Omwatsi owali omu Eryibuka Ebihano 22:25-27 syahambire okw’ithakangania omulhume kw’aliko olhubanza, kundi ikikabya ikinalhangirikire. Omughambo oyu abya okw’ikangania omukali kw’atheko lhubanza. Thalebya ebithimbire okwa mwatsi oyo.

Emilhondo y’ahanyuma yikakanaya okwa mulhume oyukakeseraya “eka” n’omumbesa oyusimolibwe. Omulhume iniakabyako olhubanza lhw’obusingiri amakolha ekyo, kundi omukali oyusimolibwe iniali ng’oyuthahibwe. Kandi ibbwa omukali? “Mwathalhaka iniane eka.” Amalhaka abandi ibakendiowa, neryo ibamutsunirya. Aliwe mwathethakolha ekyo. Neryo nayu iniakabya iniamasingira, abosi ibabya kw’olhubanza.—Ebi. 22:23, 24.

Emighambo muyathasyakania okwa yindi mibere: “Nikwa omulhume ameya omwana-mutho y’omoli oyusimolibwe, n’omundu oyo akamukinda, n’erighotsera nayu; omundu oyo iyuwene oyuwaghotsera nayu asyaholha. Nikwa simusyekolha omumbesa oyo yo kindu; sihali ekibi oko mumbesa oyo ekitholere olhuholho; kusangwa ngoku omundu akahangana oku mulikyabu, akamwitha, omwatsi oyu kw’ali athya. Omughulhu amweghaya omoli, omumbesa oyusimolibwe mwalhaka, isihali mundu w’erimulekerya.”—Ebi. 22:25-27.

Aho, abatsweri ibakalighirana n’omumbesa. Busana naki? Ikikathwalhawa indi omumbesa “mwalhaka, isihali mundu w’erimulekerya.” Neryo iniakabya isyathasingira. Aliwe omulhume iniakabyako olhubanza lhw’erighotsera n’omumbesa oyusimolibwe n’olhw’obusingiri kundi ‘alyamukinda, n’erighotsera nayu’ kinyamakara.

Neryo nomwakine indi omughambo abya akakangania ngoku omumbesa syaliko lhubanza, omwatsi oyu akakanganaya ngoku omulhume iniakabyako olhubanza lhw’erihamba omumbesa n’olhw’obusingiri. Thuyikethere ngoku abatsweri ibakasonda-sonda n’eribulya n’omuhwa n’eritswera erikwamana n’ebihano ebyo Nyamuhanga abya iniabirihiraho n’erisubiriramo ngendo nyingyi.—Ebi. 13:14; 17:4; Eri. 20:14.