Eyihi. Ebya Dawudi ahandika aho byabya bitholere kandi ibihikire.

Thalengekania okwa ebyahandika omwa mulhondo oyo n’eyisosiregho: “Nasyakupipa n’omuthima waghe wosi, iwe Mukama Nyamuhanga waghe; nasyakangania obukulhu bwawu kera na kera.” “Nasyakupipa ebiro byosi kera na kera.”​—Esy. 86:12; 145:1, 2.

Dawudi akahandika ebi abya isyali manyisaya athi syendi syaholha. Abya inianasi ngoku Yehova mwabugha athi ekibi ky’abandu kyanga lhwiririremo olhuholho, kandi Dawudi mwaligha ngoku iyo ni mukolha-nabi. (Enz. 3:3, 17-19; Esy. 51:4, 5) Abya inianasi ngoku nibya n’abalhume abo Nyamuhanga abya alighire nga Abrahamu, Isaka, na Yakobo babiriholha. Kandi Dawudi abya inianasi ngoku nayu angaholire. (Esy. 37:25; 39:4) Aliwe ebinywe biwe ebiri omwa Esyonyimbo 145:2 mubyakangania eriyisunza n’erithwamu liwe ery’eripipa Nyamuhanga kera na kera, ni bugha ambu, omw’ibyaho lya Dawudi eryosi.​—2 Sam. 7:12.

Ebindi by’okwa ebya Dawudi ahandika byabya bihambire okwa by’alhabamo okwa buthuku obo, ngoku thwangana kilhangira omwa hinywe ehiri ahighulhu okwa sura eya Esyonyimbo 18, 51, na 52. Omwa Esyonyimbo 23, Dawudi mwakania oku Yehova ng’omulisya oyukaha obusondoli, oyukahumulikanaya, n’eritheya. Dawudi abya mulisya ng’oyo. Kandi mwanza erikolera Nyamuhanga ‘ebiro byosi by’engebe yiwe.’​—Esy. 23:6.

Kandi wibuke ngoku Yehova yuwasondolha Dawudi erihandika. Eby’ahandika mwabya n’amaminyereri awahambire okwa byangabere omwa buthuku bw’embere. Ng’eky’erileberyako, omwa Esyonyimbo 110, Dawudi mwakania okwa mughulhu Omukama wiwe ‘ang’ikere oko lhuhandi [lhwa Nyamuhanga] lhw’amali’ omwa lhubulha n’erihebwa obuthoki bunene. Erikolhaki? Erikinda esyonzighu sya Nyamuhanga ‘n’eritswera ebihanda’ okwa kihugho. Dawudi yuwabya thatha-kulhu wa Masiya oyuwanga thabere iniane elhubulha kandi oyuwangabere “muhereri kera na kera.” (Esy. 110:1-6) Yesu mwakangania ngoku obuminyereri obuli omwa Esyonyimbo 110 bwabya bumuhambireko kandi ngoku bwanga bererere omwa buthuku obukasa.​—Mt. 22:41-45.

Kwesi, Dawudi mwasondolhwa erihandika ebihambire okwa buthuku bwiwe n’obuthuku obukasa omughulhu angalhubukire kandi iniapipa Yehova kera na kera. Ekyo kikathuwathikaya erilhangira ngoku ebiri omwa Esyonyimbo 37:10, 11, 29 byangana yitheghereribwa ng’ebikakanaya okwa mibere eyabyaho omwa Israeli kera kuthya n’eyikendisyabya omwa kihugho kyosi obuthuku obukasa omughulhu Nyamuhanga akendi syaberererya emilhaghe yiwe.​—Lebaya enungu 8 omo mwatsi “Wukendi Syabya Naghe Omwa Paradiso” omo gazeti eno.

Neryo Esyonyimbo 145:2 n’eyindi milhondo eyisosiregho yikakanganaya ngoku Dawudi aby’anzire eriha Yehova y’olhukengerwa omwa Israeli erihika okw’iholha liwe. Kandi yikakanganaya ndeke-ndeke ebya Dawudi akendi syathoka erikolha obuthuku obukasa Yehova abimulhubukya.