1. “Obuholho bwa Nyamuhanga” niki, kandi thwanga ghasirwa thuthi omw’ibya nabo? (Abanya Filipi 4:6, 7)

 HANE omulingo w’obuholho obwa ekihugho kino kithasi. ‘Bw’obuholho bwa Nyamuhanga,’ erithekana erikasa busana n’eribya n’obunywani bw’obughuli na Thatha wethu w’elhubulha. Omughulhu thuwithe obuholho bwa Nyamuhanga, thukayowa ithuli omwa butheya. (Soma Abanya Filipi 4:6, 7.) Thukatsema thukanywana abandi abamwanzire. Kandi thukatsemera eribya banywani ba “Nyamuhanga oyukaha obuholho.” (1 Tes. 5:23) Thukabya thukaminya Thatha wethu w’elhubulha, erimuyikethera, n’erimwowa, obuholho bwiwe bukathekanaya emithima yethu eyikabyamo erihangya-hangaya thukayisanga omwa mibere eyikalire.

2. Busana naki ithwayikethera ngoku kithokekene eribana obuholho bwa Nyamuhanga?

² Mbwino kwenene kinathokekene eribana obuholho bwa Nyamuhanga thukabana ebitsibu, ng’eributhuka ly’obulhwere, ekitsinduli, akatabanguko, kutse eriendereribwa? Ekyosi-kyosi okw’ebi kyangana thw’itha obuba. Nomwabine, Yesu mwahabulha bigha biwe athi: “Simuhanga-hangaye emithima yenyu, kandi simubahe.” (Yn. 14:27) Eky’obutseme, balikyethu babirighendera okw’ihabulha lya Yesu eryo. Busana n’obuwathikya bwa Yehova, babirithoka eribana obuholho hakabya ebitsibu ebikalire.

3. Endwalha kutse ekihunzo byanga thabulha bithi obuholho bwethu?

³ Endwalha kutse ekihunzo kyangana hindulha hakuhi engebe yethu yosi. Thalengekania ngoku ekorona (COVID-19) yahamba okwa bangyi. Erisekulya lighuma likakanganaya ngoku okwa bandu abo basekulhayako, abalhabire okwa mbindi yabo ibakakuba  othulho omwa buthuku bw’ekihunzo ekyo. Ekihunzo mukyaleka ihongera eribya amaghaniryo, eribbunika muthima, erikolesya nabi obwabu n’ebibatsi ebikathamiraya, amalhwa omwa maka, n’abandi erianza eriyitha. Eyawuli yamabuthuka obulhwere, wanga kakirya wuthi amaghaniryo wawu kandi iwatsemera obuholho bwa Nyamuhanga?

4. Busana naki eriminya obuminyereri bwa Yesu obuhambire okwa biro by’enyuma-nyuma kikathulethera obuholho?

⁴ Yesu mwalhaghulha athi omwa biro by’enyuma-nyuma hakendisyabya esyondwalha, amalhwere “ehosi.” (Lk. 21:11) Eriminya ekyo kikathulethera kithi obuholho? Sithulisweka hakabuthuka amalhwere. Thukaminya ngoku emyatsi yikaghenda yikakwamangana ngoku Yesu anabugha. Kwesi thuwithe enzumwa mbuya ey’erighendera okw’ihabulha eryo Yesu aha abali omwa mughulhu w’enduli: “Mulebaye, simubahe.”​—Mt. 24:6.

5. (a) Ngoku kiri omwa Abanya Filipi 4:8, 9, thutholere ithwasabaki hakabuthuka obulhwere? (b) Mwali wethu mughuma mwaghasirwa athi omw’ihulikirira e Biblia eyirikodingire, kandi eky’erileberyako kiwe kyanga kuwathikya kithi?

⁵ Obulhwere eributhuka kyangana leka abandu ibayibulha n’erikwa obuba. Ekyo mukyabya oku mwali wethu Desi. b Mulere wa thatha wiwe, mughalha wa thatha wiwe omukulhu, na dokita wiwe abosi babere babiriholha busana n’ekorona, mwakwa obuba athi nayu anganahambwa kandi iniabusighalirya mama wiwe oyukulire omo myaka. Kandi ekihunzo mukyaleka iniayowa ng’akendi herya omubiiri wiwe, neryo mwabulha ng’iniakendibya akabana athi esy’ebyalya n’ah’erikalha. Erihangya-hangya eri mulyabya linene kandi kyamaleka iniabya akakuba othulho. Aliwe endambi muyahika Desi amathasya bana obuholho. Athi? Kutsibu-tsibu mwasaba Yehova athi amuwathikaye athekane n’eribya n’amalengekania awatholere. (Soma Abanya Filipi 4:8, 9.) Iniakahulikirira Yehova “akakania” nayu omw’ihulikirira e Biblia eyirikodingire. Akabugha athi, “Emirenge eyihehere ey’abasomi iyikaleka ingathekana kandi iyikanyibukaya olhukogho lhwa Yehova.”​—Esy. 94:19.

6. Eriyeghesya n’emihindano y’ekithunga bikendi kuwathikya bithi?

⁶ Ahathe erithika-thika eributhuka ly’obulhwere lyangana tabura ebighuma by’okwa ndegheka yawu, aliwe isiwalighira ekyo kik’ingirira eriyeghesya lyawu n’erihindana. Ebyalholirweko ebiri omwa bitabu byethu n’omwa syovidiyo bikendi kw’ibukya ngoku balikyethu banemusighalha bathaleghulha nomubanawithe ebitsibu ng’ebyawu. (1 Pet. 5:9) Emihindano yikendi kuwathikya eryusulya omwa bulengekania bwawu mw’amalengekania awatholere awaseghemere okwa Masako. Kandi yikendi kuha  ehighisa hy’erihimbiramu abandi n’eriyihimba. (Abar. 1:11, 12) Wukendibya wukalengekania okwa mibere Yehova awathikirayamu abaramya biwe omughulhu babya balhwere, babya bakwire obuba, kutse ibali ibobene, erikirirya lyawu likendi ghuma kandi wukendi ligha ngoku nawu akendi kuwathikya.

7. N’isomo lyahi eryo thwang’ighira oku mukwenda Yoane?

⁷ Lengaho erikanirania n’abalikyenyu. Eributhuka ly’obulhwere lyanganaleka nibya ithwabya isithwanga thasyabanangana n’abaramya balikyethu. Okwa buthuku ng’obo, wanganabya n’eriyowa eriri ng’eryo mukwenda Yoane. Aby’anzire erilholha oku munywani wiwe Gayo busu okwa busu. (3 Yn. 13, 14) Nomwabine, Yoane mwaminya ngoku hakendi lhaba buthuku isyali lholha oku Gayo. Neryo Yoane mwakolha ekyo angathoka; mwahandikira Gayo y’ebaruha. Kyamabya isikyanga thokekana mughulhu wosi iwe eribungira balikyethu, lengaho eribahikako erilhabira okwa simu, okwa nganirania y’evidiyo kutse erihandika emeseji. Wamabya iwunemukanirania n’abalikyenyu, iwukendi yowa isiwuli iwuwene kandi iwuli buholho. Kaniranaya n’abasyakulhu kutsibu-tsibu wamayowa iwabirihangya-hangya, kandi ligha erihumulikania lyabu ery’olhwanzo.​—Isa. 32:1, 2.

8. Ekitsinduli kyanga thabulha kithi obuholho bwawu?

⁸ Wamabya iwanahambirweko busana n’eribogha ly’amaghetse, omusiki, kutse omuliro, wangabya imuwaghunza omughulhu muuli iwunemuhangya-hangya kutsibu enyuma w’ekitsibu ekyo. Wamabya imuwaholerwa kutse ebindu byawu eritsandalikana, wangabya imuwabya omwa bulighe, erihwa amaha, kutse nibya erihithana. Eki sikirimanyisaya kithi wanzire ebindu bya kutsibu kutse siwuwithe erikirirya. Muwalhaba omwa kitsibu ekikalire, kandi abandi ibangana lengekania bathi wukendi kolha ekithatholere. (Yobu 1:11) Aliwe nomwawune omwa mibere eyikalire, wangana bana obuholho. Wuthi?

9. Yesu mwathuthegheka athi busana n’ebitsibu ebikalha-kalire?

⁹ Wibuke ebya Yesu alhaghulha. Mbaghane n’abandi omwa kihugho abakalengekanaya bathi sihali ekiro ekitsinduli kikendi syabahambako, ithwe thunasi ngoku ebindu ebikalire bikendi yongera, kandi ebighuma by’okw’ibyo byangana thuhambako. Yesu mwabwira abigha biwe athi “emisiki minene-minene” n’ebindi bitsinduli byangabere enduli yithe yasa. (Lk. 21:11) Kandi mwalhaghulha athi ‘ebibi bikendi syakanya,’ ekindu ekinemulhangirika omwa bubi, amalhwa, n’eby’obuthabanguli. (Mt. 24:12) Yesu mwathabugha athi abakasighanaya Yehova basa babanga hikwako ebitsinduli ebi. Erithwalira haghuma, ebitsinduli binemuhamba nabi okwa bangyi b’okwa baghombe ba Yehova abathaleghulha. (Isa. 57:1; 2 Kor. 11:25) Yehova syanga thutheya okwa byosi ebi omwa nzira y’ekithiko-thiko, aliwe akendi thuha ekyosi-kyosi ekya thukayithagha erisighalha ithunathekene kandi ithune buholho.

10. Busana naki eriyitheghekera ebitsinduli lino n’ikangania erikirirya? (Emisyo 22:3)

¹⁰ Ithukendi sighalha ithunathekene hakabya ekitsinduli thwamabya ithwabirisangwa thwathegheka ebya thwanga kolha. Aliwe mbwino eriyithegheka kikakanganaya kithi sithuwithe erikirirya omu Yehova? Eyihi n’ahake. Omo kwenene, eriyitheghekera ekitsinduli ni kangania ku thuwithe erikirirya omwa maaka wiwe aw’erithutsomana. Kithi? Ekinywe kya Nyamuhanga kikathubwira kithi ithwayitheghekera ebitsinduli ebyangabya. (Soma Emisyo 22:3.) Kandi erilhabira omo myatsi y’omwa syogazeti, emihindano, n’ebirango ebikasira okwa buthuku, ekithunga kya Nyamuhanga kikabera  erithuhira mw’omuhwa w’eriyitheghekera ekitsinduli. c Mbwino thunayikethere Yehova? Kyamabya ikwakiri kithya, ithukendi kwama erihabulha eryo lino​—ekitsinduli kithe kyabya.

11. Eky’erileberyako kya Margaret kyamakweghesyaki?

¹¹ Thalengekania okwa kyalholirweko kya mwali wethu Margaret. Mwabwirwa indi ahume obulhambu bwabu bukabuthukamo omuliro. Kundi abandu bangyi mubathibithira mukono mughuma, enzira muyusulhamo esyomatoka neryo hamabya isihakiri ah’erilhaba. Ekyanya mukyusulhamo omukyi, na Margaret mwakwama kyabya aho omwa matoka yiwe habw’akathambi. Aliwe mwalhama kundi abya inianayitheghekire. Omwa kakapa kiwe mwabya imune emapu eyanga muwathikya eriminya eyindi nzira ey’erilhabamo. Nibya mwanasangwa alhaba omwa nzira eyo nuku kyasyamw’olhobera erilhaba muyo hakabya ekitsinduli. Hakiri akayithegheka, Margaret mwalhama okwa muliro.

12. Busana naki ithwaghendera okwa busondoli bw’erithutheya?

¹² Erithutheya n’erilhangira bathi hakabya ihane obuyithondeke, ab’obuthoki bangana thubwira bathi thughondere ekafiyu, thuhume, kutse erikwama ebindi biika ebitholere. Abandi sibalyanguhirawa erighendera okwa busondoli kundi sibanzire erisighania ebindu byabu. Abakristayo ibo bakakolha kyahi? E Biblia yikathubwira yithi: “Mwowe abathabali ba muna-kihugho busana n’Omukama, kutse ni mwami oyuwithe ehamuli yosi, kutse abathabali bakulhu biwe abakathumawa.” (1 Pet. 2:13, 14) Kandi ekithunga kya Nyamuhanga kikathuha obusondoli erithutheya. Thukabya ithunemw’ibukibwa eriha abasyakulhu b’esyongangirira syethu nuku basyathubana hakabya ekitsinduli. Wunewakolha ekyo? Kandi thwangana hebwa obusondoli indi thulek’ilhua eka, thuhume, n’eribana obuwathikya kutse nga thwanga wathikya thuthi abandi kandi mughulhu wahi. Thwamalemwa erighondera obusondoli, ithwangana hira engebe yethu n’ey’abasyakulhu y’omwa kabi. Wibuke abalhume abathaleghulha aba bakathutheghaya. (Ebr. 13:17) Margaret akabugha athi, “Ngaligha ndeke-ndeke ngoku erighendera okwa busondoli bw’abasyakulhu n’obw’ekithunga mukyalhamya engebe yaghe.”

13. Ni kyahi ekyabiriwathikya Abakristayo bangyi ababirihumibwa eribya ibanatsemire kandi ibane buholho?

¹³ Balikyethu bangyi ababirihuma busana n’ekitsinduli kutse olhuhi kutse akatabanguko  babirikolha ngoku bangathoka erighenda-ghendania n’emibere emihyaka n’erilhuaho ibasangira omwa mibiiri y’ekiteokrasi. Ng’Abakristayo abakera abapanzikana bak’endereribwa, bakalholha embere ‘erithulha engulhu yuwene.’ (Emib. 8:4) Erithulira likabawathikaya erihwerya amalengekania w’oko Bwami omwakanya k’emibere eyikalire eya balimu. Busana n’ekyo, bakasighalha ibanatsemire kandi ibane buholho.

14. Eriendereribwa lyanga thabulha lithi obuholho bwethu?

¹⁴ Eriendereribwa lyangana thughunzako ebindu bingyi ebikabera erithulethera obuholho. Thukatsema n’eriyowa buholho thukahindana haghuma omwa bwiranda, thukathulira ahathe eribisirira, n’erikolha emibiiri yethu ya buli kiro ahathe erisagha erihambwa. Thwamalhusibwako obwiranda obo, ithwangana hangya-hangya, eribulha nga ni kyahi ekikendi thasyakwamako. Eriyowa eri ni rya buli kiro. Nomwabine, thutholere ithwayitheya. Yesu mwakangania ngoku eriendererya lyangalekire abandi bigha biwe ibathwikalha. (Yn. 16:1, 2) Neryo thwanga sighalha thuthi ithune n’obuholho bwethu thuk’endereribwa?

15. Busana naki sithutholere thukasagha eriendereribwa? (Yoane 15:20; 16:33)

¹⁵ Ekinywe kya Nyamuhanga kikathubwira kithi: ‘Abosi abanzire erikwama engebe y’erikenga Nyamuhanga n’erimathikana na Kristo Yesu, basyendereribwa.’ (2 Tim. 3:12) Mughalha wethu oyukahulhawamo Andrei mukyamukalira eriligha ekyo enyuma w’omubiiri wethu er’imanibwa omwa kihugho kyabu. Mwabugha athi: ‘Eno yiri Abema banene. Ab’obuthoki bangathoka bathi erithuhamba ithwe bosi?’ Aliwe omwakanya k’amalengekania ayo erilethera Andrei y’obuholho, mwaleka iniabera erihangya-hangya. Abandi balikyethu mubasigha emyatsi y’omwa byalha bya Yehova, kandi isibali lengekanaya bathi sibanga hambwa. Mubaligha ngoku bangana hambwa, aliwe mubathahangya-hangya kutsibu nga Andrei. Neryo mwathwamu erithunga amalengekania awali nga wabu, amayikethera Nyamuhanga. Buthuku buke-buke mwayowa buholho, kandi lino atsemire nomuhane ebitsibu. Ekiri ng’ekyo kyangana thubyako. Nomwakine indi Yesu mwathubwira athi ithwabya ithunasi ku thukendi endereribwa, aliwe kandi mwathukakasya  athi thwangana sighalha bathaleghulha.​—Soma Yoane 15:20; 16:33.

16. Ni busondoli bwahi obwa thutholere ithwaghenderako thuk’endereribwa?

¹⁶ Omubiiri wethu am’imanibwa kutse erihirwako olhukako lhunene, ithwangana bana obusondoli erilhua okwa kyaghanda ky’omuthahulha n’okwa basyakulhu. Baliho erithutheya, erilhangira bathi thukabya ithunemubana ebyalya by’obunyakirimu, n’erilholha embere erithulira ngoku thwanga thoka. Lengaho erighendera okwa busondoli obwa wukahebawa, nibya nomuwangabya isiwathayitheghererya ndeke ekyamaleka ibwahebwa. (Yak. 3:17) Emyatsi eyihambire oku balikyethu kutse okwa mibiiri yethu y’ekithunga isiwabisulirayo abathatholere eriowayo.​—Omu. 3:7.

17. Ng’abakwenda b’omwa kighana ky’erimbere, thwabirithwamu erikolhaki?

¹⁷ Enguma y’okwa syonzumwa ngulhu esikaleka Sitani inialhwa n’abandu ba Nyamuhanga yiri yithi ‘bakakwama erithulhagho lya Yesu.’ (Erib. 12:17) Sitani n’ekihugho kiwe isibyakuthinga. Nomuhane erihakanisibwa, erithulira n’erikangirirya bikathulethera etseme n’obuholho. Omwa kighana ky’erimbere omughulhu ab’obuthoki Abayuda balhaghira bathi abakwenda baleke erithulira, abalhume abathaleghulha abo mubathwamu eriowa Nyamuhanga. Mubalholha embere erithulira kandi omubiiri oyo mwabalethera etseme. (Emib. 5:27-29, 41, 42) Ni kwenene, omubiiri wethu amahirwa kw’olhukako, thutholere ithwakolesya amenge thukathulira. (Mt. 10:16) Aliwe thwamakolha ngoku thwanga thoka, ithukendi bana obuholho obukasa busana n’eritsemesya Yehova n’erisangira omo mwatsi owakalhamaya esyongebe.

18. Nindi oyuwanga thuha obuholho bw’okwenene?

¹⁸ Thusike ngoku nibya n’omwa buthuku obukalire, thwangana bana obuholho. Okwa buthuku ng’obo, thutholere ithw’ibuka ngoku obuholho obwa thukayithagha bw’obuholho bwa Nyamuhanga, ni bugha ambu, obuholho obo Yehova musa akaha. Thumuyikethere hakabuthuka obulhwere, ekitsinduli, kutse eriendereribwa. Thumakirire ekithunga kiwe. Thuhire ameso w’okwa buthuku bubuyanga obwa thulindirire. Thukendibya thukakolha ekyo, ‘Nyamuhanga omwinye obuholho asyabya nethu.’ (Fil. 4:9) Omo mwatsi owakakwamako, thukendi syalebya nga thwanga wathikya thuthi Abakristayo balikyethu abakabana ebitsibu eribya ibane n’obuholho bwa Nyamuhanga.