Wunewasoma ndeke esyogazeti sy’Akaleberyo esy’omwaka ono? Thalebyanu nga wangana subirya okwa bibulyo bino:

Thutholere ithwalhangira thuthi Abakristayo abahakabibwa?

Thukasima erikirirya lyabu, aliwe, sithuli bapipa. Thukayitheghaya ‘okw’ibayighomba.’ (Yuda 16) Sithuli babulhaya ebibulyo ebihambire okwa maha wabu.​—w20.01, olhup. 29.

Ni kyahi ekyanga kukakasya ngoku Yehova anakwasi?

E Biblia yikakanganaya ngoku mwakuminya nibya isiwuli wabuthwa. Kandi akowa emisabe yawu. Anasi ebiri omwa muthima wawu kandi anasi ebya wunemulengekania, kandi ebyo wukakolha bikamuhambako. (1 Emy. 28:9; Emi. 27:11) Abirikuletha okw’iyo.​—w20.02, olhup. 12.

Ni by’erileberyako byahi ebikakanganaya omughulhu w’eribugha n’ow’eribya bukuthu?

Thukatsema thukakania oku Yehova. Thukabugha thwamalhangira omundu iniali okw’ikwama enzira eyithuwene. Abasyakulhu bakabugha bakaha erihabulha kyamayithaghisibwa. Thukabya bukuthu bakathubulirirya omubiiri wethu ng’akakolhawa athi omwa bihugho ebyabirihira okwa mubiiri wethu kw’olhukako. Sithuli bisulha emyatsi y’embiitha.​—w20.03, olhup. 20-21.

Esyongyike esiri omu Yoeli sura 2 siri mbaghane sithi okwa siri omwa Eribisulirwa sura 9?

Yoeli 2:20-29 hakabugha hathi Nyamuhanga akabingira esyongyike sya haali kandi akayilhagha erisuba-subania ebyo sikatsandaya. Enyuma waho Nyamuhanga akuthulha omulimu wiwe. Ebi mubyabererera Abanya Babeli bakabambira Abaisraeli kandi n’enyuma waho. Eribisulirwa 9:1-11 hakakanaya okwa bahakabibwa abamunabwire abali ng’esyongyike abakathulhughanaya eritswera lya Nyamuhanga busana n’omughulhu mubi ono kandi eki kikaleka abakasighika ekihugho ibathayowa buholho.​—w20.04, olhup. 3-6.

Omwami w’elhuthambi lhw’endatha nindi munabwire?

Russia n’abakasighikayo. Babiribambira abandu ba Nyamuhanga omw’ihira okwa mubiiri w’erithulira kw’olhukako n’erikangania ku baponire Abema. Omwami w’elhuthambi lhw’endatha anemulhwa n’omwami w’elhuthambi lhw’eyikwa.​—w20.05, olhup. 13.

Mbwino emibere mwenda eyiri omwa Abanya Galatia 5:22, 23 “y’emikolere eyikalhua okwa mulimu” misa?

Eyihi. Omulimu abuyirire akathuwathikaya eribya n’eyindi mibere, ng’obuthunganene. (Efe. 5:8, 9)​—w20.06, olhup. 17.

Ni kitsibu kyahi kighuma ekiri omw’ithuma emyatsi eyikuhambireko okwa Intaneti?

Ebya wukahira okwa mithahulha y’erikanirania byangana kangania ku si wuyikehirye aliwe ku wuli mw’emihalisyo.​—w20.07, olhup. 6-7.

Ni byahi ebyo abathuliri Abakristayo bang’ighira okwa basohi b’amenge?

Bakakolha oko ndambi n’omo myanya eyo bangabaniramu esiswe. Bakathendekawa erikolesya eby’erikolesya ebitholere. Kandi omwa buthubaha bakakolha omwa mibere muthina-muthina eyikahinduka. Nethu thwangana kolha thuthya omwa mubiiri wethu w’erithulira.​—w20.09, olhup. 5.

Ni nzira nga syahi esyo thwanga wathikiryamu abigha be Biblia eryongera olhwanzo olho bawithire Yehova?

Thwangana hira omwa bigha be Biblia mw’omuhwa w’erisoma e Biblia obuli kiro n’erighanirya okwa ebyo bakigha. Kandi thwangana bakangirirya erisaba.​—w20.11, olhup. 4.

Ni bahi abali omwa: ‘Abosi ababirimathikana na Kristo basyalhubukibwa omo ngebe’?​—1 Kor. 15:22.

Paulo mwathabugha athi obuli mundu akendi syalhubuka. Abya iniakahulha Abakristayo abahakabibwa, “ababya ibabirihighulhwa erimathikana na Kristo Yesu.” (1 Kor. 1:2; 15:18)​—w20.12, olhup. 5-6.

Abahakabibwa bakendi syakolhaki ‘okwa ndambi nguma ng’erikohya ly’eriso, omughulhu engubi y’enyuma-nyuma yasyabugha’?​—1 Kor. 15:51-53.

Bakendi syasangira na Kristo omw’ilisya abandu omwa mutso w’ekyuma. (Erib. 2:26, 27)​—w20.12, olhup. 12-13.