Wunewasoma ndeke esyogazeti sy’Akaleberyo esy’omwaka ono? Thalebyanu nga wangana subirya okwa bibulyo bino:

Thwanga ghasirwa thuthi thwamahiraho obuthuku bw’erikania na Yehova, erimuhulikirira, n’erimulengekaniako?

Ithukendi thoka erithwamu ndeke, eribya bakangirirya babuya, erikirirya lyethu iryongera erighuma, n’olhwanzo olhwa thuwithire Yehova ilhwongera.​—w22.01, olhup. 30-31.

Thwanga ghasirwa thuthi thwam’igha eriyikethera Yehova n’abo abirisombolha erithusondolha?

Buno bw’obuthuku bw’erigha eriyikethera emibere Nyamuhanga akakoleramo emyatsi omw’ithendi thika-thikira obusondoli n’erithwamu ly’abasyakulhu. Obulighe bunene bukendi syabya bukahika, kikendi syathwolhobera erighendera okwa busondoli obwa thukendi syahebwa nomubwangabya nga si bwa buli kiro kutse nga bukalire erighenderwako.​—w22.02, olhup. 4-6.

Ni nzumwa yahi eyabya omwa bya omumalaika abwira Zekaria ebihambire okwa “lhulengo omo byalha bya Zerubabeli,” omuthabali? (Zek. 4:8-10)

Esyonzoli esi musyakakasya abandu ba Nyamuhanga ngoku ehekalu eyabya yikahimbwa eya abandi balhangira nga siyuwene ndeke yanga hwere kandi iyaberererya ekya Nyamuhanga anzire.​—w22.03, olhup. 16-17.

Thwangabya thuthi ky’erileberyako ekyuwene omwa mibughire? (1 Tim. 4:12)

Thukakanaya omwa bwolho n’omw’isikya omw’ithulira, eriimba n’omuthima wosi, erisubirya mughulhu wosi okwa mihindano, kandi thukabugha okwenene n’erikania omwa nzira eyikahimba abandi, eriyihighulha okwa bitsumi.​—w22.04, olhup. 6-9.

Busana naki ebiminyikalho ebiri okwa syonyama ini (amami) esikanibweko omu Danieli sura 7 biri okwa nyama nguma ngoku kiri omwa Eribisulirwa 13:1, 2?

Enyama eyiri omwa Eribisulirwa 13 siyir’imanira egavumente nguma, nge Roma. Aliwe, yik’imanira amathabali wosi w’ekipolitiki awabirithabalha abandu.​—w22.05, olhup. 9.

Enzira ngulhu eyathwanga kanganiryamu ku thuyikethere obulingirirania bwa Nyamuhanga y’eyahi?

Omundu amathutsuma, erithuhithania, kutse erithusoberya, sithuli bika ekinigha, thukasigha emyatsi omwa byalha bya Yehova. Akendi syaghunzaho ebitsibu byosi ebikasa busana n’ekibi.​—w22.06, olhup. 10-11.

Mughalha wethu oyukaha omusabe okwa muhindano atholere iniabya inian’ibukireki?

Omusabe syatholere erikolesibwa ng’enzira y’erihabulha ekithunga kutse erilhabya ebirango. Sikiriyithaghisaya erikolesya ‘ebinywe bingyi,’ kutsibu-tsibu emihindano yikatsuka. (Mt. 6:7)​—w22.07, olhup. 24-25.

Ni mwa nziraki “abakolha ebibi” bakendi ‘syalhubuka oko lhubanza lhw’eritswerwa’? (Yn. 5:29)

Sibendi syatswerwa indi baliko olhubanza, erikwamana n’ebya bakolha kera. Bakendi syalebibwa ndeke erikwamana n’emibere ey’abakendi syakangania babilhubuka.​—w22.09, olhup. 18.

Ni mwatsi wahi owakasisimulha ogho J. F. Rutherford aha okwa lhuhindano lhw’Okwomwenda 1922?

Okwa lhuhindano olhwabya Cedar Point, Ohio, U.S.A., mwaranga athi: “Omwami anemuthabalha! Muli bathumwa biwe. Busana n’ekyo, muthulhughanaye, muthulhughanaye, muthulhughanaye, Omwami n’Obwami bwiwe!”​—w22.10, olhup. 3-5.

Isaya sura 30 hakakanganaya bindu byahi bisathu ebya Nyamuhanga akathuwathikirayamu eriyiyinia?

Esura eno yikakanganaya ngoku (1) akendi hulikirira ndeke n’erisubirya emisabe yethu, (2) akendi thuha obusondoli, na (3) erithuha emighisa lino n’omwa buthuku obukasa.​—w22.11, olhup. 9.

Busana naki ithwaghunzerera thuthi ebinywe ebiri omwa Esyonyimbo 37:10, 11, 29 mubyabererera kera kandi bikendi bererera obuthuku obukasa?

Ebinywe bya Dawudi bikasoborera ndeke emibere eyuwene eyabya omwa Israeli, ng’omw’ithabalha lya Solomona. Yesu mwakania oko paradiso eyikasa kandi mwasuba omwa mulhondo 11. (Mt. 5:5, NWT; Lk. 23:43)​—w22.12, olhup. 8-10, 14.