1. Erighanirya okwa mulhaghe ogho Yehova abirithuha ow’engebe y’erikotha kikathuhambako kithi?

 YEHOVA akayilhagha athi abakamwowa bakendi syabana “engebe y’erikotha.” (Abar. 6:23) Thukabya thukaghanirya okwa bya Yehova anemuthuha, ahathe erithika-thika olhwanzo olho thumuwithire lhukayongera. Thakilengekaniako: Thatha wethu w’elhubulha athwanzire kutsibu indi akathuha ekihembo eki nuku thulekisyaghabulhwa okw’iyo.

2. Omulhaghe w’engebe y’erikotha akathuwathikaya athi?

² Omulhaghe wa Nyamuhanga ow’engebe y’erikotha akathuwathikaya eriyiyinirya ebitsibu ebyo thuwithe lino. Nibya n’omughulhu esyonzighu syethu syanga thuhayira sithi sikendi thw’itha, sithuli bikyako. Busana naki? Enzumwa nguma yiri yithi, thunasi ngoku thwamaholha ithune bathaleghulha oku Yehova, akendi syathulhubukya ithunawithe amaha w’erithendi syaholha kandi. (Yn. 5:28, 29; 1 Kor. 15:55-58; Ebr. 2:15) Busana naki thwangana kakasya ngoku kithokekene ithwe eribyaho kera na kera? Thalengekania okwa syonzumwa hino.

3. Busana naki ithwaligha ngoku Yehova awithe amaaka w’erisyaleka ithwabyaho kera na kera? (Esyonyimbo 102:12, 24, 27)

³ Thunasi ngoku Yehova awithe amaaka w’erisyaleka ithwabyaho kera na kera kundi ya Nzuko y’engebe kandi aliho kera na kera. (Esy. 36:9) Lhangira amasako make we Biblia awakakanganaya ngoku Yehova abiribya inianeho kandi kw’akendisyabya inianeho. Esyonyimbo 90:2 hakabugha hathi Yehova ni wa “kera na kera.” Esyonyimbo 102 hakabugha ikyan’ekyo. (Soma Esyonyimbo 102:12, 24, 27.) N’omuminyereri Habakuki abere akahandika oku Thatha wethu w’elhubulha mwabugha athi: ‘Iwe Yehova, Nyamuhanga waghe, Oyubuyirire waghe, siwuli w’erikotha kwehi? Siwendi syaholha.’​—Hab. 1:12.

4. Mbwino thunatholere erithika-thika kyamathukalira eriyitheghererya eky’eribugha indi Yehova abiribya inianeho? Soborera.

 ⁴ Kikanakukalira eriligha eky’eribugha indi Yehova abiribya inianeho “kera na kera”? (Isa. 40:28) Ekyo ni kya buli kiro. Elihu mwabugha oku Nyamuhanga athi: “Emighanzo y’emyaka yiwe sirisomboleka.” (Yobu 36:26) Aliwe erithabya isiwuli yitheghereraya ekindu sikirimanyisaya indi sikihikire. Ng’eky’erileberyako, kyangana thukalira eriyitheghererya ndeke ngoku ekyakakalha kikakolha, mbwino ekyo kikamanyisaya kithi ekyakakalha sikiriho? Eyihi n’ahake! Kuthya, ithwe ng’abandu kyangana thukalira eriyitheghererya ndeke eky’eribugha indi Yehova abiribya inianeho kandi akendisyabya inianeho. Aliwe ekyo sikirimanyisaya indi Nyamuhanga si wa kera na kera. Ebya thwanga yitheghererya kutse erithendi yitheghererya oku Muhangiki sibirileka akathendibya ekyo ali. (Abar. 11:33-36) Kandi abya inianeho ekyanya n’ebyosi ebirimo bithe byabyaho imwamune n’ebikaha ekyakakalha ng’eryuba. Thunasi ndeke ngoku Yehova “yuwahangika ekihugho omo maaka wiwe.” Kandi abya inianeho athali ‘asanza olhubulha.’ (Yer. 51:15; Emib. 17:24) Ni yindi nzumwa yahi eyanga leka ithwayikethera ngoku kithokekene ithwe eribyaho kera na kera?

5. Omulhume n’omukali ab’erimbere babya bawithe mahaki?

⁵ Yehova mwahangika ebindu ebikahumulha okwa kihugho isiby’eribyaho habw’obuthuku buuli, kwihaho abandu. Mwabaha amaha w’embaghane aw’erithendi holha. Aliwe, Yehova mwakunga Adamu athi: “Oko bighuma by’omuthi w’eriminya ekibuya n’ekibi, susyerya kubyo. Kusangwa oko kiro wasyalya kubyo wasyaholha kundu.” (Enz. 2:17) Adamu na Eva ku bowa Yehova, sibanga holire. Ni ky’amenge erighunzerera thuthi, endambi yanga hikire Yehova iniabalighira erirya oko “muthi w’engebe.” Eki kyanga manyisirye kithi amabakakasya ngoku banga ‘kothire,’ eribyaho kera na kera. b​—Enz. 3:22.

6-7. (a) Ni kindi kyahi ekikakanganaya ngoku abandu bahangikawa isi b’eriholha? (b) Ni byahi ebikakutsemesaya ebyo wanzire erisyakolha? (Lebaya ebisasani.)

⁶ Kikaswekaya eriminya ngoku abandi banya sayansi babiribana obwema obukakanganaya ngoku obwongo bwethu buwithe amaaka w’eribika emyatsi mingyi kwilhaba eyo thwanga minya omwa ngebe yethu yosi eya lino. Omwa 2010 egazeti eya Scientific American Mind muyabugha yithi obwongo bwethu buwithe  amaaka w’eribika emyatsi hakuhi eyingene n’evidiyo ey’esyosaha miliyoni isathu, kandi iwukendi syaghunza emyaka eyilhabire omu 300 iwunemulebyayo. Nibya kyanganabya indi obwongo bwethu bwangana bika emyatsi mingyi kwilhaba naho. Aliwe, kikakanganaya ngoku Yehova mwakolha obwongo bwethu eribya ibwangana bika emyatsi mingyi kwilhaba eyo thwanga minya omwa myaka 70 kutse 80.​—Esy. 90:10.

⁷ Kandi Yehova abere akathuhangika, mwathuhira mw’eriyisunza linene ery’eribyaho. E Biblia yikabugha okwa bandu yithi Nyamuhanga “abirihira erikotha omo mithima yabu.” (Omu. 3:11) Eyo ni nzumwa nguma eyikaleka ithwalhangira olhuholho ng’enzighu. (1 Kor. 15:26) Thwamathoha, thukanakwama kya yilekerania neryo ithwalinda olhuholho? Eyihi. Mughulhu mungyi, thukaghenda eyiri dokita kandi obundi ithwalya omubatsi erithambira obulhwere. Ekyo thukakikolha nuku sithuhole. Kandi oyo thwanzire amaholha, mbulha ni mulere kutse mukulhu, mbwino sithuli yowa nabi kutsibu kandi habw’omughulhu muuli? (Yn. 11:32, 33) Kwesi, Omuhangiki wethu w’olhwanzo syangathuhere eriyisunza n’amaaka w’eribyaho kw’abya isyawithire abandu b’ekighendererwa ky’eribya ibaneho. Aliwe hane esindi nzumwa esyanga leka ithwaligha ngoku thwanganabyaho kera na kera. Thulebaye ebighuma by’okwa bya Yehova akolha kera n’ebya munabwire ebikakanganaya ngoku syali athahindulha ekighendererwa kiwe ky’erimbere.

8. Bikahika okwa kighendererwa kya Yehova busana nethu, ni yikethera lyahi eryo thukabana omu Isaya 55:11?

⁸ Nomwakine indi Adamu na Eva mubahalya n’erilethera abaana babu b’olhuholho, Yehova  mwathahindulha amalengekania wiwe awahambire okwa kighendererwa kiwe. (Soma Isaya 55:11.) Abathaleghulha erisyabyaho kera na kera kikine kighendererwa kiwe. Thukaminya ekyo busana n’ebindu ebyo Yehova abiribugha n’erikolha nuku aberereraye ekighendererwa kiwe.

9. Nyamuhanga abirilhaghaki? (Danieli 12:2, 13)

⁹ Yehova abiriyilhagha athi akendi syalhubukya ababiriholha n’eribaha akaghisa k’eribyaho kera na kera. (Emib. 24:15; Tito 1:1, 2) Omuthaleghulha Yobu aby’ayikethere ngoku Yehova akakandira erilhubukya ababiriholha. (Yobu 14:14, 15) Omuminyereri Danieli abya inianasi ngoku abandu bawithe amaha w’erisyalhubukibwa n’eribana akaghisa k’eribyaho kera na kera. (Esy. 37:29; soma Danieli 12:2, 13.) Abayuda b’omwa biro bya Yesu nabu babya ibanasi ngoku Yehova angahere abaghombe biwe abathaleghulha “engebe y’erikotha.” (Lk. 10:25; 18:18) Yesu iniakabera erikania okwa mulhaghe oyu, kandi nayu iyuwene-wene Thatha wiwe mwamulhubukya.​—Mt. 19:29; 22:31, 32; Lk. 18:30; Yn. 11:25.

10. Erilhubukibwa eryabya kera likakanganayaki? (Lebaya ekisasani.)

¹⁰ Yehova yukaha engebe kandi awithe amaaka w’erilhubukya abandu. Mwaha omuminyereri Eliya y’amaaka w’erilhubukya mughalha w’omukwakali we Zarefati. (1 Bam. 17:21-23) Enyuma waho, omwa buwathikya bwa Nyamuhanga, omuminyereri Elisa, mwasubya mughalha w’omukali Omusunami. (2 Bam. 4:18-20, 34-37) Erilhubukibwa eryo n’erindi bikakanganaya ngoku Yehova awithe amaaka w’erilhubukya abandu. Iniane okwa kihugho, Yesu mwakangania ngoku Thatha wiwe abirimuha amaaka ayo. (Yn. 11:23-25, 43, 44) Lino Yesu ane elhubulha kandi abirihebwa “ehamuli yosi . . . omo lhubulha n’omo kihugho.” Busana n’ekyo, awithe ehamuli y’eriberererya omulhaghe owakabugha athi “abosi abali omo masinda” basyalhubukibwa oko ngebe n’eribya n’amaha w’eribyaho kera na kera.​—Mt. 28:18; Yn. 5:25-29.

11. Endongolya yikaleka yithi ikyathokekana ithwe eribana engebe y’erikotha?

¹¹ Ni kyahi ekyaleka Yehova inialighira Mughalha wiwe mwanzwa eriholha olhuholho olhukanubaya? Yesu mwakangania ekyaleka omw’ibugha athi: “Nyamuhanga mwanza ekihugho ky’athya, kyaleka iniaha Mughalha wiwe, Ekyusa kiwe, neryo oyukamw’ikiriraya siahere, nikwa abye n’engebe y’erikotha.” (Yn. 3:16) Omw’ihayo Mughalha wiwe ng’endongolya erikuningira ebibi byethu, Nyamuhanga akaleka ikyathokekana ithwe eribana engebe y’erikotha. (Mt. 20:28) Omukwenda Paulo mwasoborera ekitsweka kikulhu eki ky’okwa kighendererwa kya Nyamuhanga akahandika athi: “Kusangwa ngoku olhuholho lhwahika busana n’omundu mughuma, lithya erilhubuka oko baholi mulyahika busana n’omundu mughuma. Kandi ngoku abandu bosi ba Adamu bakaholha, lithya abosi ababirimathikana na Kristo basyalhubukibwa omo ngebe.”​—1 Kor. 15:21, 22.

12. Yehova akendi syaberererya athi ekighendererwa kiwe?

¹² Yesu mwakangirirya abigha biwe athi basabe bathi Obwami bwa Nyamuhanga bwase kandi bathi erisonda liwe likoleke oko kihugho. (Mt. 6:9, 10) Ekitsweka ky’okwa kighendererwa kya Nyamuhanga kiri kithi abandu babye okwa kihugho kera na kera. Eriberererya ekyo, Yehova abirisombolha Mughalha wiwe ng’Omwami w’Obwami bw’Ekimasiya. Nyamuhanga abiribya inianemuhindania abandu 144,000 erilhua okwa kihugho erisyakolha haghuma na Yesu eriberererya erisonda lya Nyamuhanga.​—Erib. 5:9, 10.

13. Yehova anemukolhaki lino, kandi nawu wukahambawako wuthi?

 ¹³ Lino Yehova anemuhindania “endeko nene” y’abandu n’eribathendeka erisyabya ahisi sy’Obwami bwiwe. (Erib. 7:9, 10; Yak. 2:8) Nomwakine indi munabwire bali omwa kihugho ekighabene busana n’eriponangana n’amalhwa, abali omwa gurupu eyo bakalengaho eriyilhusya mw’eriponangana ery’emiringo yosi. Bali ng’ababirihesa emiyali yabu mw’esisuka. (Mika 4:3) Omwakanya k’erisangira omwa syonyuhi esikaleka abandu bangyi ibaholha, bakawathikaya abandu eribana “engebe eyiri ngebe kundu” omw’ibakangirirya oku Nyamuhanga w’okwenene n’ebighendererwa biwe. (1 Tim. 6:19) Abahughu babu bangana bahakanisya kutse ikyangana balethera ebitsibu omwa by’emingirirye busana n’erisighika Obwami bwa Nyamuhanga, aliwe Yehova akalhangira athi bakabana ebyo bakayithagha. (Mt. 6:25, 30-33; Lk. 18:29, 30) Ebyo bikathukakasaya ngoku Obwami bwa Nyamuhanga buneho kandi bukendi lholha embere eriberererya ekighendererwa kya Yehova.

14-15. Omulhaghe wa Yehova ow’erighunziraho ighuma olhuholho akendi syaberereribwa athi?

¹⁴ Lino Yesu ni Mwami w’Obwami bwa Nyamuhanga elhubulha kandi akendi berererya emilhaghe ya Yehova. (2 Kor. 1:20) Eritsuka 1914, Yesu abiribya inianemukinda esyonzighu  siwe. (Esy. 110:1, 2) Iyo n’abakendi syathabalha nabu bakisiya ibakindir’ighuma n’erithoghothya ababi.​—Erib. 6:2.

¹⁵ Omw’Ithabalha lya Yesu ery’Emyaka Rukumi, abaholi bakendi syalhubukibwa neryo abandu abowa ibayirwa mw’abahikene. Enyuma w’erilengesibwa ly’erighunzerera, abo Yehova akendi syathwamu athi babathunganene ‘basyikalha omwa kihugho mwa buholho, n’erisighalyakyo kera na kera.’ (Esy. 37:10, 11, 29) Eky’obutseme, ‘olhuholho, enzighu y’enyuma-nyuma, yikendisyahwerekereribwa.’​—1 Kor. 15:26.

16. Ni kyahi ekitholere eribya kilhubirirwa kyethu kikulhu ky’erikolera Yehova?

¹⁶ Ngoku thwamabirilhangira, amaha wethu w’eribyaho kera na kera aseghemere ndeke okwa Kinywe kya Nyamuhanga. Amaha ayo angana thuwathikya erisighalha bathaleghulha omwa biro by’enyuma-nyuma ebikalire bino. Aliwe sithutholere eritsemesya Yehova ahabw’erithanza eribyaho lisa. Enzumwa ngulhu eyikaleka ithwasighalha bathaleghulha oku Yehova na Yesu yiri yithi thubanzire kutsibu. (2 Kor. 5:14, 15) Olhwanzo olho lhukathuhira mw’omuhwa w’eribagherererya n’eribwira abandi okwa maha agho thuwithe. (Abar. 10:13-15) Thukabya thuk’igha eribya abakatsomana abandi kandi benge, thukabya abandu abo Yehova anzire ibabya banywani biwe kera na kera.​—Ebr. 13:16.

17. Obuli mughuma w’okw’ithwe awithe lhukwamirwaki? (Matayo 7:13, 14)

¹⁷ Thunemwendi syabya okw’abo abakendi syabana engebe y’erikotha? Yehova abirikyungulha olhukyo nuku ekyo kithokekane. Lino kiri okw’ithwe erisighalha omwa nzira eyikakolhaya okwa ngebe. (Soma Matayo 7:13, 14.) Engebe yikendisyabya yithi thukabyaho kera na kera? Thukendi syasubirya ekibulyo ekyo omo mwatsi owakakwamako.