akendi lholha embere eribyaho, iniane omwa ngebe eyuwene, isyali omwa busondoli bwa Nyamuhanga.—Enz. 2:17; 3:3-5.

Engangirirya y’amabehi ey’akalimu akatheholha eyiriho munabwire yamabya isi yatsuka omwa Edeni, iyatsuka hayi? Omo kwenene sithwasi. Thunasi ngoku eriramya ly’amabehi eryosi mulyahwaho okw’Ighunga ly’Amaghetse omwa biro bya Noa. Sihali n’engangirirya y’amabehi eyasighalha okw’Ighunga ly’Amaghetse kundi Noa n’eka yiwe basa—abaramya b’okwenene—babalhama.

Neryo kwesi engangirirya eya munabwire eyi eya akalimu akatheholha yatsuka Erighunga ly’Amaghetse lyabiribya. Ahathe erithika-thika, Nyamuhanga abere akatabura emibughe e Babeli n’abandu eripanzikanira oko “bughali bw’ekihugho kyosi,” mubaghenda n’engangirirya eya kalimu akatheholha. (Enz. 11:8, 9) Nomwakine indi sithwasi engangirirya eyi nga yatsuka mughulhu wahi, thwangana kakasya ngoku ‘ise w’amabehi,’ Sitani Diabolo, yuwakulha-kulhanaya engangirirya eyo kandi mwatsema akalhangira amabehi aya akakanyirira.—Yn. 8:44.