1-2. Eky’erileberyako kya Angelito kikathweghesayaki?

ABABUTHI bawu ni Bema ba Yehova? Kyamabya ikwakiri kithya, isiwalengekanaya wuthi wukendi thunga obughuma na Yehova busana nabu. Mbulha ababuthi bethu bakakolera Yehova kutse eyihi, obuli mughuma w’okw’ithwe atholere iniayithungira obunywani na Yehova.

² Lengekanaya okwa ky’erileberyako kya mughalha wethu ya Angelito. Ababuthi biwe babya Bema ba Yehova. Aliwe, omwa bulere bwiwe iniakayowa isyali hakuhi na Yehova. Akabugha athi, “Nabya ingakolera Yehova kundi inganzire erikolha ekya eka yethu yikakolha.” Neryo, Angelito mwathwamu erihiraho obuthuku bw’erisoma Ekinywe kya Nyamuhanga n’erikighaniryako, kandi mwatsuka eribya akasaba Yehova buthumbya. Mw’ighaki? Angelito akabugha athi, “Munaminya ngoku enzira nguma nyisa ey’eriyithundiramu hakuhi na Thatha waghe mwanze, Yehova, ly’erimuminya ingye ahabwaghe.” Ekyalholirweko kya Angelito kikaleka ihabya ebibulyo bikulhu bino: Hali mbaghaneki ahakathi-kathi k’eriminya Yehova n’erimuminya ndeke? Kandi thwanga kolhaki eriminya Yehova ya ndeke?

3. Hali mbaghaneki ahakathi-kathi k’eriminya Yehova n’erimuminya ndeke?

³ Thwangana bugha thuthi omundu anasi Yehova amabya inianasi erina lya Nyamuhanga kutse ebighuma by’okwa bya  abiribugha kutse erikolha. Aliwe ni bingyi ebikayithaghisibawa eriminya Yehova ya ndeke. Thutholere ithw’igha oku Yehova n’emibere yiwe eyuwene. Neryo aho imuthukendi minya ekikaleka iniabugha n’erikolha ebindu birebe. Ekyo ikikendi thuwathikya eriminya ng’akanatsemera amalengekania, erithwamu, n’ebya thukakolha. Thwamabiriminya ebya Yehova anzire ithwakolha, ithukendi bikolha.

4. Erigha okwa by’erileberyako by’omwa Biblia kikendi thuwathikya kithi?

⁴ Abandi bandu bangana thusekererya busana n’erianza erikolera Yehova kandi bangana thuhakanisya kutsibu thukatsuka erihindana na bandu biwe. Aliwe, thwamayikethera Yehova, isyendi thulhabirya ahisi. Ithukendibya ithwamatsukisya obunywani na Nyamuhanga obuthendi syahwa. Mbwino thwangana minya Yehova ya ndeke? Ee, thwangana muminya! Eby’erileberyako by’abalhume abathahikene, nga Musa n’Omwami Dawudi, bikakanganaya ngoku kinathokekene. Thukalebya ebyo bakolha, thukendi subirya ebibulyo bibiri bino: Baminya bathi Yehova? Eby’erileberyako byabu bikathweghesayaki?

5. Musa mwathwamu erikolhaki?

⁵ Musa mwathwamu erikolera Nyamuhanga. Iniakisigha iniahikya myaka 40, Musa mwathwamu eribya haghuma n’abandu ba Nyamuhanga, Abaisraeli, omwakanya k’eryahulhwamo “mughalha wa mwali wa Farao.” (Ebr. 11:24) Musa mwasighania ekitsumbi kinene. Musa abere akasighika Abaisraeli, abya inianasi ngoku Farao akendi hithana. Farao abya mwami w’amaaka manene kandi Abanya Misiri ibakamulhangira ng’enyamuhanga. Musa mwakangania erikirirya erighumire! Mwayikethera Yehova. Eriyikethera eri ly’eryaleka iniathunga obughuma obughumire na Yehova omwa ngebe yiwe yosi.—Emi. 3:5.

6. Eky’erileberyako kya Musa kikathweghesayaki?

⁶ Thuk’ighaki? Nethu nga Musa, thuwithe erithwamu: Thunemwendi thwamu erikolera Nyamuhanga n’eribya haghuma n’abandu biwe? Thwangana yiferezya bindu birebe erikolera Nyamuhanga, n’eriligha erihakanisibwa erikalhua okwa bathasi Yehova. Aliwe thwamayikethera Thatha wethu w’elhubulha, ithukendi kakasya ngoku akendi thusighika!

7-8. Musa mwalholha embere erighaki?

⁷ Musa mwalholha embere erigha okwa mibere ya Yehova n’erikolha erisonda liwe. Ng’eky’erileberyako, Yehova abere akabwira Musa athi alhusaye ekihanda kye Israeli ky’omwa bukobe, mwalemwa eriyikethera Yehova n’eribera erimubwira athi syendi thoka. Nyamuhanga mwamukwira obulighe, amamuwathikya. (Eri. 4:10-16) Neryo, Musa mwathoka eribwira Farao omwatsi w’eritswera owakalire. Musa mwalhangira Yehova akakolesya obuthoki bwiwe erilhamya Abaisraeli aliwe amathoghothya Farao n’amahe wiwe omwa Ngetse y’Engulha.—Eri. 14:26-31; Esy. 136:15.

⁸ Musa abere abirilhusya Abaisraeli e Misiri, mubabera eriyineghenia. Nomwabine, Musa mwalhangira erighumisirizya lya Yehova akakolongana n’abandu abo alhusaya omwa bukobe. (Esy. 78:40-43) Kandi Musa mwalhangira eriyikehya linene lya Yehova akalighirana n’erisaba lya Musa ery’erithendi thoghothya Abaisraeli.—Eri. 32:9-14.

9. Ngoku kiri omu Abaebrania 11:27, obunywani bwa Musa na Yehova bwabya buthi b’okwa ndungu?

⁹ Musa abere abirilhua e Misiri, obunywani bwiwe na Yehova bwabya b’okwa ndungu indi mwabya ng’analhangire Thatha wiwe w’elhubulha. (Soma Abaebrania 11:27.) E Biblia yikakanganaya obughuma obo ngoku bwabya  bwa hakuhi-kuhi yikabugha yithi: “Omwami Mukulhu mwakania na Musa meso n’ameso, ngoku omundu akakanaya n’omwira wiwe.”—Eri. 33:11.

10. Ni byahi ebya thutholere ithwakolha eriminya Yehova ya ndeke?

¹⁰ Thuk’ighaki? Eriminya Yehova ya ndeke, thutholere ithw’igha okwa mibere yiwe n’erikolha erisonda liwe. Munabwire erisonda lya Yehova liri lithi “abandu bosi balhamibawe, n’eriminya ndeke omwatsi w’ekwenene.” (1 Tim. 2:3, 4) Enzira nguma ey’erikoleramu erisonda lya Nyamuhanga ly’erikangirirya abandi oku Yehova.

11. Thukabya thukakangirirya abandi oku Yehova, thukamuminya thuthi ndeke?

¹¹ Mughulhu mungyi thukabya thukakangirirya abandi oku Yehova thukaminya Yehova ya ndeke. Ng’eky’erileberyako, thukayilhangirira ndeke-ndeke ngoku Yehova akakwira abandu b’obulighe akathuwathikya eribana abandu b’emithima myolho. (Yn. 6:44; Emib. 13:48) Thukalhangira obuthoki bw’Ekinywe kya Nyamuhanga thukalhangira abo thuk’igha nabu bakaleka emitse mibi n’eritsuka eriambalha omundu muhya-muhya. (Kol. 3:9, 10) Kandi thukalhangira erighumisirizya lya Nyamuhanga akathuthuma ngendo nyingyi omwa bulhambu bwethu eriyawathikya abandu erimw’ighako nuku basyalhama.—Abar. 10:13-15.

12. Ngoku kiri omu Eriluayo 33:13, Musa mwasabaki, kandi busana naki?

¹² Musa mwalhangira obughuma bwiwe na Yehova mwa bw’obughuli. Nomwakine indi Musa abya iniabirikolha emibiiri y’amaaka omo lina lya Nyamuhanga, mwabya iniakinasaba Yehova athi amuwathikaye erimuminya ndeke-ndeke. (Soma Eriluayo 33:13.) Musa abya w’emyaka eyilhabire oku 80 akasaba ekyo, aliwe abya inianasi ngoku akinawithe bingyi by’erigha oku Thatha wiwe w’olhwanzo ow’elhubulha.

13. Ni nzira yahi nguma eyathukakanganirayamu ku thutsomene obunywani bwethu na Nyamuhanga?

¹³ Thuk’ighaki? Mbulha thwamaghunza buthuku bungahi ithune mukolera Yehova, si thutholere thukaghalhaghandya obughuma bwethu nayu. Erikania na Nyamuhanga omw’isaba ni nzira nguma eyathukakanganirayamu ku thutsomene obunywani bwethu nayu.

14. Busana naki omusabe akaleka ithwongera eriminya Nyamuhanga?

¹⁴ Erikanirania eryuwene ly’erikaghumaya obunywani. Neryo yithunde hakuhi na Nyamuhanga omw’imusaba mughulhu wosi, isiwuli sagha erimubwira eriyowa lyawu. (Efe. 6:18) Krista, oyuwikere e Turkey, akabugha athi: “Olhwanzo n’eriyikethera ebya ngawithire Yehova bikongera erikanya obuli mubwira eriyowa lyaghe omwa musabe n’erilhangira kw’akanyiwathikaya. Erilhangira Yehova ku akasubiraya emisabe yaghe kyabirileka ingamulhangira nga Thatha kandi Munywani.”

15. Yehova mwabugha athiki oku Mwami Dawudi?

¹⁵ Omwami Dawudi abuthirawa omwa kihanda ekiyihereyo oku Yehova Nyamuhanga. Aliwe Dawudi iyo mwatharamya Yehova ambu kundi eka yiwe yikamuramaya. Mwayithungira obughuma obughumire na Nyamuhanga, kandi Yehova mwamwanza kutsibu. Yehova iyuwene-wene mwabugha oku Dawudi athi ni “omundu oyo nyanzire.” (Emib. 13:22) Dawudi mwabya athi munywani wa Yehova?

16. Dawudi mw’ighaki oku Yehova omw’isamalira ebihangikwa?

¹⁶ Dawudi mw’igha oku Yehova erilhabira omwa bihangikwa. Dawudi iniakine mulere  iniakaghunza buthuku bunene omoli akalisya esyombuli sya thatha wiwe. Obo bwangabya ibw’obuthuku obo atsukiramu erighanirya okwa bya Yehova abirikolha. Ng’eky’erileberyako, iniakabya akasamalira endatha omwa kiro, isyali subulira okw’ilhangira esyongununu nyingyi, aliwe iniakalhangira n’emibere y’Oyuwasikolha. Ky’ekyaleka Dawudi iniahandika athi: “Olhubulha lhukakanaya olhukengerwa lhwa Nyamuhanga, n’ekyanya kikabisulha ndeke ebyo abirikolha.” (Esy. 19:1, 2) Dawudi abere akaghanirya okwa mibere abandu bahangikirwemu, mwalhangira amenge wa Yehova. (Esy. 139:14) Dawudi abere akalengaho eriyitheghererya emibiiri ya Yehova, mwayilhangira iyo ini kandu kake buyira.—Esy. 139:6.

17. Thwang’ighaki thwamaghanirya okwa bihangikwa?

¹⁷ Thuk’ighaki? Ighira okwa bihangikwa. Hiraho obuthuku obw’erigha okwa kihugho kibuyanga ekya Yehova abirihangika; kitsemere! Omwa ngebe yawu ya buli kiro, ghaniraya okwa ekya ebihangikwa ebikuthimbireko—ebirimwa, ebisoro, n’abandu—bikakweghesaya oku Yehova. Neryo obuli kiro iwukendibya na bingyi by’erigha oku Thatha wawu w’olhwanzo. (Abar. 1:20) Kandi iwukendi lhangira olhwanzo olhwa wumuwithire lhuk’ongera buli kiro.

18. Ngoku kiri omu Esyonyimbo 18, Dawudi mwayilhangiriraki?

¹⁸ Dawudi mwaminya ngoku Yehova anemumuwathikya. Ng’eky’erileberyako, Dawudi abere akalhamya esyombuli sya Thatha wiwe okwa ndale n’edubu, mwaminya ngoku Yehova yuwamamuwathikya er’itha ebisoro ebikalire ebyo. Abere akitha embangyi Goliata, Dawudi mwayilhangirira ngoku Yehova yukamusondolha. (1 Sam. 17:37) Kandi Dawudi abere akabalha omo byalha by’Omwami Saulo, mwaminya ngoku Yehova yulyamulhamaya. (Esy. 18, ehinywe ehiri ahighulhu okwa sura) Dawudi kw’abya mulhume w’emiyiheko angabughire athi ebyo alyabikolha omwa maaka wiwe. Aliwe Dawudi abya ayikehirye, kyaleka iniathoka eriyilhangirira obuwathikya bwa Yehova.—Esy. 138:6.

19. Eky’erileberyako kya Dawudi kikathweghesayaki?

¹⁹ Thuk’ighaki? Sithutholere thukasubulira okw’isaba Yehova y’obuwathikya. Thutholere kandi ithwaminya obuthuku n’emibere akathuwathikirayamu. Thwamabya ithuyikehirye, ithukendi minya erilemererwa lyethu, kandi ngoku Yehova yukathuthokesaya. Kandi obughuma bwethu na Yehova ibukendi ongera thukalhangira ngoku Yehova akathuwathikaya. Isaac, mughalha wethu we Fiji oyuwabirikolera Yehova habw’emyaka mingyi, abiriyilhangirira eki. Akabugha athi: “Ngabya ingasubya ameso w’enyuma, ngalhangira ngoku Yehova abirinyiwathikya erilhua aho natsukira erigha e Biblia erihika na lino. Ngayowa ingali bughuma ndeke na Yehova.”

20. Obughuma obwa Dawudi abya awithe na Nyamuhanga bukathweghesayaki?

²⁰ Dawudi mwagherererya emibere ya Yehova. Yehova mwathuhangika omwa mibere ey’eribya ithwangana gherererya emibere yiwe. (Enz. 1:26) Thukabya thukongera erigha okwa mibere ya Yehova, ku thukan’ongera thuthya erimugherererya. Dawudi mwaminya ndeke Thatha wiwe w’elhubulha, kyamaleka iniathoka erimugherererya akakolongana n’abandi. Thulebaye eky’erileberyako kighuma. Dawudi mwasoberya Yehova akasingira na Batiseba n’er’ithisya mwira wiwe. (2 Sam. 11:1-4, 15) Aliwe Yehova mwathwamu erikangania Dawudi y’olhukeri, omulhume oyuwabya iniabirikangania abandi b’olhukeri. Kundi Dawudi abya awithe obu ghuma obuwene na Yehova, Abaisraeli mubamwanza kutsibu, kandi Yehova mwamukolesya eribya ky’erileberyako okwa bandi bami be Israeli.—1 Bam. 15:11; 2 Bam. 14:1-3.

21. Ngoku kiri omu Abanya Efeso 4:24 na 5:1, thukaghasirawa thuthi thwamagherererya Nyamuhanga?

²¹ Thuk’ighaki? Thutholere ithwagherererya Nyamuhanga. Ekyo kikathughasira kandi ikyaleka ithwamw’ighako bingyi. Thwamagherererya emibere yiwe, thukakanganaya ku thuli baana biwe.—Soma Abanya Efeso 4:24; 5:1.

22-23. Ni kyahi ekyangabya thwamaghendera okwa bya thukigha oku Yehova?

²² Ngoku thwabirilhangira, ebihangikwa n’Ekinywe kiwe Biblia bikaleka ithwaminya bingyi oku Yehova. E Biblia muli eby’erileberyako eby’abaghombe ba Nyamuhanga abathaleghulha abo thwanga gherererya, nga Musa na Dawudi. Yehova abirikolha owiwe. Nethu thutholere ithwakolha owethu n’erimw’ighako bingyi ngoku thwanga thoka.

²³ Sithwendi syaleka erigha oku Yehova. (Omu. 3:11) Ekikulhu si by’ebya thumwasiko aliwe ly’erighendera okwa byathumwasiko. Thwamaghendera okwa byathukigha n’erilengaho erigherererya Thatha wethu w’olhwanzo, ithukendi lholha embere eriyithunda hakuhi nayu. (Yak. 4:8) Erilhabira omo Kinywe kiwe, akathukakasaya ngoku syanga sighania abakalengaho erimuminya ndeke.