1-2. (a) E Yubile niki? (Lebaya akasanduku “ E Yubile Yabya Iniki?”) (b) Ngoku kiri omu Luka 4:16-18, Yesu mwakania okuki?

EBINDI bihugho bikakolha emikonga y’embaghane omwami kutse omwami-kali akaghunza myaka 50 inianemuthabalha. Omwaka wa 50 oyo akanahulhawamo yubile y’omuthabali. Ekiro kikulhu ekyo kyanganaghunza kiro kighuma, yenga nguma, kutse kwilhaba n’aho, aliwe neryo ikyahwamo n’abandu ibalhuaho ibibirirwa etseme eyo.

² Thukendi lebya eyubile eyuwene, nibya eyuwene kwilhaba n’ey’Abaisraeli eyabya yikaghunza mwaka mughuma eyabya yikakolhwa obuli myaka 50. E Yubile eyakera eyo iyikaha Abaisraeli b’obwiranda. Busana naki nethu ithw’igha kuyo? Kusangwa omwaka w’Abaisraeli owe Yubile akathwibukaya endegheka mbuyanga y’eribana obwiranda kundu​—obwa Yesu akanayako, eya Yehova anemukolha lino.​— Soma Luka 4:16-18.

3. Ngoku kiri omu Abalawi 25:8-12, Abaisraeli ibakaghasirawa bathi omwa Yubile?

³ Ithukendi yitheghererya lhuba ekya Yesu amanyisaya akakania okwa bwiranda thwamatsuka erikania okwa ndegheka ye Yubile eya Nyamuhanga ahiriraho abandu biwe kera. Yehova mwabwira Abaisraeli athi: ‘Wasyahighulha omwaka w’amakumi athano, wasyathulhughania engulhu y’obwiranda omo kihugho kyosi n’esyondulhani syosi syakyo; asyabya Yubile busana nenyu; nenyu mwasyasuba obuli mundu oko kithaka kiwe, obuli mundu oko kithunga kiwe.’ (Soma Abalawi 25:8-12.) Omwatsi w’ahanyuma akakanaya okwa mibere Abaisraeli baghasirawa omwa Sabato y’obuli yenga. Neryo ibbwa mubaghasirwa bathi n’omwa Yubile? Ng’eky’erileberyako,  Omuisraeli iniamabya mw’eribanza neryo iniakanaghulhaya ekithaka kiwe erithuha eribanza eryo. Omwaka we Yubile iniakabya akahika, iniakasubana n’ekithaka kiwe. Neryo, obuli mundu ‘iniakasuba okwa kithaka kiwe,’ n’abaana biwe ibasyasighalya ekithaka ekyo. N’ekindi, omundu iniamabya mw’eribanza linene kutsibu iniangana ghulya omwana wiwe​—kutse iniayighulya​—omwa bukobe nuku athuhe eribanza eryo. Omwaka we Yubile iniakabya akahika, omukobe oyo ‘iniakasuba okwa kithunga kiwe.’ Neryo isihalibya oyukabya mukobe kera na kera! Endegheka eyi yikakanganaya ngoku Nyamuhanga abya atsomene abandu biwe!

4-5. Busana naki ni kikulhu munabwire ithwe erigha okwa Yubile y’Abaisraeli?

⁴ Ni wundi mughaso wahi owa e Yubile yabya yiwithe? Yehova mwabugha athi: “Sihendisyabya mwera omo kathi-kathi kenyu kusangwa Omwami Mukulhu asyabatsumulha kwenene omo kihugho ekyo akabaha eribya mwandu, ogho mukasighalhaya.” (Ebi. 15:4) Ekyo kiri mbaghane okwa binemubya omwa kihugho munabwire, ekya thunemulhangiramu abagaga bak’ongera eribya bagaga n’abanakwa eribya banakwa kutsibu!

⁵ Ithwe ng’Abakristayo sithuli ahisi sy’Emighambo ya Musa. Eki kikamanyisaya kithi sithulighendera okwa ndegheka ye Yubile ey’er’iha abakobe omwa bukobe, erighanyira amabanza, n’erisubulya ekithaka. (Abar. 7:4; 10:4; Efe. 2:15) Aliwe ni kikulhu ithwe erigha okwa Yubile. Busana naki? Kundi thwangana bana obwiranda, obuli ng’obwa Yehova atheghekaniraya Abaisraeli.

6. Abandu bakayithagha eribya bwiranda okuki?

⁶ Ithwe bosi thukayithagha eribya bwiranda kundi thuli omwa bukobe obukalire​—thuli bakobe b’ekibi. Kundi thuli bakolha-nabi, thukakekelhuha, ithwalhwalha, n’eriholha. Abangyi bakayilhangirira ekyo bakayileberya omwa kiyo kutse bakaya eyiri dokita eriyathambirwa. Kandi thukayowa nabi busana n’erikolha ebibi. Omukwenda Paulo mwabugha athi abya “mundu w’omuliki w’omughambo  w’ebibi ebikere omwa bitsuko [biwe].” Mw’ongerako athi: “Ingye indi mundu w’obulighe! Nindi wasyanyiboholha oko mubiri oyu w’olhuholho kwehi?”​—Abar. 7:23, 24.

7. Isaya mwakania athiki okwa bwiranda?

⁷ Eky’obutseme, Nyamuhanga abirihiraho endegheka y’erithulhamya, kutse erithw’iha omwa bukobe bw’ekibi. Yesu yukendi syaleka ikyathokekana erithunga obwiranda obo. Omwa kighonye ky’omunani Yesu athali asa okwa kihugho, omuminyereri Isaya mwakania okwa bwiranda bunene. Obwiranda obo bwangabere ibuwene kutsibu kwilhaba obwa Abaisraeli babya bakathunga okwa mwaka we Yubile. Mwahandika athi: ‘Omulimu w’Omukama Omwami Mukulhu anyiriko, kusangwa Omwami Mukulhu abirinyihakabya amaghutha, nyirethe engulhu yuwene oko bandu abakaghalhawa. Abirinyithuma erilhunga ababbunikire omo muthima, erithulira ababohire obwiranda.’ (Isa. 61:1) Obuminyereri obo bukakanaya oku bahi?

8. Obuminyereri bwa Isaya obuhambire okwa bwiranda bukakanaya oku bahi?

⁸ Obuminyereri bukulhu obu bwatsuka eribererera Yesu akatsuka omubiiri wiwe w’erithulira. Omughulhu Yesu aghenda omwa sinagogi ewabu e Nazareti, mwasomera Abayuda ababya bahindenemo obuminyereri bwa Isaya obo. Yesu mwayikaniako akabugha athi: “Omulimu w’Omukama ali kwingye, kusangwa abirinyihakabya erithulha Engulhu Yuwene y’oko bera, abirinyithuma erithulira obwiranda oko banyeghawa, n’eriswaha erilhangira oko syo ndimethime, eriboholha abakanubibawa, erithulha omwatsi w’omwaka ogho mukama asyalhamya abandu biwe.” (Lk. 4:16-19) Yesu mwaberererya athi obuminyereri obo?

9. Omwa buthuku bwa Yesu abangyi babya balindirire obwiranda obuli buthi?

⁹ Obwiranda obwa Isaya akanayako kandi obwa Yesu abughako bwatsuka eribererera omwa kighonye ky’erimbere. Yesu mwaghumya eki akabugha athi: ‘Munabwire Amasako aya amabererera ngoku mukabiriowa.’ (Lk. 4:21) Abangyi abowa ebya Yesu asoma bangabya imubalengekania bathi hakayabya embinduka omwa by’ekipolitiki, erilhua omwa buthabali bwe Roma. Bangabya imubayowa ng’abalhume babiri ababugha bathi: “Ithwe thwabya n’amaha thuthi yukendithongolya Israeli.” (Lk. 24:13, 21) Aliwe Yesu mwathabwira abigha biwe athi bayisamambule okwa buthabali obukalire bwe Roma.  Omwakanya k’ekyo, mwababwira athi “mulihe Kaisari ebindu bya Kaisari.” (Mt. 22:21) Neryo Yesu mwaletha athi obwiranda okwa buthuku obo?

10. Yesu mwawathikya abandu eribya bwiranda okuki?

¹⁰ Mughalha wa Nyamuhanga asa erisyawathikya abandu erithunga obwiranda, omwa nzira ibiri. Ey’erimbere, Yesu mwawathikya abandu eribya bwiranda okwa syongangirirya sy’amabehi esy’abakangirirya b’amadini. Okwa buthuku obo, Abayuda bangyi ini bakobe b’esyongangirirya n’emitse y’abandu. (Mt. 5:31-37; 15:1-11) Ababya bakabya nga basondoli, nabu ini ndimethime bunyakirimu. Kundi mubaghana Masiya n’ekwenene eyo akangiriraya, mubasighalha omwa mwirimya n’omwa kibi. (Yn. 9:1, 14-16, 35-41) Busana n’esyongangirirya siwe esihikire n’eky’erileberyako kiwe kibuya, Yesu mwaleka abakayikehaya ibabya bwiranda bunyakirimu.​—Mk. 1:22; 2:23–3:5.

11. Ni nzira yahi eyakabiri eya Yesu aletheramu obwiranda?

¹¹ Ekyakabiri, Yesu mwawathikya abandu erilhua omwa bukobe bw’ekibi ekyo basighalhaya. Busana n’ekihongwa kya Yesu, Nyamuhanga mwabya inianganaghanyira ebibi by’abakakanganaya erikirirya n’eriligha embanulho eyo aha. (Ebr. 10:12-18) Yesu mwabugha athi: “Neryo Mughalha amabaha obwiranda, mwasyabya n’obwiranda kundu.” (Yn. 8:36) Obwiranda obo ibulengire obwiranda obo Omuisraeli abya akabana omwa mwaka we Yubile! Ng’eky’erileberyako, omundu oyulyabya bwiranda okwa Yubile iniakabya inianganathasyabya mukobe, kandi nibya iniangana holera mubo.

12. Ni bahi ababya b’erimbere erighasirwa omwa bwiranda obo Yesu ahulha?

¹² Okwa kiro kye Pentekote 33 E.K., Yehova muthulira okwa bakwenda n’abandi balhume n’abakali abathaleghulha kw’omulimu abuyirire. Mwabayira mw’abaghalha biwe nuku obuthuku bw’embere ibalhubukibwa n’erighenda elhubulha eriyathabalha na Yesu. (Abar. 8:2, 15-17) Aba bababya b’erimbere erighasirwa omwa bwiranda obwa Yesu aranga iniane omwa sinagogi e Nazareti. Abalhume n’abakali abo mubalhua omwa bukobe bw’esyongangirirya sy’amabehi n’emirwa eyithaseghemere okwa masako ey’Abasondoli b’Abayuda. Nyamuhanga kandi mwabalhangira ibali bwiranda okwa kibi ekikaletha olhuholho. Endegheka ya Yehova y’eriletha obwiranda eyatsuka akahakabya abigha ba Kristo omulimu abuyirire okwa 33 E.K. yikendi syahwa Obuthabali bwa Yesu obw’Emyaka  Rukumi bukahwa. Ni bindu byahi ebikendisyabya ibyabiribya erihika okwa buthuku obo?

13-14. Eryongera okwa Bakristayo abahakabibwa, ni bandi bahi abakaghasirawa omwa bwiranda obo Yesu ahulha?

¹³ Munabwire esyomiliyoni sy’ab’emithima myolho erilhua omwa bihanda byosi ni ‘b’esindi mbuli.’ (Yn. 10:16) Ibo Nyamuhanga syathabasombolha erithabalha na Yesu omwa lhubulha. E Biblia yikabugha yithi bakendi syabya okwa kihugho kera na kera. Nawu ayo w’amaha agho wuwithe?

¹⁴ Nibya na lino wunemubana ebighuma by’okwa bibuya eby’abakendisyabya omwa Bwami bwa Nyamuhanga obw’elhubulha. Busana n’erikirirya omwa kihongwa kya Yesu, wanganasaba Yehova erighanyira ebibi byawu. Ekyo kikaleka Nyamuhanga iniakuligha kandi iwabya n’obunyamuthima-thima obuwene. (Efe. 1:7; Erib. 7:14, 15) Thalengekania n’okwa mighisa eyo wuwithe busana n’eribya iwuli bwiranda okwa syongangirirya sy’amabehi. Yesu mwabugha athi: “Mwasyaminya ekwenene, n’omwatsi w’ekwenene asyabaha obwiranda.” (Yn. 8:32) Ni butseme eribya n’obwiranda ng’obu!

15. Ni bwiranda bwahi n’emighisa eyo thulindirire?

¹⁵ Ni bwiranda bunene obuli embere. Yesu akisigha iniaghunzaho amadini wosi w’amabehi  n’abathabali abalibathangania. Nyamuhanga akendi syatheya ‘ab’endeko nene’ abakamukolera, n’erileka batsemere emighisa ey’okwa kihugho paradiso. (Erib. 7:9, 14) Abandu bangyi kutsibu bakendisyalhubukibwa n’erithunga akaghisa k’eribya bwiranda okwa bikalhwiririra omwa kibi kya Adamu.​—Emib. 24:15.

16. Ni bwiranda bwahi bunene obo abandu balindirire?

¹⁶ Omwa Buthabali bw’Emyaka Rukumi, Yesu n’abo akendi syathabalha nabu bakendi syawathikya abandu erihikana kinyamubiri na bunyakirimu. Obuthuku bw’erisuba-subania n’eriboholha obo bukendisyabya nge Yubile y’omwa Israeli. Neryo abandu bosi abakakolera Yehova buthaleghulha bakendi syahikana, ibabya bwiranda okwa kibi.

17. Isaya 65:21-23 hathi ni kyahi ekikendisyabya okwa bandu ba Nyamuhanga? (Lebaya ekisasani ky’okwa kidipa.)

¹⁷ Isaya 65:21-23 hakakanganaya engebe nga yikendisyabya yithi okwa kihugho. (Soma.) Thukendisyabya ithunawithe bingyi eby’erikolha. E Biblia yikabugha yithi abandu ba Nyamuhanga okwa buthuku obo bakendisyakolha emibiiri eyuwene, eyikatsemesaya. Emyaka Rukumi yikahwa, thuyikethere ndeke-ndeke ngoku “ebihangikwa byasyaboholhwa omwa bukobe bw’emyatsi y’erihonda, eryingira omwa bwiranda n’olhukengerwa lhw’abaana ba Nyamuhanga.”​—Abar. 8:21.

18. Busana naki ithwikirirya ngoku thukendi syabya n’engebe yuwene omwa buthuku bw’embere?

¹⁸ Ngoku Yehova analhangira athi abandu biwe bakathunga obuthuku bw’erikolha n’erilhuhuka, kwa binemwendisyabya bithya n’okwa bandu biwe omwa Buthabali bwa Kristo obw’Emyaka Rukumi. Mukendisyabya obuthuku bw’eriramya Nyamuhanga. Eribana etseme lino kikayithagha eriramya Nyamuhanga, kandi omwa kihugho kihyaka thukendisyabya n’obuthuku bw’erikolha ekyo. Ni bingyi ebikendi syaleka ithwatsema omwa Buthabali bwa Kristo bw’Emyaka Rukumi kundi thukendisyabya ithuwithe emibiiri eyuwene n’erikolera Nyamuhanga.