Eyihi, omwa Biblia kutse ebya kera sihali ekikakanganaya indi ekyo mukyanabya.

Emibere omulhondo oyu ali omwa syo Biblia nyingyi kyabirileka abandu ibalengekania bathi omwa biro bya Paulo abandu banabya bakabatizibwa omwa maghetse busana n’abaholi. Ng’eky’erileberyako: “Abaholi bamabya isibelhubukibawa nahake, busana naki abandu bakabatizibawa busana n’abaholi kwehi?”​—E Biblia y’Ekinandi eya 1980

Aliwe thalebya ebyo basomi babiri be Biblia babugha. Dr. Gregory Lockwood mwabugha athi “omwa Biblia kutse omwa bya kera sihali ekikakanganaya kithi hane owosi-wosi oyuwabatizibawa busana n’oyuwabiriholha.” Kuthya na Professor Gordon D. Fee mwahandika athi: “Omwa Biblia kutse omwa bya kera simuli eribatizibwa ly’omulingo oyo. Endaghano Embyaka siyirikibughako; sihali ekikakanganaya kithi mukyanakolhwa n’omwa Bakristayo b’erimbere, kutse omwa kanisa yosi-yosi eyatsuka abakwenda imubanamabiriholha.”

E Biblia yikabugha yithi abakakwama Yesu babya batholere ‘ibayira abigha okwa bihanda byosi n’eribatizyabo n’erikangiriryabo erikolha ebyosi ebyo abiribahana.’ (Mt. 28:19, 20) Omundu iniakabya athalyabya mwigha oyubatizibirwe, iniatholere iniatsuka erigha oku Yehova na Mughalha wiwe, iniabikirirya, n’eribowa. Omundu oyuwabiriholha kandi iniane omw’isinda syangakolha ekyo; kandi sihali Omukristayo oyuwanga mukolerakyo.​—Omu. 9:5, 10; Yn. 4:1; 1 Kor. 1:14-16.

Neryo kwesi Paulo abya iniakamanyisayaki?

Abandi Abakristayo ibakaghana bathi abaholi sibanga lhubuka. (1 Kor. 15:12) Paulo mwakangania ngoku amalengekania ayo awire. Mwabugha athi iniakabya omo ‘bwiko bw’eriholha ebiro byosi.’ Aliwe nomwanabana ebitsibu, abya inianayikethere ngoku nomwangaholha akendisyalhubuka iniaghenda elhubulha, nga Yesu.​—1 Kor. 15:30-32, 42-44.

Abanya Korinto babya batholere ibaminya ngoku eribya Bakristayo abahakabibwa kikamanyisaya kithi bangabere ibanemubana ebitsibu kandi ibaholha imubalhubuka. “Eribatizibwa erimathikana na Kristo” mwamuli “eribatizibwa erimathikana n’olhuholho lhwiwe.” (Abar. 6:3) Eki kikamanyasaya kithi nga Yesu bangabwene ebitsibu kandi ibaholha imubalhubuka n’erighenda elhubulha.

Ihamabirilhaba emyaka eyilhabire okw’ibiri Yesu alibatizibirwe omwa maghetse, mwabwira ababiri b’okwa bakwenda biwe athi: “Mwasyabatizibwa omwa lhubatizo olho ngabatizibawamo.” (Mk. 10:38, 39) Hano Yesu syakanaya okw’ibatizibwa omwa maghetse, aliwe akanaya okw’ibatizibwa omwa lhuholho. Yesu amanyisaya athi eribya muthaleghulha oku Nyamuhanga mwangalhwiririre iyo erilholha. Paulo mwahandika athi abahakabibwa batholere ‘ibaghalhwa haghuma na Kristo’ nuku basyasangira haghuma omwa “lhukengerwa lhwiwe.” (Abar. 8:16, 17; 2 Kor. 4:17) Neryo nabo bangaholire, ibalhubuka, n’erighenda elhubulha.

Ebinywe bya Paulo ebi byanganabuwa omwa nzira eyihikire bithi: “Kandi bithe bithya, abakabatizibawa busana n’ekighendererwa ky’eribya baholi, ibakendi kolhaki? Abaholi bamabya isibanga syalhubukibwa nahake, busana naki bakabatizibawa busana n’ekighendererwa eky’eribya baholi?”