WUNAYASI ng’omundu oyukasima? Ithwe bosi thutholere ithwalengekania okwa kibulyo ekyo. E Biblia muyabugha yithi okwa buthuku bwethu, abandu bangyi basyabya “abathe n’ewasingya.” (2 Tim. 3:2) Obundi wabiribana abandu abakayowa bathi abandi batholere ibabakolera kutse eribaha. Bakayowa nga sibatholere erisima ebyo bakahebawa. Mbwino kikanakutsemesaya eribya omwa bandu ng’aba?

Mbaghane n’ekyo, abaghombe ba Yehova bakabwirawa kino: “Mubye bandu b’ewasingya.” Thuli b’eriha “ewasingya omo myatsi yosi.” (Kol. 3:15; 1 Tes. 5:18) Omwa kwenene, kyuwene ithwe eribya n’omuthima w’erisima. Hali nzumwa nyingyi esikaleka ikyabya kibuya.

Enzumwa nguma eyanga leka ithwabya n’omuthima w’erisima yiri yithi kyangana leka ithwayithungako amalengakania awatholere. Omundu oyukasima, ahathe erithika-thika akayowa ndeke, kuthya n’oyulyasimawa. Busana naki eriha ewasingya likathutsemesaya ithwe bosi? Lengekanaya okwa ky’erileberyako kino: Abandu bakathwamu erikukolera kindu kirebe kundi bakayowa ikikutholere. Bakabya ibakutsomene. Wukabya wukalhangira eritsomana eryo, kikaleka iwayowa ndeke. Kikalhangirika, ku kyanabya kithya n’oku Ruta. Boazi mwakangania Ruta omuthima w’erihithya. Ahathe erithika-thika ekyo mukyatsemesya Ruta akaminya ku hane oyumutsomene.​—Ruta 2:10-13.

Kutsibu-tsibu kitholere erisima Nyamuhanga. Ahathe erithika-thika, hakanayira iwalengekania okwa bihembo bingyi by’obunyakirimu n’ebya kinyamubiri ebyo abirikuha n’ebya anemulholha embere erikuha. (Ebi. 8:17, 18; Emib. 14:17) Aliwe omwakanya k’erilengekania yighulhu-ghulhu okwa bubuya bwa Nyamuhanga, busana naki iwuthahiraho obuthuku bw’erighanirya okwa mighisa mingyi eyo Nyamuhanga abirikuha n’abo wanzire. Erighanirya okwa mubere w’erihithya ow’Omuhangiki wawu kikendi leka iw’ongera erimusima n’eryongera eriminya ngoku akwanzire kandi ku akakusima.​—1 Yn. 4:9.

Eryongera okw’ilengekania okwa mubere wa Yehova ow’erihithya n’erighanirya okwa mighisa yiwe; wutholere iwamuha ewasingya. (Esy. 100:4, 5) Kikabughawa indi “erisima abandi kikaleka abandu ibatsema kutsibu.”

Eyindi nzumwa eyikaleka ikyabya kibuya iwe eribya oyukasima yiri yithi kikaghumaya obunywani. Ithwe bosi thukayithagha erisimwa. Wamasima owundi erilhua okwa muthima busana n’ekibuya ekyo amakolha, mukabya banywani kundu. (Abar. 16:3, 4) Kandi, ahathe erithika-thika, abandu abakasima bakawathikaya abandi. Bakalhangira ebibuya ebyo abandi bakabakolera ikyaleka nabu ibawathikya abandi. Omwa kwenene, eriwathikya abandi kikaletha etseme. Kiri ngoku Yesu anabugha athi: “Erihithya likaletha obutseme kwilhaba erihabwa.”​—Emib. 20:35.

Robert Emmons omughuma w’okwa basondoli b’erisekulya lye Yunivasite eye California erihambire okw’isima, mwabugha athi: “Eribya oyukasima, thutholere ithwaminya ngoku thuliho busana n’eriwathikangania. Hakanayira ithwahithya kutse ithwahebwa.” Okwenene kuli kuthi ithwe eribyaho kandi ithunatsemire thukayithagha obuwathikya bw’abandi. Ng’eky’erileberyako, bangana thuha eky’erirya kutse erithuwathikya okwa by’emithambirire. (1 Kor. 12:21) Oyukasima, akasima ebyo abandi bakamukolera. Busana n’ekyo, nina mubere wawu erisima ebyo abandi bakakukolera?

Eyindi nzumwa eyikaleka ikyabya kibuya iwe eribya oyukasima yiri yithi kikakuwathikaya erihwerya amalengekania okwa bibuya butsira ebithuwene. Amalengekania wawu akakolha ng’akayungulu. Kikaleka iwatsomana ebindi n’ebindi iwabigheghena. Iwahira ameso w’okwa bibuya n’ebitsibu iwabya nga siwubilholire. Wukabya wuk’ongera eribya oyukasima, wuk’ongera erilhangira ebibuya, ikyaleka iw’ongera eribya oyukasima. Wamahwerya amalengekania wawu okwa ebya wukasima ikikendi kuwathikya erikolha ekya mukwenda Paulo abugha kino: “Mutseme omwa mighendere yenyu busana n’Omukama emighulhu yosi.”​—Fil. 4:4.

Erisima likaleka iwuthalengekania okwa bithuwene. Sikyangathokekana erisima omundu kandi iwunamuwitheko obuha, isiwutsemire, kandi iwunamuhitheneko. Abandu abakasima sibalyanza kutsibu ebindu by’ekinyamubiri. Bakasima ebyo bawitheko kandi sibali lengaho erithunga bingyi.​—Fil. 4:12.

Iwe ng’Omukristayo, wunakyasi ngoku Sitani anzire iwabbunika omuthima n’erihwa amani busana n’ebitsibu ebyo wukabana omwa biro by’enyuma-nyuma bino. Iniakendi tsema wamabya n’amalengekania awathuwene n’omubere w’eriyineghenia. Wamabya n’omuthima ng’oyu, ikikendileka abandu ibathakuhulikirira wukathulhughania engulhu yuwene. Ahathe erithika-thika, erisima lihambangene n’emikolere y’omulimu wa Nyamuhanga, imwamuli etseme eyikasa busana n’ebibuya ebyo Nyamuhanga abirikuha, n’erikirirya omwa milhaghe yiwe yosi.​—Gal. 5:22, 23.

Iwe eribya mughuma w’okwa bandu ba Yehova, ahathe erithika-thika wukalighirana n’ebiri omwa mwatsi ono ebihambire okw’isima. Kandi wunakyasi ngoku erisima n’eribya n’amalengekania awatholere sibiryasa bwase. Nomwabine, ekyo isikyakughunza amani. Wangana thunga n’erikulha-kulhania omubere w’erisima. Wuthi? Obuli kiro hiraho obuthuku bw’erilengekania okwa bindu birebe omwa ngebe ebya wangaherako ewasingya. Wamalholha embere erikolha ekyo, omubere w’erisima iniakendyasa. Ekyo ikikendileka iwatsema kutsibu kwilhaba abakahweraya amalengekania okwa bitsibu by’engebe. Lengekanaya okwa bibuya ebyo Nyamuhanga n’abandi bakakolha erikuhimba, ebikaleka iwatsema. Iwanganabya wukabihandika. Obuli kiro, iwanganahandika bibiri kutse bisathu.

Abakasekulhaya babirilhangira ngoku eribera erisima abandi, kyangana hindulha emibere obwongo bukakoleramu neryo ikyathw’olhobera eritsemera engebe.” Oyukasima ni mundu oyutsemire. Neryo lengekanaya okwa mighisa eya wabirithunga, tsemera ebibuya ebyo wukabana, kandi mughulhu wosi ibya mundu w’ewasingya! Omwakanya k’erilhangira ebibuya ebyo ng’ebya buli kiro, “muhe ewasingya okwa Mwami Mukulhu, kusangwa ni mubuya.” Kwesi, “muhe ewasingya omo myatsi yosi.”​—1 Emy. 16:34; 1 Tes. 5:18.